Paipel sohte kasalehda me e sapwungki isihslahn paliweren me melahr akan.

Paipel kasalehda me mie paliwar oh tih kan en me melahr akan me isihsla. (Sos. 7:15, 25; 2 Kron. 34:4, 5) Ele e mwomwen me aramas ako sohte warohng seridi ni ahl me konehng. Ahpw isihslahn paliweren me melahr akan sohte kin ahnsou koaros wehwehki me re sohte warohng seridi.

Kitail kak kilang met sang ni dahme wiawihong Nanmwarki Sohl oh nah pwutak silimeno. Irail me pahmen ko mehla ni arail mahweniong mehn Pilisdia ko. Emen pwutak ko iei Sonadan, kompoakepahn Depit me kin utung ih ni lelepek. Ni ahnsou me mehn Israel kommwad kei sang Sapes nan Kilead esehda dahme wiawiong irail, re kohla wahsang paliwararail ko, isikala, oh eri sarepedi tihrail ko. Mwuhr Depit kapinga mehn Israel pwukat pwehki dahme re wiahda.​—1 Sam. 31:2, 8-13; 2 Sam. 2:4-6.

Koapworopwor me Paipel kihda ong me melahr akan iei kaiasada. Eri sohte lipilipil ma me melahr men isihsla de soh, Siohwa ketin sapwellimanki manaman en kapwurehiong aramaso eh mour ahpw ni paliwar kapw ehu. Mwahnakapw en Ipru silimen ko me Nanmwarki Nepukadnesar koasoanehdi ren lekdekiong nan kisiniei mwehlo sohte anahne masak ma re isihsla. Koht kak ketin kaiasada irail. (Dan. 3:16-18) Met pil wiawihong sapwellimen Siohwa ladu lelepek kan me mehla oh mwuhr isihsla nan imweteng en Nazi ko. Sapwellimen Koht ladu lelepek tohto mehla nan wasa kan me pospeseng de mehla ni ahl teikan me paliwararail sohte kak dierek. Ahpw mendahki met, irail uhdahn pahn iasada.​—Kaud. 20:13.

Siohwa sohte anahne ketin kapwurepene paliweren emen pwehn kaiasada ih. Met kin sansalda sang ni Koht eh ketin kaiasada me keidi kan ong mour nanleng. Duwehte Sises me ketin iasada nin duwen ngehn emen, Kristian keidi kan iasada ni mwomwarailohte ahpw nin duwen ngehn kei. Paliwar me irail ahneki mwoweo sohte iang irail kohla nanleng.​—1 Pit. 3:18; 1 Kor. 15:42-53; 1 Sohn 3:2.

Kitail kamehlele me aramas men kak iasada, kaidehn pwehki paliwereo isihsla de soh, ahpw pwehki kitail ahneki pwoson me Koht kak oh pil ketin kupwurki kapwaiada sapwellime inou kan. (Wiewia 24:15) Mehlel, ele kitail sohte kak uhdahn wehwehki ia duwen Koht eh ketin wiahda manaman en kaiasada aramas akan mahs de ia duwen eh pahn ketin wia met ni ahnsou kohkohdo. Ahpw kitail likih Siohwa. E ketikihda “kadehdepen met” ni eh ketin kaiasada Sises.​—Wiewia 17:31; Luk 24:2, 3.

E mwahu Kristian kan en medemedewe duwen tiahk kan, madamadau en aramas akan, oh pil kosonned en arail wasao me pid dahme re kak wiahiong paliweren me melahr akan. (2 Kor. 6:3, 4) Eri sohte lipilipil ma paliwar en me melahro isihsla de soh, Kristiano de peneineio me pahn pein pilada.