Kaiasadahn Sises kadirehkihla sapwellime tohnpadahk ko pwoson oh ngoang. Ahpw wahnpoaron Pohl me kin keieu seiloakseli nan sahpw me met adaneki Turkey oh Mediderenien, pwehn wiahda mwomwohdiso kan oh kakehlaka Kristian kan ren dadaurete nan kasongosong oh uhwong lemei kan. Mendahki soangen apwal pwukat, me tohto wiahla Kristian.

Mwuhr Pohl selidi nan imweteng. Ahpw pil wasao, e ntingihada kisinlikou kei pwehn kangoange oh kaweid mwomwohdisohn Kristian kan. E katamankin irail duwen kahpwal laud ehu me ekei aramas pahn uhwongala padahk mehlel. Sapwellimen Koht manaman kin kamwakid Pohl en ese me mwuhr “kidien wel kan” pahn pwarada nanpwungarail oh pahn “pitiheki me pwoson akan lokaia likamw, pwe re en idawehnirailla.”​—Wiewia 20:29, 30.

Sounpar kei mwohn pahr 100, kahpwal en uhwong padahk mehlel tepida wiawi. Ni ahnsowo Sises ketikihong wahnpoaron Sohn Kaudiahl me kasalehda dahme pahn wiawi ahnsou kohkohdo. Nin duwen dahme Sohn ntingihedi, sohte soun uhwong de sounpadahk likamw men pahn irehdi Koht en ketin kapwaiada dahme e kupwurki nin tapio ong sampah oh tohnsampah. Paipel mahsanih me “wehi koaros, kadaudok koaros, lokaia koaros, oh sahpw koaros” pahn rong rongamwahu duwen Wehin Koht. (Kaudiahl 14:6) Sampah pahn pwurehng paradaisla oh koaros me men wia kupwuren Koht pahn iang mi nan paradais!

Ia duwe, met wia “rongamwahu” ong uhk? Ma ei, eri kalaudehla omw esehla duwen dahme Koht mahsanihong tohnsampah nan Paipel oh ia duwen omw kak paiekihda rahnwet oh ahnsou kohkohdo.

Ke kak wadek Paipel nan Internet me kawehwehdi ni mpen lokaia 50 ni website www.pr418.com. Nan website wet, ke kak pil wadek kisin pwuhk me oaralape Rohng Mwahu Sang Rehn Koht! oh pil pwuhk me oaralape Dahme Paipel Uhdahn Padahngki? iangahki pwuhk teikan me koasoia kahrepen atail kak likih Paipel oh ia duwen atail kak doadoahngki eh kaweid mwahu kan ong atail peneinei oh pil ong pein kitail. De idek rehn Sounkadehdehn Siohwa kan en sewese iuk kalaudehla omw ese met.

​—Kohsang nan pwuhken Wiewia kan, Episos, Pilipai, Kolose, Pailimwon, 1 Sohn, oh Kaudiahl.