1. Mehnia pwihn me wiliandi wehin Israel nin duwen sapwellimen Koht aramas pilipil kan? (Menlau kilang tepin kilel.)

 SAPWELLIMEN Siohwa aramas akan nin sampah rahnwet kin kaudokiong ih ni ahl me kin kaperenda ih. Mahso, tohn wehin Israel kin wia sapwellimen Koht aramas pilipil kei. Ahpw irail kesehla oh uhwongada kaudok mehlel. Siohwa eri ketin wiahda wehi kapw ehu me wiawihkihda tohnpadahk en Krais kan. Irail wiahla pwihn ehu me kin wiliandi Siohwa. Mendahki Serusalem ohla nan pahr 70, pwihn wet sohte ohla. (Luk 21:20, 21) Ni imwin rahn pwukat, wehi kapw wet kin koasoansoandi mwahu pwehn wilian Siohwa. E sohte pahn sohrala ahnsou me ahn Sehdan sampah pahn mwomwla douluhl. (2 Tim. 3:1) Ia duwen atail kak kamehlele met?

2. Ia duwen Sises eh ketin kawehwehda duwen “kahn kamakam kowahlap”? Ia duwen met eh pahn tepida?

² Sises ketin kohpada dahme pahn wiawi ni imwin rahn kan. E mahsanih: “Pwe apwal [“kahn kamakam kowahlap,” NW] en ni ahnsowo pahn laudsang apwal me kin wiawi sang mahs kohdo lel met; pil sohte me pahn duwe sang met kohla.” (Mad. 24:3, 21) Kahn kamakam kowahlap wet pahn tepida ahnsou me Siohwa pahn ketin kasohrehla “Papilon Lapalap,” me iei  pwihnen pelien lamalam likamw koaros. E pahn ketin doadoahngki koperment en aramas akan pwehn wia met. (Kaud. 17:3-5, 16) Dahme pahn wiawi mwuhr?

3. Mwurin kamwomwalahn pelien lamalam likamw, dahme pahn wiawihong sapwellimen Siohwa aramas akan?

³ Mwurin kamwomwalahn pelien lamalam likamw, pelien lamalam ehute me pahn luwehdi nin sampah, iei Sounkadehdehn Siohwa kan. Eri, Sehdan oh eh sampah pahn uhwongada sapwellimen Siohwa ladu kan. E pahn mwomwen me sohte mehkot pahn pere sapwellime aramas meleilei kan. Paipel mahsanihki “Kok, kaun lapalap en . . . Makok”: “Ih oh nah karis oh wehi tohto me iang ih pahn mahweniong rasehng melimel oh pwaindi sahpwo duwehte pelien depwek pali.” Ahpw uhwong wet sohte pahn pweida!​—Esek. 38:1, 2, 9-12.

4, 5. Dahme Siohwa pahn ketin wia ahnsou me Sehdan oh ienge kan pahn uhwongada sapwellime aramas akan?

⁴ Ni Sehdan oh ienge kan ar uhwongada sapwellimen Siohwa aramas akan, e pahn mwomwen me re uhwongada Siohwa. (Wadek Sekaraia 2:8.) Dahme Siohwa pahn ketin wia? Kaunepen lahng oh sampah pahn ketin mwadangete doarehla sapwellime aramas akan. E sohte pahn ketin mweidada ren sohrala. Ih ahnsowo me Siohwa pahn ketin tapiada mahwen en Armakedon oh pahn ketin kasohrehla douluhl ahn Sehdan sampah.​—Kaud. 16:14, 16.

⁵ Seremaia kohpada me pein Siohwa pahn ketin mahweniong wehi kan nan Armakedon: “‘KAUN-O ketin kadeikadahr wehi kan. E pahn ketikipene aramas koaros nan mwoalen kopwung oh ketin kalokehki me suwed kan mehla. KAUN-O, me mahmahsen.’ KAUN-O, Wasa lapalap, ketin mahsanih me kalokolok pahn lelohng ehu wehi mwurin ehu wehi, oh melimel laud ehu tepidahr ni imwin sampah. Ni rahno paliweren irail kan me KAUN-O ketin kemelahr pahn mwarahkseli sang apali sampah lel apali. Sohte mehmen pahn mwahieikin irail, oh re sohte pahn seridi. Re pahn koasoakoasoakda rasehng koasoakoasoak en pwise.” (Ser. 25:31-33) Armakedon pahn kasohrehla douluhl ahn Sehdan sampah. Ahpw sapwellimen Siohwa pwihn pahn mihmihte.

6, 7. (a) Ia wasa aramas akan me wiahda “pokon kalaimwun” kohsang? (b) Dahme kadehdehda me sapwellimen Koht pwihn kin pousehlahte wie kekeirda?

⁶ Rahnwet, sapwellimen Koht pwihn nin sampah kin pousehlahte kekeirda pwehki aramas pwung kan me Koht ketin kupwurki iei me kadirehla. Paipel mahsanih: “Silangin Kaun-o kin mahmahsanih me pwung kan, oh e kin karonge ar pekipek kan.” (1 Pit. 3:12) Aramas pwung pwukat kin iangahki “pokon kalaimwun” ehu, me ngedehrie, me pahn pitsang “kahn kamakam kowahlap.” (Kaud. 7:9, 14, NW) Medewehla ia pahn omw pepehm ni omw pahn pitsang kahn kamakam kowahlapo oh iang mi nanpwungen pokon kalaimwun wet!

⁷ Pokon kalaimwun wet wiawihkihda aramas akan sang sahpw koaros. Doadoahk en kalohk iei me kin kaminiminpene irail. Sises ketin kohpada: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros​—a mwuri, imwin sampah ahpw pahn kohdo.” (Mad. 24:14) Ihme kahrehda doadoahk me keieu kesempwal  ong sapwellimen Koht aramas akan iei en kalohki rongamwahu en Wehin Koht. Pwehki met, aramas rar rar kei kin kaudokiong Siohwa ni “mehlel.” (Sohn 4:23, 24) Karasepe, nanpwungen pahr 2003 oh 2012, aramas tohtohsang 2,707,000 inoukihong Siohwa arail mour oh papidaisla. Rahnwet, mie Sounkadehde kan me tohtohsang 7,900,000, oh nan sounpar koaros, pil mie meh rar rar kei me kin iang towehda Kataman en pwoulahn Krais. Kitail perenki me pokon kalaimwuno kin mwadang wie kekeirda oh kitail ese me Siohwa me ketin kahrehiong en kekeirda.​—1 Kor. 3:5-7.

8. Dahme kahrehda sapwellimen Siohwa pwihn kin wie kekeirda laud?

⁸ Siohwa ketin pilada pwihn ehu nin sampah pwehn wilian ih. Oh pwihn wet wie kekeirda mwadang. (Wadek Aiseia 43:10-12.) Aiseia kohpada duwen imwin rahn akan: “Me keieu tikitik oh sohte wede rehmwail pahn lapalapala rasehng wehi lapalap ehu. I pahn koasoanehdi pwe irair wet en kak pweida mwadang, ni ahnsawi eh pahn leledo. Ngehi me KAUN-O!” (Ais. 60:22) Luhwen me keidi kan, “Israel en Koht,” kin duwehte “me keieu tikitik oh sohte wede,” ahpw Siohwa ketin kapaiada arail doadoahk en kalohk. Irail wie tohtohla ni me keidi teikan ar iangala sapwellimen Koht pwihn. (Kal. 6:16, NW) Nan sounpar kan me douwehr powe, aramas rar rar kei me ahneki koapworopwor en mour nin sampah pil iangala padahk mehlel.

9. Dahme kitail anahne wia pwehn paiekihda sapwellimen Koht inou en mour kaselel ni ahnsou kohkohdo?

⁹ Siohwa ketin inoukihong kitail koaros mour kaselel ehu ni ahnsou kohkohdo mehnda ma kitail iang me keidi kan de pokon kalaimwun. Pwehn paiekihda inou wet, kitail anahne peikiong sapwellime kehkehlik kan. (Ais. 48:17, 18) Karasepe, Siohwa ketin kupwurki mehn Israel ko ren peikiong sapwellime Kosonned. Kosonnedo pahn pere irail oh padahkihong irail ia duwen arail pahn ahneki mouren peneinei nsenamwahu oh kompoakepah mwahu kan, ia duwen arail en wia arail pesines kan ni mehlel, oh ia duwen arail en kasalehda kadek ong meteikan. (Eks. 20:14; Lip. 19:18, 35-37; Deud. 6:6-9) Met pil kin wiawi ong kitail rahnwet. Sapwellimen Koht kehkehlik kan kin pere kitail oh pil wia kamwahu ong kitail. Kehkehlik pwukat sohte nohn apwal ong kitail en peikiong. (Wadek 1 Sohn 5:3.) Ni atail kin peikiong, atail mour kin nsenamwahu, oh kesempwal sang met, atail pwoson Siohwa kin kehlailla.​—Taitus 1:13.

10. Dahme kahrehda kitail anahne tehk mwahu me kitail kin kaukaule onopki Paipel oh wia atail Kaudok en Peneinei ni soutik kan?

¹⁰ Sapwellimen Koht pwihn nin sampah kin mwekimwekid kohwei ni ahl tohto. E kin sewese kalaudehla atail wehwehki padahk mehlel en Paipel. Ih met me Paipel inoukihda: “Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.” (Lep. Pad. 4:18) Ahpw emenemen kitail anahne pein idek: ‘I kin ese duwen wekidekla kan me ahpwtehn wiawi duwen mwomwen atail wehwehki ekei iren Paipel kan? I kin wadek Paipel rahn koaros? I kin ngoangki wadek ehuehu sawaspen Paipel kapw kan? I kin wia Kaudok en Peneinei ni ehu soutik en wihk koaros?’ E sohte apwal en wia koasoandi pwukat, ahpw kitail anahne koasoanehdi ahnsou pwehn wia mepwukat. E uhdahn kesempwal kitail en pousehlahte onopki Mahsen en Koht, kapwaiada oh peipeian sapwellimen  Koht pwihn. Kitail anahne wia met, ahpw mehlel ni kahn kamakam kowahlapo eh kerendohr!

11. Dahme kahrehda sapwellimen Siohwa aramas akan kin iang towehda mihting kan oh mihting tohrohr kan?

¹¹ Sapwellimen Siohwa pwihn kin kangoange kitail en idawehn ahn Pohl kaweid: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kaun-o kerendohr.” (Ipru 10:24, 25) Mehn Israel kan en mahs kin kalapw pokonpene pwehn kaudokiong Siohwa oh ale kaweid sang reh. Ehu soangen kapokon kaperen pwukat iei kasarawi en impwal kan ni mwehin Nehmaia. (Eks. 23:15, 16; Neh. 8:9-18) Rahnwet, e pil kin mie mihting kan oh mihting tohrohr kan me kitail kin wia. Kitail anahne song iang towehda mihting pwukat koaros pwehki mihting pwukat kin sewese kitail en mihmi karanih Siohwa oh pil ahneki peren ni atail papah ih.​—Taitus 2:2.

12. Ia atail pepehm ong doadoahk en kalohk?

¹² Nin duwen towe kan en sapwellimen Siohwa pwihn, kitail anahne kalohki rongamwahwo. Met wia pwais kaselel ehu ong kitail. Ni mehlel, Paipel mahsanih me doadoahk wet wia doadoahk sarawi ehu. (Rom 15:16) Ni atail kin kalohk, kitail kin iang Siohwa, me “ketin sarawi,” doadoahk. (1 Kor. 3:9; 1 Pit. 1:15) Kitail pil kin iang kawauwih mwaren Siohwa me sarawi. E kin kihong kitail peren en kalohki “duwen lingan en rongamwahu en Koht en peren.”​—1 Tim. 1:11, NW.

13. Dahme atail mour oh atail nanpwungmwahu rehn Siohwa kin poahsoankihda?

¹³ Siohwa ketin kupwurki dahme keieu mwahu ong kitail. Ihme kahrehda e ketin kupwurki kitail en mihmi karanih ih oh sapwellime pwihn. Kitail anahne wiahda atail pilipil duwehte mehn Israel ko ar anahne wiahda pilipil ni Moses eh padahkihong irail: “Kumwail en pilada nanpwungen mour oh mehla, nanpwungen sapwellimen Koht kupwuramwahu de sapwellimen Koht keria. Eri, pilada mour. Poakohng KAUN-O, amwail Koht, kapwaiada sapwellime mahsen oh loalopwoatohng, pwe ih me pahn kahrehiong kumwail oh kadaudokamwail kan mour werei.” (Deud. 30:19, 20) Pilada mour. Poakohng Siohwa oh ahnsou koaros loalopwoatohng ih oh sapwellime pwihn.

14. Ia pepehm en emen brother duwen sapwellimen Koht pwihn?

¹⁴ Brother Pryce Hughes, me sukuhlkihdi padahk mehlel mwohn pahr 1914, kin loalopwoatongete Siohwa oh sapwellime pwihn erein eh mour. Ahnsou me e koasoiahda duwen eh mour, e nda me mehn kasukuhl me keieu kesempwal me e sukuhlkihdi iei en mihmi karanih sapwellimen Siohwa pwihn oh dehr koapworopworki lamalam en aramas. Met sewese ih en dadaur pahn kasongosong kan nan eh mour. Brother Hughes nda me ihte ahl en ahneki sapwellimen Siohwa kupwuramwahu iei en ahnsou koaros idawehn kaweid en sapwellime pwihn.

15. Mehn kahlemeng dahieu nan Paipel me padahkihong kitail ia duwen atail pahn mwekidki wekidekla kan ong ekei padahk kan en Paipel?

¹⁵ Siohwa ketin kupwurki kitail en utung sapwellime pwihn oh pwungki wekidekla kan ong mwomwen atail wehwehki padahk mehlel en Paipel oh pil ong mwomwen atail kalohk. Ni mwehin wahnpoaron ko, ekei Kristian en Suhs kan kin poadidiongete Kosonnedo. (Wiewia 21:17-20)  Ahpw Pohl kapwungala irail oh sewese irail ren kilang me sapwellimen Sises meirongo me kahrehda mahkpen diparail en kak mie, kaidehn meirong en mahn akan. (Ipru 10:5-10) Tohtohn Kristian pwukat pwungki ahn Pohl kaweid oh wekidala arail madamadau. Kitail kak sukuhlki mehn kasukuhl kesempwal ehu sang arail mehn kahlemeng. Kitail anahne onopki mwahu Paipel oh neitail sawaspen Paipel kan, oh ni sapwellimen Siohwa pwihn eh wiahda wekidekla kan, kitail anahne ni aktikitik utungada.

16. (a) Dahme kahrehda mour nan Paradais pahn uhdahn kaselel? (b) Dahme ke kasikasik nan sampah kapw?

¹⁶ Koaros me loalopwoatohngete Siohwa oh sapwellime pwihn pahn ale kapai kan. Me keidi kan pahn papah nin duwen nanmwarki kei rehn Sises Krais nanleng. (Rom 8:16, 17) Irail me ahneki koapworopwor en kousoan nin sampah kin kasikasik mour soutuk nan Paradais. Sapwellimen Siohwa aramas akan koaros nin sampah ahneki pwukoa tohrohr ehu en padahkihong meteikan duwen koapworopwor wet. (2 Pit. 3:13) Paipel mahsanih: “Me aktikitik kan pahn sapwenikihla sahpwo oh re pahn paiamwahu oh popohl.” (Mel. 37:11) Aramas akan pahn nsenamwahuki arail doadoahk. “Aramas akan pahn kauwada imwarail kan oh kousoanla loale.” (Ais. 65:21, 22) Sohte me pahn wiahiong meteikan me suwed. Sohte emen pahn semwehmwe, oh mwenge pahn itarohng koaros. (Mel. 72:13-16) Pelien lamalam likamw kan solahr pahn padahngki padahk likamw duwen Koht pwehki re solahr mie. (Kaud. 18:8, 21) Me melahr akan pahn iasada oh pahn kakehr mour kohkohlahte nin sampah. (Ais. 25:8; Wiewia 24:15) Ma kitail kakehlakahla atail nanpwungmwahu rehn Siohwa oh pousehlahte peipeian sapwellime pwihn, inou kaselel pwukat pahn uhdahn pweida rehtail.

17. Ia atail pepehm ong Siohwa oh sapwellime pwihn?

¹⁷ Koasoandi en Sehdan pahn kereniong imwisekla. Pwe kitail en pitla, kitail anahne kolokolte atail pwoson en kehlail oh iang sapwellimen Siohwa pwihn kaudokiong ih ni loalopwoat. Atail pepehm kin duwehte ahn Depit ni eh koulki: “Meteieu me I patohwan peki rehn KAUN-O; mehteieu me I kin anahne: I en kin mihmihte nan tehnpas en KAUN-O erein ei mour, pwe I en kin uduhdiahl sapwellime lingan, oh I en peki sapwellime kaweid kan wasao.” (Mel. 27:4) Emenemen kitail en kin mihmi karanih Siohwa oh peipeian sapwellime pwihn.