DAHME KAHREHDA EKEI KIN PEIKASAL: Nin duwen ehu roporop me wiawi me keren kasalehda, pahnlahng kelehpw kin audaudki usu daulih lik pak epwiki. Pwehki uwen lapalap en pahnlahng, aramas tohto kin idek, ‘Ia kahrepen Sounkapikada wasa lapalahpie en ketin tetehk dahme aramas akan kin wiewia nin sampah tikitik wet?’

DAHME MAHSEN EN KOHT KIN PADAHNGKI: Koht sohte ketikihongete kitail Paipel oh sohla ketin nsenohki kitail. Ahpw, Siohwa ketin kamehlelehiong kitail: “I pahn padahkihong uhk ahl me ke pahn weid ie; I pahn kaweid uhk oh panawihiuk.”​—Melkahka 32:8.

Medewehla Akar, lihen Isip me momour mpen sounpar 2000 samwalahro mwohn Krais. Akar mwamwahlkihla eh kaun en doadoahko, Sarai. Sarai eri kasarowehdi ih mwo oh Akar tang kohla nan sapwtehn. Pwehki sapwung me Akar wiahda, ia duwe, Koht sohla ketin nsenohki ih? Paipel kasalehda: “Tohnleng en KAUN-O ahpw tuhwong Akar.” Tohnlengo eri kansenamwahwihala Akar ni eh nda: “KAUN-O ketin karongeier ngilen omw apwal.” Akar eri kamwarenki Siohwa: “Koht Me kin Mahsanih Wasa.”​—Senesis 16:4-13.

“Koht Me kin Mahsanih Wasa,” pil kin ketin tetehk uhk. Karasepe, nohno limpoak men kin tetehk nah seri tikitik kan, ahpw me keieu tikitiko me kin anahne eh pahpa nohno en tehk laud. Pil duwehte, Koht kin keieu tehk kitail ni atail kin pehm me kitail sohte katepe oh luwet. Siohwa mahsanih: “I kin ketiket wasa ileile oh sarawi, ahpw I pil kin ketiket rehn aramas akan me aktikitik oh wiliakapwalahr, pwe I en kak kasapahldo arail koapworopwor oh likilik.”​—Aiseia 57:15.

Ahpw ele ke medewe: ‘Ia duwen Koht eh ketin tehk ie? E kin ketin kadeik ie sang ni mwomwei, de e kin ketin tehk loalei oh uhdahn ketin wehwehkin ie?’