1, 2. Dahme kahrehda kitail anahne esehla Melkahka 45?

 NANMWARKI me sapwellimanki lingan en powehdi ketiket kohieilahng mahwen pwehn peiki mehlel oh pwung. E ketin kalowehdi sapwellime imwintihti kan, oh mwurin eh ketin kana, e ketin pwoudikihda lih kamwohd kaselel men. Koaros tamataman oh kawauwih nanmwarki menet kohkohlahte. Mepwukat iei ekei mwekid kaselel me Melkahka 45 kasalehda.

² Ahpw Melkahka 45 sohte wiahte soai kaselel ehu me imwila mwahu. Mwekid pwukat me sansalda wasaht kin kesempwal ong kitail pwehki e kin pidada atail mour met oh pil ahnsou kohkohdo. Kitail tehk kanahieng ni atail onopki melkahka wet.

3, 4. (a) Dahkot “pato kaselel” me soun melkahkao ntingihdi, oh ia duwen eh kin kamwakid mohngiongitail? (b) Rohng dahieu me pid “nanmwarki” men me kitail kin kalohki? Ia duwen lowetail eh kin rasehngala nein sounnting koahiek men pinsel?

³ Wadek Melkahka 45:1. Mohngiong en sounmelkahkao mwekidkihda “pato kaselel kei” me pid duwen nanmwarki men. Ihme  kahrehda peren “kipedier” eh mohngiong oh lowe rasehngala “nein sounnting pinsel” koahiek men.

⁴ Ia wehwehn met ong kitail? Rongamwahu en Wehin Mesaiao wia pato kaselel kei me kipedier de kadirehla mohngiongitail. Rongamwahu en Wehio wiahla mehkot “kaselel” nan pahr 1914. Dahme kahrehda? Pwehki sang nan pahro kohdo, rohng wet solahr kin pidada duwen Wehio eh pahn kaunda ahnsou kohkohdo. Ahpw sang pahr 1914 kohdo, rohngo kin pid duwen uhdahn koperment ehu me met wie kakaun nanleng. Met iei “Rongamwahu en Wehin Koht” me kitail kin kalohki “wasa koaros nin sampah, pwe kadehde en mie ong aramas koaros.” (Mad. 24:14) Ia duwe, rongamwahu en Wehio kin “kipedier” de kaperenda mohngiongitail? Kitail kin uhdahn ngoangki kalohki rongamwahu en Wehio? Duwehte soun melkahkao, atail “koulen kaping” kin pid nanmwarki men. Kitail kin kalohki duwen rongamwahwo me ahnsou wet Sises iei Kaun en Wehin Mesaiao nanleng. Se luke koaros, pil kaun akan en sampah wet en pwungki sapwellimen Sises Wehi. (Mel. 2:1, 2, 4-12) Oh lowetail kin rasehngala “nein sounnting pinsel” koahiek men ni atail kin doadoahngki neitail Paipel nan atail doadoahk en kalohk.

5. (a) Dahme kahrehda kitail kak nda me Sises ketin “masamwahu”? (b) Ia duwen Sises eh ketin kalohk ni kadek? Ia duwen atail kak idawehn sapwellime mehn kahlemeng?

⁵ Wadek Melkahka 45:2: Paipel sohte nohn kasalehda duwen mwomwen Sises. Nin duwen ohl unsek men, ele e “masamwahu.” Ahpw eh kin ketin mehlel oh lelepek ong Siohwa kahrehiong eh uhdahn masamwahu. Sises pil ketin kalohki rongamwahu en Wehio ni kadek oh doadoahngki mahsen kan me sair mohngiong en aramas akan. (Luk 4:22; Sohn 7:46) Ia duwe, kitail kin wia uwen atail kak pwehn kahlemengih Sises nan atail doadoahk en kalohk?​—Kol. 4:6.

6. Ia duwen Koht eh ketin kapaiada Sises kohkohlahte?

⁶ Pwehki Sises ketin lelepek oh uhdahn poakohng Semeo, Siohwa ketin kapaiada eh doadoahk en kalohk nin sampah oh ketin katingih mwurin e meirongkihla eh mour. Wahnpoaron Pohl ntingihedi duwen Sises: “E ketin mpahi, oh e ketin weid nan elen peik lao lel mehla—eh pwoula pohn [“tukehn kalokolok,” NW]. Pwehki kahrepe wet Koht ketin kasapwiladahng nan wasa me keieu ileile, oh ketikihong mwar ehu me lapalapasang mwar akan koaros; pwe mehkoaros me momour nanleng, oh nin sampah, oh pil pahn sampah,en kelehpwikihdi, pwe re en wauneki mwaren Sises; oh koaros en sakarkihda ni sansal me Sises Krais me Kaun, ong ni kalinganpen Koht Sahm.” (Pil. 2:8-11) Siohwa ketin kapaiada Sises kohkohlahte sang ni eh ketin kaiasada ih ong mour me sohte kak mehla.​—Rom 6:9.

7. Ni ahl dah kan me Koht ketin keiehdi Sises laudsang “nanmwarki teikan”?

⁷ Wadek Melkahka 45:6, 7. Pwehki Sises ketin uhdahn poakohng dahme pwung oh ketin kalahdeki soahng koaros me kakete kihsang wahu me Semeo sapwellimaniki, Siohwa ketin keiehdi ih nin duwen Nanmwarki en Wehin Mesaia. Siohwa ketin keiekihdi Sises “peren” laudsang me e ketikihong “nanmwarki teikan,” me iei nanmwarki kan en Suda me pil wia kadaudok en Depit. Ni ahl dah? Keieu, pein Siohwa me ketin keiehdi Sises. Keriau, Siohwa ketin keiehdi Sises pwehn kaunda nin duwen Nanmwarki oh pil wia Samworo Lapalap.  (Mel. 2:2; Ipru 5:5, 6) Kesiluh, Sises sohte ketin keikihdi leh ahpw e ketin keikihdi sapwellimen Koht manaman. Mwuhr, e ketin kaunda sang nanleng, a kaidehn nin sampah.

8. Dahme kahrehda kitail kak kamehlele me sapwellimen Sises kaunda kin pwung? Dahme kahrehda kitail kak nda me Sises sapwellimaniki pwuhng en kaunda?

⁸ Nan pahr 1914, Siohwa ketin idihada sapwellime Ohlo nin duwen Nanmwarki en Wehin Mesaia nanleng. Sises pahn ketin ‘kakaun sapwellime kan ni me pwung,’ eri kitail kak kamehlele me sapwellime kaunda pahn ahnsou koaros pahrek oh pwung. E sapwellimaniki pwuhng en kaunda pwehki Siohwa me ketin idihada ih. Sapwellimen Sises kaunda pahn “poatopoat kohkohlahte.” Kitail uhdahn pohlki atail papah Siohwa pahn kaundahn Nanmwarki me e ketin idihada.

9, 10. (a) Iahd me Krais ketin katengehdiong sapwellime kedlahso ni lukopeo, oh ia duwen eh ketin doadoahngki? (b) Ia duwen Krais eh pahn ketin doadoahngki sapwellime kedlahso ni ahnsou kohkohdo?

⁹ Wadek Melkahka 45:3. Siohwa ketin mahsanihong Nanmwarkio en katengehdi nah kedlahso ni lukope. Sang ni eh ketin wia met, e ketin mweidohng Sises en mahweniong irail kan me uhwong sapwellime kaunda oh kasohrehla irail. (Mel. 110:2) Pwehki Krais ketin wia Sounpei oh Nanmwarki me sohte emen kak kalowehdi, e ketin mwarenki “nanmwarki roson.” E ketin katengehdi sapwellime kedlahso ni lukopeo nan pahr 1914, ni eh ketin kalowehdi Sehdan oh ngehn saut kan oh kesepwekeirailsang nanleng ong nin sampah.​—Kaud. 12:7-9.

¹⁰ Ahnsowo wia tepin eh kana nin duwen Sounpei oh Nanmwarki. E pil ketin anahnehte “kolahng kalowehdi eh imwintihti kan.” (Kaud. 6:2) Siohwa ketin koasoanehdier me soahng koaros me wia kisehn ahn Sehdan sampah anahne sohrala, oh pil manaman me Sehdan oh nah ngehn saut kan ahneki anahne kohsang. Keieu, Papilon Lapalap, me iei pelien lamalam likamw koaros nin sampah, pahn sohrala. Siohwa pahn ketin doadoahngki kaunen koperment kan nin sampah pwehn kasohrehla “lih suwedo.” (Kaud. 17:16, 17) Mwuhr, Krais pahn ketikihsang douluhl koperment kan koaros nan ahn Sehdan sampah. Eri, Sises, me adaneki “tohnleng en pwoahr loalo me soh kapi,” pahn ketin kaimwisekihla sapwellime mahwen ni eh pahn ketin kesepwekehdilahng Sehdan oh ngehn saut akan nan pwoar loalo me soh kapi. (Kaud. 9:1, 11; 20:1-3) Kitail pahn kilang ia duwen Melkahka 45 eh kohpada duwen mwekid pwukat.

11. Ia duwen Krais eh ketilahng mahwenki “mehlel”?

¹¹ Wadek Melkahka 45:4. * Nanmwarkio sohte ketilahng mahwen pwehn kalowehdi sahpw kan de kalidu aramas akan. E sapwellimaniki kahrepe mwahu pwehn ketila mahwen. E ketin mahwenki “mehlel oh aktikitik oh pwung.” Siohwa kelehpw me ketin sapwellimaniki pwuhng en kaunda nanleng oh sampah. Ire “mehlel” wet iei me keieu kesempwal oh anahne en poadoandoarla. Ni Sehdan eh uhwongada Koht, e mwomwen ndinda me Siohwa sohte sapwellimaniki pwuhng en kaunda. Sangete ahnsowo kohdo, ngehn saut kan oh aramas akan peidengki ire wet. Met iei ahnsou me Nanmwarkio me Siohwa ketin idihada en ketila mahwen oh kadehdehda me Siohwa kelehpw me sapwellimaniki pwuhng en kaunda.

12. Ia duwen Nanmwarkio eh ketilahng mahwenki “aktikitik”?

¹² Nanmwarkio pil ketilahng mahwenki “aktikitik.” Sises kin ketin ahnsou koaros wia mehn kahlemeng keieu mwahu en aktikitik oh peik ong Semeo. (Ais. 50:4, 5; Sohn 5:19) Sapwellimen Nanmwarkio ladu lelepek kan koaros  anahne idawehn sapwellime mehn kahlemeng oh ren aktikitik ni arail peikiong Siohwa nin duwen arail Kaun ni soahng koaros me re kin wia. Irail kante me kin wia met me pahn mour nan sapwellimen Koht sampah kapw.​—Sek. 14:16, 17.

13. Ia duwen Krais eh ketilahng mahwenki “pwung”?

¹³ Krais pil ketilahng mahwenki “pwung.” Pwung wet iei sapwellimen Siohwa koasoandi en dahme pwung oh dahme sapwung. (Rom 3:21; Deud. 32:4) Aiseia kohpada duwen Sises Krais ni ahl wet: “Nanmwarki men pahn mie me inenen inen oh pwung.” (Ais. 32:1) Erein sapwellime kaunda, Sises pahn ketikihdo “lahng kapw” ehu oh “sampah kapw” ehu me aramas koaros pahn wia dahme pwung. (2 Pit. 3:13) Met wehwehki me aramas koaros nan sampah kapwo pahn anahne mour pahrekiong sapwellimen Siohwa koasoandi en dahme pwung oh dahme sapwung.​—Ais. 11:1-5.

14. Ia duwen palimaun en Krais eh pahn ketin wiahda “soahng kapwuriamwei kan”? (Menlau kilang tepin kilel.)

¹⁴ Sounmelkahkao nda me Nanmwarkio ketin katengehdi kedlahs ni lukopeo ni eh ketilahng mahwen. (Mel. 45:3) Ih eri ale sapwellime kedlahso ni palimaune oh tepida doadoahngki. Sounmelkahkao kohpada duwen Sises ni ahl wet: “Palimaunomw pahn kaweid uhk ni soahng kapwuriamwei kan.” (Mel. 45:4, NW) Ni Sises eh ketilahng kasohrehla ahn Sehdan sampah ni Armakedon, e pahn ketin wiahiong sapwellime imwintihti kan “soahng kapwuriamwei kan.” Kitail sohte uhdahn ese ia duwen Nanmwarkio eh pahn ketin kasohrehla ahn Sehdan sampah. Ahpw kitail ese me sohte lipilipil dahme Sises ketin wia pahn kamasepwehkihada irail me sohte peikiong sapwellimen Koht mehn kataman kan oh sohte pwungki kaundahn Nanmwarkio. (Wadek Melkahka 2:11, 12.) Ni eh ketin kohpada duwen imwio, Sises mahsanih me aramas akan pahn “lipwongmaskihla ar masak ni ar pahn awiawih mehkan me pahn wiawihong sampah pokon; pwe poahsoan en pahnlahng kan pahn pingida oh rerrer.” E pil mahsanih: “Ih ahnsowo me Nein-Aramas pahn pwarada ketiket kohdo nan depwek ehu ni roson oh lingaling lapalahpie.”​—Luk 21:26, 27.

15, 16. Ihs me pahn iang karis en sounpei me pahn idawehn Krais kolahng mahwen?

¹⁵ Pwuhken Kaudiahl pakairki duwen Nanmwarkio eh pahn ketido “ni roson oh lingaling lapalahpie” pwehn kalowehdi sapwellimen Koht imwintihti kan. E mahsanih: “I ahpw kilangada nanleng eh ritida oh oahs pwetepwet men pwarada. Soundake oahso mwarenki Loalopwoat oh Mehlel. E kin wia kopwung oh kin mahwen duwen me pwung. Karis en sounpei en nanleng kan kin idawehn, dake oahs pwetepwet kei, oh likawih likou pwetepwet mwakelekel. Kedlahs keng pwoat uhsang ni ewe, me e pahn kin kalowehkihdi wehi kan. E pahn kaunkinirailda sokon mete; oh pein ih pahn tiakasang, nan wasahn tiahk wain, wainen engieng en Koht.”​—Kaud. 19:11, 14, 15.

¹⁶ Ihs me pahn iang “karis en sounpei” me idawehn Sises kolahng mahwen? Tohnleng ko iang Sises mahwen ni eh tepin katengehdi sapwellime kedlahs ni lukopeo oh kesepwekehsang nanleng Sehdan oh ngehn saut kan. (Kaud. 12:7-9) Eri e pwung en nda me ni Armakedon, tohnleng sarawi kan pahn iang sapwellimen Krais karis en sounpei. Ia duwe, pil mie ekei me pahn iang? Sises ketin inoukihong rie me keidi kan inou wet: “Ong irail kan me dadaurete lao powehdi me suwed koaros, oh wiewiahte lel ni imwi ei doadoahk, I pahn kihong irail manamanohte me I ale sang rehn Semei: I pahn kihong irail manaman en kaunkihda wehi kan sokon mete, oh manaman en kauwehla wehi kan duwehte sah me wiawihkihda pwehl.” (Kaud. 2:26, 27) Eri rien Krais me keidi kan me iasadahng nanleng pahn pil iang kisehn sapwellime karis en sounpei nanleng. Re  pahn iang Sises ni eh ketin wia “soahng kapwuriamwei kan” pwehn kasohrehla wehi kan.

17. (a) Dahme oahs pwetepweto me Krais ketin dake kin wehwehki? (b) Dahme kedlahso oh kesik ketieuwo kin wehwehki?

¹⁷ Wadek Melkahka 45:5. Kaudiahl 6:2 mahsanih: “I ahpw kilangada oahs pwetepwet men. Me dakeo weuwa kesik ketieu pwoat oh nihn ehu kohieng. E ahpw mwesel kohkohla, kolahng kalowehdi eh imwintihti kan.” Oahs pwetepwet me Nanmwarkio dake kin wehwehki mahwen me pwung oh Koht ketin kupwurki. (Kaud. 19:11) Kapatahiong kedlahso, Nanmwarkio pil ketin weuwa kesik ketieu ehu. Kedlahso oh kesik ketieuwo kin wehwehki soangen wiepe kan me Krais pahn ketin doadoahngki pwehn kasohrehla sapwellime imwintihti kan.

18. Dahme pahn wiawi ni Krais eh ketin doadoahngki sapwellime “arep” kan?

¹⁸ Sounmelkahkao doadoahngki lokaia kaselel kei ni eh kohpada duwen Nanmwarkio ni ahl wet: “Sapwellimomwi arep keng kan pahn lelete pwar mohngiong en sapwellimomwi imwintihti kan.” Kasohrala pahn wiawi wasa koaros nin sampah. Seremaia kohpada: “Ni rahno paliweren irail kan me KAUN-O ketin kemelahr pahn mwarahkseli sang apali sampah lel apali.” (Ser. 25:33) Ehu kokohp me pil pid mwekidohte koasoia: “I ahpw pil kilangada tohnleng men me uh pohn ketipin. E ahpw ngihl laud weringki menpihr koaros me pipihr nan wehwe, patohwan, ‘Kumwail patohdo oh pokonpene pwe kumwail en iang kamadipw lapalap en Koht! Kumwail patohdo oh iang tungoale uduk en nanmwarki, uduk en kaunen sounpei kan, uduk en sounpei kan, uduk en oahs akan oh me dake kan, uduk en aramas koaros, lidu oh me maiauda kan, me lapalap oh me tikitik kan!’”​—Kaud. 19:17, 18.

19. Ia duwen Krais eh pahn ketin kaimwisekihla sapwellime powehdi?

¹⁹ Mwurin eh ketin kasohrehla ahn Sehdan sampah suwed wet, Nanmwarki lapalapo Sises Krais pahn ‘wenewohng eh lingan en powehdi.’ (Mel. 45:4) E pahn ketin kaimwisekihla sapwellime powehdi sang eh kesepwekehdilahng Sehdan oh nah ngehn saut kan nan pwoar loal soh kapio. Re pahn mihmihte nan pwoar wet ni Sises oh irail 144,000 ko ar pahn kakaun sang nanleng erein sounpar kid. (Kaud. 20:2, 3) Ni Tepilo oh ngehn saut kan ar mi nan pwoar loalo, e pahn mwomwen me re mehla pwehki re sohla pahn kak kahrehda kahpwal kan. Koaros nin sampah pahn paiekihda sapwellimen Nanmwarkio kaunda pwehki re sohte pahn mi pahn manaman suwed en Sehdan oh nah ngehn saut kan. Mwohn sampah pwon eh pahn wiahla paradais ehu, e pahn pil mie ehu kahrepe en iang Nanmwarkio oh irail 144,000 pereperen. Kitail pahn koasoiapene mwekid kaperen wet nan iren onop en mwuhr.