1, 2. Dahme Siohwa ketin mahsanihong Moses en wia? Oh inou dahieu me Siohwa ketin wiahda?

 MEDEWEHLA ma ke anahne wilian sapwellimen Koht aramas akan koasoiong kaun me keieu lapalap nin sampah. Ia pahn omw pepehm? Ele ke pahn pwunod, masepwehk, oh sohte kak lokaia. Ia duwen omw pahn kaunopada dahme ke pahn koasoia? Ke pahn kak koasoi ni mwomwen ke ahneki manaman me duwehte emen me wia sounkair en Koht?

² Moses mi nan soangen irairohte. Ih ohl emen me uhdahn aktikitik. (Nemp. 12:3) Ahpw Siohwa ketin poaronehla ih en koasoiong Parao, ohl emen me inenen lemei oh pohnmwahso. Siohwa ketin mahsanihong Moses en kihong Parao kehkehlik ehu. Kehkehlik wet iei en kasaledekihala sapwellime aramas akan sang pahn kalidu. (Eks. 5:1, 2) Kitail kak wehwehki dahme kahrehda Moses kalelapek rehn Siohwa oh nda: “Maing, ihs ngehi pwe I en patohla rehn Parao, oh kahluwahsang mehn Israel kan nan Isip?” Ele Moses kin pehm me e sohte koahiek en lokaiahiong Parao. Ahpw Siohwa ketin inoukihong Moses me e sohte pahn kelehpw. E mahsanihong ih: “I pahn kin ieiang uhk.”​—Eks. 3:9-12.

3, 4. (a) Dahme kahrehda Moses masepwehkada? (b) Dahme kahrehda omw pepehm kan kak pil duwehte en Moses?

³ Dahme kahrehda Moses masepwehkada? E perki me Parao pahn  sohte tehk de karonge ih nin duwen sounkair men me pekederdo sang rehn Siohwa Koht. Moses pil perki me mehn Israel kan pahn peikasalki ma Koht me ketin pilada ih en kahluwa irail sang Isip. Ih eri patohwanohng Siohwa: “Ma mehn Israel kan sohte pahn kamehlele ie, oh sohte men rong ei pato kat, dahme I pahn wia ma re patohwan me komwi sohte mwahn pwarohng ie?”—Eks. 3:15-18; 4:1.

⁴ Ia duwen kowe? Ele ke sohte anahne koasoiong kaun lapalap men. Ahpw ia duwen ma e apwal ong uhk en koasoiong aramas akan nan omw wasahn kalohk duwen Siohwa oh sapwellime Wehi? Sapwellimen Siohwa kehkehlik ong Moses oh dahme wiawi mwuhr kak padahkihong kitail mehn kasukuhl inenen kesempwal ehu.

5. Dahme Siohwa ketikihong nan pehn Moses, oh ia duwen met eh sewese ih en ahneki eimah? (Menlau kilang tepin kilel.)

⁵ Ni Moses eh patohwanohng Siohwa me e perki me aramas ako sohte pahn kamehlele ih, Koht eri ketin kaunopada Moses ong dahme e pahn wia pwehn kak pweida. Paipel mahsanih: “KAUN-O ahpw ketin keinemwe reh, ‘Dahme ke kolokolen?’ A e patohwan, ‘Sokon pwoat.’ KAUN-O eri mahsanih, ‘Kesehdiong napwelen.’ Moses kesehdiongete nanpwelo, a e wiahla sineik men. Moses ahpw pitipitte pweieklahsang. KAUN-O eri mahsanihong Moses, ‘Met, kapahwei pehmwen oh ale pwadaikien, pwekada.’ Moses eri kapahla peho, ale pwadaikio, pwekada; e ahpw pwurehng wiahla sokon. KAUN-O eri mahsanih, ‘Eri, ke pahn wia met pwe re en kamehlele me KAUN-O . . . pwarohng uhk.’” (Eks. 4:2-5) Pwehki sapwellimen Koht manaman, sokono wiahla sineik men nan pehn Moses. Manaman wet pahn kadehdehda me Moses iei sapwellimen Koht sounkair oh e ahneki manaman me kohsang reh. Siohwa ketin mahsanihong ih: “Ale sokon pwoatet, me ke pahn wiahkihda soangen manaman kei.” (Eks. 4:17) Mehn kadehde wet kamehlelehong Moses en kohla koasoiong Parao ni eimah oh pil koasoiong sapwellimen Koht aramas akan.​—Eks. 4:29-31; 7:8-13.

6. (a) Dahme kitail en kolokol nan pehtail ni atail kalohk oh dahme kahrehda? (b) Kawehwehda ia duwen “mahsen en Koht wie momour” oh ia duwen eh “manaman.”

⁶ Ni atail kin ehukihong meteikan rongamwahwo, dahme kitail kin kolokol nan pehtail kan? Kitail kin kolokol Paipel, oh kin ngoangki doadoahngki. Ekei aramas kin leme me Paipel ihte pwuhk mwahu ehu. Ahpw Paipel kin wia laudsang met. E audaudki sapwellimen Koht mahsen ong kitail. (2 Pit. 1:21) E audaudki sapwellimen Koht inou kan oh padahkihong kitail dahme sapwellime Wehi pahn wia. Pohl ntingihedi: “Mahsen en Koht wie momour oh manaman.” (Wadek Ipru 4:12.) Ia duwen mahsen en Koht eh wie momour? Sapwellimen Siohwa inou koaros kin wia pweipweida, oh re pahn uhdahn pweida douluhl. (Ais. 46:10; 55:11) Ni aramas emen eh kin wehwehkihla mwahu ire mehlel pwukat duwen Mahsen en Koht, dahme e kin wadek nan Paipel kak kamwakid laud eh mour.

7. Ia duwen atail kak doadoahngki “mahsen en Koht” ni ahl pwung?

⁷ Siohwa ketikihongehr kitail sapwellime mahsen me momour, Paipel. Pwehki mehn doadoahk wet, kitail kak kadehde ong aramas akan me re kak likih dahme kitail nda oh me e kohsang rehn Koht. Ihme kahrehda ni Pohl eh kin kasukuhlih Timoty, e kangoange ih en doadoahngki “mahsen en Koht ni mehlel.” (2 Tim. 2:15) Ia duwen atail kak doadoahngki ahn Pohl eh mehn kaweid? Sang ni atail pahn pilada mwahu iren Paipel kan me kitail kin wadek ong meteikan. Atail mehn akadei iei en sair mohngiong en irail me kin rong kitail. Kisin doaropwe kan me kitail ale nan pahr 2013 kin wiawihda pwehn sewese kitail en wia met.

8. Dahme emen sounapwalih en kalohk ndahki neitail kisin doaropwe kan?

⁸ Kisin doaropwe kapw kan koaros wiawihda  ni soangen mwohmw ehute. Eri ni atail sukuhlki ia duwen atail pahn doadoahngki ehu, kitail pahn eseier ia duwen atail pahn doadoahngki koaros. Emen sounapwalih en kalohk sang Hawaii, Amerika, ntingihdi: “Se sohte kasik me doadoahngki doaropwe pwukat nan kalohk ihmw lel ihmw, oh nan kalohk en wehi pokon pahn pweida mwahu.” Dahme kahrehda kisin doaropwe pwukat mengei en doadoahngki? E leme me met pwehki peidek oh pasapeng kan me kohda mwohn kisin doaropwe pwukat. Tohnihmwo sohte anahne pwunodki kihda pasapeng sapwung. Brothero koasoia me pwehki mwomwen wiawihdahn kisin doaropwe pwukat, kahrehiong aramas tohto en men koasoi, oh met imwikihla arail koasoakoasoipene en pweida mwahu.

9, 10. (a) Ia duwen kisin doaropwe pwukat eh wiawihda pwehn sewese kitail doadoahngki Paipel? (b) Mehnia me ke kin doadoahngki rehn kisin doaropwe pwukat me keieu pweida mwahu, oh dahme kahrehda?

⁹ Ehuehu kisin doaropwe pwukat mie iren Paipel me ni keneinei pilipilda pwe kitail en wadek ong tohnihmwo. Karasepe, duwehte kisin doaropwe me adaneki Lokolok pahn imwisekla? Idek rehn tohnihmwo peidek me mi mwohn doaropweo. Tohnihmwo kak pilada en sapengki “ei” de “soh” de “mwein.” Sohte lipilipil ia eh pasapeng, pahkala pali me mi loale oh nda, “Dahme Paipel mahsanih?” Eri wadek ong ih Kaudiahl 21:3, 4.

¹⁰ Ni ahnsou me ke doadoahngki kisin doaropwe me adaneki Dahme Ke Kin Medemedewehki Paipel? sohte lipilipil mehnia nanpwungen pasapeng siluho me tohnihmwo pahn pilada, pahkalahte oh nda, “Paipel mahsanih me ‘audepen Pwuhk Sarawi unsek pwilisang rehn Koht.’” Ke kak kapatahiong, “Ahpw ni mehlel, wasaht kin kasalehda laudsang met.” Eri pahkala nan Paipel oh wadek nan 2  Timoty 3:16, 17.

11, 12. (a) Ni soangen ahl dah me ke kak doadoahngki kisin doaropwe pwukat pwe en kalaudehla omw perenki doadoahk en kalohk? (b) Ia duwen kisin doaropwe pwukat ar kak seweseiuk ni omw pwurala rehn me men rong?

¹¹ Mwein ke pahn kosonnehdi en wadek oh koasoiapene kisin doaropwe wet. Dahme ke koasoanehdi pahn poahsoankihda mwomwen ahn tohnihmwo mwekidki met. Ahpw sohte lipilipil ia mwomwen aramas pahn mwekidki met, re alehdier rong wet me mi nan kisin doaropwe wet, oh ke wadekohngehr irail ekei ire kan sang Mahsen en Koht. Mehnda ma ke wadekete iretikitik ehu de riau ni tepin omw tuhwong irail, ke kak pil pwurodo mwuhr oh pousehlahte dahme kumwail koasoiapene.

¹² Ni tihnsewen kisin doaropwe pwukat, mie kisin oaralap me koasoia “Pwehn Medemedewe  Duwen.” Pahnangin oaralap wet, mie iren Paipel kan oh peidek ehu me kitail kak doadoahngki ni atail pwurala rehrail. Nan kisin doaropwe me oaralape koasoia Ia Omw Madamadau ong Ahnsou Kohkohdo? peideko iei: “Ia duwen Koht eh pahn ketin kamwahwihala sampah?” Pwuhken Madiu 6:9, 10 oh Daniel 2:44 me kileldi wasao. Ong kisin doaropwe me adaneki Me Melahr akan Uhdahn Kak Pwurehng Mourda? peideko iei: “Dahme kahrehda kitail kin mahla oh mehla?” Pwuhken Senesis 3:17-19 oh Rom 5:12 me kileldi wasaht.

13. Kawehwehda ia duwen atail pahn doadoahngki kisin doaropwe kan pwehn tapiada onop en Paipel kan.

¹³ Kisin doaropwe pwukat kin wiawihda pwehn sewese kitail tapiada onop en Paipel kan. Aramas kak scan QR code * nan tihnsewen doaropwe pwukat oh met kin kahrelahng nan neitail Web site. Wasao kin luke ih en onop Paipel. Doaropwe pwukat kin kasalehda duwen kisin pwuhk me adaneki Rohng Mwahu Sang Rehn Koht! Ehuehu kisin doaropwe pwukat kin kasalehda ehu iren mehn kasukuhl sang nan kisin pwuhk wet. Karasepe, kisin doaropwe me oaralape koasoia Ihs me Uhdahn Kaunda Sampah? kin kahluwakitailahng iren mehn kasukuhl 5 nan kisin pwuhk wet. Kisin doaropwe me oaralape koasoia Dahme Keieu Kesempwal ong Mouren Peneinei Nsenamwahu? kin kahluwakitailahng iren mehn kasukuhl 9. Kisin doaropwe pwukat wiawihda ni ahl ehu me pahn kak sewese kitail en doadoahngki Paipel ni atail tepin tuhwong tohnihmw kan oh ni atail pwurala rehrail. Ni ahl wet kitail kak tepida onop Paipel rehn me tohto. Dahme ke pil kak wia pwehn doadoahngki mwahu Mahsen en Koht nan omw doadoahk en kalohk?

14, 15. Ia duwen omw kak alasang mehn kahlemeng en Pohl nan omw doadoahk en kalohk?

¹⁴ Pohl kin men wehwehki madamadau en “uwen tohtohn aramas” me e kak nan eh wasahn kalohk. (Wadek 1 Korint 9:19-23.) Dahme kahrehda? E men sewese “aramas koaros,” mehn Suhs oh meteikan, en esehla padahk mehlel pwe ren kak mourla. (Wiewia 20:21) Ia duwen atail kak alasang ahn Pohl mehn kahlemeng ni atail kaunopada ong atail doadoahk en kalohk oh kalohk ong soangsoangen “aramas koaros”?​—1 Tim. 2:3, 4.

¹⁵ Ehuehu sounpwong, Atail Doadoahk ong Wehio kin audaudki iren kaweid kan ong ia duwen atail pahn kasalehda rohng me kitail kin weuwa nan atail doadoahk en kalohk. Song doadoahngki iren kaweid pwukat. Ahpw ia duwen ma aramas akan nan omw wasahn kalohk kin medemedewe mehkot tohrohr? Kaunopada en koasoia mehkot me re pahn men koasoia. Dahme aramas tohto limwahmw kin medemedewe? Pilada ehu iren Paipel me pid ire wet. Emen sounapwalih me kin seiloak oh eh pwoud kawehwehda ia duwen ara kin kak kalaudehla ara doadoahngki Paipel nan kalohk: “Pali laud en tohnihmw kan kin mweidohng kiht en wadek ehu iren Paipel ma se kin koasoi ni mwotomwot oh kasalehdahte dahme se uhdahn pahn koasoia. Mwurin at rahnmwahu, se kin wadek iren Paipel me se kaunopadahr oh pahkala mwowe.” Nan parakrap en mwuri kan, tehk ekei ire kan, peidek kan oh iren Paipel kan me sounkalohk kan doadoahngkier oh pweida nan doadoahk en kalohk. Ele ke pahn men song doadoahngki ekei ire pwukat nan omw wasahn kalohk.

16. Kawehwehda ia duwen pwuhken Aiseia 14:7 eh kak kadoadoahk nan doadoahk en kalohk.

¹⁶ Ma ke mi ni soangen wasa me diren mwersuwed oh lemei, ele ke kak idek rehn emen: “Ke kak medewehla ma ke kilang rohng wet mi ni tepin doaropwehn nuhs ehu, me koasoia: ‘Aramas akan wie pereperen weriwerki me sampah pwon meleilei, solahr tiahk lemei?’ Ihme Paipel mahsanih nan pwuhken Aiseia 14:7. Ni mehlel, Paipel kin audaudki Sapwellimen Koht inou tohto kan me pid meleilei me pahn ahnsou keren pweida.” Kowe eri idek ma ke kak wadek ehu inou pwukat me sansalda sang nan Paipel.

17. Ia duwen atail kak doadoahngki Madiu 5:3 nan atail koasoi ong tohnihmwo?

 ¹⁷ Ia duwe, e kin apwal ong ohl tohto nan omw wasa en apwalih arail peneinei? Ma iei, eri ele ke kak tepikihda omw koasoi sang ni omw idek: “Ke leme ia uwen laud en mwohni emen ohl anahne wiahda pwe eh peneinei en kak peren?” Mwurin aramaso sapeng, ele ke kak nda: “Ohl tohto kin wiahda mwohni laudsang men, ahpw arail peneinei kan sohte kin itarki. Eri, dahme uhdahn anahn?” Eri wadek nan Madiu 5:3 oh idek rehn tohnihmwo ma e mwahuki onop Paipel rehmw.

18. Pwehn kamweitala meteikan, ia duwen omw kak doadoahngki Melkahka 37:11?

¹⁸ Ia duwe, aramas akan nan omw wasa wia lokolok pwehki apwal laud ehu me ahpwtehn wiawi? Ke kak tepikihda omw koasoi nda: “I kohdo omw wasa pwe I en kihda ehu ire me kak kansenamwahwihiukala. (Wadek Melkahka 37:11.) Ke kilang soahng riau me Koht ketin kupwurki ong kitail? ‘Popohl’ oh ‘paiamwahu.’ E seu mwahu en ese me e ketin kupwurki kitail en ahneki mour mwahu? Ahpw ia duwen met eh kak wiawi?” Kowe eri kasalehiong ih ehu ire me konehng nan pwuhken Rohng Mwahu.

19. Kawehwehda ia duwen Kaudiahl 14:6, 7 eh kak kadoadoahk ni atail koasoiong aramas akan me kin laudiki pelien lamalam.

¹⁹ Ke kin mi wasa me aramas akan kin laudiki pelien lamalam? Ma iei, ele ke kak tepikihda omw koasoi nda: “Ma tohnleng men kohdihdo oh koasoiong uhk, ke pahn rong dahme e pahn koasoia? (Wadek Kaud. 14:6, 7.) Tohnleng menet nda ‘kumwail lemmwiki Koht.’ Eri mehnia Koht me e koasokoasoia wasaht? Iei Kohto ‘me ketin kapikada nanleng oh sampah.’ Ihs Koht menet?” Kowe eri wadek nan Melkahka 124:8, me koasoia: “Sawasapatail kin pwarodo sang rehn KAUN-O, me ketin kapikada nanleng oh sampah.” Kitail eri kawehwehda ihs KAUN-O * me wasaht kin koasokoasoia.

20. (a) Ia duwen atail kak doadoahngki Lepin Padahk 30:4 pwehn padahkihong emen mwaren Koht? (b) Mehnia iren Paipel me ke doadoahngki me pweida mwahu nan kalohk?

²⁰ Ke kak tapiada omw koasoi ong me pwulopwul men oh nda: “I men wadek iren Paipel ehu me idek peidek ehu me inenen kesempwal. (Wadek Lepin Padahk 30:4.) Sohte emen me kak wia soahng pwukat, eri ire pwukat kin doakedoake atail Sounkapikada. Ia wasa kitail kak diarada mware? I pahn perenki kasalehiong uhk sang nan Paipel.”

21, 22. (a) Ia duwen iren Paipel mwahu ehu eh kak wekidala mouren aramas emen? (b) Dahme ke koasoanehdi teng en wia nan omw doadoahk en kalohk?

²¹ Ke sehse ia duwen aramas akan ar pahn mwekidki iren Paipel pwukat. Karasepe, Sounkadehde riemen nan Australia letelet ni imwen lih pwulopwul men. Emen ira idek rehn liho: “Ke ese ia mwaren Koht?” oh wadek nan Melkahka 83:18. Liho koasoia: “I uhdahn pwuriamweikihla. Mwurin ara kohkohla, I tangkihla mwail 35, kohlahng ni wasahn pwainda pwuhk ehu pwehn tehk kawehwehn Paipel teikan oh diarada ahd wet nan dikseneri. Pwehki I diaradahr me mwaren Koht iei Siohwa, kahrehiong ien medewe dahme I pil sohte ese?” Mwurinte mwo, ih oh me e pahn pwoudikihdao tepida onop Paipel, oh mwuri ira papidaisla.

²² Mahsen en Koht ahneki manaman en wekidala mouren aramas. Ni aramas emen eh kin wadek Paipel, e kak kalaudehla eh pwoson sapwellimen Siohwa inou kan. Eh pwoson met pahn kahrehiong en kapwaiada dahme e sukuhlki. (Wadek 1 Deselonika 2:13.) Rohng mwahu sang nan Paipel inenen manaman sang dahme kitail kak nda. Eri nan atail doadoahk en kalohk kitail anahne koasoanehdi teng en doadoahngki Mahsen en Koht uwen me kitail kak koaros. Pwe e wie momour!