1. Mwomwen atail wiewia ong aramas akan me kitail kin kalohk ong kesempwal? Menlau kihda ehu karasaras. (Menlau kilang tepin kilel.)

 PWOUPWOUD ehu nan Fiji wia kalokalohk oh luke aramas akan ong Kataman en pwoulahn Krais. Ira koasoakoasoiong emen lih likin imweo oh keteu tepida mweredi. Brothero oh eh pwoud kihong ehu neira amper ko pwe liho en doadoahngki. Liho uhdahn mwekidkihda met me kahrehda e pilada en iang towehda Katamano. Mwuhr e nda me e sohte taman dahme pwopwoudo ndaiong ih, ahpw e taman kadek me ira kasalehiong ih. Pwopwoudo idawehn sapwellimen Sises kaweid duwen atail wiewia ong meteikan.

2. Kaweid dahieu Sises ketikihda, oh ia duwen atail kak idawehn?

² Kaweid dahieu me Sises ketikihda? E mahsanih: “Kumwail wiahiong meteikan me kumwail kin anahne aramas akan en kin wiahiong kumwail.” (Mad. 7:12) Ia duwen atail kak wia met? Keieu, pein idek rehmw, ‘Ma ngehi aramaso, dahme I men meteikan en wiahiong ie?’ Keriau, wia uwen omw kak en wiahiong meteikan soahngohte.​—1 Kor. 10:24.

3, 4. (a) Menlau kawehwehda dahme kahrehda sapwellimen Sises kaweido kin mwahu ong atail wiewia ong aramas koaros. (b) Dahme kitail pahn koasoipene nan iren onop wet?

³ Ia duwe, Sises kin mahmahsanih me kitail en idawehn  sapwellime kaweid duwen atail wiewia kan ongete irail kan me mi nan mwomwohdiso? Soh, e kin mahmahsanih duwen atail wiewia kan ong aramas koaros, iangahki atail imwintihti kan. (Wadek Luk 6:27, 28, 31, 35.) Eri e pil uhdahn kesempwal en idawehn sapwellime kaweido ni atail kin kalohk ong aramas akan, pwehki tohto rehrail ele pahn mwekidki rongamwahwo oh ale “mour soutuk”!​—Wiewia 13:48.

⁴ Met kitail pahn koasoiapene peidek pahieu me kitail en medemedewe ni atail kin iang kalohk. Ihs me I koasoakoasoiong? Ia wasa me I koasoakoasoiong irail? Iahd me keieu mwahu en koasoiong irail? Ia duwen ei pahn koasoiong irail? Nin duwen me kitail pahn kilang, peidek pwukat kak sewese kitail en wehwehki dahme meteikan men kitail en wiahiong irail. Eri, kitail pahn ese ahl me keieu mwahu en koasoiong emenemen aramas.​—1 Kor. 9:19-23.

5. Soangen peidek dah kan me kitail en pein idek rehtail?

⁵ Aramas koaros me kitail kin tuhwong nan atail kalohk wekpeseng oh emenemen irail mie pein arail irair kan oh kahpwal kan. (2 Kron. 6:29, 30) Ni omw koasoiong emen, pein idek rehmw: ‘Ma ngehi aramaso, dahme I men meteikan en wiahiong ie? I men aramas en mwadangete medewe oh kadeik ie mwohn e eseiehla? De I pahn men ih en esehla soangen aramas dahmen ngehi? Peidek pwukat kak sewese kitail en idawehn sapwellimen Sises kaweid duwen atail wiewia kan ong meteikan oh kasalehda atail nsenohki emenemen aramas.

6, 7. Dahme kitail anahne wia ma kitail tuhwong emen nan kalohk me mwomwen lingeringer de sohte kasalehda wahu?

⁶ Karasepe, Kristian kan kin wia uwen arail kak en idawehn kaweid kan en Paipel pwe ren ahnsou koaros koasoi ni kadek oh wahu. (Kol. 4:6) Ahpw kitail sohte unsek. Mwein kitail nsensuwed rahn ehu oh kitail ele nda mehkot me mwuhr kitail koluhkihla. (Seims 3:2) Ni met eh wiawi, kitail koapworopworki me aramaso pahn wehwehki me kitail sohte kin kalapw wia soahngo. Kitail sohte men aramaso en medewe me kitail sohte kin kasalehda wahu. Atail ese met kin sewese kitail en wehwehki me aramas akan me sohte kasalehda wahu ele mwuhr kin koluhkihla dahme re ndaiong kitail.

⁷ Ma ke tuhwong emen me mwomwen lingeringer de sohte kasalehda wahu, ke kak song en wehwehki dahme kahrehda e wiahki soangen mwekido? E sou mwein pwunodki mehkot ni eh wasahn doadoahk de wasahn sukuhl? De e ahneki soumwahu laud ehu? Aramas tohto me kin lingeringerda ni Sounkadehde kan ar tepin tuhwong irail kin men rong mwuhr pwehki Sounkadehde kan kin wauneki oh kadek ong irail.​—Lep. Pad. 15:1; 1 Pit. 3:15, 16.

8. Dahme kahrehda kitail anahne kalohki rongamwahu en Wehio ong “aramas koaros”?

⁸ Kitail kin kalohk ong soangen aramas koaros. Nan sounpar kei samwalahr ko, koasoiepen aramas 60 samwa pwarada pahn oaralap “Paipel Kin Wekidala Mouren Aramas” nan neitail Kahn Iroir. Oaralap pwukat koasoia duwen aramas akan me mahs wia soun pirap, soun kamam sakau, iang pwihn en aramas mwersuwed, de soun doadoahngki wini en kasahliel. Ekei kin wia soun politik, kaun en pelien lamalam, de kin nsenohkihte arail doadoahk en mwohni. Ekei kin ahneki mour en tiahk samin me uhdahn suwed. Ahpw irail koaros rong rongamwahwo, pwungkihda en onop Paipel, wiahda wekidekla kan nan arail mour oh iangala padahk mehlel. Met wehwehki me kitail en dehr medewe me ekei aramas sohte pahn douluhl rong rongamwahu en  Wehio. (Wadek 1 Korint 6:9-11.) “Aramas koaros” kak iangala padahk mehlel.​—1 Kor. 9:22.

9. Dahme kahrehda kitail anahne kasalehda me kitail wauneki ahn meteikan wasahn kousoan?

⁹ Kitail kin kalapw kalohk ong aramas akan ahnsou me re mi ni imwarail. (Mad. 10:11-13) Atail wasahn kousoan kin kesempwal ong kitail, eri kitail men meteikan en kasalehda me re wauneki atail wasahn kousoan oh atail kepwe kan. Kitail kin mwahuki atail wasahn kousoan en wia wasa ehu me sohte keper oh ahneki onepek mwahu. Ni atail kin koasoiong aramas akan, kitail anahne kasalehda soangen wahuohte ong arail wasahn kousoan.​—Wiewia 5:42.

10. Ia duwen atail kak dehr kansensuwedihada meteikan ni atail kin kalohk?

¹⁰ Kitail mi nan sampah ehu me diren mwersuwed oh tohnihmw tohto kin lemelemehk suwedki aramas me re sehse. (2 Tim. 3:1-5) Kitail en dehr wia mehkot me pahn kahrehiong ren lemelemehk suwedki kitail. Karasepe, ke letelet ni ihmw ehu. Ma sohte emen sapeng, mwein ke pahn men kilanglong nan wenihmwtoko de alu seli likin ihmwo pwehn rapahki tohnihmwo. Ele ke men wia met pwehki ke men diar uwen aramas tohto me ke kak ni omw kalohk. (Wiewia 10:42) Ke uhdahn men sewese aramas akan en sukuhlki dahme mehlel duwen Koht. (Rom 1:14, 15) Ahpw ia duwe, met pahn kansensuwedihada tohnihmwo nan omw wasahn kalohk? Dahme mehn mpe kan ele pahn medewe? Kitail anahne loalokong oh dehr wia mehkot me ele pahn kansensuwedihada aramas akan nan atail wasahn kalohk. Wahnpoaron Pohl ntingihedi: “Se sohte men aramas emen en kahdsuwedih at kohwa doadoahk, ihme se sohte kin men kedirapwahki emen.” (2 Kor. 6:3) Aramas akan nan atail wasahn kalohk ele pahn men rong padahk mehlel ni atail kin kasalehda atail wauneki arail wasahn kousoan oh arail kepwe kan.​—Wadek 1 Piter 2:12.

11. Dahme kahrehda kitail kin mwahuki ni meteikan ar kin wauneki atail ahnsou?

¹¹ Pali laud en kitail kin uhdahn kedirepw. Pwehn wiahda soahng koaros, kitail anahne pilahn mahs oh koasoanehdi mwahu atail ahnsou. (Ep. 5:16; Pil. 1:10) Ma mehkot me kitail sohte kasik wekidala atail koasoandi kan, ele kitail kin pwunodikihda. Eri, kitail kin mwahuki ni meteikan ar kin wauneki atail ahnsou oh ren pil wehwehki me ele kitail sohte ahneki ahnsou laud ong irail. Ia duwen sapwellimen Sises kaweid duwen atail wiewia eh kin sewese kitail en kasalehda me kitail kin wauneki ahn meteikan ahnsou?

12. Ia duwen atail kak pilada ahnsou me keieu mwahu pwehn koasoiong aramas akan nan atail wasahn kalohk?

¹² Iahd me keieu mwahu en koasoiong aramas akan? Pein idek rehmw: ‘Nan ei wasahn kalohk, iahd me aramas akan kin kalapw mi ni imwarail? Ahnsou dah me re pahn kak rong?’ E pahn mwahu en wekidala atail koasoandi kan pwehn koasoiong irail nan soangen ahnsou ko. Nan ekei sahpw, e kin keieu mwahu en kalohk ihmw lel ihmw mwurin souwas de ni soutik. Ma met kin wiawi nan omw wasa, ke kak koasoanehdi pwehn koasoiong aramas akan erein ahnsou ko? (Wadek 1 Korint 10:24.) Siohwa pahn ketin kapaiada soangen tounmetei koaros me kitail wiahda pwe kitail en kak kalohk ong aramas akan ni ahnsou me keieu mwahu ong irail.

13. Ia duwen atail kak kasalehda me kitail wauneki tohnihmwo?

¹³ Ia pil ehu ahl me kitail kak kasalehda me kitail wauneki tohnihmwo? Ni atail diar emen  me rong atail padahk, kitail anahne wia padahk mwahu ahpw kitail en dehr koasoiong ih nohn werei. Ele tohnihmwo koasoanehdi en wia mehkot me pil kesempwal ong ih. Ma e nda me e kedirepw, kitail kak nda me kitail sohte pahn mihmi werei. Eri, kitail anahne wia dahme kitail nda oh koasoi ni mwotomwot. (Mad. 5:37) Ni atail kaimwisekala atail koasoi, e pahn mwahu en idek iahd me keieu mwahu en pwurala reh. Ekei sounkalohk kin nda: “I pahn perenki pwurodo rehmw. E pahn mwahu ma I delepwohndo de textsi iuk mwohn ei kohdo?” Ni atail wauneki me aramas akan kin kedirepw oh mie pein arail koasoandi kan, kitail kin idawehn mehn kahlemeng en Pohl. E sohte kin wia dahme keieu mwahu ong ih, ahpw e kin wia dahme keieu mwahu ong “koaros, pwe re en kak mourla.”​—1 Kor. 10:33.

14-16. (a) Dahme kahrehda kitail anahne ni sansal ndaiong tohnihmwo kahrepen atail mwemweitla rehrail? Menlau kihda ehu karasaras. (b) Dahme emen sounapwalih me kin seiloak diarada me kin pweida mwahu?

¹⁴ Medewehla ma aramas emen delepwohndo rehmw ahpw ke sohte kak kasawihada ngileo. Ke sehse ihs ih ahpw e idek rehmw soangen mwenge dah me ke iouki. Ke medemedewe ihs me delepwohndo rehmw oh dahme e uhdahn mwahuki. Ke sohte men kasalehda me ke sohte wauneki, eri ele ke koasoiong ih ni ahnsou mwotomwot. Ahpw mwurin ahnsou kis, ke pahn men kauhdi amwa koasoakoasoi. Met medewehla me aramasohte me delepwohndo rehmw uhd ndaiong uhk ihs ih oh me eh doadoahk iei en sewese aramas akan ren kang mwenge me mwahu ong roson mwahu. Ni kadek e ndaiong uhk me  mie iren sawas kei reh me ele kak sewese iuk. Mwein ke pahn men rong ih. Ni mehlel, kitail kin mwahuki ni aramas akan ar sohte kin ekihsang kitail ihs irail ni arail kin koasoiong kitail. Ia duwen atail kak kasalehda wahuohte ong aramas akan me kitail tuhwong?

¹⁵ Ni wasahn kalohk tohto, kitail kin anahne padahkihong tohnihmwo kahrepen atail mwemweitla rehrail. Mehlel me kitail weuwa ire kesempwal kan me tohnihmwo anahne. Ahpw medewehla ma kitail sohte ndaiong irail ihs kitail oh kahrepen atail kohla rehrail ahpw tepidahte doadoahngki peidek wet: “Ma ke kak kamwahwihala kahpwal koaros nin sampah, mehnia me ke men kamwahwihala?” Kitail idek peidek wet pwehn diarada dahme aramaso medemedewe pwe kitail en kak doadoahngki Paipel ni atail koasoakoasoipene. Ahpw tohnihmwo ele medewe: ‘Ihs aramas menet oh dahme kahrehda e idek rehi peidek wet? Dahme wiewiawi?’ Kitail kin men tohnihmwo en perenki koasoiong kitail. (Pil. 2:3, 4) Eri, ia duwen atail kak wia met?

¹⁶ Emen sounapwalih me kin seiloak kin wia soahng wet: Mwurin eh rahnmwahwih tohnihmwo, e kin kihong kisin doaropwe me oaralap Ke Sou Men Esehla Duwen Padahk Mehlel? oh nda: “Rahnwet, se kin kihong aramas koaros nan omw wasa doaropwe wet. E kin koasoiahda peidek weneu me aramas tohto kin idek. Iet noumw doaropwehn.” Brothero nda me ni arail kin ese kahrepen eh mwemweitla rehrail, pali laud en irail kin saledek oh e pil mengei en pousehla arail koasoakoasoipene. Brothero pil idek rehn aramaso: “Mie pak me ke kin medemedewe duwen ekei peidek pwukat?” Ma tohnihmwo pilada ehu peidek, brothero pahn pahkpeseng doaropweo oh koasoia dahme Paipel mahsanih duwen peideko. Ma soh, brothero pahn pilada ehu peidek oh pousehlahte eh koasoakoasoi oh sohte kahrehda tohnihmwo en namenekda. Mehlel, mie ahl tohto me kitail kak tapiada atail koasoi. Nan ekei sahpw, kitail anahne idawehn ekei tiahk ni atail kin rahnmwahwih aramas mwohn atail pahn ndaiong kahrepen atail kohla rehrail. Kitail anahne wehwehki me e kesempwal en wekidala wiepen atail padahk pwe aramas akan en men rong atail padahk.

17. Ia ekei ahl me kitail kak idawehn sapwellimen Sises kaweid duwen atail wiewia ni atail kin kalohk?

¹⁷ Dahme kitail sukuhlkiher me kak sewese kitail en idawehn sapwellimen Sises kaweid duwen atail wiewia ni atail kin kalohk? Kitail kin nsenohki oh wauneki emenemen aramas. Kitail kin kasalehda atail wauneki en tohnihmwo eh wasahn kousoan oh eh kepwe kan. Kitail kin wia uwen atail kak en kalohk ni ahnsou me aramas akan kin mi ni imwarail oh mie arail ahnsou en rong. Kitail kin tepikihda atail padahk ni ahl ehu me pahn kahrehiong aramas akan nan atail wasahn kalohk en men rong.

18. Dahme kahrehda e mwahu en wiahiong irail kan nan atail wasahn kalohk duwehte me kitail mwahuki ren wiahiong kitail?

¹⁸ Ni atail kin kadek ong irail kan nan atail wasahn kalohk oh medemedewe duwen arail pepehm, kitail kin kasalehda me kitail kin kapwaiada kaweid en Paipel kan, oh met kin kihong kaping ong Samatail nanleng. (Mad. 5:16) Aramas tohto ele pahn men sukuhlki padahk mehlel ni atail kin kasalehda wahu ong irail. (1 Tim. 4:16) Sohte lipilipil ia duwen aramas akan ar kin mwekidki rongamwahu en Wehio, kitail pahn ese me kitail wiahier uwen atail kak nan atail doadoahk en kalohk. (2 Tim. 4:5) Kitail en alasang wahnpoaron Pohl me ntingihedi: “I wialahr soahng koaros rehn aramas koaros, pwe I en komourala ekei irail.” (1 Kor. 9:22) Kitail koaros en idawehn sapwellimen Sises kaweid duwen atail wiewia kan ni atail koasoiong meteikan.