Naoko, me kitail koasoiapene nan oaralap en mwoweo, ndahki eh powehdi simoak: “Ei sukuhlki dahme mehlel duwen sapwellimen Koht irair kaselel kan oh pil kupwure iei me kahrehda ien kak wekidala ei mour.” Dahme e sukuhlki kin dierek nan Paipel. Mendahki Paipel sohte mahsanih duwen sika de tipaker, e sewese kitail en wehwehki sapwellimen Koht madamadau ong simoak. * Ong me tohto, madamadau wet kin kangoange irail en pelianda de uhdihsang simoak. (2 Timoty 3:16, 17) Kitail pahn koasoiapene soangen keper siluh me simoak kin kahrehda oh dahme Paipel mahsanihki duwen keper pwukat.

Mie mehkot nan sika me adaneki nicotine me kin keieu kahrehda aramas en sohla kakasang simoak. E kin kahrehda aramaso en men mwekimwekidseli oh pil kin katikala ineng kei me aramaso ahneki, duwehte men mwenge ape. Ni omw kin simsimoak, e kin mwadang pwurepwurehng kadarala nicotine nan omw mwahliel. Ahnsou koaros me ke kin ihkada simoak, e kin duwehte omw kangala wini ehu. Eri, ong emen me simoakehla koaruk en sika ehu rahn ehu, met duwehte e kangala mpen wini 200 rahn ehu. Pwehki uwen laud en nicotine me e kihong nan paliwere, met kahrehda e sohla kak uhdihsang simoak. Ahnsou me aramaso sohla kakasang simoak, e pahn kin mwomwen soumwahukihda ma e sohte kaitarala eh ineng en simoak.

Paipel sewese kitail en ahneki madamadau pwung duwen ire wet ni eh mahsanih: “Kumwail eseier met: ni amwail mweidohng pein kumwail pwe en wiahla lidun emen oh peikiong, eri, mehlel kumwail me lidun me kumwail kin peikiong.” (Rom 6:16) Ni en emen eh madamadau oh wiewia kan kasalehda me eh ineng en kang sika kaundahier ih, e wiahla lidun tiahk samin wet. Ahpw, Koht, me mwarenki Siohwa, * ketin kupwurki kitail en saledek sang kaidehn ihte wiewia ahpw pil madamadau me kin kauwehla paliwaratail. (Melkahka 83:18; 2 Korint 7:1) Eri, ni emen eh kalaudehla eh kalahngan oh eh wauneki Siohwa, e pohnese me Siohwa ketin warohng ale dahme keieu mwahu sang reh oh me e sohte kak patohwanohng Koht dahme keieu mwahu reh ma e wiahte lidun tiahk keper ehu. Madamadau wet kin sewese aramaso en men pelianda soangen ineng keper kan.

Olaf, me kin mi Sehmen, tepida simoak ahnsou me e sounpar 12. Sounpar 16 mwuri, e powehdi eh ineng en simoak. Olaf medewe me e sohte keper en simoak sika. Ahpw mwurin sounpar tohto, e sohla kak uhdihsang. E nda: “Ehu pak, e sohla kenei sika. I uhdahn pwunodikihda met, kahrehda I rikida filter en sika koaros me mi nan doupen pehso, kihsang luhwen sika me mi ni filtero oh kidimpene nan kisin doaropwe. Ni ei medewehla dahme  I wiahu, e uhdahn kanamenek.” Ia duwen eh uhdihsang tiahk kanamenek wet? E nda: “Kahrepe keieu kesempwalo iei ei men kaperenda Siohwa.” E pil nda: “Siohwa eh ketin poakohng aramas akan oh pil koapworopwor me e ketikihda kihong ie kehl en uhdihsang douluhl tiahk wet.”

Ehu pwuhk koasoia: “Saintis kan kadehdehda me simoak sika kin kauwehla kakon koaros nan paliwar oh kin kahrehda soumwahu oh mehla en tohtohla.” (The Tobacco Atlas) Aramas tohto ese me simoak kin kahrehda soangen soumwahu kan me sohte kak douseli, duwehte kanser, soumwahu en mohngiong oh soumwahu en ngolungol. Ahpw ohpis en apwalih palien roson mwahu nan sampah pwon (WHO) koasoia me simoak iei me pil kin keieu kahrehda mehla sang soangen soumwahu lusulus kan, duwehte soumwahu en limengimeng.

Sang sapwellime Mahsen, Paipel, Siohwa Koht ketin padahkihong kitail en ahneki madamadau pwung duwen atail mour, paliwaratail oh pil atail lamalam. Sapwellime Ohl, Sises, mahsanih duwen met ni eh mahsanih: “Ke pahn poakohng Kaun-o omw Koht sang nan kapehdomw unsek, sang ni [“omw mour,” NW] unsek, sang ni omw lamalam koaros unsek.” (Madiu 22:37) Eri e sansal me Koht ketin kupwurki kitail en doadoahngki mwahu atail mour oh paliwaratail oh pil wauneki. Ni atail sukuhlki duwen Siohwa oh sapwellime inou kan, kitail kin poakohngala ih oh kesempwalikihla soahng koaros me e ketin wiadahr ong kitail. Met kin kamwakid kitail en katohrekitailsang soahng koaros me kin kasaminehla paliwaratail.

Jayavanth, toahkte men sang India, simoangki sounpar 38. E nda: “I sukuhlki duwen keperpen simoak sang pwuhken toahkte kan. I ese me e sapwung oh I kin kaweidki nei soumwahu kan ren uhdihsang tiahk wet. Ahpw pein ngehi sohte kak uhdihsang, mendahki I song en wia met pak limau de weneu.” Dahme sewese ih en uhdihsang? E nda: “I uhdihsang simoak pwehki ei kin onop Paipel. Ei men kaperenda Siohwa kin kamwakid ien mwadang uhdihsang tiahk wet.”

Ediniei me soun simoako peukiei oh ediniei me kohsang sika me wie lullul kin uhdahn pwoisin. Omw esingengki soangen ediniei pwukat kin kak kahrehda kanser oh soangen soumwahu teikan. Sounpar koaros e kin kemehla me sohte kin simoak kan meh wenelopw (600,000), pali laud iei lih oh seri kan. Ripoht ehu sang WHO  kihda mehn kataman ehu: “Ediniei sang simoak kin keper ong irail kan me sohte simoak, mehnda ma ahnsou kiste re karanih me simoako.”

Sises ketin mahsanih me ke anahne keieu poakohng Koht oh keriau, ke anahne poakohng mehn mpomw kan, me iei omw peneinei, kompoakepahmw kan oh pil meteikan. E mahsanih: “Ke pahn poakohng mehn mpomw duwen omw kin poakohng pein uhk.” (Madiu 22:39) Ma kitail kin wia tiahk ehu me kin kamedekihala irail me karanih kitail, kitail sohte kin kasalehda limpoak ong mehn mpatail. Limpoak mehlel kin kamwakid kitail en idawehn kaweid en Paipel me mahsanih: “Kumwail dehr kin ngoangki raparapahkihte pein kamwahupamwail kan, ahpw emenemen en ngoangki rapahki kamwahupen meteikan.”​—1 Korint 10:24.

Armen, me kin mi Armenia, nda: “Ei peneineio kin peki ien dehr simoak pwehki e pil kin suwed ong irail. Ahpw I sohte men nda me I pil pwungki me e kak suwed ong irail.” E kawehwehda dahme wekidala eh madamadau: “Ei esehla duwen Paipel oh ei poakohng Siohwa sewese ien uhdihsang simoak oh nda me simoak kin keper ong kaidehn ihte pein ngehi ahpw pil ong meteikan me karanih ie.”

Olaf, Jayavanth, oh Armen arail esehla Paipel sewese irail en uhdihsang tiahk sapwung wet me kin kamedekihala pein irail oh pil meteikan. Kahrepen arail pweida sohte ihte kohsang arail ese me simoak kin keper. Ahpw re pweida pwehki arail poakohngala Siohwa oh men kaperenda ih. Kesempwalpen limpoak kin sansalda nan 1 Sohn 5:3, me mahsanih: “Iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.” Ei mehlel, atail idawehn mouren kaweid kan en Paipel sohte pahn mengei ahnsou koaros, ahpw peik sohte pahn wia mehkot apwal ma emen kin mwekidki limpoak laud ong Koht.

Sang doadoahk en kasukuhl me kin wiwiawi nan sampah pwon, Siohwa Koht kin ketin sewese kasaledekihala aramas rar rar kei sang arail wia lidun simoak. (1 Timoty 2:3, 4) Ahnsou keren, Siohwa pahn ketin doadoahngki sapwellime Wehi, me iei koperment en nanleng pahn kaundahn sapwellime Ohl, Sises Krais, pwehn ketikihsang palien pesines noahrok kan me pwukoahki kahrehiong aramas tohto en wia lidun simoak. E pahn ketikihsang kahpwal en simoak douluhl oh kahrehiong aramas peik kan ren ahneki paliwar oh madamadau unsek.​—Aiseia 33:24; Kaudiahl 19:11, 15.

Menlau dehr uhdihsang omw nannanti en sohla simoak. Omw sukuhlki en poakohng Siohwa oh ahneki sapwellime madamadau duwen simoak, ke pil pahn diar sawas me ke anahne pwehn pweida. Sounkadehdehn Siohwa kan pahn perenki mwemweitwei rehmw oh sewese iuk sukuhlki oh pil doadoahngki kaweid kan en Paipel. Kamehlele me ma ke men Siohwa en ketin sewese iuk ken uhdihsang simoak, e pahn ketikihong uhk manaman oh kehl me ke anahne.​—Aiseia 12:2.