1, 2. (a) Ahn ihs kapwopwoud me pahn kahrehda peren nanleng? (b) Peidek dah kan me kitail pahn koasoiapene?

 AHNSOU koaros kitail kin anahne ahnsou laud pwehn kaunopada ong kapwopwoud ehu. Ahpw met kitail pahn koasoiapene duwen kapwopwoud en nanmwarki men me kaukaunopkier mpen sounpar 2,000! E pahn kereniong lel ahnsou me ohl kamwohdo pahn tuhwong lih kamwohdo. Ngilen keseng kaperen pahn kipehdi tehnpas en Nanmwarkio, oh ngihl sang nanleng pahn koulki: “Kitail kapinga Koht! Pwe atail Kaun, atail Koht, Wasa Lapalahpie, iei ih me atail Nanmwarki! Kitail perenda oh ngisingiski atail peren; kitail kapinga sapwellime roson. Pwe e lelehr ahnsoun kapwopwoud en Sihmpwulo, oh sapwellime lih kamwohd onopadahr.”​—Kaud. 19:6, 7.

² “Sihmpwul” me iren Paipel wet koasoia iei Sises Krais. (Sohn 1:29) Sapwellime kapwopwoud pahn kahrehda peren laud nanleng. Ia duwen eh pahn ketin kapwatada ong kapwopwoudo? Ihs me pahn wia sapwellime lih kamwohd? Ia duwen lih kamwohdo eh kaunopada ong kapwopwoudo? Iahd me kapwopwoud wet pahn wiawi? Kapwopwoud wet pahn kahrehda peren nanleng.  Ahpw ia duwe, irail me ahneki koapworopwor en mour kohkohlahte nin sampah pahn iang peren? Kitail men ese pasapengpen peidek pwukat, eri kitail en pousehlahte onopki Melkahka 45.

3, 4 (a) Dahme sounmelkahkao koasoiahki sapwellimen Ohl kamwohdo likoun kapwopwoud? Dahme kalaudehla en Ohl kamwohdo eh peren? (b) Ihs “sapwellimen nanmwarki serepein kan” oh sapwellime “likendo” me iang Nanmwarkio peren?

³ Wadek Melkahka 45:8, 9. Ohl kamwohdo, Sises Krais ketin likoukihda sapwellime likoun kapwopwoud. Sapwellime likou pwohmwahuki pwohn “warpwohmwahu kaselel koaros” duwehte mir oh kasia, lehn kei sarawi me mehn Israel kan kin doadoahngki.​—Eks. 30:23-25.

⁴ Keseng kaselel kan nan tehnpas en ohl kamwohdo nanleng kalaudehla eh peren ni eh kerenlahngehr ahnsoun eh kapwopwoud. Sapwellime “likendo,” me iei sapwellimen Koht pwihn nanleng, oh pil iangahki “sapwellimen nanmwarki serepein kan,” me iei tohnleng sarawi kan, pil iang ih peren. Ngihl kei sang nanleng koasoia: “Kitail perenda oh ngisingiski atail peren; . . . Pwe e lelehr ahnsoun kapwopwoud en Sihmpwulo.”

5. Ihs lih kamwohdo?

⁵ Wadek Melkahka 45:10, 11. Kitail eseier ihs ohl kamwohdo, ahpw ihs me lih kamwohdo? Kaidehn ih uhdahn lih emen. Ahpw e karasaraskihong 144,000, pwihn en Kristian keidi kan pwon. Sises iei tapwin mwomwohdiso wet en me keidi kan. (Wadek Episos 5:23, 24.) Me keidi pwukat pahn iang Krais kakaun sapwellime Wehi nanleng. (Luk 12:32) Re pil “kin idawehn Sihmpwulo wasa koaros me e pahn kin ketila ie.” (Kaud. 14:1-4) Irail wiahla “werek en Sihmpwulo” oh mihmi reh ni tehnpese nanleng.​—Kaud. 21:9; Sohn 14:2, 3.

6. Dahme kahrehda me keidi kan adaneki “sapwellimen nanmwarki serepeino”? Dahme kahrehda re ale kaweid ren meliehla nah aramas ako?

⁶ ‘Likend en nanmwarkio’ pil adaneki “sapwellimen nanmwarki serepeino.” (Mel. 45:10, 13) Ihs nanmwarki teio nan Melkahka 45:13? Iei ih Siohwa. E ketin pwekada Kristian keidi kan nin duwen sapwellime “seri” kan. (Rom 8:15-17) Me keidi kan ale kaweid wet: “Komw ketin meliehla sapwellimomwi kan oh kisehmwi kan.” Pwehki me keidi kan pahn wiahla lih kamwohdo nanleng, irail anahne medemedewehte “soahng kan me mi wasao , kaidehn mehkan me mi sampah wet.”​—Kol. 3:1-4.

7. (a) Ia duwen Krais eh ketin kaukaunop lih kamwohdo? (b) Ia pepehm en lih kamwohdo ong me e pahn pwoudikio?

⁷ Erein sounpar tohto, Krais ketin kaukaunop lih kamwohdo me e pahn ketin pwoudiki ong kapwopwoud me pahn wiawi nanleng. Wahnpoaron Pohl ntingihedi me Krais “ketin poakohng mwomwohdiso oh ketin pangala pein ih pwehki mwomwohdiso. E ketin wiahda met pwe en ketin kasarawihkihong Koht sapwellime mahsen, mwurin eh ketin kamwakelehkihda mwomwohdiso pihl, pwe en ketin kasalehiong pein ih mwomwohdiso ehu me lingan, mwakelekel, min, sohte kisin mwahi de emwirek kis reh, de mehkot samin.” (Ep. 5:25-27) Pohl padahkihong Kristian keidi kan mahs nan Korint: “I luwangkinkumwaillahr duwehte Koht eh ketin luwangkin kumwail; pwe kumwail rasehng meipwon mwakelekel emen me inoun pwopwoud ong ohltehmen, iei Krais.” (2 Kor. 11:2) Pwehki en lih kamwohdo eh kaudok me mwakelekel oh Koht ketin kupwurki, Nanmwarkio Sises Krais ketin kilangwohng ih nin duwen emen me uhdahn kaselel. Lih kamwohdo kin poaridi mwohn me e pahn pwoudikio oh kin pohnese ih nin duwen eh “kaun.”

8. Dahme kahrehda Paipel kasalehda me lih kamwohdo uhdahn “kaselel”?

⁸ Wadek Melkahka 45:13, 14a. Lih kamwohdo “kapwatadahr pwe en tuhwong eh pwoud” ni kapwopwoudo oh “ia uwen eh kaselel!” Kaudiahl 21:2 kin kapahrekihong lih kamwohdo kahnimw ehu, Serusalem Kapw. Kahnimw en nanleng wet kin lingalingki “lingan en Koht” oh e rasehng “kisin takai kesempwal, me adaneki sasper, oh mwakelekel duwehte kilahs.” (Kaud. 21:10, 11) Pwuhken Kaudiahl kawehwehda lingan en Serusalem Kapw wet. (Kaud. 21:18-21) Ia uwen lih kamwohd menet eh kaselel! Ih met me kitail pahn kasik sang kapwopwoud en nanmwarki men nanleng.

9. Ihs me lih kamwohdo pakahrlahng reh? Ia mwomwen eh likouo?

⁹ Lih kamwohdo pakahrlahng Ohl Kamwohdo, Nanmwarki Mesaiao. E ketin kaunopadahr oh kamwakelehkihda lih kamwohdo sapwellimen Koht mahsen. Lih menet me “mwakelekel” oh sohte “mehkot samin” reh. (Ep. 5:26, 27) Lih kamwohdo pil anahne kapwatada ni ahl me konehng kamadipwo. Oh ih met me e wia. “Kohl me wia dereht en eh likou,” oh “ni eh kapwatkihda soangen kapwat kaselel pwukat, eh ahpw pakahrlahng rehn nanmwarkio.” Ni kapwopwoud en Sihmpwulo, “e mweimweiongehr lih kamwohdo en kapwatkihda likou min oh mwakelekel. (Likou mwakelekel, iei en sapwellimen Koht aramas akan ar wiewia mwahu kan.)”​—Kaud. 19:8.

10. Iahd me kapwopwoud en Sihmpwulo pahn wiawi?

¹⁰ Wadek Kaudiahl 19:7. Iahd me kapwopwoud en Sihmpwulo pahn wiawi? Mendahki Kaudiahl 19:7 mahsanih me “sapwellime lih kamwohd onopadahr” ong kapwopwoudo, iretikitik kan en mwuhr sohte koasoia duwen kapwopwoudo. Ahpw, ire ko kin koasoia ni sansal duwen dahme wiawi ni kaimwiseklahn kahn kamakam kowahlapo. (Kaud. 19:11-21) Ia duwe, met wehwehki me kapwopwoudo pahn wiawi mwohn Nanmwarkio pahn ketin kaimwisekala sapwellime mahwen? Soh. Mwekid kan me pwuhken Kaudiahl kohpada sohte ntingdi ni irekidi en ahnsou me re pahn wiawi. Melkahka 45 kasalehda me keieu, Sises Krais ketin katengehdi sapwellime kedlahs ni lukope oh ketin kalowehdi sapwellime imwintihti kan, oh mwuhr kapwopwoud lapalapo ahpw wiawi.​—Mel. 45:3, 4.

11. Dahme Krais pahn ketin wia mwohn kapwopwoudo pahn wiawi?

¹¹ Eri kitail sukuhlki sang Paipel me mwekid pwukat pahn wiawi nin duwen met: Keieu, “lihen netiki paliwere,” Papilon Lapalap, me iei pelien kaudok likamw koaros, pahn sohrala. (Kaud. 17:1, 5, 16, 17; 19:1, 2) Keriau, Krais pahn ketin kasohrehla ahn Sehdan sampah suwed pwon nan “mahwen me pahn wiawi ni Rahn Lapalap en Koht, Wasa Lapalahpie,” Armakedon. (Kaud. 16:14-16; 19:19-21) Mwurin met, Nanmwarkio pahn ketin kaimwisekala sapwellime mahwen sang ni eh pahn ketin kesepwekehdilahng Sehdan oh nah ngehn saut kan nan pwoahr loalo me soh kapi, wasa me re sohla pahn kak wia kauwe emen. E pahn mwomwen me re mehla.​—Kaud. 20:1-3.

12, 13. (a) Iahd me kapwopwoud en Sihmpwulo pahn wiawi? (b) Ihs me pahn perenda nanleng pwehki kapwopwoud en Sihmpwulo?

¹² Ni imwin rahn akan, Kristian keidi kan me kin lelepek lao lel mehla pahn iasada ong mour nanleng. Ahnsou kis mwurin Papilon Lapalap pahn sohrala, ahpw mwohnte Armakedon, Krais pahn ketin kanekehla eh ketikihpene Kristian keidi meh 144,000 ko koaros pwehn iang ih mi nanleng. (1 Des. 4:16, 17) Eri, mwurin Armakedon, kapwopwoud en Sihmpwulo kakehr wiawi. Ia uwen kaperen en kamadipw en kapwopwoud wet! Kaudiahl 19:9 mahsanih: “Meid pai irail kan me aleier luhk ong ni kamadipw en kapwopwoud en Sihmpwulo!” Ei, lih kamwohdo uhdahn peren.  Nanmwarkio pahn ketin perenkihda ienge me keidi kan koaros ar pahn iang ih ket nanleng. (Luk 22:18, 28-30) Ahpw, kaidehn lih kamwohdo oh Ohl Kamwohdo kelehpw me pahn pereperen.

¹³ Nin duwen me kitail wadekehr mwoweo, ngihl kei nanleng pahn koulki: “Kitail perenda oh ngisingiski atail peren; kitail kapinga sapwellime roson. Pwe e lelehr ahnsoun kapwopwoud en Sihmpwulo, oh sapwellime lih kamwohd onopadahr.” (Kaud. 19:6, 7) Ahpw ia duwen sapwellimen Siohwa ladu kan nin sampah? Irail pahn iang kamadipw wet?

14. Nin duwen me Melkahka 45 kasalehda, ihs irail “pwihn en meipwon akan” me iang lih kamwohdo?

¹⁴ Wadek Melkahka 45:12, 14b, 15. Soukohp Sekaraia kohpada me ni imwin rahn akan, aramas akan sang wasa koaros nin sampah pahn kalahnganki arail iang luhwen me keidi kan papah Siohwa. E ntingihedi: “Ni rahn pwuko mehn liki ehk pahn kohdo rehn mehn Suhs men oh nda, ‘Se pahn ianguhkala nan omw palien lamalam en, pwe se rong me Koht kin ketin ieiang uhk.’” (Sek. 8:23) Irail “mehn liki ehk” ko kin karasaraskihong “mehn Dair kan” oh “me kepwehpwe kan” me kileldi nan Melkahka 45:12. Irail kin kihong luhwen me keidi kan kisakis kan, oh re kin doadoahk pwe ren “alkenikenla” rehrail oh pil ale sawas pwe ren papah Siohwa. Sang pahr 1935, luhwen me keidi kan kin kahrehdo aramas rar rar kei ong ni me “pwung,” me pil wehwehki, aramas rar rar kei sukuhlkier dahme mehlel duwen Siohwa. (Dan. 12:3) “Mehn liki ehk” pwukat iei iengen me keidi ko. Re kin lelepek oh re kamwakelehdahr arail mour sang soangen kaudok likamw koaros. Ihme kahrehda  re adaneki “pwihn en meipwon akan.” Irail inoukihongehr Siohwa arail mour oh kadehdedahr me irail ladu lelepek kei en Nanmwarki Sises Krais.

15. Ia duwen “pwihn en meipwon akan” ar iang luhwen me keidi kan doadoahk?

¹⁵ Irail luhwen me keidi kan kin uhdahn kalahnganki “pwihn en meipwon” pwukat pwehki arail ngoangki sewese kalohki “rongamwahu en Wehin Koht” wasa koaros nin sampah. (Mad. 24:14) Kaidehn ihte “sapwellimen Koht manaman oh lih kamwohdo me kin pousehlahte mahmahsanih: ‘Kohdo!’” ahpw irail me rong pil kin nda: “Kohdo!” (Kaud. 22:17, NW) Met wehwehki me “sihpw teikan” kin rong me keidi kan ar nda “Kohdo!” oh re pil iang irail ndahng aramas akan nan sampah pwon ren “Kohdo!”​—Sohn 10:16, NW.

16. Pwais kaselel dahieu me Siohwa ketikihong sihpw teikan?

¹⁶ Luhwen me keidi kan poakohng sihpw teikan. Irail me keidi kan perenkihda Siohwa eh ketikihong sihpw teikan pwais kaselel en iang perenki kapwopwoudo. E kokohpdahr me irail “pwihn en meipwon” pwukat pahn “nsenamwahu oh pereperen.” Ei, sihpw teikan, me ahneki koapworopwor en mour kohkohlahte nin sampah, pahn iang sapwellimen Siohwa peneinei nanleng oh nin sampah pereperen ni ahnsou me kapwopwoud en Sihmpwulo wiawi nanleng. Pwuhken Kaudiahl kawehwehda pokon kalaimwuno, me kin kaudokiong Siohwa nin sampah, arail “uh mwohn mwoahlo oh mwohn Sihmpwulo.” Irail kin papah Siohwa nin sampah nan koasoandi en sapwellime tehnpas sarawi lapalapo.​—Kaud. 7:9, 15.

17, 18. Ia duwen irail me pahn mi nin sampah kapwo ar pahn paiekihda kapwopwoud en Sihmpwulo? Krais pahn ketin wiahla semen ihs erein kaundahn Pahr Kido?

¹⁷ Wadek Melkahka 45:16. Irail “pwihn en meipwon akan” en sapwellimen Krais lih kamwohdo nanleng pahn ahneki kahrepe laud ren perenda ni ar kilang kapwopwoudo eh wahdo kapai kan ong sampah kapwo. Nanmwarki Sises Krais pahn ketin kaiasada “pahpa kahlap ako” nin sampah. Pwehki Krais pahn ketin kaiasada “pahpa kahlap” ako, e pahn ketin “sapwellimankihla” irail. (Sohn 5:25-29; Ipru 11:35) Krais pahn ketin pilada ekei irail pwe ren “kaunda sampah pwon.” Kitail pil kak kasik me e pahn ketin pilada ekei elder lelepek kan rahnpwukat pwehn tiengla mwowe nin duwen “kaunen wehi kan” nan sampah kapwo.​—Ais. 32:1.

¹⁸ Erein sapwellime kaundahn sounpar kido, Krais pil pahn ketin wiahla sahm men ong meteikan. Ia duwen? Irail me kin pwoson sapwellimen Sises meirong pahn mour kohkohlahte nin sampah. (Sohn 3:16) Ih ahnsowo me Krais pahn ketin wiahla “Sahm Poatopoat” ong irail.—Ais. 9:6, 7.

19, 20. Ia duwen mwekid kaperen kan me kileldi nan Melkahka 45 eh kin kamwakid Kristian mehlel kan koaros rahnwet?

¹⁹ Wadek Melkahka 45:1, 17. Kristian kan koaros men esehla mwekid kan me kileldi nan Melkahka 45. Irail me keidi kan me mihmihte nin sampah perenkihda arail ese me re pahn kereniong patehng riarail kan oh pil Ohl Kamwohdo, Sises Krais, nanleng. Sihpw teikan kin mwekidki en pousehlahte kalaudehla arail uhpahiong arail Nanmwarki lapalapo. Irail pil kalahnganki arail wia iengen irail kan me wia kisehn lih kamwohdo me luhluhwe nin sampah. Kapai kan me Krais oh sapwellime lih kamwohdo pahn ketikihong tohnsampah mwurin kapwopwoudo pahn kaselel sang dahme kitail kak medewe.​—Kaud. 7:17; 21:1-4.

²⁰ Ni atail kasikasik pweidahn kokohp kan duwen Nanmwarki Mesaiao, e pahn uhdahn kamwakid kitail en kasalehda duwen mwareo. Kitail en kapinga Nanmwarkio “kohkohlahte.”