1, 2. Dahme sewese Sounkadehdehn Siohwa 230 ko ren mourla nan sapalo ni kaimwiseklahn Mahwen Keriau en Sampah?

 AHNSOWO kerenlahng imwin Mahwen Keriau en Sampah. Nein Hitler sounpei kan pahn luhsehr nan mahweno. Koperment en Nazi koasoanehdi ren kemehla me kid kei me senselte nan imweteng ko. Me sensel ko nan Sachsenhausen anahne sapalla lel wasahn peidi en sohp, wasa re pahn kihdahng irail pohn sohp oh kakihrirailla nansed. Met iei kisehn koasoandi ehu me mwuhr re kahdaneki kapar en mehla.

² Irail meh 33,000 pwukat me selidi nan imweteng en Sachsenhausen anahne sapalki mwail 155 lella ni Lübeck, kahnimw ehu me karanih wasahn peidi en sohp nan Sehmen. Mie Sounkadehdehn Siohwa 230 sang wehi weneu me iang irail. Sounpei ko ndahng Sounkadehde ko ren patpene alu. Me sensel ko pwon luwet pwehki soumwahu oh sou itar en mwenge. Ahpw riatail ko koaros mourla. Ia duwen met eh kak wiawi? Emen irail nda: “Se kin doulahte kangoange emenemen pwehn dehr uhdi.” Arail limpoak ong emenemen iangahki “manaman lapalap” sang Koht sewese irail en mourla.​—2 Kor. 4:7.

3. Dahme kahrehda kitail anahne kangoange emenemen?

³ Mendahki rahnpwukat kitail sohte lelohng kahpwal duwehte arailo, kitail pil kin dadaur pahn kahpwal tohto. Mwurin Wehin Koht tepida kakaun nan pahr 1914, Sehdan pisikendiongehr sampah sang nanleng. E inenen lingeringer kowahlap pwehki e ese me “eh ahnsou mwotomwotalahr.” (Kaud. 12:7-9, 12) Ni Armakedon eh kerendohr, Sehdan kin doadoahngki kasongosong kan en song kaluwetehla atail nanpwungmwahu rehn Siohwa. Kitail pil kin lokolongki kapwunod kan en ehuehu rahn. (Sohp 14:1; Ekl. 2:23) Ekei pak, kahpwal pwukat koaros kak kahrehiong kitail en uhdahn luwetala oh sohte lipilipil dahme kitail wia, kitail kin nsensuwedte. Karasepe  ehu, erein sounpar tohto brother men kin kangoange me tohto pwe ren loalopwoatohngete Siohwa. Ahpw ni eh mahla, ih oh eh pwoud soumwahuda oh e tepida uhdahn mworusala. Kitail koaros duwehte brothero me anahne “manaman lapalap” sang rehn Siohwa. Kitail pil anahne kangoange emenemen.

4. Ma kitail pahn kangoange meteikan, kaweid dahieu me wahnpoaron Pohl kihda me kitail anahne kapwaiada?

⁴ Ma kitail pahn kangoange meteikan, kitail anahne idawehn kaweid me wahnpoaron Pohl kihong Kristian kan en Ipru. E koasoia: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kaun-o kerendohr.” (Ipru 10:24, 25) Ia duwen atail kak kapwaiada kaweid kesempwal wet?

5. Ia wehwehn en “nsenoh sawaspene”? Ia duwen atail kak wia met?

⁵ “Nsenoh sawaspene” kin wehwehki kitail en medewe duwen anahn en meteikan. Kitail sohte pahn ese anahn en riatail kan ma kitail kin rahnmwahwihte irail ni mwotomwot nan atail Wasahn Kaudok oh koasoiongete irail duwen soahng kan me sohte nohn kesempwal. Mehlel me kitail sohte men tetehk soahng koaros duwen arail mour. (1 Des. 4:11; 1 Tim. 5:13) Ahpw, kitail men song esehla riatail Kristian kan. Kitail men ese irair en arail mour, soahng mwahu kan rehrail, arail koahiek kan, luwet kan oh arail pepehm duwen padahk mehlel. Irail anahne ese me kitail iei kompoakparail oh kitail poakohng irail. Kitail anahne kihong irail atail ahnsou, kaidehn ahnsou kante me irail ahneki kahpwal oh mworusala, ahpw pil ni ahnsou teikan.​—Rom 15:7.

6. Dahme pahn sewese elder men en “nsenohki” tohnmwomwohdiso?

⁶ Paipel mahsanih me elder kan anahne perenki oh ngoangki wia doadoahk en apwalih anahn en tohnmwomwohdiso. (1 Pit. 5:1-3) Pwe ren wia met, elder kan anahne ese riarail Kristian kan. (Wadek Lepin Padahk 27:23, NW. *) Ma elder kan kasalehda me re onopadahr en sawas oh re perenki kihong arail ahnsou ong riarail Kristian kan, tohnmwomwohdiso pahn pehm me re kak peki arail sawas ni ahnsou me re anahne. Re pahn mengeiki koasoiaiong elder kan duwen arail pepehm kan oh pwunod kan. Met pahn imwikihla elder kan ar pahn kak sewesehki emenemen arail anahn kan.

7. Dahme kitail anahne tamataman duwen “pato mwahl” en irail me nan kapehd tikitikla kan?

⁷ Pohl padahkihong mwomwohdiso en Deselonika: “Kumwail sewese me luwet akan.” (Wadek 1 Deselonika 5:14.) “Me luwet akan” pil kin iangahki irail me nan kapehd tikitikla oh irail me mworusala. Lepin Padahk 24:10 mahsanih: “Ma ke me luwet ni ahnsou apwal, ke me uhdahn lamalam luwet.” Ma kitail men sewese irail kan me mworusala, kitail anahne tamataman me ekei pak arail koasoi kan kakete wiahla “pato mwahl akan.” (Sohp 6:2, 3) Ele re kak ndahla soahng kan me kaidehn uhdahn dahme re men nda. Rachelle me eh nohno ahneki soumwahu en pwunod laud wehwehkihda duwen met. Rachelle nda: “Pak tohto ei nohno kin nda mehkot me kalingeringer. Pali laud en ahnsou ko, I kin song katamankihong ie uhdahn soangen aramas dahmen nohno, me e limpoak oh kadek sapan. I esehda me aramas me ahneki soumwahu wet kin nda soahng tohto me re sohte uhdahn men nda. Dahme keieu suwed me emen kak wia iei dupungki lokaia de wiewia suwed kan.” Lepin Padahk 19:11 mahsanih: “Ma ke me loalokong, ke pahn kak kanengamahiong omw lingeringer. Ma emen pahn wiahiong uhk sapwung ehu, e pahn wia tiahk mwahu ehu ma ke pohnsehsehla.”

8. Ihs me keieu anahne kitail en “kasalehiong” atail limpoak, oh dahme kahrehda?

 ⁸ Ia duwen atail kak kasalehda “nsenoh” ong emen me mworusala pwehki sapwung ehu e wiahda mahs? Mendahki e kapwungalahr eh sapwungo, ele e pahn namenengkihte dahme e wiao. Pohl ntingwohng rie Kristian kan en Korint duwen emen nan arail mwomwohdiso me koluhkihla dihp ehu e wiahda. E koasoia: “Eri met, kumwail pahn mahkohng oh sewesehda, pwe eh nsensuwed dehr lalaudla . . . Eri, I peki rehmwail ni ngidingid, kumwail en kasalehiong amwail limpoak mehlel.” (2 Kor. 2:7, 8) Riatail Kristian men sohte pahn ese me kitail poakohng oh nsenohki ihte ma kitail kasalehiong ni lokaia oh wiewia kan.

9. Ia wehwehn en “nsenoh sawaspene ni kasalepen atail limpoak oh atail wiewia mwahu kan”?

⁹ Pohl ntingihedi: “Kitail nsenoh sawaspene ni kasalepen atail limpoak oh atail wiewia mwahu kan.” Kitail kin wia met ni atail kin sewese riatail Kristian kan en kasalehda limpoak oh wia dahme mwahu. Pwehn karasahda: Ma kitail men kisiniei ehu en dehr kunla, ele kitail kin arih tuwi ko oh ipir pwehn okohk. Ni ahlohte, mie soahng kan me kitail kak wia pwehn sewese kamwakid riatail kan ren doulahte papah Siohwa ni ngoang. Ehu ahl me keieu mwahu en wia met iei sang ni atail kapinga riatail kan ong soahng mwahu kan me re kin wia.

10, 11. (a) Ihs me anahne ale kaping? (b) Menlau kihda ehu karasaras duwen kapinga emen eh kak sewese ih en wia me pwung.

¹⁰ Kitail anahne aramas en kapinga kitail sohte lipilipil ma kitail nsensuwed de soh. Emen brother nda: “Sohte pak ehu ei pahpao kin nda me I wiahda mehkot mwahu.” Eri ni brother menet eh kekeirda, e uhdahn pehm me soahng koaros e wia kin sapwung. Mendahki e sounparehr 50, e kin perenkihte ni meteikan ar ndahng me e wia doadoahk mwahu nin duwen elder men. Pwehki met, e esehda uwen kesempwal en kangoange meteikan, kahrehda e kin rapahki ahl akan en kapinga  meteikan. Kitail koaros kin kehlailda ni emen eh ndahng kitail me e mwahu dahme kitail wiewia, pil iangahki pioneer kan, me mah kan oh me mworusala kan.​—Rom 12:10.

¹¹ Ni elder kan ar kin sewese emen me wiahda sapwung ehu, arail kapingahki ih soahng mwahu kan me e wiahda mahs ele kak sewese ih en wekidala eh madamadau oh wia dahme pwung. (Kal. 6:1) Ih soahng wet me sewese sister men me ede Miriam. E ntingihedi: “I lelohng kahpwal laud ehu nan ei mour ni kompoakepahi kei sohla iang padahk mehlel oh, ni ahnsowohte, ei pahpao soumwahuda pwehki nta mihla nan eh mwahliel. I uhdahn mworusala.” E tepida iang ohl emen me sohte kin kaudokiong Siohwa pwehki e medewe me met pahn kahrehiong ih nsenamwahu. Ahpw e kahrehiong ih en pehm me e sohte warohng sapwellimen Siohwa limpoak oh e lemehda en sohla iang padahk mehlel. Ahpw elder men katamankihong duwen soahng koaros me e wia nan eh papah Siohwa oh kamehlelehiong me Siohwa ketin poakepoakehte. Met imwikihla eh limpoak ong Siohwa kehlailda. E sohla kin iang ohl me e ieiango oh doulahte papah Siohwa.

12. Dahme kak wiawi ma kitail kin kapahrekiong riatail kan ong meteikan, kauwe irail, kahrehda ren pehm me re dipada?

¹² Kitail anahne kanahieng ia duwen atail song kangoange riatail Kristian kan ren doulahte ngoangki papah Koht. Kitail dehr kapahrekiong irail meteikan, kauwe irail pwehki arail sohte idawehn koasoandi kan me kitail wiahda, de kahrehiong irail en pehm me re dipada pwe re sohte wia laudsang dahme re kin wia. Mepwukat kakete kamwakid irail en kamwahwihala dahme re kin wia ongete ahnsou kis, ahpw e sohte pahn werei. Ahl me keieu mwahu en kangoange riatail kan iei en kapinga irail oh sewese irail en pohnese me limpoak ong Koht iei kahrepen atail kin men wia uwen atail kak en papah ih.​—Wadek Pilipai 2:1-4.

13. Ia wehwehn kakehlaka meteikan? (Menlau kilang tepin kilel.)

¹³ Pohl pil nda me kitail anahne “kakehlaka nan kapehd en emenemen.” Kitail kak karasahiong kakehlaka nan kapehd en meteikan ong kisiniei ehu me kitail kin kihkihong tuwi pwe en okohkete oh pil kalaudehla eh lullul. Kakehlaka riatail Kristian kan kin wehwehki en kangoange irail oh kansenamwahwih irail pwe ren kak doulahte papah Koht. Ni atail song en sewese irail me mworusala, kitail anahne lokaia ni kamantik oh kadek. (Lep. Pad. 12:18) Kitail pil anahne “nan kapehd mwadang ong rong, ahpw dehr nan kapehd karuaru en lokaia.” (Seims 1:19) Ma kitail rong riatail men oh song en wehwehki eh pepehm, mwein kitail kak diarada kahrepen eh mworusala, eri kitail kak nda mehkot me pahn sewese ih.

14. Ia duwen elder men eh sewese brother men me nsensuwedla?

¹⁴ Medewe duwen elder kadek men me kak  sewese brother men me sohla kin iang kalohk erein sounpar kei. Ni eldero eh rongorong brothero, e esehda me brothero ahnekihte limpoak laud ong Siohwa. Brothero kin onopki Kahn Iroir koaros oh kin nantihong iang towehda mihting koaros. Ahpw mie ekei nan mwomwohdiso me kahrehiong en nsensuwedla pwehki soahng kan me re wiahda. Eldero rong kanahieng oh song wehwehki en brothero pepehm ni eh sohte kin kadeik ih. E pil kamehlelehiong me ienge tohnkaudok kan poakohng ih. Ekisekis, brothero esehda me e kin mweidohng soahng suwed kan me lelohng ih en kauhdi eh papah Kohto me e poakohng. Eldero luke ih en iangih kohla kalohk. Sang ni eldero eh sawas, brothero kehlailda nan doadoahk en kalohk oh mwuhr pwurehng wiahla elder men.

15. Dahme kitail kak sukuhlki sang Siohwa duwen kakehlaka meteikan?

¹⁵ Me mworusala men ele sohte pahn mwadang nsenamwahula de pwungki ale sawas nin tapio. Ele kitail anahne doulahte sewese erein ahnsou ehu. Pohl koasoia: “Kumwail sewese me luwet akan, oh kanengamahiong aramas koaros.” (1 Des. 5:14) Kitail en pousehlahte “sewese” me luwet akan oh dehr mwadang uhdi. Mahso, Siohwa kin ketin kanengamahiong sapwellime ladu kan me kin mworusala. Karasepe, Koht ketin kanengamahiong Elaisa oh kesempwalki eh pepehm kan. E ketikihong dahme e anahne pwehn pousehlahte papah ih. (1 Nan. 19:1-18) Pil ehu karasepe iei Depit. E uhdahn nsensuwedkihla dahme e wiahda. Siohwa ketin mwahngih met oh ni kadek ketin mahkohng. (Mel. 51:7, 17) Koht pil ketin sewese sounnting en Melkahka irelaud 73 me kereniong uhdihsang papah Ih. (Mel. 73:13, 16, 17) Siohwa kin ketin kadek oh kanengamahiong kitail, ahpw mehlel ni atail kin mworusala. (Eks. 34:6) Paipel mahsanih me sapwellimen Siohwa mahk kin rasehng “kansenamwahu en nimenseng” oh “sohte kin tokedi.” (Koul Ked. 3:22, 23) Siohwa ketin kasik me kitail en idawehn sapwellime mehn kahlemeng oh kadek ong me mworusala kan.

16, 17. Ni kaimwiseklahn koasoandi wet eh kerendohr, dahme kitail anahne wia? Dahme kahrehda?

¹⁶ Nanpwungen me sensel 33,000 ko me kohkohsang nan imweteng en Sachsenhausen, meh kid kei me mehla. Ahpw Sounkadehdehn Siohwa 230 ko koaros mourla. Re sohte pahn kak mourla ma re sohte kin kangoange oh sewese emenemen.

¹⁷ Rahnpwukat, kitail mi nan elen “kolahng mour.” (Mad. 7:14) Kereniong sapwellimen Siohwa tohnkaudok koaros pahn pitla oh pedolong nan sampah kapw me dirkihla irair pwung. (2 Pit. 3:13) Ni kaimwiseklahn ahn Sehdan koasoandi suwed wet eh kerendohr, kitail en sawaspene pwe kitail en mihmihte nan elen kolahng mour.