KITAIL mi ni ahnsou me keieu apwal nan poadopoad en aramas. (2 Timoty 3:1-5) Rahn koaros, kitail kin lelohng kasongosong pwehki atail poakohng Siohwa oh pwehki atail peikiong sapwellime koasoandi pwung kan. Sises mwahngih me rahn pwukat pahn apwal, eri e ketin inoukihong sapwellime tohnpadahko me e pahn ketikihong irail mehn kangoang me anahn pwe ren dadaur lel ni imwi. (Madiu 24:3, 13; 28:20) Pwehn ketikihda sawas wet, Sises ketin idihada ladu lelepek men pwehn kihda padahk mehlel me rasehng “mwenge ahnsou me konehng.”​—Madiu 24:45, 46.

Idihdahn ladu lelepeko wiawi nan pahr 1919. Sangete ahnsowo kohdo, laduwo kin kihda padahk en Paipel kan me rasehng mwenge ni soangsoangen lokaia tohto ong sapwellimen Koht aramas akan. (Madiu 24:14; Kaudiahl 22:17) Ahpw, kaidehn sawaspen Paipel pwukat koaros mie ni lokaia koaros. Kaidehn koaros naineki computer de dipwisou kan me duwehte met pwehn paiekihda sawas en neitail pwuhk kan. Karasepe, me tohto sohte kak kilang kasdo kan de wadek pwuhk teikan me kin kohda nan jw.org kelehpw. Ia duwe, met wehwehki me ekei Kristian kan sohte alehdi mehn ketihnain en padahk mehlel kan koaros me re anahne? Pwehn diarada pasapeng en peidek wet, kitail tehkpene peidek kesempwal pahieu.

Ni Sehdan eh kasonge Sises en ketin kawekala takai ko en wiahla pilawa, Sises mahsanih: “Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.” (Madiu 4:3, 4) Sapwellimen Siohwa mahsen kan mi nan Paipel. (2 Piter 1:20, 21) Eri poahsoanpen padahk pwukat iei Paipel.​—2 Timoty 3:16, 17.

Sapwellimen Siohwa pwihn wiahda kawehwehn Paipel ehu me adaneki New World Translation of the Holy Scriptures. Kawehwehn Paipel wet kawehwehdi pwon de ni ekeite wasa. Kawehwe wet wiawihdahr ni lokaia 120, oh sounpar koaros mie ni lokaia teikan pil kapatapatehng. Likin kawehwehn New World Translation, kawehwehn Paipel lik kei mie ni lokaia kid kei. Pweidahn doadoahk wet kin pahrekiong kupwuren Koht me e “kin ketin kupwurki aramas koaros en ale komourparail oh marainkihla me mehlel.” (1 Timoty 2:3, 4) Pwehki Siohwa ketin mwahngih mohngiong en aramas koaros, kitail kak kamehlele me e kak ketin kainangihedo irail kan me “kin tehk arail anahn en esehla Koht” ong sapwellime pwihn oh ketikihong irail padahk mehlel kan me rasehng mwenge.​—Madiu 5:3, 6, NW; Sohn 6:44; 10:14; Ipru 4:13.

Pwehn ahneki pwoson kehlail, emen anahne kaidehn ihte en wadek Paipel, ahpw e pil anahne wehwehki oh kapwaiada dahme e sukuhlki. (Seims 1:22-25) Iei me emen ohl en Idiopia ni mwehin Kristian ko anahne wia. Ni Pilip, emen sounkalohk en rongamwahwo eh kilangada ohl menet wadewadek Mahsen en Koht, Pilip kalelapek reh: “Ia duwe, komw wehwehki dahme komw wadewadeken?” Ohlo sapeng nda: “Ia duwen ei pahn kak wehwehki, ma sohte me pahn kawehwehiong ie?” (Wiewia 8:26-31) Pilip eri sewese ohlo en wehwehki dahme e wadewadek. Ohl menet uhdahn mwekidkihda dahme e sukuhlki me kahrehiong ih en papidaisla. (Wiewia 8:32-38) Pil duwehte, neitail sawaspen Paipel kan kin sewese kitail en wehwehki padahk mehlel me dierek nan Mahsen en Koht. Dahme kitail wadek kin kamwakid atail pepehm oh kahrehiong kitail en kapwaiada dahme kitail sukuhlki.​—Kolose 1:9, 10.

Neitail sawaspen Paipel kan kin kihong kitail, me wia sapwellimen Siohwa ladu kan, soahng mwahu tohto en tungoale de nim. (Aiseia 65:13) Karasepe, Kahn Iroir mieier ni lokaia daulih 210. E kin kawehwehda kokohp kan, sewese kitail en wehwehki padahk mehlel kesempwal kan, oh kamwakid kitail en mour pahrekiong sapwellimen Koht kosonned kan. Neitail Awake! makasihn mieier ni mpen lokaia 100. E kin sewese kitail en sukuhlki laud duwen sapwellimen Siohwa kapikipik kaselel kan oh padahkihong kitail ia duwen atail en doadoahngki kaweid mwahu kan me dierek nan Paipel. (Lepin Padahk 3:21-23; Rom 1:20) Ladu lelepeko kin kihda pwuhk kan me poahsoankihda Mahsen en Koht ni lokaia tohtohsang 680! Ke kin kihong ahnsou en wadek Paipel ehuehu rahn? Ke kin wadekala ehuehu makasihn kapw oh pil sawaspen Paipel kapw koaros me mi ni omw lokaia?

Sapwellimen Siohwa pwihn pil kin kaunopada padahk kan me kin wiawi ni mihting kan oh mihting tohrohr kan. Ke kin perenki rong padahk kan, sipai kan, kamwomwada kan me wiawi wasao oh rong riatail kan kosoaia arail mour ni ar papah Siohwa? Ei, Siohwa kin ketikihong kitail padahk en Paipel tohto!​—Ais. 25:6.

Pasapengo soh! Kitail en dehr pwuriamweikihla ma ekei Kristian kan alehdi padahk en Paipel laudsang meteikan. Dahme kahrehda? Karasepe, medewehla wahnpoaron ko. Ni mwehin Sises, re kin alehdi kaweid tohto laudsang tohnpadahk teikan. (Mark 4:10; 9:35-37) Mendahki met, tohnpadahk pwukat kin alehdi padahk kan me re anahne.​—Ep. 4:20-24; 1 Pit. 1:8.

E mwahu en tamataman me pali laud en dahme Sises mahsanih oh ketin wia nin sampah sohte ntingdi nan Paipel. Wahnpoaron Sohn ntingihdi: “Oh pil mie soahng tohto me Sises pil ketin wiahda. Ahpw ma se pahn ntingihedi duwen mehkan koaros, I lemeleme me sampah wet sohte kak deukada pwuhk kan me pahn ntingdi.” (Sohn 21:25) Kristian kan ni mwehin wahnpoaron ko ese ire tohto me pid duwen Sises laudsang me kitail ese. Met sohte wehwehki me kitail katihasang ire koaros me pid Sises. Dahme kahrehda? Pwehki Siohwa ketin tehk mwahu me dahme kitail ese duwen Sises atail Kaun, kin itarohng kitail pwe kitail en kak idawehn eh mehn kahlemeng.​—1 Pit. 2:21.

Pil medewehla kisinlikou ko me wahnpoaron ko ntingkilahng mwomwohdiso kan ni mwehin tepin Kristian ko. Mwein ehu kisinlikou me wahnpoaron Pohl ntingihdi sohte mi nan Paipel. (Kol. 4:16) Ia duwe, met wehwehki me e sohte itar padahk en Paipel rehtail pwehki sohte kisinlikou wet? Soh. Siohwa ketin mwahngih dahme kitail anahne oh e ketikihong kitail dahme itar pwe kitail en kak kehkehlailte nan pwoson.​—Mad. 6:8.

Ekei sapwellimen Siohwa aramas akan kin alehdi sawaspen Paipel tohto. Ahpw ele ekeite soahng pwukat me mie ni omw lokaia. Ma ke ahneki kahpwal wet, ken ese me Siohwa ketin nsenohkin uhk. Onopki pwuhk kan me mie rehmw oh towehda mihting kan me doadoahngki lokaia me ke wehwehki. Ni ahl wet, omw nanpwungmwahu rehn Siohwa pahn kehkehlailte.​—Mel. 1:2; Ipru 10:24, 25.

Neitail kisin pwuhk kan oh pwuhk teikan kin kohda nan neitail Web site. Nan site wet pil mie ire kan me kin sewese pwopwoud kan, pahpa nohno kan, me pwulopwul kan oh seri kan. Peneinei kan kin paiekihda arail doadoahngki ire pwukat nan arail kaudok en peneinei. Neitail Web site pil kin kihda prokram tohrohr kan me duwehte kesepwil en sukuhl en Kilead oh mihting en Society me kin wiawi pak ehu nan pahr koaros. E pil kin kihda rohng kapw kan me pid duwen kahpwal kan en melimel, rerrer en sahpw de iloak laud ape oh pil repen pwuhng kan me wiawihong sapwellimen Siohwa aramas akan. (1 Pit. 5:8, 9) E pil uhdahn wia mehn doadoahk mwahu ehu ong atail doadoahk en kalohk. E pil mweidohng rongamwahwo en lella nan sahpw kan me atail doadoahk en kalohk keinapwihdi de sohte mweimwei.

Ahpw, ke kak kehkehlailte nan padahk mehlel mehnda ma ke kak de sohte kak doadoahngki Web site wet. Ladu lelepeko kihda sawaspen Paipel kan me itar pwe Kristian koaros en alehdi padahk kan me re anahne. Eri, sohte kahrepe ken pehm me ke anahne pwainda computer ape ihte pwe ken kak kohla nan jw.org. Ekei kin koasoanehdi en print ekeite ire kan nan Web site wet ong irail kan me re ese me sohte kin doadoahngki Internet. Ahpw mwomwohdiso kan sohte anahne wia met.

Kitail kin kalahnganki Sises eh ketin kolokolete sapwellime inou en ketikihong kitail dahme kitail anahne pwehn kehlail nan pwoson. Kitail kak kamehlele me Siohwa pahn pousehlahte ketikihda “mwenge ahnsou me konehng” lao sampah suwed wet imwisekla.