1, 2. Ia sapwellimen Siohwa pepehm duwen emenemen sapwellime ladu?

 NI PAHPA oh nohno kan ar kilang neirail seri kan mwadong, re kin pwuriamweikihla soangen koahiek kan me seri ko ahneki. Ele ke pil kin kilang met. Emen seri ele kin koahiek nan mwadong kan, a seri teikan mwein perenki mahlen de wiahda soahng kan. Sohte lipilipil soangen koahiek dah me re ahneki, pahpa nohno kan kin perenki sewese neirail seri kan ren doadoahngki arail koahiek ni ahl me keieu mwahu, de seri ko en wia uwen me re kak.

² Nin duwen Sahm limpoak men, Siohwa kin ketin nsenohki sapwellime ladu kan. Re “kesempwal” ong ih ahpw mehlel pwehki arail kin lelepek oh loalopwoat ong ih. (Ak. 2:7) Ele ke kin tehk me riomw Kristian kan ahneki soangsoangen koahiek kan. Karasepe, ekei brother kan kin kadek padahk oh ekei kin ese koasoanehdi koasoandi kan. Sister tohto kin mai en esehla lokaiahn sahpw teikan oh doadoahngki nan kalohk. Ekei kin koahiek en apwalih anahn en me soumwahu kan de kangoange irail me anahne. (Rom 16:1, 12) Kitail uhdahn kalahnganki atail  kin iang patehng soangen brother oh sister pwukat nan mwomwohdiso.

3. Peidek dah kan me kitail pahn koasoiapene nan iren onop wet?

³ Ekei Kristian, ahpw mehlel brother pwulopwul de me ahpwtehn papidaisla kan, ele pehm me re saikinte uhdahn kak iang wia pwukoa kan nan mwomwohdiso. Ia duwen atail kak sewese irail en doadoahngki arail koahiek ni ahl me keieu mwahu? Dahme kahrehda kitail anahne kahlemengih Siohwa oh rapahki irair mwahu kan me riatail brother kan ahneki?

4, 5. Dahme Siohwa ketin mwahngih duwen Kidion? Dahme kitail sukuhlki sang sapwellimen Siohwa mehn kahlemeng?

⁴ Paipel kasalehda me Siohwa sohte kin ihte ketin mwahngih irair mwahu kan rehn sapwellime ladu kan ahpw e pil kin ketin mwahngih duwen arail koahiek kan. Karasepe, Siohwa ketin pilada Kidion pwehn kapitala mehn Israel kan sang arail imwintihti mehn Midian ko. Kidion pehm me e sohte warohng met eri e pwuriamweila ahnsou me tohnleng men ndaiong ih: “Kowe ohl kommwad emen, oh KAUN-O ketin ieiang uhk!” Kidion pehm me e sohte “kommwad” oh e sohte kak doarehla sapwellimen Koht aramas ako. Ahpw sapwellimen Siohwa madamadau weksang met. E ketin mwahngih me Kidion kak wia met oh E kak ketin doadoahngki Kidion pwehn doarehla mehn Israel ko.​—Wadek Sounkopwung 6:11-16.

⁵ Siohwa uhdahn ketin koapworopworki Kidion pwehki E ketin mwahngih soangen koahiek kan me Kidion ahneki. Karasepe, Siohwa ketin mwahngih me ni Kidion eh wie koakoahk wahn pilawa kei, e kin doadoahngki eh kehl koaros. Pil ehu, soumwet kan kin kalapw doadoahk likin ihmw. Ahpw Kidion wie koakoahk pilawa nan loalen wasahn tiak wain pwe mehn Midian ko sohte pahn kilangada wahn eh pilawa ko oh pirapa sang. Siohwa ketin mwahngih me Kidion kak wia laudsang ihte doadoahk laud. E loalokong oh kak wehwehkihda irair ehu oh wiahda pilipil mwahu pwehn soikala keper kan. Ei, Siohwa ketin mwahngih ahn Kidion koahiek kan oh kak ketin kasukuhlih.

6, 7. (a) Ia duwen sapwellimen Siohwa madamadau ong Eimwos eh weksang madamadau en ekei mehn Israel? (b) Ia duwen atail ese me Eimwos warohng pwukoa wet?

⁶ Pil duwehte met, Siohwa ketin mwahngih koahiek kan me soukohp Eimwos ahneki. Ong me tohto, Eimwos ele wia aramas nennen men de sohte kesempwal. E kin wia doadoahk me sohte nohn wad duwehte sounsilepen sihpw oh soumwet. Ahpw Siohwa ketin idihada Eimwos pwehn kapwungala keinek eisek ko en Israel me uhdihsang kaudokiong Ih. Ekei mehn Israel ele medewe me Eimwos sohte warohng met. Dahme kahrehda?​—Wadek Eimwos 7:14, 15.

⁷ Eimwos kin kousoan nan kousapw ehu me dohsang kahnimw kan. Ahpw e ese soahng tohto duwen tiahk kan oh pil kaun akan me kapilpene eh kousapwo. Mwein e esehda soahng pwukat sang soun netinet kan me kin leledo eh wasao oh douluhlla wasa teikan. Karasepe, Eimwos ese soahng tohto duwen wehi kan me karanih eh wasao oh pil soahng suwed kan me wiewiawi nan Israel. (Eimw. 1:6, 9, 11, 13; 2:8; 6:4-6) Pil ehu, Eimwos wia sounnting koahiek men. E kak doadoahngki lokaia mengei ahpw me uhdahn kehlail. E sohte masak en kasansalehda suwed en samworo Amasaia. Ni mehlel, Siohwa ketin pilada aramas men me warohng kasalehda sapwellime mahsen kan. E ketin mwahngih soangen koahiek kan me Eimwos  ahneki me meteikan ele sohte kilang.​—Eimw. 7:12, 13, 16, 17.

8. (a) Dahme Siohwa ketin inoukihong Depit? (b) Dahme kahrehda Melkahka 32:8 kin kangoange irail kan me ele sohte kin koapworopworki pein arail koahiek kan?

⁸ Siohwa kin ketin mwahngih soangen koahiek kan me sapwellime ladu kan ahneki, oh e kupwurki sewese emenemen kitail en wia uwen me kitail kak. Karasepe, Siohwa ketin inoukihda me e pahn ketin padahkih Depit oh ketikihong kaweid kan me e anahne. (Wadek Melkahka 32:8.) Dahme kahrehda met kin kangoange kitail? Mendahki ele kitail sohte kin koapworopworki pein atail koahiek kan, Siohwa kak ketin sewese kitail en wia laudsang me kitail medewe. Duwehte sounpadahk mwahu men me kin padahki tohnsukuhl soakoahiek men nan kahk koaros me e wia, Siohwa kin ketin padahki kitail pwe kitail en kak doadoahngki atail koahiek kan ni ahl me keieu mwahu. Ele e pil kak ketin doadoahngki riatail Kristian kan en sewese kitail en wia met. Ia duwen?

9. Ia duwen atail kak “pohnese” ineng mwahu en riatail Kristian kan?

⁹ Pohl kangoange Kristian koaros ren “pohnese” ineng mwahu en riarail kan. (Wadek Pilipai 2:3, 4.) Dahme pil iang pidada kaweid wet? E pil pidada atail en tehk koahiek kan me riatail kan ahneki oh koasoiaiong irail. Ia omw pepehm ni emen eh kin tehkada irair mwahu ehu me ke ahneki? Ke kin pehm me ke men pousehlahte kalaudehla omw kekeirda, kaidehn? Met pil mehlel rehn riatail kan. Ma kitail kin kihong ahnsou pwehn tehk soangen nanti me riatail brother kan kin wiahda, e pahn kangoange irail ren kalaudehla arail kekeirda oh pweida ni arail papah Siohwa.

10. Ihs me keieu anahne kitail en tehk irail?

¹⁰ Ekei pak, kitail koaros anahne meteikan en tehk kitail. Brother pwulopwul de me ahpwtehn papidaisla kan keieu anahne pehm me re kin iang pidada wiewia kan nan mwomwohdiso. Met pahn sewese irail en wehwehki me re uhdahn katapan de kesempwal nan sapwellimen Siohwa pwihn. Paipel kangoange brother pwukat ren “kin nantihong ale pwukoa en sounapwalih men.” (1 Tim. 3:1, NW) Ahpw ma re pehm me sohte me kin kalahnganki arail doadoahk, met ele pahn katikitikihala arail men kalaudehla arail papah Siohwa.

11. (a) Ia duwen emen elder eh sewese brother pwulopwul men en kekeirda? (b) Dahme ke sukuhlki sang dahme wiawihong Julien?

¹¹ Emen elder me adaneki Ludovic nda me ni emen kin kasalehiong brother men me e uhdahn nsenohkin ih, brothero pahn mwadang en kekeirda. Emen me duwehte soangen brother pwukat iei Julien. Ludovic tehk me Julien kin namenek oh ni Julien eh song kalaudehla eh sawas nan mwomwohdiso, e sohte kin likih pein eh koahiek kan oh kin mwekid ni ahl soakoahiek. Ludovic nda: “Ahpw I kak kilang me e uhdahn kadek oh uhdahn men sawas.” Eri Ludovic sohte kauwe Julien ahpw e kilangwohngete eh irair kaselel kan oh kangoange ih. Pwehki met, Julien kak wiahla sounsawas men nan mwomwohdiso oh mwuhr wiahla emen pioneer.

12. Dahme kitail anahne wia pwehn sewese riatail brother kan? Menlau kihda ehu karasaras.

¹² Ma kitail men sewese riatail kan en doadoahngki arail koahiek ni ahl me keieu mwahu, kitail en dehr tetehkte arail luwet kan, ahpw kitail rapahki irair mwahu kan oh pil koahiek kan me re ahneki. Sises ketin wia met ong wahnpoaron Piter. Ekei pak, e mwomwen me Piter soakoahiek. Ahpw Sises  mwahngih duwen irair mwahu kan me e ahneki oh mahsanih me Piter pahn tengeteng rasehng paipalap ehu.​—Sohn 1:42.

13, 14. (a) Ia duwen Parnapas eh kilangwohng Mark? (b) Ia duwen Alexandre eh paiekihda sawas me e alehdi sang emen elder? (Menlau kilang tepin kilel.)

¹³ Kitail pil tehk duwen mehn kahlemeng en Parnapas oh Mark. (Wiewia 12:25) Mark pwukoahki apwalih anahn kan en Pohl oh Parnapas erein keieun arail seiloak en misineri. Ahpw ni arail lella nan Pampilia, Mark mwadangete kesehla ira. Pohl oh Parnapas anahne kelehpw seiloak wasa keper ehu. (Wiewia 13:5, 13) Dahme Parnapas wia? E mwomwen me e kilangwohngete irair mwahu kan me Mark ahneki, a kaidehn eh luwet kan. E sohte medewe me Mark soakoahiek. Mwuhr Parnapas kasukuhlihada Mark, oh met imwikihla Mark eh wiahla Kristian koahiek men. (Wiewia 15:37-39) Mwurin sounpar kei, Mark mi Rom sewesewese Pohl, me mi nan imweteng. Oh ni Pohl eh ntinglahng mehn Kolose ko, e nda soahng mwahu kan duwen Mark. (Kol. 4:10) Ke kak medewehla uwen en Parnapas eh peren ahnsou me Pohl peki Mark en sewese ih?​—2 Tim. 4:11.

¹⁴ Emen elder me adaneki Alexandre tamanda ia duwen brother men eh sewese ih. E nda: “Ni ei pwulopwul, I kin uhdahn apwalki kapakap mwohn pokon. Elder men kasalehiong ie ia duwen ei pahn kaunopada ei madamadau oh dehr saloh. E sohte kihsang ie en sohla kapakap ahpw e kin mweidohng ien kalapw kapakap ni tuhpenehn kalohk kan. Mwuhr, I sohla saloh.”

15. Ia duwen Pohl eh kasalehda eh kalahnganki rie Kristian kan?

¹⁵ Dahme ke kin wia ni omw kilang irair mwahu me Kristian teikan ahneki? Ke kin kapinga irail? Nan Rom irelaud 16, Pohl kapinga rie Kristian daulih riehk pwehki irair mwahu kan rehrail me e kin kalahnganki. (Rom 16:3-7, 13) Karasepe, Pohl kapinga Andronikus oh Sunias pwehki ara kin papah Krais werei sang ih oh pil pwehki ara kin dadaurete. Pohl pil koasoia duwen en Rupus eh nohno pwehki epwel mwahu me e wiahiong ih.

16. Dahme kak wiawi ni atail kin kapinga me pwulopwul kan?

¹⁶ Kitail pil kak kilang imwila mwahu ni atail kapinga meteikan. Tehk duwen Rico, pwutak pwulopwul men nan France me eh pahpao sohte kin papah Siohwa. Rico uhdahn nsensuwedla pwehki eh pahpao sohte men en papidaisla. Rico leme me e anahne awih lao e lel sounpar 18 pwehn wia met. E pil nsensuwedki seri kan nan eh sukuhlo arail kin kapailoke ih pwehki eh pelien lamalam. Ahpw elder men me ede Frédéric kapinga Rico oh ndahng me uhwong kan me e ahneki kin wehwehki me e kin eimah en kalohk. Pwehki soangen lokaia kadek pwukat, Rico koasoanehdi teng en pousehlahte kekeirda. E pil kamwahwihala eh nanpwungmwahu rehn eh pahpao. Rico papidaisla ni eh sounpar 12.

17. (a) Ia duwen atail kak sewese brother pwulopwul kan ren patohwanohng Siohwa dahme keieu mwahu? (b) Ia duwen emen misineri eh sewese brother pwulopwul kan? Ia imwilahn met?

 ¹⁷ Ahnsou koaros me kitail kin kapinga riatail kan pwehki doadoahk mwahu ehu re wiahda, e pahn uhdahn kamwakid irail ren patohwanohng Siohwa dahme keieu mwahu. Sylvie, * me kin papah nan Pedel en France erein sounpar tohto, nda me sister kan pil kak kapinga brother kan. E pehm me e pwukoahki wia met. (Lep. Pad. 3:27) Pak tohto sister kan kin tehk soahng kei me ele brother kan sohte kin tehk. Eri ni sister kan ar kapinga brother kan pwehki arail kin nannanti, met kak kalaudehla kaping me brother koahiek kan kin ndahng brother ko. Jérôme, emen misineri nan French Guiana, sewesehier brother pwulopwul tohto wiahda akadei en wiahla misineri. E nda me ni eh kin kapinga brother pwulopwul kan pwehki soahng mwahu ehu me re wia nan kalohk de pasapeng mwahu ehu me re kihda, met kin kalaudehla arail eimah oh kamwahwihala arail koahiek kan.

18. Dahme kahrehda e mwahu en iang brother pwulopwul kan doadoahk?

¹⁸ Kitail pil kak kangoange Kristian kan en kekeirda sang ni atail kin iang irail doadoahk. Karasepe, ele elder men kak peki rehn brother pwulopwul men en print soahng kan nan jw.org me pahn sewese me mah kan me sohte neirail computer. De ke kak peki rehn brother pwulopwul men en sewese iuk kamwakele de kamwahwihala mehkot nan Wasahn Kaudoko. Ni omw kin nantihong iang me pwulopwul kan doadoahk, ke pahn ahneki ahnsou mwahu en tehkada arail koahiek kan, kapinga irail, oh kilang arail kekeirda.​—Lep. Pad. 15:23.

19, 20. Dahme kahrehda kitail anahne sewese meteikan en kekeirda?

¹⁹ Siohwa ketin pilada Sosua en kahluwa mehn Israel kan. Ni ahnsowo, Koht ketin kehkehlikihong Moses en kasukuhlih oh “kakehlahda” Sosua. (Wadek Deuderonomi 3:28.) Rahn pwukat, mie aramas tohto me tepida kaudokiong Siohwa. Kitail anahne brother koahiek kan en tiengla mwowe nan mwomwohdiso. Eri koaros nan mwomwohdiso anahne sewese brother pwulopwul de me ahpwtehn papidaisla kan ren doadoahngki arail koahiek ni ahl me keieu mwahu. Met pahn imwikihla brother tohto pahn iang doadoahngki pali laud en arail ahnsou ong papah Siohwa oh pil tohto en irail pwukat pahn kak padahkih aramas teikan.​—2 Tim. 2:2.

²⁰ Sohte lipilipil ma kitail iang mwomwohdiso laud ehu me mie brother koahiek tohto de kitail iang pwihn tikitik ehu, kitail kak iang sawas pwe mwomwohdiso en pweida mwahu ni ahnsou kohkohdo. Pwehn wia met, kitail anahne kahlemengih Siohwa oh rapahki soahng mwahu kan rehn meteikan.