1. Soangen tounmetei dah kan me aramas tohto kin wiahda, oh dahme kahrehda?

 ARAMAS kin perenki wiahda tounmetei kan ong soahng kan me kesempwal ong irail. Pahpa nohno kan perenki tounmeteikihla arail ahnsou, kehl oh neirail mwohni pwehn wia kamwahu ong neirail seri kan. Me pwulopwul kan me men siai nan Olympic kin doadoahngki ahnsou laud pwehn praktis oh ale kaiahn laud rahn koaros, ahpw iengerail kan kin mwadong oh pereperen. Sises pil ketin wiahda tounmetei kan ong soahng kan me kesempwal ong ih. E sohte ketin akadei ong ahneki mour paiamwahu de kepwehpwe de naineki seri. Ahpw e kupwurki doadoahngki sapwellime kehl koaros pwehn utungada Wehin Koht. (Mad. 4:17; Luk 9:58) Sapwellime tohnpadahk kan pil wiahda tounmetei tohto. Wehin Koht iei me keieu kesempwal nan arail mour, eri re wiahda tounmetei kan ong met. (Mad. 4:18-22; 19:27) Kitail anahne pein idek, ‘Dahme kesempwal nan ei mour?’

2. (a) Soangen tounmetei dah kan me Kristian mehlel koaros anahne kapwaiada? (b) Soangen tounmetei dah teikan me ekei kin wiahda?

² Mie ekei tounmetei me Kristian mehlel koaros anahne wiahda. Mepwukat anahn ma kitail men kolokol atail nanpwungmwahu rehn Koht. Atail ahnsou oh kehl me kitail doadoahngki ong kapakap, wadek Paipel, wia kaudok en peneinei, towehda mihting kan, oh kalohk iei tounmetei kan me kitail anahne kapwaiada. * (Sos. 1:8; Mad. 28:19, 20; Ipru 10:24, 25) Pwehki atail nanti oh pil sapwellimen Siohwa kapai kan, doadoahk en kalohk kin mwadangala, oh aramas akan me tepida kaudokiong Koht kin wie tohtohla sang ni arail pokonlahng “nahnao, wasa me Tehnpas Sarawio” en Siohwa mi ie. (Ais. 2:2) Pwehn utungada Wehio, me tohto kin wiahda tounmetei kan pwehn  papah nan Pedel, sewese kauwada Wasahn Kaudok kan oh Wasahn Mihting Tohrohr kan, koasoanehdi mihting tohrohr kan de sewese irail me lelohng melimel, rerrer en sahpw ape. Mendahki Siohwa sohte ketin kasik kitail en wiahda soangen tounmetei pwukat pwehn ahneki mour soutuk, tounmetei pwukat anahn pwehn utungada Wehin Koht rahnpwukat.

3. (a) Ia duwen atail paiekihda atail kin wiahda tounmetei kan ong Wehio? (b) Peidek dah kan kitail anahne idek?

³ Rahnpwukat, kesempwalpen en wia uwen atail kak ong Wehio uhdahn laudsang mahs. Ia uwen atail kin peren me aramas tohto kin men wiahda tounmetei kan ong Siohwa. (Wadek Melkahka 54:6.) Ma kitail pil wia met, kitail pahn nsenamwahu ni atail awiawih Wehin Koht en leledo. (Deud. 16:15; Wiewia 20:35) E kesempwal ong kitail koaros en kasawih pein kitail oh idek peidek pwukat: Mie ahl akan me kitail kak kalaudehla atail doadoahk ong Wehio? Ia duwen atail kin doadoahngki atail ahnsou, kehl, koahiek, oh neitail mwohni? Dahme kitail en dehr pohnsehsehla ni atail kin wia tounmetei kan? Kitail en koasoiapene dahme kitail kak sukuhlki sang ekei mehn kahlemeng duwen meirong kan me pein emen kin nsenki kihda. Met pahn sewese kitail en ahneki peren laud.

4. Ia duwen mehn Israel kan ar paiekihda arail wia meirong kan?

⁴ Aramas akan nan Israel mahso anahne wiahda meirong kan pwehn ale mahkpen diparail. Meirong kan anahne wiawi pwehn ale sapwellimen Siohwa kupwuramwahu. Ekei meirong pwukat koasoandier, a ekei kin sang ni emen eh pein toukihda. (Lip. 23:37, 38) Meirong isihs kak wia meirong ehu me emen pein toukihda, de wia kisakis ehu, ong Siohwa. Ehu karasepen soangen meirong pwukat me wiawihong Siohwa iei me wiawi ni kasarawi en tehnpas sarawio me Solomon wiahda.​—2 Kron. 7:4-6.

5. Dahme Siohwa ketin wia pwe me semwehmwe kan en pil kak iang wia meirong?

⁵ Siohwa ni limpoak ketin mwahngih me ahn koaros ar meirong sohte kak pahrekpene. E ketin padahkihong mehn Israel ko ren kihda ihte uwen me re kak. Sapwellimen Siohwa kosonned kehkehlingki me meirong en mahn akan anahne wiawi oh me re anahne kakerehdi ntahn mahn ako pohn pei sarawio. Meirong pwukat wia “kamwomwada soh dehde ehu en kamwahu kan” me Sises pahn ketin wiahda. (Ipru 10:1-4) Ahpw Siohwa ketin wiahda kosonned wet ni ahl ehu me uhdahn toupahrek. Karasepe, Koht ketin kupwurki  me emen kak meirongki mwuroi men ma e sohte kak kihda meirong laud ehu, duwehte sihpw wol de emen kuht. Eri, me semwehmwe kan pil kak wia meirong ong Siohwa oh peren. (Lip. 1:3, 10, 14; 5:7) Mehnda Siohwa ketin kupwurki soangsoangen mahn ekei ong meirong, ahpw mie soahng riau me e ketin kupwurki sang koaros me kin toukihda arail meirong.

6. Soahng riau dah me anahn ni emen eh wia eh meirong? Ia uwen kesempwal en peikiong koasoandi pwukat?

⁶ Keieu, mehmen me kihda meirong ehu anahne kihda me keieu mwahu. Ma mahno soumwahu de mie samin kis reh, Siohwa sohte pahn ketin kupwurki meirongo. (Lip. 22:18-20) Keriau, aramaso me kihda meirongo anahne mwakelekel nin duwen me Kosonnedo kawehwehda. Ma e sohte mwakelekel, keieu e anahne wia meirong en tomwki dihpw de meirong en kapwung pwe en kak pwurehng ale sapwellimen Siohwa kupwuramwahu. Ihte ni ahl wet me Siohwa pahn ketin kupwurki eh meirongo me e toukihda. (Lip. 5:5, 6, 15) Met uhdahn kesempwal. Siohwa ketin mahsanih me ma emen me sohte mwakelekel kang meirong en kaminimin iangahki meirong kan me emen toukihda, e pahn ale kalokepe. (Lip. 7:20, 21) Ahpw ma emen me mwakelekel oh eh meirongo sohte soumwahu de mie samin kis, e pahn ahneki nsen mwakelekel oh peren laud.​—Wadek 1 Kronikel 29:9.

7, 8. (a) Soangen peren dah me irail me kin wia tounmetei kan ong Wehio kak ahneki? (b) Dahme kitail ahneki me kitail kak tounmeteikihong Siohwa?

⁷ Rahnwet, tohtohn riatail Kristian kan kin men doadoahk laud ni arail papah Siohwa. Met kin kaperenda Siohwa. Atail doadoahk laud pwehn sewese riatail kan pil kin kaperenda kitail. Emen brother me kin sewese kauwada Wasahn Kaudok kan oh pil sewese irail me lelohng kahpwal kan me duwehte melimel de rerrer en sahpw ape, koasoia me e apwal ong ih en kawehwehda eh pepehm ni eh sewese rie kan. E nda: “Ei kilang brother oh sister kan wasao arail kasalehda peren oh kalahngan mwurin arail pedolong nan arail Wasahn Kaudok kapw, de ni arail kin alehdi sawas mwurin kahpwal laud ehu wiawi, met kahrehda ei nannanti oh doadoahk laud uhdahn mie katepe.”

⁸ Sapwellimen Siohwa pwihn nin sampah kin ahnsou koaros rapahki ahl akan me re kak wia pwehn utungada Wehio. Nan pahr 1904, Brother C. T. Russell kawehwehda me kitail koaros anahne wia uwen atail kak en doadoahngki atail ahnsou, kehl en kamwakid meteikan, neitail  mwohni de soahng teikan, pwehn kalinganahla Siohwa. Mwein mie mehkot me kitail kak luhs sang ni atail wia tounmetei kan ong Siohwa, ahpw tounmetei pwukat kin wahdo kapai tohto. (2 Sam. 24:21-24) Ia duwe, kitail kak kamwahwihala mwomwen atail kin doadoahngki dahme kitail ahneki ni atail wia meirong kan ong Siohwa?

9. Dahme kitail sukuhlki sang Luke 10:2-4 duwen atail en doadoahngki atail ahnsou?

⁹ Atail ahnsou. Ahnsou oh doadoahk laud kin anahn pwehn kawehwehda oh wiahda neitail pwuhk kan, kauwada Wasahn Kaudok oh Wasahn Mihting Tohrohr kan, koasoanehdi mihting tohrohr kan, sewese wasa kan me lelohng kahpwal laud, oh pil wia doadoahk teikan me anahn. Awahte 24 nan rahn ehu, ahpw Sises ketikihda ehu kaweid me kak sewese kitail en doadoahngki atail ahnsou ni loalokong. Ni eh ketin kadarala sapwellime tohnpadahk kan nan kalohk, Sises mahsaniong irail me ren dehr “uhdi nanial akan pwehn rahnmwahwih aramas.” (Luk 10:2-4) Dahme kahrehda Sises ketikihda kaweid ko? Ni mwehin Sises, ni aramas ako ar rahnmwahwih emenemen, re sohte kin ihte dairukedi de itipe. Ahpw re kin pwoalehdi emen pak tohto oh pil kin dairukedi lel nan pwehl. Mepwukat koaros anahne ahnsou laud. Sises sohte ketin mahmahsanih me sapwellime tohnpadahk ko ren wia aramas me sehse tiahk. Ahpw e ketin sewese irail ren wehwehki me re sohte ahneki ahnsou laud, eri re anahne doadoahngki arail ahnsou ni ahl me keieu mwahu oh wia dahme keieu kesempwal. (Ep. 5:16) Ia duwe, kitail kak doadoahngki kaweid wet pwehn ahneki ahnsou laud en utungada doadoahk en Wehio?

10, 11. (a) Dahme atail sawas en mwohni ong doadoahk en kalohk sampah pwon kin utungada? (b) Kaweid dahieu nan 1 Korint 16:1, 2 me kak sewese kitail?

¹⁰ Neitail mwohni. Mwohni laud anahn pwehn utungada doadoahk en kalohk sampah pwon. Nan sounpar koaros, tala rar pak dep kei kin kadoadoahk pwehn utungada doadoahk me sounapwalih kan me kin seiloak, pioneer tohrohr kan, oh misineri kan kin wia. Sang pahr 1999, Wasahn Kaudok tohtohsang rienen pahkid limepwiki (24,500) kin wiawihda nan sahpw kan me riatail kan semwehmwe. Ahpw mpen Wasahn Kaudok 6,400 pil anahnte wiawihda. Nan sounpwong koaros, Kahn Iroir oh Awake! meh sapw (100 million) kin wiawihda. Doadoahk pwukat koaros kak pweida pwehki sawas me ke pein toukihda.

¹¹ Siohwa ketin kamwakid wahnpoaron Pohl en ntingihedi kaweid ehu kitail kak doadoahngki ni atail kihda sawas en mwohni. (Wadek 1 Korint 16:1, 2.) Pohl kangoange rie Kristian kan nan Korint ren dehr awih lao imwin wihko en kilang ma mie mehkot luhwe me ren sawaski, ahpw ren koasoanehdi ni tepin wihko ia uwen mwohni me re kak kihda. Duwehte tepin Kristian ko, brother oh sister kan rahnwet kin kaunopada mwowe en kihda ni sapan dahme re kak kihda. (Luk 21:1-4; Wiewia 4:32-35) Siohwa kin ketin kesempwalki tounmetei me sapwellime aramas akan wiahda.

12, 13. Dahme kahrehda ekei mwein kin medewe me re sohte kak patohwanohng Siohwa arail kehl oh koahiek kan? Ia duwen Siohwa eh kak ketin sewese irail?

¹² Atail kehl oh koahiek kan. Siohwa kin ketin utungada atail nannanti doadoahngki atail kehl oh koahiek kan ong Wehio. E ketin inoukihda en ketin sewese kitail ni ahnsou me sohla atail kehl. (Ais. 40:29-31) Ia duwe, kitail kin medewe me sohte atail koahiek me anahn pwehn utungada doadoahk en Wehio, de meteikan pahn doadoahk mwahusang kitail? Tamataman me Siohwa kak ketin kamwahwihala atail koahiek kan, duwehte me e ketin wiahiong Pesalel oh Oliap.—Eks. 31:1-6; menlau kilang tepin kilel.

¹³ Siohwa ketin kangoange kitail en dehr mweidohng mehkot en kauhdi atail en patohwanohng ih dahme keieu mwahu. (Lep. Pad. 3:27) Ahnsou me tehnpaso onohnsapahlda, Siohwa ketin mahsanihong mehn Suhs kan nan Serusalem ren medewe mwahu dahme re wiewia pwehn utungada doadoahko. (Akkai 1:2-5)  Re kin kedirepwla oh sohla mwohneki mahs sapwellimen Siohwa doadoahk nan arail mour. Kitail en idek rehtail: Atail wiewia kupwuren Siohwa kin kesempwal ong kitail laudsang soahng teikan koaros? Kitail kak medewe mwahu duwen atail mour oh koasoanehdi ia duwen atail kak kalaudehla atail utungada Wehin Koht ni imwin rahn pwukat?

14, 15. (a) Ia duwen riatail Kristian kan me semwehmwe ar kin kangoange iuk? (b) Dahme kitail en men wia?

¹⁴ Aramas tohto kin mi wasa kan me mour uhdahn apwal oh kahpwal duwehte semwehmwe kalapw mie. Atail pwihn kin doadoahk laud pwehn sewese riatail Kristian kan nan sahpw pwukat. (2 Kor. 8:14) Ahpw, riatail kan me semwehmwe pil kin kesempwalki pwais kaselel en kihkihwei. E kin kaperenda Siohwa ni eh ketin mahsanihada arail kin perenki kihda dahme re kak.​—2 Kor. 9:7.

¹⁵ Nan ehu sapwen Aperika me uhdahn semwehmwe, ekei brother ko kin katohrehla wasakis nan arail mwetuwelo pwe en padokedi wahn sahpw mehn netla. Mwohni me re alehdi sang kisin wasao, re kin kihda ong doadoahk en Wehio. Nan sahpw ohte, brother oh sister kan men iang sewese kauwada Wasahn Kaudok. Ahpw ahnsowo kasaing ahnsou me re kin kedirepwki padok wahnsahpw. Pwehki re mente iang sawas, re kin iang wia Wasahn Kaudoko ni rahn, a ni soutik kan re nantihong kanekehla arail padok arail wahnsahpw ko. Re uhdahn kasalehda tounmetei! Met katamankihong kitail duwen Kristian kan en mahs nan Masedonia. “Nan arail semwehmwe,” ahpw re kin peki Pohl ni ngidingid en mweidohng irail ren iang kihda arail sawas en mwohni ong riarail Kristian teikan. (2 Kor. 8:1-4) Kitail en pil kihda dahme kitail kak pwehn kasalehda me kitail kin kalahngankihong Siohwa kapai kan me e ketikihong kitail.​—Wadek Deuderonomi 16:17.

16. Ia duwen atail kak tehk mwahu me Siohwa kin ketin kupwurki atail tounmetei kan?

¹⁶ Ni atail kin wia tounmetei kan, kitail anahne kanahieng kitail en dehr pohnsehsehla soahng kan me keieu kesempwal, duwehte atail peneinei. Duwehte mehn Israel kan, kitail anahne tehk mwahu me Koht pahn ketin kupwurki atail meirong kan me kitail kin nsenki kihda. Kitail anahne tamataman me atail peneinei oh pein atail kaudok ong Siohwa iei pwukoa kan me keieu kesempwal ong kitail. Ele kitail ahneki ahnsou mwahu en doadoahngki atail ahnsou, kehl, de soahng teikan pwehn sewese meteikan. Ahpw kitail en dehr mweidohng met en kauwehla atail apwalih anahn akan en atail peneinei de arail nanpwungmwahu rehn Siohwa. Kitail sohte kak tounmeteikihong Siohwa dahme kitail sohte ahneki. (Wadek 2 Korint 8:12.) Pil ehu, kitail anahne doulahte kakehlaka atail nanpwungmwahu rehn Siohwa. (1 Kor. 9:26, 27) Kitail kak kamehlele me ma kitail mour pahrekiong koasoandi kan en Paipel, atail tounmetei kan pahn kaperenda kitail, oh Siohwa “pahn kin kupwurperenki.”

17, 18. Ia atail pepehm ong irail me wiahda tounmetei kan ong Wehio? Dahme kitail koaros anahne medemedewe?

¹⁷ Riatail Kristian tohto kin toukihda ni soh roporop arail ahnsou, kehl oh neirail mwohni pwehn utungada doadoahk en Wehio. (Pil. 2:17) Kitail uhdahn kalahnganki irail me kin kasalehda irair en tounmetei. Kitail pil kapinga ahn brother kan me kin tiengla mwowe nan doadoahk en Wehio arail pwoud oh neirail seri kan pwehki arail tounmetei.

¹⁸ Doadoahk laud anahn pwehn utungada doadoahk en Wehio. Kitail en kapakap oh medewe mwahu ia duwen atail kak toukihda uwen atail kak ong Siohwa. Ma kitail wia met, kitail pahn ahneki kapai tohto met oh pil laudsang “nan mour me pahn kohdo.”​—Mark 10:28-30.