1, 2. (a) Pilipil dahieu me Moses wiahda ni ahnsou me e sounpar 40? (Menlau kilang tepin kilel.) (b) Dahme kahrehda Moses pilada en iang mehn Israel kan lokolok?

 MOSES ese soangen mour dah me wehin Isip kak kihong ih ni ahnsou kohkohdo. E kilang imwen me kepwehpwe kan me laud oh kaselel. E pwekpwekla rehn ahn nanmwarkio peneinei. E “audaudkidahr soangen loalokong koaros en mehn Isip,” mwein iangahki kasukuhl en wiahda soahng kaselel kan duwehte mahlen, kasukuhl en usu kan de soahng kan pahnlahng, kasukuhl en wahntuhkeih nempe kan, oh pil kasukuhl en palien sains teikan. (Wiewia 7:22) E uhdahn pahn mengei ong ih en nainekihda mwohni tohto, ahneki manaman oh pwais kaselel me mehn Isip tohto sohte kak ahneki.

² Mendahki soangen pai pwukat koaros me Moses ahneki, ahnsou me e sounpar 40 e wiahda pilipil ehu me ele Parao oh eh peneinei sohte kak wehwehki. E pilada en kesehla soangen pai pwukat en Isip. Ia duwe, e men ahneki soangen mour me mehn Isip tohto ahneki? Soh, e pil sohte mwahuki met. Ahpw e pilada en iang lidu kan. Dahme kahrehda? Pwehki Moses ahneki pwoson. (Wadek Ipru 11:24-26.) Pwehki eh pwoson, likamwete Moses kak kilang Siohwa. E kin pwoson Koht “me soh sansal” oh pil pweidahn sapwellimen Koht inou kan.​—Ipru 11:27.

3. Peidek siluh dah kan me kitail pahn sapengala nan iren onop wet?

³ Duwehte Moses, kitail anahne ahneki pwoson pwe kitail en kak kilang laudsang dahme sampah wet kak kihda oh pil kak kilang Siohwa.  Kitail anahne wia soangen aramas me “mie atail pwoson.” (Ipru 10:38, 39) Pwehn sewese kitail kakehlaka atail pwoson, kitail pahn tehkpene dahme Paipel ntingihedi duwen Moses nan Ipru 11:24-26. Ni atail wia met, song en sapengala peidek pwukat: Ia duwen pwoson eh sewese Moses en soikala ineng kan en paliwar? Ni eh lelohng uhwong, ia duwen pwoson eh sewese ih en kesempwalki eh pwais en papah Siohwa? Oh dahme kahrehda Moses kin “kilikilengwohngete keting me pahn kohdo”?

4. Dahme Moses wehwehki duwen “perenki dihp”?

⁴ Pwehki eh pwoson, Moses kak wehwehki me “perenki dihp” kin ongete ahnsou mwotomwot. Madamadau en meteikan ele weksang met. Dahme kahrehda? Re kilang Isip, wasa ehu me pwongih dikedik en eni kan oh wunahni kin kalapw wiawi, eh wiahlahr wehi kehlail ehu, ahpw sapwellimen Siohwa aramas akan kin lokolok nin duwen lidu kei. Ahpw Moses ese me Siohwa kak ketin wekidala irairo. Mendahki irail me kin nsenohkihte kaitarala arail ineng kan kin mwomwen pweida mwahu, Moses ahneki pwoson me irail me suwed kan pahn sohrala. Ihme kahrehda e sohte lelohng kasongosong en “perenki dihp ahnsou mwotomwot.”

5. Dahme pahn sewese kitail en soikala “perenki dihp ahnsou mwotomwot”?

⁵ Ia duwen omw kak soikala “perenki dihp ahnsou mwotomwot”? Dehr manokehla me peren me kohsang omw wia dihp kin ongete ahnsou mwotomwot. Pwoson pahn seweseiuk ken kilang me “sampah wet oh mehkoaros nin sampah me aramas kin inengieng kin sosohrala.” (1 Sohn 2:15-17) Doudouloale imwilahn me dipan akan me sohte men koluhla. Irail mi “wasa likekiris kei . . . imwilahrail meid kamasepwehk.” (Mel. 73:18, 19) Ni omw kin lelohng songosong en wia dihp, idek rehmw, ‘Dahme I mwahuki ong pein ngehi ni ahnsou kohkohdo?’

6. (a) Dahme kahrehda Moses sohte men “inanki sapwellimen Parao serepeino”? (b) Dahme kahrehda ke leme me Moses wiahda pilipil pwung?

⁶ En Moses eh pwoson pil kaweid eh pilipil en doadoahk. “Pwoson me kahrehiong Moses, ni eh laudlahro, eh sohte men inanki sapwellimen Parao serepeino.” (Ipru 11:24) Moses sohte kin medemedewe me e kak ahneki pwukoa kesempwal ehu nan tehnpas en nanmwarkio oh mwuhr papah Koht sang ni eh doadoahngki nah mwohni ko oh eh manaman pwehn sewese ienge mehn Israel ko. Moses koasoanehdi teng en poakohng Siohwa sang eh mohngiong, mour oh kehl unsek. (Deud. 6:5) Eh pilipilo doarehsang ih lokolok laud. Ni imwila, mehn Israel ko wahsang ahn mehn Isip kan arail dipwisou kesempwal tohto. (Eks. 12:35, 36) Parao namenekla oh mehla ni eh kihrla nansedo. (Mel. 136:15) Ahpw ia duwen Moses? Koht ketin doadoahngki ih en kahluwa mehn Israel kan pwon pwe ren pitila. Eh mour uhdahn pweida.

7. (a) Nin duwen me Madiu 6:19-21 kasalehda, dahme kahrehda kitail anahne wiahda pilahn ong ahnsou kohkohdo me pahn mihmi kohkohlahte? (b) Dahme wiawiong emen lih me kasalehda wekpeseng en wiahda pilahn ong ahnsou mwotomwot oh ahnsou kohkohlahte?

⁷ Ma kowe emen sapwellimen Siohwa ladu pwulopwul men, ia duwen pwoson eh kak seweseiuk ken pilada doadoahk ehu? Wiahda koasoandi kan ong ahnsou kohkohdo. Kamehlele sapwellimen Koht inou kan oh “kepwehpwehkihla paien nanleng,” de wiahda pilahn ong ahnsou kohkohdo me pahn mihmi kohkohlahte, a kaidehn ongete ahnsou mwotomwot. (Wadek Madiu 6:19-21.) Met iei pilipil me Sophie, soun kahlek (ballet) koahiek men, anahne wiahda. Pesines kan en soangen kahlek wet nan Amerika men pwain eh sukuhl oh pil men kihong ih doadoahk mwahu nan arail pesineso. E nda me “e kaperen en ale kaping sang aramas akan.” E pil nda me e pehm me e mai sang soun kahlek teikan. Ahpw e kin nsensuwed. Mwuhr, Sophie kilang kasdo en Young People Ask—What Will I Do With My Life? (lokaiahn wai). E nda: “I esehda me sampah wet kahrehiong ie ien pweida oh ndandla, ahpw e uhd kihsang ei pahn kaudokiong Siohwa sang ei mohngiong unsek.” Eri e kapakap ong Siohwa ni ngidingid oh uhdihsang eh doadoahk en soun kahlek. Ia eh pepehm duwen eh pilipilo? E nda: “I sohte nsensuwedki ei sohla ahneki ei mouren mahso. Rahnwet,  I uhdahn peren. I kin iang ei pwoudo pioneer. Se sohte wia aramas ndand kei oh se sohte ahneki soahng tohto. Ahpw mie at nanpwungmwahu rehn Siohwa, mie nait tohnsukuhl en Paipel kan oh mie at mehn akadei kan en papah Siohwa. I sohte koluhkihla ei pilipilo.”

8. Kaweid en Paipel dahieu me kak sewese me pwulopwul men en pilada dahme e pahn wiahiong eh mour?

⁸ Siohwa ketin mwahngih dahme keieu mwahu ong uhk. Moses nda: “Dahme KAUN-O, amwail Koht, ketin kupwurki sang rehmwail. Kumwail en lemmwiki KAUN-O oh kapwaiada sapwellime mahsen koaros. Poakohng ih oh papah ni mohngiongimwail unsek. Kapwaiada sapwellime kosonned koaros me I kehkehlingkihong kumwail rahnwet pwe kumwail en nsenamwahu.” (Deud. 10:12, 13) Ni omw wie pwulopwulte, pilada doadoahk ehu me pahn kahrehiong ken papah oh poakohng Siohwa “sang nan mohngiongomw unsek.” Ke kak kamehlele me soangen pilipil wet pahn kahrehda ‘ke en nsenamwahu.’

9. Menlau kawehwehda dahme kahrehda ele e apwal ong Moses en kapwaiada me Koht ketikihong.

⁹ Moses “pilada en namenekla pwehki Mesaia sang ahneki kepwe kesempwal koaros en Isip.” (Ipru 11:26) Siohwa ketin pilada Moses en wia pwukoa nin duwen “Mesaia,” de “Me Keidi Men,” pwehn kahluwa mehn Israel kan sang Isip. Moses ese me e pahn apwal en wia met. E pahn lelohng “namenekla,” de uhwong. Mwoweo, emen mehn Israel ko kepitki Moses oh nda: “Ihs me kilelehdi me komwi en kaunkitada oh kadeingkitada?” (Eks. 2:13, 14) Mwuhr, Moses patohwan idek rehn Siohwa: “Ia duwen Parao eh pahn ketin karonge ie?” (Eks. 6:12) Pwehn kaunopada ong uhwong kan, Moses kapakapkihong Siohwa dahme e kin perki oh pil eh kapwunod kan. Ia duwen Siohwa eh ketin sewese Moses en pweida nan eh pwukoa apwalo?

10. Ia duwen Siohwa eh ketikihong Moses dahme e anahne pwehn kapwaiada eh pwukoa?

¹⁰ Keieu, Siohwa ketin inoukihong Moses: “I pahn kin ieiang uhk.” (Eks. 3:12) Keriau, Siohwa ketikihong koapworopwor oh eimah ni eh ketin kawehwehiong ih ehu kisehnte wehwehn Mwareo: “I Pahn Wiahla Dahme I Pilada en Wiahla.” * (Eks. 3:14, NW) Kesiluh, e ketikihong Moses manaman en wiahda soahng kapwuriamwei kan de manaman kan oh met kadehdehda me Koht me uhdahn ketin poaronehla ih. (Eks. 4:2-5) Kapahieu, Siohwa ketin pilada Aaron en wiliandi Moses oh koasoiong Parao oh pil sewese Moses en kapwaiada eh pwukoa. (Eks. 4:14-16) Ni imwilahn eh mour, Moses uhdahn kamehlele me Koht kin ketin sewese Sapwellime ladu kan ren kapwaiada pwukoa koaros me E ketikihong irail. Moses uhdahn likih Siohwa kahrehda e kak ndaiong Sosua: “KAUN-O pahn ketin kahluweiuk oh pahn ketin ieiang uhk; e sohte pahn ketin keseiukala de likidmelieiukala. Dehr perki de masak mehkot.”​—Deud. 31:8.

11. Dahme kahrehda Moses kin kesempwalki eh pwukoa?

¹¹ Pwehki sawas sang rehn Siohwa, Moses kin kesempwalki eh pwukoa apwalo laudsang “kepwe kesempwal koaros en Isip.” Sohte mehkot me pahrekiong eh kin papah Koht wasa lapalahpie. Ia duwe, eh wia soupeidi men nan Isip kesempwalsang Siohwa eh ketin pilada en kahluwa mehn Israel ko? Moses ale ketingpen eh ahneki madamadau pwung. E ahneki nanpwungmwahu keren rehn Siohwa, me ketikihong ih “manaman kapwuriamwei” pwehn kahluwalahng mehn Israel kan nan Sapwen Inou.​—Deud. 34:10-12.

12. Soangen pwais kaselel dah kan me kitail en kalahnganki me Siohwa ketikihong kitail?

¹² Kitail pil ahneki pwukoa ehu. Siohwa ketin doadoahngki sapwellime Ohlo en ketin idihada kitail “en papah” nin duwen e ketin idihadahr wahnpoaron Pohl oh meteiko. (Wadek 1 Timoty 1:12-14.) Kitail koaros ahneki pwais kaselel en kalohki rongamwahuo. (Mad. 24:14; 28:19, 20) Ekei kin doadoahngki pali laud en arail ahnsou ong  papah Siohwa. Ekei brother koahiek kan kin papah nan mwomwohdiso nin duwen sounsawas kei oh elder kei. Ahpw mwein omw peneinei oh meteikan me sohte mi nan padahk mehlel kin peidengki omw kin kesempwalki pwais kaselel me ke ahneki. Ele re kin kauwe omw wiahda tounmetei kan ong Siohwa. (Mad. 10:34-37) Ma re kansensuwedihukala, ke kakete tepida medewe me tounmetei kan me ke wiahda sohte katepe de ke sohte kak kapwaiada omw pwukoa. Ma met wiawiong uhk, ia duwen pwoson eh pahn seweseiuk dadaur?

13. Ia duwen Siohwa eh ketin sewese kitail en kapwaiada pwukoa kan me e ketikihong kitail?

¹³ Peki rehn Siohwa sapwellime sawas oh pwoson me e pahn ketin seweseiuk. Padahkihong ih dahme ke kin perki oh omw kapwunod kan. Siohwa me ketikihong uhk pwukoa wet oh ke kak kamehlele me e pahn ketin seweseiuk ken pweida. Ia duwen? Ni ahl kohte me e ketin sewese Moses. Keieu, Siohwa ketin inoukihda: “I pahn kin kakehlakei kumwail oh sewesei kumwail; I pahn kin apwalih kumwail oh doareikumwailla.” (Ais. 41:10) Keriau, e ketin katamankin uhk me ke kak likih sapwellime inou kan: “Ngehi me mahmahsen; eri, e pahn pweida.” (Ais. 46:11) Kesiluh, Siohwa ketikihong uhk “manaman lapalap” pwe ken pweida nan omw pwukoa. (2 Kor. 4:7) Kapahieu, pwehn sewese kitail dadaur atail pwukoa, Samatail limpoako ketikihong kitail riatail tohnkaudok mehlel kan nin sampah pwon pwehn ‘kakehlakahda emenemen kitail, oh sawaspene.’ (1 Des. 5:11) Ni Siohwa eh kin ketikihong uhk dahme ke anahne pwe ken pweida nan omw pwukoa kan, omw pwoson ih pahn kehlailla. Imwilahn met, ke pahn kesempwalki me omw pwukoa kan nan sapwellime doadoahk kin laudsang soahng koaros me sampah wet kak kihong uhk.

14. Dahme kahrehda Moses uhdahn kamehlele me e pahn ale ketingpe?

¹⁴ Moses kin “kilikilengwohngete keting me pahn kohdo.” (Ipru 11:26) Mendahki Moses sohte ese soahng tohto duwen ahnsou kohkohdo, e kin doadoahngki soahng malaulau kante me e ese pwehn kaweid ih wiahda eh pilipil kan. Duwehte eh pahpa kahlap en mahso Eipraam, Moses uhdahn kamehlele me Siohwa kak ketin kaiasada me melahr kan. (Luk 20:37, 38; Ipru 11:17-19) Eh likih sapwellimen Koht inou kan kin sewese ih en dehr leme me eh mour nin duwen emen me rukurukseli erein sounpar 40 oh pil eh mi nan sapwtehn erein sounpar 40 sohte katepe. Mendahki e sehse ia uhdahn mwomwen Siohwa eh pahn ketin kapwaiada Sapwellime inou kan, eh pwoson Siohwa  uhdahn laud me kahrehda likamwete Moses kak kilang keting me pahn kohdo.

15, 16. (a) Dahme kahrehda kitail en kilikilengwohngete ketingpatail? (b) Soangen kapai dah kan me ke kin kasikasik pahn kaundahn Wehin Koht?

¹⁵ Ke kin “kilikilengwohngete keting” me ke pahn alehdi? Duwehte Moses, kitail saikinte ese ia duwen sapwellimen Koht inou kan ar pahn uhdahn pweida. Karasepe, me pid duwen kahn kamakam kowahlapo, kitail “sehse ahnsawi.” (Mark 13:32, 33) Mendahki kitail sohte ese soahng koaros, kitail ese laudsang dahme Moses ese duwen Paradais en ahnsou kohkohdo. Siohwa ketikihong kitail inou tohto duwen ia pahn mwomwen atail mour pahn kaundahn sapwellime Wehi pwe kitail en kak “kilikilengwohngete” met, me iei, kitail kak uhdahn medewehla mwomwen sampah kapwo. Ma kitail ahneki soangen madamadau wet, kitail pahn uhdahn men rapahki mahs Wehio. Dahme kahrehda? Medewehla met: Ma ke sohte nohn ese duwen ihmw ehu, ke pahn pwainda? Uhdahn soh! Pil duwehte, kitail sohte pahn doadoahngki atail mour pwehn rapahki koapworopwor ehu me sohte mehlel ong kitail. Atail pwoson anahne sewese kitail en uhdahn kilang atail mour pahn kaundahn Wehio.

¹⁶ Pwe Wehin Koht en uhdahn mehlel nan omw madamadau, “kilikilengwohngete,” de medewehla omw mour nan Paradais. Karasepe, ni omw onopki mour en aramas akan nan Paipel me mour mwohn Sises, medewehla dahme ke pahn ele idek rehrail ahnsou me irail iasada. Medewehla dahme irail pahn mwein idek rehmw duwen omw mour erein imwin rahn akan. Medewehla ia uwen omw pahn peren ni omw tuhwong kisehmw kan me momour sounpar epwiki kei samwalahro oh omw pahn padahkihong irail duwen soahng koaros me Koht ketin wiahda ong irail. Medewehla omw peren ni omw pahn kilikilang oh sukusukuhlki duwen mahn lawalo tohto nan sampah meleilei ehu. Doudouloale ia uwen omw pahn karanihala Siohwa ni omw ekisekis unsekla.

17. Ia duwen atail kin medemedewe ketingpatail ahnsou kohkohdo eh kak sewese kitail rahnwet?

¹⁷ En medemedewe ketingpatail ahnsou kohkohdo kin sewese kitail en dadaur, ahneki peren, oh wiahda pilipil kan. Pohl ntinglahng Kristian keidi kan: “Ma kitail koapworopworki mehkot me kitail saikinte kilang, eri, kitail kin kanengamah oh awiawih.” (Rom 8:25) Ahpw met sohte kin dokedokehte me keidi kan. E dokedoke Kristian koaros me ahneki koapworopwor en mour soutuk. Mendahki kitail saikinte ale ketingpatail, atail pwoson kin uhdahn kehlail kahrehda kitail kin awiawihte ni kanengamah “keting me pahn kohdo.” Duwehte Moses, kitail sohte kin pehm me atail papah Siohwa erein sounpar tohto sohte katepe. Ahpw kitail kamehlele me “mehkan me kitail kin kilangki masatail, iei me kin mie ahnsou kis, a mehkan me kitail sohte kin kilangki masatail, ih me soutuk.”​—Wadek 2 Korint 4:16-18.

18, 19. (a) Dahme kahrehda kitail anahne pei pwe atail pwoson en kehlail? (b) Dahme kitail pahn koasoiapene nan iren onop en mwuhr?

¹⁸ Pwoson kin kahrehiong kitail en ese “mehkan me kitail sohte kak kilangki masatail.” (Ipru 11:1) Emen me sohte ahneki sapwellimen Koht madamadau sohte ahneki pwoson, kahrehda e sohte kin wehwehki kesempwalpen en papah Siohwa. Ong soangen aramaso, pwais kaselel wet wia “mehkot mwahl.” (1 Kor. 2:14) Ahpw kitail kin kasikasik en mour kohkohlahte oh kilang duwen iasadahn aramas akan, soahng kei me aramas akan me wia kisehn sampah wet sohte kak uhdahn medewe duwe. Duwehte ekei aramas ako ni mwehin Pohl me nda me e kin koasoakoasoi mwahl, pali moron en aramas akan rahnwet medewe me koapworopwor me kitail kin padapadahngki uhdahn likamw.​—Wiewia 17:18.

¹⁹ Pwehki kitail mi nan sampah ehu me sohte kin pwoson, kitail anahne pei pwe atail pwoson en kehlail. Peki rehn Siohwa pwe “omw pwoson en dehr luwetala.” (Luk 22:32) Duwehte Moses, medemedewehte imwilahn dihp, oh pil medemedewehte pwais kaselel en papah Siohwa oh koapworopwor en mour soutuk. Ia duwe, ihte soahng pwukat me kitail sukuhlki sang ahn Moses mehn kahlemeng? Soh. Nan iren onop en mwuhr, kitail pahn koasoiapene ia duwen pwoson eh sewese Moses en kilang “Koht me soh sansal.”​—Ipru 11:27.