Pwehki Siohwa Koht * me Sounkapikadahn soahng koaros oh me keieu lapalap, me tohto kin leme me ih me ketin pwukoahki soahng koaros me kin wiawi nin sampah, iangahki me suwed kan. Ahpw, tehk dahme Paipel mahsanih duwen Koht mehlelo:

• “KAUN-O me ketin pwung ni mehkoaros.”​—Melkahka 145:17.

• “Sapwellime [Koht] wiewia kan me unsek oh pwung. Amwail Koht me loalopwoat oh mehlel, e kin ketin wiahda dahme pwung oh pahrek.”​—Deuderonomi 32:4.

• “Kaun-o me diren kadek oh kalahngan.”​—Seims 5:11.

Koht sohte kin ketin kahrehda me suwed kan en wiawi. Eri ia duwe, e kin ketin kasonge aramas ren wia me suwed? Uhdahn soh! Paipel mahsanih: “Mehmen me lelohng nan songosong . . . en dehr nda me, ‘Kasongosong wet sang rehn Koht.’” Dahme kahrehda? Pwehki “sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Koht sohte kin ketin kasonge emen en wia me suwed. Koht pil sohte kin ketin kahrehda me suwed kan en wiawi de pil kasonge meteikan ren wia me suwed. Eri ihs de dahme kitail en kapwukoahki ni ahnsou me me suwed kin wiawi?

Ni eh kasalehda ehu kahrepe me aramas kin lokolok, Paipel mahsanih: “Paisuwed kin lelohng aramas koaruhsie.” (Eklesiasdes 9:11) Pali laud en ahnsou, emen kak lellong paisuwed de aksident pwehki e mi wasa ehu ni ahnsou me apwalo wiawi ni eh sohte kasik. Mpen sounpar 2,000 samwalahro, Sises Krais ketin koasoiahda duwen kahpwal ehu me wiawiong aramas 18. Irail koaros mehla, pwehki wasahn iroir ehu pwupwudiong pohrail. (Luk 13:1-5) Re mehla kaidehn pwehki mwomwen arail mour, ahpw pwehki re mi wasao me kahpwalo wiawi. Me keren, rerrer en sahpw laud ehu wiawi Haiti nan January 2010. Koperment en wasao koasoia me aramas daulih 300,000 mehkihla rerrer en sahpw wasao. Aramas pwukat koaros mehla, sohte lipilipil ihs irail. Soumwahu pil kak lellong aramas sohte lipilipil ahnsou dah.

Ele ekei pahn idek: ‘Ia duwe, Koht sohte kak ketin kauhdi soangen kahpwal laud pwukat me kemelahr aramas pwe en dehr wiawi? E sohte kak ketin pere aramas mwahu kan sang kahpwalo?’ Pwe Koht en ketin kauhdi soahng pwukat, e pahn anahne mwahngih duwen soahng suwed kan mwohn ar wiawi. Koht ketin sapwellimanki koahiek en ese dahme pahn wiawi ahnsou kohkohdo, ahpw peidek me kitail anahne medewe iei: Ia duwe, Koht ketin pilada en doadoahngki sapwellime manaman koaros pwehn esehda soahng suwed kan mwohn ar wiawi?​—Aiseia 42:9.

Paipel mahsanih: “Koht kin ketiket nanleng; e ketin wiewia mehkoaros me e kin ketin kupwurki.” (Melkahka 115:3) Siohwa kin ketin wia dahme e ketin medewe me konehng wiawi—kaidehn soahng koaros e kak ketin wia. Met pil kin pidada dahme e ketin pilada en kohpada. Karasepe, mwurin wiewia suwed eh mihla wasa koaros nan kahnimw en Sodom oh  Komora, Koht ketin mahsanihong Eipraam: “I pahn kohdihwei pwe I en kadehde ma ngilen kedip kan me I rongehr me mehlel de soh. Oh ma soh, I pahn kak esehda.” (Senesis 18:20, 21, NW) Erein ahnsou ehu, Siohwa ketin pilada en dehr mwahngih duwen uwen laud en suwed me mihmi nan kahnimw ko. Pil duwehte, Siohwa kak ketin pilada en dehr mwahngih duwen soahng koaros me pahn wiawi ahnsou kohkohdo. (Senesis 22:12) Met sohte wehwehki me mie soh unsek de luwet kis reh. Pwehki “sapwellime wiewia kan me unsek,” Koht kin ketin kasalehda toupahrek ni eh ketin doadoahngki sapwellime koahiek en kohpada duwen ahnsou kohkohdo ong dahme e ketin kupwurki. E sohte kin ketin idingkihong aramas akan en idawehnte ahl ehu. * (Deuderonomi 32:4) Eri dahme kitail en medewe? Kitail en medewe me Koht kin ketin medemedewe ehuehu mwekid oh ketin wiahda pilipil ni eh ketin doadoahngki  sapwellime koahiek en mwahngih dahme pahn wiawi ahnsou kohkohdo.

Aramas akan pil iang pwukoahki wiewia suwed kan. Tehk dahme Paipel mahsanih me kak kahrehda wiewia suwed kan. E mahsanih: “Aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp. Eri, eh kin kanaitikihada eh ineng suwed, oh ni dihp eh kin pweidahr mehlel, e kin kahrehiong mehla.” (Seims 1:14, 15) Ni en emen eh kapwaiada eh ineng suwed kan de dukula pahn eh ineng sapwung, met kin kahrehda imwila suwed. (Rom 7:21-23) Nin duwen poadopoad kasalehda, aramas wiadahr tiahk kan me uhdahn mwersuwed oh kahrehda lokolok laud. Laudsang met, aramas suwed kak kahrehong meteikan en wiahla aramas suwed, kahrehda me suwed en pousehlahte wiawi.​—Lepin Padahk 1:10-16.

Ia duwe, Koht anahne ketin kauhdi aramas akan pwe ren dehr wia me suwed? Medewehla ia duwen aramas ar wiawihda. Paipel mahsanih me Koht ketin kapikada aramas rasehng ih. Kahrehda, aramas akan ahneki koahiek en kasalehda sapwellimen Koht irair kaselel kan. (Senesis 1:26) Koht ketikihong aramas akan kisakis en ahneki saledek en wiahda pilipil kan. Re kak pilada ren poakohng Koht oh loalopwoatohng ih sang arail kin wia dahme pwung mwohn silangih. (Deuderonomi 30:19, 20) Ma Koht kin ketin idingkihong aramas akan ren idawehnte ahl ehu, met wehwehki e ketikihsang arail kisakis en wiahda pilipil kan ni saledek. Ma e ketin wia met, aramas akan pahn duwehla robot kei me kin wiewiahte dahme koasoandier ren wia. Met pahn duwehte atail mweidohng madamadau me dene soahng koaros koasoandier ong kitail en kaunda kitail oh pil dahme pahn wiawiong kitail. Ia uwen atail kalahnganki me Koht kin ketin mweidohng kitail en pilada dahme kitail en wia! Ahpw met sohte wehwehki me soahng suwed kan me kohsang sapwung en aramas oh arail pilipil suwed kan pahn wiwiawi ong aramas kohkohlahte.

Ma ke idek rehn emen me tikida nan pelien Hindu de Buddah peidek me wia oaralap en kisin pwuhk wet, ele e pahn sapeng nda: “Soahng suwed kan kin wiawiong aramas mwahu pwehki padahk en Karma. Irail kin dolung wahn arail wiewia kan me irail wiahda mahs.” *

Me pid padahk en Karma, e mwahu kitail en tehk dahme Paipel mahsanihki duwen mehla. Nan mwetuwel en Ihden, wasa me aramas tepisang ie, Sounkapikpatailo mahsanihong tepin ohl Adam: “Ke kak tungoale wahntuhke koaros me mi nan mwetuwelet, ahpw ihte wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.” (Senesis 2:16, 17) Ma Adam sohte dipada oh sapeikiong Koht, e pahn mour kohkohlahte. Mehla miehla pwehn wia kalokepen ahn aramas sapeikiong sapwellimen Koht kehkehlik. Eri, ni seri kan ar ipwidi, “mehla lelohngehr aramas koaros.” (Rom 5:12) Kahrehda, kitail kak nda me “pweinen dihp, iei mehla.” (Rom 6:23) Paipel pil kawehwehda: “Ni emen eh pahn mehla, e kin maiaudahsang pahn manaman en  dihp.” (Rom 6:7) De kitail kak nda, aramas sohte pahn pwapwain arail dihp kan mwurin arail mehla.

Aramas tohto rahnwet kin nda me kahpwal me aramas akan lokolongki kin pidada Karma. Me kamehlele padahk wet kin pwungki lokolok kan me lelohng ih oh pil meteikan oh sohte nohn pwunodki. Ahpw dahme mehlel iei me madamadau wet kahredahr sohla koapworopwor en kauhdi soahng suwed kan en wiawi. Re kin kamehlele me elen maiauda ehute mie ong emenemen iei en saledek sang koasoandi kan en ipwsapahl. Met kohsang omw wiewia kan me aramas pwungki oh ma ke ahneki loalokong tohrohr. Madamadau pwukat uhdahn weksang dahme Paipel mahsanih. *

Ahpw kaidehn aramas me uhdahn kahrehda me suwed kan. Sehdan me Tepil, me nin tapio wia sapwellimen Koht tohnleng lelepek men, “sohte kin miniminiong me mehlelo.” Iei ih me kahrehiong dihp en miehla nin sampah. (Sohn 8:44) Iei ih me tapiada uhwong ehu nan mwetuwel en Ihden. (Senesis 3:1-5) Sises Krais ketin kahdaneki ih “Me Suwedo” oh “kaunen sampah wet.” (Sohn 14:30; 17:15) Aramas akan kin idawehn Sehdan sang ni arail peikiong ih oh soikala sapwellimen Siohwa ahl mwahu kan. (1 Sohn 2:15, 16) Nan 1 Sohn 5:19 mahsanih: “Sampah unsek mi pahn manaman en Me Suwedo.” Pil mie ngehn teikan me wiahla ngehn suwed kei oh iangala Sehdan. Paipel kasalehda me Sehdan oh nah ngehn saut akan kin “pitipitih sampah pwon,” oh kahrehda “meid suwediong sampah.” (Kaudiahl 12:9, 12) Eri, Sehdan me Tepil me uhdahn pwukoahki soahng suwed kan me wiewiawi.

E uhdahn sansal me kaidehn Koht me ketin pwukoahki soahng suwed kan en wiawiong aramas akan oh e sohte pil ketin kahrehiong irail en lokolok. Weksang met, e ketin inoukihda en ketikihsang me suwed, nin duwen me oaralap en mwuhr pahn kasalehda.