1. Dahme wia mehkot kesempwal nan atail kaudok?

 NAN sampah, ke kak diarada mwaren Siohwa kileldi ni imwen wehi pokon laud tohto oh pil ni soangsoangen dipwisou nan museum kan. Ma mie pak ke kilang mwar wet ni wasa ko, ke uhdahn kin perenda oh pwuriamweila. Pwehki kitail Sounkadehdehn Siohwa kan, mwaren Koht kin wia mehkot kesempwal nan atail kaudok. Sohte pwihn ehu rahnwet me kin doadoahngki mwaren Koht duwehte kitail. Ahpw mie soahng tohto me pidada laudsang atail en ihte doadoahngki mwaro. Pwehki kitail ahneki pwais kaselel ehu en wia sapwellime Sounkadehde kan, kitail pil pwukoahki en kasalehda wiewia kan me pahn wahdo kaping ong ih.

2. Pwehki kitail ahneki pwais kaselel en weuwa mwaren Koht, dahme kitail pwukoahki wia?

² Pwe Koht en kupwurkin kitail, kitail anahne wia laudsang en ihte doadoahngki mwareo. Kitail pil anahne idawehn sapwellime koasoandi kan me pid dahme pwung oh sapwung oh “sohpeisang  me suwed.” (Mel. 34:14) Pohl kasalehda pwukoa wet ni sansal ni eh ntingihedi: “Mehmen me kin koasoakoasoia me ih sapwellimen Kaun-o uhdahn pahn sohpeisang wiewia suwed kan.” (Wadek 2 Timoty 2:19.) Eri nin duwen sapwellimen Koht aramas akan, ia duwen atail kak tehk mwahu me kitail kin “sohpeisang wiewia suwed kan”?

3, 4. Ire dah kei me ekei kin apwalki wehwehki, oh dahme kahrehda?

³ Nan 2 Timoty 2:19, Pohl kin koasoia duwen “poahsoan tengeteng me Koht ketin poahsoanedier.” Me ntinting ni poahsoan wet iei iren mahsen riau. Keieu en ireo “KAUN-O pahn ketin kasalehiong kitail ihs me e ketin sapwellimanki,” kohsang nan pwuhken Nempe 16:5. (Menlau kilang iren onop en mwoweo.) Ahpw ia duwen iren mahsen keriauo “Mehmen me kin koasoakoasoia me ih sapwellimen Kaun-o uhdahn pahn sohpeisang wiewia suwed kan”? Ekei kin apwalki wehwehki ire wet. Dahme kahrehda?

⁴ Dahme Pohl koasoia mwomwen kasalehda me e koasoakoasoia wasa ehu nan Palien Paipel ni Lokaiahn Ipru. Ahpw e mwomwen me sohte iretikitik ehu me pahrekiong ire wet. Eri, dahme Pohl koasokoasoia ni eh nda: “Mehmen me kin koasoakoasoia me ih sapwellimen Kaun-o uhdahn pahn sohpeisang wiewia suwed kan.”? Keieun ire me Pohl koasoia kohsang nan Nempe irelaud 16, oh e kin dokedoke uhwong me Kora wia. Ia duwe, ire keriauo kin pil dokedoke mwekid en uhwong me Kora wia?

5-7. Mwekid dah kei me wiawi ni mwehin Moses me Pohl koasoia nan pwuhken 2 Timoty 2:19? (Menlau kilang tepin kilel.)

⁵ Dadan oh Apiram iang Kora uhwongada. (Nemp. 16:1-5) Re sohte wauneki Moses oh soikala eh manaman me Koht ketikihong. Re wia mehkot keper ong mehn Israel kan pwehki irail kin mihmihte nanpwungarail. Mwohn Siohwa ketin kasalehda ihs sapwellime tohnkaudok lelepek kan, e ketikihda kehkehlik sansal ehu.

⁶ Paipel mahsanih: “KAUN-O ketin mahsanihong Moses, ‘Ndaiong aramas akan re en keiweisang ni en Kora, Dadan oh Apiram imwarail impwal kan.’ Moses eri kahre kaun en mehn Israel ko oh kohieila rehn Dadan oh Apiram. E ndaiong pokono: ‘Kumwail keiweisang limwahn en aramas suwed pwukat ar impwal kan oh dehr doahke mehkot me arail. Ma soh, kumwail pahn iang kamwomwmwomwla pwehki diparail kan.’ Irail eri keilahsang limwahn en Kora, Dadan oh Apiram ar impwal ko.” (Nemp. 16:23-27) Siohwa eri ketin kamwomwala irail koaros me uhwongada. Ahpw irail ko me lelepek ong Koht mourla. Ia duwen? Re ‘sohpeisang wiewia suwed kan’, sang ni arail keiweisang irail kan me kin uhwong.

⁷ Nan 2 Timoty 2:19 ni Pohl eh ntingihedi lepin mahsen pwukat: “Kaun-o ketin mwahngih irail kan me sapwellime,” e kin koasoia ire me kohsang nan Nempe 16:5. Oh ni eh koasoiahda ire wet: “Mehmen me kin koasoakoasoia me ih sapwellimen Kaun-o uhdahn pahn sohpeisang wiewia suwed kan,” ele e kin koasokoasoia duwen dahme wiawi nan Nempe 16:23-27. Mwomwen me ire pwukat koaros kin dokedoke mwekid ehute. Dahme kitail sukuhlki sang ire pwukat? Kitail sukuhlki me Siohwa ketin mwahngih mohngiong en aramas. E kin ketin mwahngih ihs sapwellime kan me loalopwoat oh e ketin kasik irail en tohrohreweisang irail me suwed kan.

8. Dahme kitail pil anahne wia likin en ihte doadoahngki mwaren Koht oh iang kisehn mwomwohdiso?

⁸ Pohl pil doadoahngki dahme wiawi ni mwehin Moses pwehn katamankihong Timoty me e anahne pere eh nanpwungmwahu  rehn Siohwa. Sapwellimen Koht ladu lelepek kan ni mwehin Moses anahne wia laudsang ihte doadoahngki mwaren Siohwa, pil duwehte Kristian kan anahne wia laudsang ihte iang kisehn mwomwohdiso. Sapwellimen Koht ladu lelepek kan koaros anahne sohpeisang wiewia suwed. Ia wehwehn met ong Timoty? Oh dahme kitail kak sukuhlki sang en Pohl kaweid?

9. Ia duwen “akamai pweipwei oh sawehwe kan” ar kamwakid mwomwohdiso en tepin Kristian ko?

⁹ Nan nein Pohl kisinlikou ong Timoty, e kihda kaweid mwahu ong ia duwen eh pahn sohpeisang wiewia suwed. Karasepe, Pohl ndaiong Timoty en “dehr akamaipene” oh en “liksang koasoi mwahl akan.” (Wadek 2 Timoty 2:14, 16, 23.) Ia wehwehn met? Ekei nan mwomwohdiso kin padapadahngki padahk kan me irail me kesehla oh uhwongada kaudok mehlel wiahda. Ekei pil kihpesengehr soangen padahk kan me kahrehda akamai. Ekei padahk pwukat sohte uhdahn uhwong padahk kan en Paipel, ahpw padahk pwukat kin keper ong miniminpene en mwomwohdiso. Ihme kahrehda Pohl kangoange Timoty en “kaleke akamai pweipwei oh sawehwe kan.”

10. Dahme kitail en wia ma kitail kilang mwekid en kesehla oh uhwongada kaudok mehlel?

¹⁰ Rahnwet, mwekid en kesehla oh uhwongada kaudok mehlel sohte kin kalapw wiawi nan mwomwohdiso. Ahpw kitail pil kin rong soangen padahk kan me uhwong Paipel. Sohte lipilipil ia wasa me padahk pwukat kohsang ie, kitail anahne koasoanehdi teng en sohpeisang. E sohte wia elen loalokong en rong de kilang irail kan me kesehla oh uhwongada kaudok mehlel, sohte lipilipil ma nan Internet de pil ni soangen ahl teikan. Mendahki kitail men sewese soangen aramaso, ma kitail koasoiong irail, kitail pahn sapeikiong Koht. E ketin kehkehlikihong kitail en liksang douluhl mwekid en kesehla oh uhwongada kaudok mehlel.

11. Dahme kak kahrehda saminimin nan mwomwohdiso? Ia duwen Kristian elder kan ar kak wia mehn kahlemeng mwahu?

¹¹ Pil mie soahng teikan me kak kauwehla meleilei en nan mwomwohdiso likin mwekid oh padahk kan me uhwongada kaudok mehlel. Karasepe, ele madamadau ong soangen mehn kamweit dah kan me konehng Kristian men kin wekpeseng. En idingkihong soangen madamadau pwukat ong meteikan kak kahrehda “akamai pweipwei oh sawehwe kan.” Ahpw ia duwen ma emen nan mwomwohdiso kin kangoange soangen mehn kamweit me kin uhwongada sapwellimen Koht koasoandi me pid dahme mwahu oh dahme suwed? Elder kan sohte pahn mweidohng met en wiawi pwehn ihte soikala akamai kan. (Lep. Pad. 6:16-19; Ep. 5:3-5) Elder kan kin kanahieng ren dehr kangoangehki meteikan pein arail madamadau. Ahpw re kin idawehn kaweid en Paipel me mahsanih: “Kumwail en kin wia doadoahk en silepen sihpw me Koht ketikihong kumwail, oh apwalih irail . . . dehr kin aksoupeidi ong irail kan me mi pahn epwelpamwail, ahpw kumwail en kin wia kahlemengihpen pwihn sihpw.”​—1 Pit. 5:2, 3; wadek 2 Korint 1:24.

12, 13. (a) Ia duwen Sounkadehdehn Siohwa kan ar kin pilada mehn kamweit kan, oh mehnia kaweid en Paipel me kadoadoahk wasaht? (b) Ia duwen kaweid kan me parakrap 12 kasalehda ar kin kadoadoahk ong pilipil kan me emenemen kin wiahda?

¹² Atail pwihn sohte kin kasawih kasdo kan, mwadong kan nan video (video game), pwuhk kan de koul kan oh pilada mehnia me kitail en soikala. Dahme kahrehda? Pwehki Paipel mahsanihong emenemen en kaiahnehda kadeikpen loale pwehn “eselahr wekpeseng en me mwahu oh me suwed.” (Ipru 5:14) Kitail kak doadoahngki kaweid kan en Paipel pwehn sewese kitail en pilada mwahu mehn kamweit kan. Ong soangen pilipil pwukat koaros, kitail anahne “rapahki dahme Kaun-o kin ketin kupwurperenki.” (Ep. 5:10) Paipel pil padahkihong kitail me tapwin peneinei iei  me ahneki manaman, eri e kakete pilada en dehr mweidohng eh peneineio en kilang ekei mehn kamweit kan. *​—1 Kor. 11:3; Ep. 6:1-4.

¹³ Kaweid kan en Paipel me kileldi powe kak sewese kitail en wiahda pilipil mwahu ong irair teikan nan atail mour. Karasepe, mie soangsoangen pilipil kan ong soangen likou oh kapwat, mehn karoson mwahu kan, roson mwahu, de pil pilipil teikan me emenemen kin wiahda. Ekei ele men idingkihong meteikan arail pilipil, oh met kak kahrehda akamai. Ahpw ma pilipilo sohte kauwehla kaweid en Paipel, eri sohte kahrepen akamai en wiawi duwen dahme emenemen Kristian anahne wia. Paipel mahsanih me “ladun Kaun-o men en dehr akamai. E pahn kin kadek ong aramas koaros.”​—2 Tim. 2:24.

14. Ia duwen Pohl eh karasahda anahnepen soikala werek suwed?

¹⁴ Nin duwen sapwellimen Koht ladu kan, ia pil ekei ahl me kitail en “sohpeisang wiewia suwed kan”? Sang ni atail kin soikala werek suwed. Ia duwen Pohl eh karasahda met? Mwurin e koasoia duwen “poahsoan tengeteng me Koht ketin poahsoanedier,” e ntingihedi duwen “ihmw laud ehu.” Nan ihmw wet mie soangen “dahl” kan de mehkan, me wiawihkihda “silper oh kohl, a ekei tuhke de pwehl; ekei kin doadoahk ahnsou koaros, a ekei ni ahnsou kesempwalte [“ni kahrepe sohte kesempwal,” NW].” (2 Tim. 2:20, 21) Pohl eri kangoange Kristian kan ren soikala “dahl” kan me “sohte kesempwal.”

15, 16. Dahme kitail kak sukuhlki sang karasaras en “ihmw laud ehu”?

¹⁵ Ia wehwehn ahn Pohl karasaraso? ‘Ihmw laudo’ kak karasaraskihong mwomwohdisohn Kristian. “Dahl” kan nan ihmwo kak karasaraskihong emenemen tohn mwomwohdiso. Nan ihmw ehu, ekei kepwe kan kakete keper ma re saminla. Ni met eh wiawi, me imwaneki ihmwo anahne katohrehla kepwe samin ko sang ni me mwakelekel ko, duwehte me e kin doadoahngkihong wia mwenge.

 ¹⁶ Met pil pahrekiong sapwellimen Koht aramas akan rahnwet. Ma kitail men mwakelekel ni soahng koaros nan atail mour, kitail anahne katohre kitail sang irail kan nan mwomwohdiso me kin pousehlahte sohte men peikiong sapwellimen Siohwa kaweid kan. (Wadek 1 Korint 15:33.) Ma kitail anahne soikala werek suwed nan mwomwohdiso, eri kitail pil uhdahn anahne soikala werekiong irail kan likin mwomwohdiso. Kitail kin wia met pwehki aramas tohto likin mwomwohdiso kin poakohng mwohni, sapeikiong pahpa nohno kan, soaloalopwoat, likamw, lemei, kailongki me mwahu, kin pangala iengerail kan, inengieng pein arail peren laudsang poakohng Koht.​—2 Tim. 3:1-5.

17. Ia uwen mehn Israel lelepek ko arail anahne kanahieng en “sohpeisang wiewia suwed kan”?

¹⁷ Ni ahnsou me Siohwa ketin kehkehlikihong mehn Israel lelepek ko ren “keiweisang ni en Kora, Dadan oh Apiram imwarail impwal kan,” re “mwadangete keilahsang.” (Nemp. 16:24, 27, NW) Re sohte pwand en katohre irail sang irail me uhwong kan de peikasalki dahme re pahn wia. Re “keilahsang . . . ni pali koaros.” Me lelepek kan kin ngoangki peik sang nan mohngiongirail unsek. Re kin kasalehda ni sansal me re kin utung Siohwa oh uhwong me suwed. Dahme kitail kak sukuhlki sang karasaras wet?

18. Ia wehwehn ahn Pohl eh koasoi ni eh ndaiong Timoty en ‘kalekehkin ih ineng en mwahnakapw akan’?

¹⁸ Kitail kin kesempwalki atail nanpwungmwahu rehn Siohwa. Kitail anahne mwadangete pere met. Ih wehwehn ahn Pohl koasoi ni eh ndaiong Timoty en ‘kalekehkin ih ineng en mwahnakapw akan.’ (2  Tim. 2:22) Ele ni ahnsowo Timoty dauliher sounpar 30. Ahpw irail me laud kan pil kak ahneki “ineng en mwahnakapw akan.” Ni Timoty eh kin lelohng soangen irair wet, e anahne “kalekehkin” ih mepwukat. E anahne “sohpeisang wiewia suwed kan.” Sises ketin kasalehda ire me duwehte met: “Ma apali mesomwen me kin kahrehiong uhk nan dihp, pwadikasang oh kesehweisang uhk.” (Mad. 18:9) Kristian kan me men peikiong kaweid wet oh pere arail nanpwungmwahu rehn Siohwa, anahne koasoanehdi teng oh mwekid mwadang.

19. Ia duwen ekei ar kin pere arail nanpwungmwahu rehn Siohwa?

¹⁹ Ia duwen ekei Kristian ar pere arail nanpwungmwahu rehn Siohwa? Ekei me mahs kin ahneki kahpwal en kamam sakau piladahr en dehr douluhl kang sakau en wai. Meteikan me ahneki soangen luwet kan, re anahne soikala mehn kamweit kan me ele pahn kahrehda ineng suwed. (Mel. 101:3) Karasepe, mwohn emen brother eh wiahla Sounkadehde, e kin perenki kohla kahlek wasa kan me aramas kin wia soahng kan me sohte konehng. Mwurin eh sukuhlki padahk mehlel, e pilada en sohla douluhl kahlek, pil ni ahnsou kan me Sounkadehde kan kin kohpene mwemweit. E sohte men wia mehkot pwehn katamando madamadau de ineng suwed kan. Met sohte wehwehki me Kristian koaros anahne soikala sakau, kahlek, de soahng teikan me sohte uhdahn sapwung. Ahpw kitail koaros anahne kanahieng oh pere atail nanpwungmwahu rehn Siohwa.

20. Mendahki e apwal en “sohpeisang wiewia suwed kan,” dahme kin kamweitala kitail?

²⁰ E wia pai kaselel ehu en wia emen Sounkadehdehn Siohwa. Mie soangen pwukoa kan me iangete pai wet. Kitail anahne “sohpeisang me suwed.” (Mel. 34:14) Met sohte kin mengei ahnsou koaros. Ahpw ia uwen kansenamwahu en ese me Siohwa pahn ahnsou koaros ketin poakohng “irail kan me sapwellime” oh me kin peikiong ih.​—2 Tim. 2:19; wadek 2 Kronikel 16:9a.