1, 2. Dahme kahrehda Siohwa ketin karasahiong ih soun silepen sihpw men?

 SIOHWA ketin karasahiong ih silepen sihpw men. (Esek. 34:11-14) Met sewese kitail en wehwehki soangen Koht dahmen Siohwa. Silepen sihpw limpoak men kin pehm me e pwukoahki mouren sihpw kan me e kin apwalih. E kin kahreiraillahng wasa me mie mwenge oh pihl oh wahda neirail ko me ahpwtehn ipwidi. (Mel. 23:1, 2; Ais. 40:11) E kin tetehk sihpw kan ni rahn oh nipwong oh perehsang mahn lawalo kan. (1 Sam. 17:34, 35; Luk 2:8) E kin rapahki sihpw men me dohweisang pelin sihpwo oh apwalih irail ko me ohla.​—Esek. 34:16.

² Mahso, pali laud en sapwellimen Koht aramas akan wia soun silepen sihpw kan oh soumwet kan. Eri irail wehwehki kahrepen Siohwa eh ketin karasahiong ih sounsilepen sihpw men. Irail ese me sihpw kan anahne epwel mwahu pwe ren roson oh en mourla. Ni ahlohte, aramas akan anahne Siohwa en ketin apwalih oh kaweid irail. (Mark 6:34) Ma sohte epwel mwahu oh kaweid sang rehn Siohwa, aramas akan pahn lokolok. Irail pahn sehse dahme pwung oh dahme sapwung oh sohte me kin pere irail. Irail rasehng “sihpw me sohte sileparail.” (1 Nan. 22:17) Ahpw irail me mweidohng Siohwa en ketin wia sileparail kin ahneki soahng koaros me re anahne.

3. Dahme kitail pahn sukuhlki nan iren onop wet?

³ Kitail pil wehwehki ia mwomwen Siohwa eh ketin rasehng sounsilepen sihpw men. Kitail kin kilang me e ketin uhdahn apwalih mwahu sapwellime aramas akan rahnpwukat. Kitail pahn sukuhlki ia duwen eh kin ketin kaweid kitail oh apwalih atail anahn akan. Kitail eri pahn koasoiapene dahme kitail anahne wia pwe kitail en paiekihda sapwellimen Siohwa kaweid oh epwel mwahu.

4. Ia duwen Sises eh ketin apwalih sapwellimen Siohwa sihpw kan?

⁴ Siohwa ketin idihada Sises en wia Tapwin mwomwohdisohn Kristian. (Ep. 1:22, 23) Sises me iei “silepen sihpw mwahu” ketin duwehte Semeo. Sises ketin poakohng sihpw kan oh ketin apwalih irail. E pil ketin tounmeteikihla moure ong irail. (Sohn 10:11, 15) Ia uwen kaselel en sapwellime meirong ong aramas koaros! (Mad. 20:28) Kupwuren Siohwa iei me aramas koaros me kasalehda arail pwoson Sises “en dehr salongala, a en ahneki mour soutuk.”​—Sohn 3:16.

5, 6. (a) Ihs me Sises ketin pilada en apwalih sapwellime sihpw kan? Dahme sihpw kan anahne wia pwe ren paiekihda sapwellimen Sises epwel mwahu? (b) Ia kahrepe keieu kitail en men idawehn kaweid en elder kan?

⁵ Ia duwen sihpw kan ar kasalehda me Sises iei Soun Sileparail? Sises mahsanih: “Nei sihpw akan kin rong ngilei; oh I ese irail, oh re kin idawehn ie.” (Sohn 10:27) Sihpw kan kin rong ngilen Silepen Sihpw Mwahwo sang arail idawehn sapwellime kaweid ahnsou koaros. Met iangahki arail peikiong irail ko me e ketin idihada en sewese ih sile pelin sihpwo. Ni mwehin tepin Kristian ko, Sises ketin idihada sapwellime wahnpoaron oh tohnpadahk ko ren apwalih irail kan me kin idawehn ih. E mahsaniong irail en padahkih oh kamwenge sapwellime “sihmpwul kan.” (Mad. 28:20; wadek Sohn 21:15-17.) Ni rongamwahwo eh kin pousehlahte lohkseli, aramas me wiahla sapwellimen Krais tohnpadahk kan tohtohla. Kahrehda Sises ketin tehk me e pahn mie soun silepe koahiek kan pwehn apwalih mwomwohdiso kan.​—Ep. 4:11, 12.

⁶ Mwuhr, ni Pohl eh ntinglahng elder kan nan mwomwohdisohn Episos, e padahkihong irail me sapwellimen Koht manaman idihadahr irail pwehn “wia silepen mwomwohdisohn Koht.” (Wiewia 20:28) Rahnpwukat, sapwellimen Koht manaman pil kin idihada elder kan. Dahme kahrehda kitail kak ndahki met? Pwehki arail idihdida kin poahsoankihda soangen koahiek kan me anahn me mi nan Paipel. Eri ni atail kin peikiong elder kan, kitail kin kasalehda me kitail wauneki Sounsilepen Sihpw Lapalap riemeno, Siohwa oh Sises. (Luk 10:16) Ih kahrepe keieu wet me kitail kin perenki peikiong elder kan. Ahpw mie kahrepe teikan me kitail anahne idawehnki arail kaweid.

7. Ia duwen elder kan ar seweseiuk ken kolokol omw nanpwungmwahu rehn Siohwa en kehlail?

⁷ Kangoang oh kaweid kan me elder kan kihong riarail Kristian kan kin ahnsou koaros poahsoankihda dahme Paipel mahsanih. Elder kan sohte men ndaiong riarail Kristian kan mwomwen arail pahn mourki arail mour. (2 Kor. 1:24) Ahpw, re men sewese irail en pein wiahda pilipil kan me poahsoankihda kaweid kan en Paipel. Ni arail wia met, elder kan kin sewese mwomwohdiso pwehn mie minimin oh popohl. (1 Kor. 14:33, 40) Paipel mahsanih me elder kan “sohte kin tokedihsang apwahpwalih” mourarail. Met wehwehki me elder kan kin men sewese emenemen tohnmwomwohdiso pwe ren karanih Siohwa. Eri re kin mwadang en sewese emen riarail me pahn kereniong wiahda, de wiadahr pilipil sapwung ehu. (Kal. 6:1, 2; Sud 22) Mie kahrepe tohto kitail en ‘peikiong atail sounkaweid akan.’​—Wadek Ipru 13:17.

8. Ia duwen elder kan ar kin pere mwomwohdiso?

⁸ Wahnpoaron Pohl me wia sounsilepen sihpw limpoak men kehkehlingkihong rie Kristian ko nan Kolose: “Kumwail kanahieng pwe emen de pitihkinkumwaildi loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.” (Kol. 2:8) Kehkehlik wet sewese kitail en kilang pil ehu kahrepe kesempwal kitail  en peikiong kaweid en elder kan. Elder kan kin pere riarail Kristian kan sang irail ko me men kahre irail sang Siohwa. Wahnpoaron Piter kehkehlingki me “soukohp likamw ekei” oh “sounpadahk likamw ekei” pahn song kahrehiong Kristian luwet kan ren sapeikiong Siohwa. (2 Pit. 2:1, 14) Rahnpwukat, elder kan anahne kihda soangen kaweid kan me duwehte met ni ahnsou me anahn. Elder kan iei Kristian loalokong kan me ahneki koahiek me pid mour. Re idihdida nin duwen elder kan pwehki ar kasalehda me re wehwehki mwahu iren Paipel kan oh ahneki koahiek en padahngki padahk mehlel sang Paipel. (1 Tim. 3:2; Taitus 1:9) Arail ahneki koahiek, toupahrek oh loalokong me poahsoankihda Paipel kin sewese irail en kihong riarail Kristian kan kaweid mwahu kan.

9. Ia duwen Sises eh kin ketin kamwenge oh kaweid mwomwohdiso rahnpwukat?

⁹ Siohwa ketin doadoahngki sapwellime pwihn en padahkih oh kaweid riatail Kristian koaros nan sampah pwon. Kitail kin ale kaweid en Paipel tohto nan neitail pwuhk kan. Ekei pak, pwihn wet pil kin kihong elder kan nan mwomwohdiso kaweid kan. Elder kan kin ale kaweid pwukat sang kisinlikou de kaweid kan me sounapwalih me kin seiloak kin kihda. Ni ahl pwukat, sihpw kan kin ale kaweid kan me sansal.

10. Pwukoa dahieu me sounsilepe kadek men ahneki ni Kristian men eh kohkohsang mwomwohdiso?

¹⁰ Sounsilepe kadek kan ahneki pwukoa en pere oh apwahpwalih sihpw kan. Elder kan  kin keieu nsenohki irail kan me arail pwoson luwetala de irail kan me wiahda sapwung laud. (Wadek Seims 5:14, 15.) Ekei ele pil ekisekis kadohwanirailsang mwomwohdiso oh uhdi papah Koht. Dahme sounsilepe kadek men pahn wia pwehn sewese? E pahn wia uwen eh kak en rapahki irail oh kangoange irail en pwurodo nan mwomwohdiso. Sises mahsanih: “Samamwail me ketiket nanleng, e sohte kin ketin kupwurki emen me tikitik pwukat en kin salongala.”​—Mad. 18:12-14.

11. Dahme kahrehda ekei ele apwalki peikiong elder kan?

¹¹ Siohwa oh Sises iei Silepe unsek kei. Aramas akan me ira ketin doadoahngki nin duwen sounsilepe kan me kin apwalih mwomwohdiso sohte unsek. Ire mehlel wet ele kahrehiong ekei en apwalki peikiong elder kan. Ele irail kin medewe: ‘Elder kan sohte unsek duwehte kitail. Ia kahrepen kitail en rong arail kaweid kan?’ Mehlel me irail sohte unsek. Ahpw kitail en dehr kilikilangete arail soh unsek oh sapwung kan.

12, 13. (a) Sapwung dah kan me sapwellimen Koht ladu kan me ahneki pwukoa mahs wiahda? (b) Dahme kahrehda Siohwa ketin kupwurki sapwung en ohl kan me ahneki pwukoa en ntingdi nan Paipel?

¹² Paipel kin kasalehda ni mehlel duwen sapwung kan en ohl ako me Siohwa ketin doadoahngki en kahluwa sapwellime aramas akan mahs. Karasepe, Depit keidi nin duwen nanmwarki en Israel, ahpw mwuhr e dipada mwohn Koht. E wendi rehn lih pwopwoud men oh mwuri kemehla en liho pwoudo. (2 Sam. 12:7-9) Pil medewehla duwen wahnpoaron Piter. Mendahki e ahneki pwukoa laud nan mwomwohdisohn Kristian, e pil wiahda sapwung laud kan. (Mad. 16:18, 19; Sohn 13:38; 18:27; Kal. 2:11-14) Sangete Adam oh Ihp, sohte aramas emen me unsek likin Sises.

¹³ Dahme kahrehda Siohwa ketin mweidohng sapwung en ekei sapwellime ladu kan me ahneki pwukoa en ntingdi nan Paipel? Ehu kahrepe iei en kasalehda me e kak ketin doadoahngki ohl soh unsek kan ren kahluwa sapwellime aramas akan. Ni mehlel, e kin ketin wia met ahnsou koaros. Eri kitail en dehr wiahki soh unsek en elder kan rahnpwukat en wia kahrepen atail kaulimki irail de pohnsehsehla arail manaman. Siohwa ketin kasik kitail en wauneki oh peikiong irail.​—Wadek Eksodus 16:2, 8.

14, 15. Dahme kitail kak sukuhlki sang mwomwen Siohwa eh ketikihda kaweid ong sapwellime aramas akan mahs?

¹⁴ E uhdahn kesempwal kitail en peikiong elder kan. Dahme kahrehda? Medewehla ia mwomwen Siohwa eh ketikihda kaweid kan ong sapwellime aramas akan pwe ren kak pitsang ahnsou apwal kan mahs. Karasepe, ni ahnsou me mehn Israel ko kohkohsang Isip, Koht ketin doadoahngki Moses oh Aaron en kihong irail kaweid kesempwal kan. Pwe ren pitsang kalokolok eiseko, mehn Israel ko pil anahne peikiong kaweid kan. Re ale kaweid en wia mwengehn soutik tohrohr ehu, kemehla sihpw men oh usupihki uhr en wenihmw oh temwen imwarail kan ntahn sihpwo. Ia duwe, Koht me pein ketin mahseniong aramas ako? Soh, aramas ako anahne rong ohl mah kan me ale kaweid kan sang Moses. (Eks. 12:1-7, 21-23, 29) Ni ahl wet, Siohwa ketin doadoahngki Moses oh ohl mah ko ren kaweid aramas ako. Rahnpwukat, Siohwa kin ketin doadoahngki elder kan ren wia met.

¹⁵ Mwein ke kak medewehla ahnsou tohto teikan nan Paipel me Siohwa ketin doadoahngki aramas akan oh tohnleng kan ren kihong sapwellime aramas akan kaweid kan. Pak tohto kaweid pwukat kin kapitirailla. Nan soangen irair pwukat koaros, Koht ketin koasoanehdi en ketikihong meteikan pwukoa en wiliandi mware oh padahkihong sapwellime aramas akan dahme re anahne wia  nan ahnsou keper kan. Mie kahrepe mwahu me kitail en kasik me Siohwa pahn ketin wia soahng wette ong sapwellime aramas akan ni Armakedon. Elder kan rahnpwukat me ahneki pwukoa en weliwelian Siohwa oh sapwellime pwihn anahne kanahieng ren dehr doadoahngki arail manaman daulihala sang dahme kohwong irailehr.

16. Ia kapitien Koht me kitail anahne rong?

¹⁶ Sapwellimen Siohwa aramas akan iei “pwihn sihpw teieu” me mi pahn sileparail mehtehmen, Sises Krais. (Sohn 10:16) Sises mahsanih me e pahn ketin ieiang sapwellime tohnpadahk kan, “ahnsou koaros lel ni imwin kawa, [“koasoandi en mehkan,” NW].” (Mad. 28:20) Nin duwen Nanmwarki men nanleng, e ketin kaukaweid ni unsek mwekid koaros me pahn wiawi mwohn eh pahn ketido pwehn kasohrehla ahn Sehdan sampah. Ia duwen atail kak miniminpene oh ale perepe mwahu nan sapwellimen Koht pwihn? Paipel mahsanih: “Kumwail pahn rong kapitie sang mwurimwail me mahsanih, ‘Iet ahlo, kumwail idawehn.’” Lepin lokaia wet “kapitie” pidada dahme Siohwa ketin padahkihong kitail nan Paipel oh dahme Ih oh Sises ketin mahsanih ni ara ketin doadoahngki silepen sihpw kan me ira ketin idihadahr pwehn kaweid kitail.​—Wadek Aiseia 30:21; Kaudiahl 3:22.

17, 18. (a) Ia duwen sapwellimen Koht aramas akan ar mi nan keper? Dahme kitail kak kamehlele? (b) Dahme kitail pahn sukuhlki nan iren onop en mwuhr?

¹⁷ Paipel mahsanih me Sehdan duwehte “laion emen me kin weriwer, raparapahki ihs me e pahn kadallehla.” (1 Pit. 5:8) Rasehng mahn lawalo oh duhpek men, e kin raparapahki pelin sihpwo oh awiawih ahnsou mwahu en poar pohn sihpw men me luwet de dohsangehr pelin sihpwo. Met iei ehu kahrepe mwahu me ahnsou koaros kitail anahne uhdahn karanih mwomwohdiso oh ‘Silepatail oh Sounepwelpen’ atail mour. (1 Pit. 2:25) Me pid duwen irail kan me pitsang kahn kamakam kowahlapo, Kaudiahl 7:17 mahsanih me Sises “pahn wialahr sileparail, oh ih me pahn kin kahluwairaillahng ni pilen komour; oh Koht pahn ketin limwihasang pilen masarail kan.” Inou wet uhdahn kaselel!

¹⁸ Pwukoahn Kristian elder kan en apwahpwalih mwomwohdiso uhdahn kesempwal. Ia duwen ohl pwukat me idihdidahr ar kak kanahieng pwe ren apwalih mwahu sapwellimen Sises sihpw kan? Kitail pahn diar pasapengpen met nan iren onop en mwuhr.