“Ihs Me Uhdahn Ladu Lelepek Oh Loalokongo?”
“Ihs me uhdahn ladu lelepek oh loalokongo me eh soumas kasapwiladahngehr pohn eh papah teikan?”—MAD. 24:45, NW
1, 2. Koasoandi dahieu me Sises ketin doadoahngki rahnwet, oh dahme kahrehda e kesempwal kitail en pohnese koasoandi wet?
“RIEI ko, I sohte kak wadekedi pak depe kumwail kihda iren onop kan me audaudki ire me I keieu anahne ni ahnsou me konehng.” Ih duwen sister men kasalehda eh kalahngan nan nah kisinlikou me e kadaralahng riatail ko me doadoahk nan atail poasen kaun en Sounkadehdehn Siohwa kan. Ke kak wehwehki eh pepehm? Pali moron en kitail kak wehwehki. Ia duwe, met kapwuriamwei ong kitail? Soh.
2 Padahk kan me kin kohda ni ahnsou me konehng kin kadehdehda me Sises, Tapwin mwomwohdiso kin ketin kolokol sapwellime inou me e pahn ketin kamwenge kitail. Ihs me e kin ketin doadoahngki pwehn wia met? Ni ahnsou me e ketikihda kilelepen ahnsou me e pahn ketier, Sises mahsanih me e pahn ketin doadoahngki “ladu lelepek oh loalokongo” pwehn kihong sapwellime papah teikan “kanarail mwenge ahnsou me konehng.” * (Wadek Madiu 24:45-47, NW.) * Ladu lelepeko iei koasoandi me Sises ketin doadoahngki pwehn ketin kamwenge sapwellime tohnpadahk kan ni ahnsoun imwin rahn akan. Eri e inenen kesempwal kitail en pohnese ihs ladu lelepeko. Atail pwoson oh nanpwungmwahu rehn Koht kin pidada ladu lelepeko.—Mad. 4:4; Sohn 17:3.
3. Dahme neitail pwuhk kan kin koasoia duwen karasaras en ladu lelepeko?
3 Eri, ia duwen atail pahn wehwehki sapwellimen Sises karasaras duwen ladu lelepeko? Mahs, neitail pwuhk kan kin koasoia mepwukat: Ni Pendekos pahr 33, Sises ketin kasapwilada ladu lelepeko pohn sapwellime papah teikan. Laduwo kin weliwelian Kristian me keidi koaros nin sampah nin duwen pwihn ehu sangete ahnsowo. Papah teikan kin dokedoke emenemen irail kan me keidi. Nan pahr 1919, Sises ketin kasapwilada ladu lelepeko “pohn eh dipwisou kan koaros,” me iei soahng koaros nin sampah me pid Wehio. Ahpw, atail onopki ni keneinei oh doudouloale ni kapakap ire pwukat kasalehda me kitail anahne wehwehkihla mwahu sapwellimen Sises mahsen duwen ladu lelepek oh loalokong. (Lep. Pad. 4:18) Kitail pahn tehkpene karasaraso oh ia duwen eh pid kitail, sohte lipilipil ma kitail ahneki koapworopwor en kohla nanleng de mour nin sampah.
IAHD ME KARASARASO PWEIDA?
4-6. Dahme kahrehda kitail kak nda me sapwellimen Sises karasaras en ladu lelepeko tepida pweida mwurin pahr 1914?
4 Ire kan me pid karasaras en ladu lelepek oh loalokong kasalehda me e tepida pweida ni imwin rahn akan, a kaidehn ni Pendekos pahr 33. Kitail pahn kilang ia duwen iren Paipel ko ar kasalehiong kitail met.
5 Karasaras en ladu lelepeko iei kisehn sapwellimen Sises kokohp duwen “kilelepen [eh] pahn ketier oh kaimwiseklahn koasoandi en mehkan.” (Mad. 24:3, NW) Pali keieun kokohpo me kileldi nan Madiu 24:4-22, mie mwekid riau me pweida. Keieun eh pweida iei nan pahr kan sang pahr 33 lel pahr 70, oh keriaun eh pweida me laudsang me keieuo iei nan atail ahnsou. Ia duwe, met wehwehki me sapwellimen Sises mahsen duwen ladu lelepeko pahn pil pweida pak riau? Soh.
6 Tepida sang mahsen kan me kileldi nan Madiu 24:29, Sises kin keieu mahmahsanih duwen mwekid kan me pahn wiawi nan atail ahnsou. (Wadek Madiu 24:30, 42, 44.) Ni eh ketin mahsanih duwen dahme pahn wiawi ni kahn kamakam kowahlap, e mahsanih me aramas akan “pahn kilang duwen Nein-Aramas eh pahn ketiket kohdo pohn depwek en pahnlahng kan.” Mwuri, ni eh mahsanihong irail me momour ni imwin rahn akan ren mwasamwasahn, e mahsanih: “Kumwail sehse rahn me amwail Kaun-o pahn ketido,” oh “Nein-Aramas pahn ketido ni awa me kumwail pahn sasairki.” * Nan ire pwukat, ni eh ketin mahsanih duwen mwekid kan me pahn wiawi ni imwin rahn akan, Sises ketin wia karasaras en ladu lelepeko. Ihme kahrehda kitail kak nda me sapwellime mahsen duwen ladu lelepeko tepida pweida mwurin imwin rahn akan ar tepida nan pahr 1914. Met uhdahn wehwe mwahu. Dahme kahrehda?
7. Peidek kesempwal dahieu me pwarada ni ahnsoun rahk eh tepida, oh dahme kahrehda?
7 Nna medewehla mahs duwen peidek wet: “Ihs me uhdahn ladu lelepek oh loalokongo?” Ni mwehin tepin Kristian ko, sohte kahrepen ren idek peidek wet. Nin duwen atail sukuhlkier nan iren onop en mwoweo, wahnpoaron kan ar kak wiahda manaman oh pil kahrehda kisakis en manaman wet en kohwong meteikan kin kadehdehda me Koht kin ketin doadoahngki irail. (Wiewia 5:12) Eri, sohte emen anahne idek ihs me Krais ketin uhdahn kasapwilada en wia sounapwalih. Ahpw irairo weksang nan pahr 1914. Ahnsoun rahk tepida wiawi nan sounparo. Iei ahnsoun tepida katohre dihpw suwed ko sang tuhke mwahu ko. (Mad. 13:36-43) Ni ahnsoun rahk eh tepida, peidek kesempwal ehu pwarada: Pwehki mie Kristian tohto me dene irail iei sapwellimen Sises tohnpadahk mehlel kan, ia duwen atail kak ese ihs me tuhke mwahu ko, me iei Kristian keidi kan? Karasaras en ladu lelepeko kin kihda pasapeng. Sapwellimen Sises tohnpadahk kan me keidi iei me kin audaudki mwahu padahk mehlel me rasehng kisin tungoal kan.
IHS LADU LELEPEK OH LOALOKONGO?
8. Dahme kahrehda e konehng ladu lelepeko en wiawihkihda Kristian keidi kan?
8 Ladu lelepeko anahne wiawihkihda Kristian me keidi kan nin sampah. Irail pwukat kin adaneki “pwihn samworo en Nanmwarkio” oh kehkehlik kohwong irail ren ‘kalohkiseli wiewia kapwuriamwei kan en nin limen Koht, me ketin malipeiraildo sang nan rotorot ong nan sapwellime marain lingaling.’ (1 Pit. 2:9) Eri e konehng me towe kan en “pwihn samworo en Nanmwarkio” pahn kin iang padahkihong riarail Kristian kan padahk mehlel.—Mal. 2:7; Kaud. 12:17.
9. Kristian me keidi kan koaros iang ladu lelepeko? Menlau kawehwehda.
9 Ia duwe, koaros me keidi kan nin sampah iang ladu lelepeko? Soh. Ni mehlel, kaidehn keidi koaros pwukoahki kihda padahk mehlel me rasehng mwenge ong iengerail tohnkaudok kan sampah pwon. Nanpwungen tuhke mwahu kan iei brother keidi kan me kin wia sounsawas de elder kan nan arail mwomwohdiso. Re kin kalohk ihmw lel ihmw oh padahk nan arail mwomwohdiso, oh re kin ni loalopwoat utungada kaweid kan me kohsang atail poasen kaun en Sounkadehdehn Siohwa kan. Ahpw re sohte iang kihkihda padahk mehlel ong riatail Kristian kan sampah pwon. Pil nanpwungen me keidi kan, mie sister kan me sohte kin medewe me re pahn wia sounpadahk kei nan mwomwohdiso.—1 Kor. 11:3; 14:34
10. Ihs me ladu lelepek oh loalokong?
10 Eri, ihs me ladu lelepek oh loalokongo? Pwehn pahrekiong sapwellimen Sises koasoandi en ketin doadoahngki me malaulau pwehn kamwenge me tohto, laduwo kin wiawihkihda pwihn tikitik ehu en brother keidi kan me uhdahn pwukoahki kaunopada oh kihda padahk mehlel me rasehng mwenge erein Krais eh ketiketier. Erein imwin rahn akan, brother keidi pwukat me wia ladu lelepeko kin doadoahkpene ni poasen kaun en Sounkadehdehn Siohwa kan. Rahn pwukat, Pwihn me Kin Apwalih Mwomwohdiso en Sounkadehdehn Siohwa kan nan Sampah Pwon kin wia laduwo. Ahpw tehk me nan sapwellime karasaraso, Sises mahmahsanih duwen “ladu” men. Kahrehda, Pwihn me Kin Apwalih Mwomwohdiso nan Sampah Pwon kin ehupene wiahda pilipil kan nin duwen pwihn ehu.
IHS ME PAPAH TEIKAN?
11, 12. (a) Kasapwilda riau dah kan me ladu lelepek oh loalokong alehdi? (b) Iahd me Sises ketin kasapwilada ladu lelepeko pohn sapwellime papah teikan, oh ihs me e ketin pilada?
11 E pahn mwahu en tehk me nan sapwellimen Sises karasaraso, ladu lelepeko kesepwilda pak riau. Keieun eh kasapwilda iei eh kasapwilda pohn papah teikan. Keriauo, e kasapwilda pohn en soumaso eh dipwisou kan koaros. Pwehki karasaraso pweidahte ni imwin rahn akan, kesepwilda riau pwukat anahne wiawi mwurin Sises eh ketier nin duwen nanmwarki men nan pahr 1914.
12 Iahd me Sises ketin kasapwilada ladu lelepeko pohn sapwellime papah teikan? Pwehn sapengala peidek wet, kitail anahne pwurala ni pahr 1914, ni tepidahn ahnsoun rahk. Kitail onopkier me ni ahnsowo, pwihn tohto nda me dene irail Kristian kei. Eri mehnia pwihn me Sises pahn ketin pilada oh kasapwilada nin duwen ladu lelepeko? Peideko pasapengla mwurin Sises oh Semeo ara ketido oh dauwih tehnpas sarawio, de koasoandi en kaudok, me tepida sang pahr 1914 lel tepin pahr 1919. * (Mal. 3:1) Re uhdahn kupwurperenkihda pwihn tikitik ehu en Tohnsukuhl en Paipel loalopwoat kan me kasalehda me re uhdahn poakohng Siohwa oh sapwellime Mahsen. Ei mehlel me re anahne kamwakelda, ahpw ni aktikitik re mwekidki erein ahnsou tikitik en sosohng oh kamwakel me wiawihong irail. (Mal. 3:2-4) Irail Tohnsukuhl en Paipel lelepek pwukat iei Kristian mehlel kan me rasehng tuhke mwahu kan. Nan pahr 1919, ni ahnsou me irail pwurehng kehlailda, Sises ketin pilada brother keidi koahiek kan sang nanpwungarail pwehn wia ladu lelepek oh loalokong oh ketin kasapwilada irail pohn sapwellime papah teikan koaros.
13. Ihs me iang wia papah teikan, oh dahme kahrehda?
13 Eri, ihs irail kan me wia papah teikan? Irail pwukat iei irail me kin ale arail tungoal. Ni tepidahn imwin rahn akan, papah teikan koaros wia me keidi kei. Mwuhr, pokon kalaimwun en sihpw teikan iangala papah teikan. Ahnsou wet sihpw teikan me keieu tohto nan sapwellimen Sises “pwihn sihpw teieu” me e kin ketin kakaun. (Sohn 10:16) Pwihn riau pwukat koaros kin paiekihda padahk mehlel me rasehng mwenge me ladu lelepeko kin kihkihda. Ahpw ia duwen Pwihn me Kin Apwalih Mwomwohdiso nan Sampah Pwon me rahnwet wia ladu lelepek oh loalokong? Irail pwukat pil anahne ale soahng pwukat. Eri, re kin ni aktikitik pohnese me emenemen irail pil wia papah teikan duwehte sapwellimen Sises papah teikan me kin ideidawehn ih ni mehlel.
14. (a) Pwukoa dahieu me ladu lelepek alehdi, oh dahme met pidada? (b) Mehn kataman dahieu Sises ketikihong ladu lelepek oh loalokongo? (Menlau kilang koakon me oaralape “ A Ma Papah Suwed Men Ih . . . ”)
14 Sises ketikihong ladu lelepek oh loalokong pwukoa laud ehu. Nan Paipel, ladu likilik men, de “sounpapah,” kin apwalih soahng koaros me eh soumaso ahneki. (Luk 12:42, NW) Kahrehda ladu lelepek oh loalokongo kin pwukoahki apwalih soahng koaros nin sampah me Krais sapwellimaniki. Pwukoa wet iangahki arail apwalih kepwe oh mwohni, doadoahk en kalohk, prokram en mihting tohrohr kan, wiawihdahn sawasepen Paipel kan me kitail kin doadoahngki nan kalohk, nan pein atail onop oh mihting en mwomwohdiso. Sounpapah teikan koaros kin koapworopworki ale soahng koaros me pid padahk mehlel me laduwo kin kihkihda.
KASAPWILDA POHN EN SOUMASO EH DIPWISOU KOAROS—IAHD?
15, 16. Iahd me Sises ketin kasapwilada ladu lelepeko pohn sapwellime dipwisou kan koaros?
15 Iahd me Sises ketin wia keriaun kasapwiladahn laduwo pohn sapwellime “dipwisou kan koaros”? Sises mahsanih: “Meid pai ladu meno ma eh soumaso pahn pwarodo oh diar eh wiewia met! Mehlel I ndaiong kumwail, E pahn kasapwilada ih pohn eh dipwisou kan koaros.” (Mad. 24:46, 47, NW) Tehk me Sises ketin wia kasapwilda keriauo mwurin e ketido oh diarada me laduwo kin “wiewia met,” me iei, ni lelepek kihkihda padahk mehlel. Eri e pahn mie erein ahnsou ehu nanpwungen kasapwilda riau pwukat. Pwe kitail en wehwehki ia duwen oh iahd Sises ketin kasapwilada laduwo pohn sapwellime dipwisou kan koaros, kitail anahne ese soahng riau: iahd e ketido oh dahme sapwellime dipwisou kan kin pidada.
16 Iahd me Sises ketido? Pasapengo dierek nan iretikitik kan me mi mwowe oh mwuri nan irelaudohte. Tamataman me iretikitik kan mwowe me mahsanih duwen Sises eh “ketido,” mahsen wet kin dokedoke ahnsowo ni eh ketido pwehn ketin wia kadeik ni imwin koasoandi en mehkan. * (Mad. 24:30, 42, 44) Ihme kahrehda, sapwellimen Sises “pwarodo,” de “ketiket kohdo,” me kileldi nan karasaras en ladu lelepeko wiawi erein kahn kamakam kowahlap.
17. Dahme sapwellimen Sises dipwisou kan kin pidada?
17 Dahme “[sapwellimen Sises] dipwisou kan koaros” kin pidada? Sises sohte ketin doadoahngki lepin lokaiao “koaros” ongete sapwellime dipwisou kan nin sampah. Sises sapwellimanki manaman nanleng. E mahsanih: “Manaman koaros en nanleng oh sampah mweimweiongieier.” (Mad. 28:18; Ep. 1:20-23) Sapwellime dipwisou kan kin pid Wehin Mesaiao me e ketin sapwellimankilahr sang pahr 1914 oh me ih oh ienge me keidi kan pahn kaunda.—Kaud. 11:15.
18. Dahme kahrehda Sises pahn kupwurperenkihda eh pahn ketin kasapwilada laduwo pohn sapwellime dipwisou kan koaros?
18 Dahme kitail sukuhlki sang ire pwukat? Ni ahnsou me Sises pahn ketido pwehn wia kadeik erein kahn kamakam kowahlap, e pahn ketin diarada me ladu lelepeko kin ni loalopwoat kihkihda tungoal en padahk mehlel ong papah teikan ni ahnsou me konehng. Sises pahn kupwurperenkihda eh pahn ketin wia kasapwilada keriau pohn sapwellime dipwisou kan koaros. Irail kan me wia ladu lelepeko pahn kasapwilada ni arail ale ketingparail nanleng oh iang Krais kaunda.
19. Ladu lelepeko ale ketingparail nanleng laudsang keidi teikan? Menlau kawehwehda.
19 Ia duwe, ladu lelepeko pahn ale ketingparail nanleng laudsang me keidi teikan? Soh. Inoun keting ehu me wiawihda ahnsou ehu ong pwihn tikitik ehu ele pahn pil kohwong meteikan. Karasepe, medewe dahme Sises mahsanihong sapwellime wahnpoaron lelepek ehk emen ko nipwongo mwohn eh pwoula. (Wadek Luk 22:28-30.) Sises ketin inoukihong kisin pwihn en ohl ko me keting mwahu ehu awiawih irail pwehki arail kin lelepek. Re pahn iangih kaunda ni eh pahn sapwellimanki manaman en nanmwarki. Ahpw sounpar kei mwuri, e ketin kasalehda me 144,000 kan koaros pahn iang mwohd nan mwoalarail oh iangih kaunda. (Kaud. 1:1; 3:21) Met duwehte dahme Madiu 24:47 (NW) mahsanih, me e ketin inoukihda me kisin pwihn en ohl kei, brother keidi kan me wia ladu lelepeko, pahn kasapwilda pohn sapwellime dipwisou kan koaros. Ahpw ni mehlel, irail 144,000 koaros pahn iangih kaunda nanleng.—Kaud. 20:4, 6.
20. Dahme kahrehda Sises ketin kasapwilada ladu lelepeko? Dahme ke koasoanehdi ken wia?
20 Sang ni eh ketin doadoahngki ladu lelepek oh loalokongo, Sises ketin idawehn wiepe me e ketin koasoanehdi ni mwehin wahnpoaron ko, me iei e ketin doadoahngki me malaulau pwehn kamwenge me tohto. Sises ketin kasapwilda ladu lelepeko en tehk mwahu me irail me kin idawehn ih ni mehlel, mehnda ma re iang me keidi kan de sihpw teikan, pahn kaukaule ale padahk mehlel ni ahnsou me konehng erein imwin rahn akan. Kitail en koasoanehdi teng en kasalehda atail kalahngan sang ni atail utungada ni loalopwoat brother keidi kan me wia ladu lelepek oh loalokong.—Ipru 13:7, 17.
^ Parakrap 2: Ni ahnsou ehu mwowe, Sises ketikihda karasaras ehu me duwehte karasaras wet ni eh ketin mahsanihki “ladu” nin duwen “sounpapah” oh “papah teikan” nin duwen “sapwellime ladu kan.”—Luk 12:42-44, NW.
^ Parakap 2: Madiu 24:45-47 (NW) mahsanih: “Ihs me uhdahn ladu lelepek oh loalokongo me eh soumas kasapwiladahngehr pohn eh papah teikan, pwe en kin nehkohng irail kanarail mwenge ahnsou me konehng? Meid pai ladu meno ma eh soumaso pahn pwarodo oh diar eh wiewia met! Mehlel I ndaiong kumwail, E pahn kasapwilada ih pohn eh dipwisou kan koaros.”
^ Parakap 6: Sapwellimen Krais “ketido” (lepin lokaiahn Krihk, erʹkho·mai) kin weksang eh “ketier” (pa·rou·siʹa). Eh ketier ni soh sansal wiawi mwohn eh pahn ketido pwehn wia kadeik.
^ Parakrap 12: Menlau kilang iren onop me oaralape “Kilang! I Pahn Ieiang Kumwail Rahn Koaros, ” nan Kahn Iroir wet, pali 16-18, parakrap 5-8.
^ Parakrap 16: Menlau kilang iren onop me oaralape “Mahsanihong Kiht, Ahnsou Dah me Mepwukat Pahn Wiawi?” nan Kahn Iroir wet, pali 13-14, parakrap 14-18.
