1. Dahme kahrehda koasoandi en nanmwarki kan en Siria oh Israel sohte pweida?

 AHNSOU ehu nanpwungen pahr 762 oh pahr 759 mwohn Krais, nanmwarki en Israel oh nanmwarki en Siria tapihada mahwen ehu ong wehin Suda. Re men pedolong nan Serusalem, kihsang Ahas en sohla nanmwarki oh wiliankihdi emen ohl me ele kaidehn sang peneinei en Nanmwarki Depit. (Ais. 7:5, 6) Ahpw arail koasoandio sohte pweida. Siohwa ketin inoukidahr me ahnsou koaros emen sang peneinei en Depit pahn kin wia nanmwarki. Dahme Siohwa ketin mahsanih kin ahnsou koaros pweida.​—Sos. 23:14; 2 Sam. 7:16.

2-4. Ia duwen Aiseia 7:14, 16 eh pweida (a) nanpwungen pahr 762 oh pahr 759? (b) ni mwehin Sises?

² Ni tapio, e mwomwen me Siria oh Israel pahn kana nan mahwen wet. Nan ehute mahwen, nein Ahas sounpei 120,000 kamakamla. Nah pwutak Maaseaia pil iang kamakamla. (2 Kron. 28:6, 7) Ahpw Siohwa ketin mahmahsanih dahme wiwiawi. E ketin tamataman sapwellime inowo ong Depit oh E ketin poaronehla sapwellime soukohp Aiseia pwehn wahla mahsen uhdahn kangoang ehu.

³ Aiseia nda: “Peinakapw emen mie me liseiandahr. E pahn naitikihada nah pwutak emen, oh e pahn kamwarehki ‘Emanuel.’” Aiseia pil doula nda: “Mwohn ahnsou me serio pahn esehla pilada dahme mwahu oh suwed, sapwen nanmwarki riemeno me ke masak pahn tehnla.” (Ais. 7:14, 16) E mehlel me pali keieun kokohp wet dokedoke ipwidi en Mesaia. (Mad. 1:23) Ahpw nanmwarki en Siria oh Israel sohte mahweniong wehin Suda ni mwehin Sises, eri kokohpo duwen Emanuel pil pweida ni mwehin Aiseiao. Ia duwen?

 ⁴ Mwurinte Aiseia wiahda pakair wet, eh pwoudo liseianda. Ira kihong eden neira pwutako “Pitipit en Kul—Pitipit en Adihada.” Seri menet ele iei “Emanuel” me Aiseia kohpada duwe. * Nan Paipel, aramas akan kin kihong eden seri men ni eh ipwidi ahd ehu me ele pahn wia katamanpen mwekid tohrohr ehu, ahpw pahpa nohno oh kisehrail kan pil kak likwerihki ehu ahd tohrohr. (2 Sam. 12:24, 25) Sohte mehn kadehde me aramas akan kin ekerki Sises mwar wet Emanuel.​—Wadek Aisiea 7:14; 8:3, 4.

5. Pilipil soaloalokong dahieu me Nanmwarki Ahas wiahda?

⁵ Ni Israel oh Siria ara nannanti en powehdi Suda, wehin Asiria pil koasoakoasoane en kalowehdi wasao. Wehin Asiria kin lemei oh ngihtehte oh e wie kekehlaila. Nin duwen me Aiseia 8:3, 4 kasalehda, Asiria pahn kalowehdi Siria oh Israel mwohn eh pahn mahweniong Suda. Nanmwarki en Suda, Ahas, anahne likih dahme Koht ketin mahsanihong Aiseia en padahkihong ih. Ahpw ih oh wehin Asiria pwungkipene koasoandi soaloalokong ehu. Imwilahn met, Asiria wiahla kaun lemei kei me kaunda Suda mwuhr. (2 Nan. 16:7-10) Nin duwen kaun men en Suda, Ahas uhdahn anahne pere nah aramas ako. Ahpw e sohte pweida ni eh wia met. Ele kitail en pein idek rehtail, ‘Ni ahnsou me I anahne wiahda pilipil kesempwal ehu, I kin likih Koht de aramas?’​—Lep. Pad. 3:5, 6.

6. Ia duwen Esekaia eh weksang Ahas?

⁶ Ahas mehla nan pahr 746 mwohn Krais, oh nah pwutak Esekaia uhd wiahla nanmwarki. Aramas ako nan Suda semwehmwehla oh re uhdihsang kaudokiong Siohwa. Soahng dah me Esekaia pahn tepin wia ni eh wiahla nanmwarki? E pahn song en pwurehng kakepwehpwehla wehio? Soh. Esekaia poakohng Siohwa oh wia silepe mwahu men ong wehio. Keieu en mwekid me e wia iei en sewese aramas ako ren pwurehng kaudokiong Siohwa. Ni eh wehwehkihda dahme Koht kupwurki en wia, Esekaia mwadang peikiong. E wiahda mehn kahlemeng mwahu ong kitail!​—2 Kron. 29:1-19.

7. Dahme kahrehda mehn Lipai ko anahne sawas sang nanmwarki kapwo?

⁷ Mehn Lipai ko ahneki pwukoa kesempwal en sewese aramas ako ren pwurehng kaudokiong Siohwa. Eri Esekaia tuhwong mehn Lipai ko oh inoukihong me e pahn sewese irail. Nan tuhpeneo, mehn Lipai lelepek ko ele perenkihda ni arail rong nanmwarkio eh nda: “Iei kumwail me KAUN-O ketin piladahr pwehn . . . kahrehiong aramas en kaudokiong.” (2 Kron. 29:11) Mehn Lipai ko alehdi kehkehlik sansal pwehn sewese aramas ako ren kaudokiong Koht mehlelo!

8. Dahme Esekaia pil wia pwehn sewese aramas ako ren pwurehng kaudokiong Siohwa? Ia imwilahn met?

⁸ Esekaia luke aramas en Suda oh Israel koaros ong kasarawi en Pahsohpa laud ehu. Mwurin Pahsohpao, aramas ko wia kasarawi en Pilawa Sohte Doal Ihs me reireiki rahn isuh. Re uhdahn perenki kamadipwo kahrehda re pil kareireila kasarawio rahn isuh. Paipel mahsaniong kitail: “Kahnimw en Serusalem direkihla peren, pwehki sohte mwekid me duwehte met me wiawi sang ni mwehin Nanmwarki Solomon, sapwellimen Depit pwutako.” (2 Kron. 30:25, 26) Ele kasarawio uhdahn kangoange aramas ako koaros. 2 Kronikel 31:1 mahsanih me mwurinte arail kanekehla kasarawio, re “kauwehla uhr takai, pelehdi sansal en koht lih Asera, oh kamwomwala pei sarawi kan oh wasahn kaudok en  me rotorot akan.” Wehi wet pwuralahng rehn Siohwa. Met sewese irail en kaunopadahng kahpwal kan me pahn kereniong leledo.

9. (a) Ia duwen koasoandi en wehin Israel eh sohte pweida? (b) Dahme Senakerip tepin wiahiong Suda?

⁹ Duwehte me Aiseia koasoia, mehn Asiria ko kalowehdi wehin Israel oh wahla aramas ako oh salihedi nan sapwarailo. Met kauwehla ahn mehn Israel ko ar men pilada emen nanmwarki ong Suda me kaidehn sang peneinei en Depit. Ahpw ia ahn Asiria eh koasoandi kan? Met re kohkohdohng kalowehdi Suda. Paipel mahsanih: “Ni kaeisek pahieun sounpar en mwehin Esekaia, Senakerip, nanmwarki lapalap en Asiria, ketido oh mahweniong kahnimw kehl kehlail koaros en Suda, oh ketin kaloweiraildi.” Senakerip kalowehdi kahnimw 46 en Suda. Medewehla ia pahn omw pepehm ma ke mi nan Serusalem ahnsowo. Sounpei en Asiria kan kalowedier kahnimw kan en Suda oh kerekerendohngehr imwomwo!​—2 Nan. 18:13.

10. Dahme kahrehda kokohp en Maika kakete kangoange Esekaia?

¹⁰ Esekaia ese keper me eh wehio milahr loale, ahpw e sohte masepwehkada oh peki sawas sang wehi teikan, duwehte me seme salelepeko, Ahas, wia. Esekaia likih Siohwa. (2 Kron. 28:20, 21) Ele e ese dahme soukohp Maika koasoiahki duwen imwintihtio, “mehn Asiria.” Maika nda: “Kitail pahn kadaralahng irail neitail kaunen sounpei me keieu kehlail kan. Re pahn kalowehkihdi wehin Asiria, . . . neirail tehtehn mahwen kan.” (Maika 5:5, 6) Sapwellimen Siohwa mahsen pwukat uhdahn kangoange Esekaia. Mahsen pwukat kasalehda me Siohwa pahn ketin doadoahngki pwihnen sounpei tohrohr ehu pwehn kalowehdi mehn Asiria ko.

11. Iahd me kokohp duwen kaunen sounpei me keieu kehlail kan eh pahn keieu pweida?

¹¹ Kokohpo duwen kaunen sounpei me keieu kehlail kan pahn keieu pweida mwurin ipwidi en Sises, “me pahn kaunda Israel, emen me kadaudoke tepido sang kawao.” (Wadek Maika 5:1, 2.) Ni mehlel, pweidahn kokohp wet pahn wiawi ni ahnsou kohkohdo ni “mehn Asiria,” de imwintihtio, eh mahweniong sapwellimen Siohwa ladu  kan. Pwihn en sounpei dahieu, me mi pahn kaweid en sapwellime Ohlo, me Siohwa pahn ketin doadoahngki pwehn ketin kalowehkihdi imwintihtio? Kitail pahn sapengala peidek wet mwuhr nan iren onop wet. Ahpw keieu, kitail kilang dahme kitail kak sukuhlki sang dahme Esekaia wia ni ahnsou me mehn Asiria kan mahweniong irail.

12. Dahme Esekaia oh irail me iang ih wia pwehn pere sapwellimen Koht aramas akan?

¹² Ni atail pehm me kitail sohte kak kamwahwihala kahpwal ehu, Siohwa kin ahnsou koaros kupwurperenki ketikihda sawas me kitail anahne. Ahpw e ketin kasik me kitail en wia uwen atail kak koaros duwen kahpwalo. Esekaia wia uwen me e kak. Paipel mahsanihong kitail me e ale kaweid sang “sapwellime lapalap ako” oh e pilada en “lupukala wasahn nahk pihl likin kahnimwo.” Ni eimah, Esekaia pil “onehda sapahl kehlo, wasahn iroir kan me mi powe, oh pil kauwada ehu kehl masliki.” E pil “wiahda ketieu oh mehn sansar tohto.” (2 Kron. 32:3-5) Erein ahnsowo, Siohwa ketin doadoahngki Esekaia, nein Esekaia lapalap ako oh pil soukohp lelepek kan en pere oh apwalih Sapwellime aramas ako.

13. Dahme keieu kesempwal me Esekaia wiahda pwehn kaunopada aramas ako ong mahwen en mehn Asiria ko? Ia duwen ahn Esekaia koasoi ko eh sewese aramas ako?

¹³ Mwurin met, Esekaia wiahda mehkot me pil kesempwal sang eh pere wasahn nahk pihl kan de kakehlaka kehl en kahnimwo. Pwehki e wia sounsilepen sihpw mwahu, e kapokonpene aramas ako oh kangoangehkin irail lokaia pwukat: “Kumwail nan kapehd kehlail oh koapworopwor, oh dehr masak nanmwarki lapalap en Asiria de karis me e kakahluwa. Kitail ahneki manaman laudsang me e sapwellimanki. E sapwellimanki manaman en aramas, ahpw kitail ahneki sawas en KAUN-O, atail Koht me pahn ketin mahwenkin kitail.” Esekaia katamankihong aramas ako me Siohwa pahn ketin mahwenkin irail. Met sewese irail ren pwoson Koht oh kommwad. Esekaia oh nah lapalap oh ohl kommwad ko, oh pil soukohp Maika oh Aiseia, kasalehda me re wia sounsilepen sihpw mwahu kei, duwehte me Siohwa ketin inoukihda sang ni eh ketin doadoahngki sapwellime soukohpo.​—2 Kron. 32:7, 8; wadek Maika 5:5, 6.

14. Dahme Rabshakeh nda? Dahme aramas ako wia?

¹⁴ Nanmwarki en Asiria oh nah sounpei ko uhdi oh wiahda kahnimpwal kan nan Lakis, nanpwungen palieir oh palikapi en Serusalem. Sang wasao, e kadaralahng Serusalem meninkeder silimen pwehn padahkihong mehn Serusalem ko ren mweidohng irail en kaloweiraildi. Meninkeder me keieu lapalapo, Rabshakeh, lokaiahiong mehn Serusalem ko ni pein arail lokaia. Keieu, e song en kangoange irail en dehr rong Esekaia ahpw ren peikiong mehn Asiria ko. Ih eri pitih irail ni eh inoukihda en wairaillahng sahpw ehu me re kak ahneki mour nsenamwahu. (Wadek 2 Nanmwarki 18:31, 32.) Rabshakeh pil padahkihong irail me koht en wehi teikan sohte kak pere arail tohnkaudok ko oh me Siohwa sohte pahn pil kak ketin pere mehn Suhs ko. Ni loalokong, aramas ako pilada ren pohnsehsehla koasoi likamw ko. Rahnwet, sapwellimen Siohwa ladu kan kalapw alasang arail mehn kahlemengo.​—Wadek 2 Nanmwarki 18:35, 36.

15. Dahme aramas en Serusalem ko anahne wia? Ia duwen Siohwa eh ketin doarehla kahnimwo?

¹⁵ Esekaia uhdahn pwunodikihda. E sohte peki sawas sang wehi teikan, ahpw e ndaiong Aiseia en peki sawas sang rehn Siohwa. Soukohp Aiseia ndahng Esekaia: “Iet mahsen en KAUN-O duwen nanmwarki lapalap en Asiria: ‘E sohte pahn pedolong nan kahnimw wet; e pil sohte pahn kadarohng arep pwoat powe.’”  (2 Nan. 19:32) Ihte me aramas koaros nan Serusalem anahne wia iei en kommwad oh dehr pweiek. Siohwa pahn ketin mahwenkin irail, oh iei met me e ketin wia. “Nipwongohte, tohnleng en KAUN-O men ahpw pwarodo oh kemehla aramas 185,000 nan kahnimpwal en mehn Asiria ko.” (2 Nan. 19:35) Mehn Serusalem ko poadoandoarla, kaidehn sang dahme Esekaia wia pwehn perehla kahnimwo, ahpw sang ni sapwellimen Siohwa manaman.

16. Rahnwet, ihs me karasaraskihong (a) aramas akan en Serusalem (b) ‘mehn Asiriao’ (c) kaun en sounpei keieu kehlail kan?

¹⁶ Kokohpo duwen kaun en sounpei kehlail kan pahn keieu pweida nan atail ahnsou. Mahso, mehn Asiria ko mahweniong mehn Serusalem ko. Ahnsou keren, “mehn Asiria,” de imwintihtio, pahn pwurehng mahweniong sapwellimen Siohwa aramas akan oh song en kasohrehla irail. Paipel mahsanih duwen mahwen wet oh pil mahwen en ‘Kok en Makok,’ mahwen en “nanmwarkien Siria,” oh mahwen en “nanmwarki kan en sampah.” (Esek. 38:2, 10-13; Dan. 11:40, 44, 45; Kaud. 17:14; 19:19) Ia duwe, mahwen pwukat wekpeseng? Kitail sehse. Paipel kak doadoahngki soangsoangen ahd kan pwehn koasoiahda mahwen ehute. Mehnia pwihnen sounpei me Siohwa pahn ketin doadoahngki pwehn mahweniong imwintihti lemei menet me adaneki “mehn Asiria”? E pahn ketin doadoahngki pwihn ehu me uhdahn tohrohr, me iei “kaunen sounpei me keieu kehlail kan.” (Maika 5:5) Ihs irail? Irail iei elder kan nan mwomwohdiso. (1 Pit. 5:2) Rahnwet, Siohwa kin ketin doadoahngki elder lelepek tohto pwehn apwalih oh kakehlaka sapwellime aramas akan ong mahwen en “mehn Asiria” me pahn wiawi. Kokohp en Maika padahkihong kitail me re pahn “kalowehkihdi wehin Asiria, . . . neirail tehtehn mahwen kan.” (Maika 5:6) Ehu tehtehn mahwen me re doadoahngki pwehn kalowehdi imwintihtio iei “kedlahs” en sapwellimen Koht manaman, me iei Mahsen en Koht.​—2 Kor. 10:4; Ep. 6:17.

17. Ia mehn kasukuhl pahieu me elder kan kak sukuhlki sang dahme kitail koasoiapene mwoweo?

¹⁷ Elder kan, kumwail kak sukuhlki ekei mehn kasukuhl mwahu sang dahme kitail koasoiapene: (1) Dahme keieu mwahu kumwail en wia pwehn kaunopada ong mahwen en “mehn Asiria” me pahn wiawi ahnsou kohkohdo iei en kakehlaka amwail pwoson Koht oh sewese riamwail Kristian kan en wia duwehte. (2) Ni ahnsou me “mehn Asiria” tepida mahwen, kumwail anahne uhdahn kamehlele me Siohwa pahn ketin doarekitailla. (3) Ni ahnsowo, ele kaweid me kumwail alehdi sang sapwellimen Siohwa pwihn mwomwen ehusoahng de weksang dahme kumwail kalapw ale. Ahpw kitail koaros anahne onopada oh peikiong kaweid koaros me kitail ale, mehnda ma kitail pwungki de sapwungki, pwehki atail peikiong kaweid pwukat pahn doarehla atail mour. (4) Ma mie me kihong arail likilik ong palien sukuhl en sampah wet, dipwisou kan de pwihn en aramas akan, irail anahne wekidala arail madamadau met. Kumwail anahne onopada pwehn sewese koaros me ele sohte likih Siohwa ni unsek.

18. Ia duwen atail medemedewe dahme kitail koasoiapene eh kak sewese kitail ni ahnsou kohkohdo?

¹⁸ Ahnsowo pahn leledo me kitail pahn duwehla aramas ako en Serusalem ni mwehin Esekaiao me mwomwen sohte sawasparail. Ahnsou me met wiawi, dahme Esekaia nda kak sewese kitail en kolokol atail pwoson en kehlail. Kitail en tamataman me atail imwintihti kan ahneki “manaman en aramas, ahpw kitail ahneki sawas en KAUN-O, atail Koht me pahn ketin mahwenkin kitail”!​—2 Kron. 32:8.