DAHME KAHREHDA EKEI KIN PEIKASAL: Tohto me kamehlele Koht kin pehm me e ketin dohsang irail. Emen lih me kohsang Ireland me ede Christina, me kin iang sarawi wihk koaros koasoia: “I kin kilangwohngete Koht nin duwen emen me ketin kapikada mehkoaros. Ahpw I sehse ih. Sohte pak ehu me I pehm me I karanih.”

DAHME MAHSEN EN KOHT KIN PADAHNGKI: Siohwa sohte kin ketin uhdihsang sewese emen me pehm me e dohsang ih. Sises patohwan karasahda duwen Koht eh ketin nsenohkin kitail: “Ma aramas emen naineki sihpw epwiki, emen irail ahpw salongala, e seu pahn mweidala mahs me duwehk duwemeno re en mwengemwengeseli pohn nahna, a e ahpw pahn kohwei raparapahkiseli me salongalahro?” Dahme kitail sukuhlki sang met? “Ih pil duwen Samamwail me ketiket nanleng, e sohte kin ketin kupwurki emen me tikitik pwukat en kin salongala.”​—Madiu 18:12-14.

Koht kin ketin kesempwalki “me tikitik pwukat” koaros. Ia duwen Koht eh ketin “raparapahkiseli me salongalahro”? Nin duwen me iren Paipel me kileldi poweo koasoia, Siohwa kin ketin kainangihedo aramas akan reh.

Medewehla ia duwen Koht eh ketin tiengla mwowe pwehn ketin kainangihedo reh emenemen aramas. Ni mwehin tepin Kristian ko, Koht ketin poaronehla sapwellimen Sises tohnpadahko, Pilip, pwehn tuhwong ohl en Idiopia men oh koasoiaiong wehwehn kokohp en Paipel me ohlo wadewadek. (Wiewia 8:26-39) Mwuhr, Koht ketin kaweid wahnpoaron Piter en kohla tuhwong sounpei en Rom men me adaneki Kornilius, me kin wie kapakap oh nannanti en kaudokiong Koht. (Wiewia 10:1-48) Koht pil ketin kaweid wahnpoaron Pohl oh ienge ko ren kohla ni pillap ehu likin kahnimw en Pilipai. Ih wasao me re tuhwongada Lidia, “emen lih me kin kaudok ong Koht,” oh “Kaun-o ketin ritingada eh mohngiong pwe en rong kanahieng.”​—Wiewia 16:9-15.

Nan ehuehu koasoipen aramas pwukat, Siohwa ketin tehk kanahieng me irail me raparapahki ih kak ahneki ahnsou mwahu en esehla ih. Rahnwet, ihs me kin kohla rehn aramas akan ni imwarail oh nan wehi pokon pwehn ehukihong irail rongamwahu en Koht sang nan Paipel? Me tohto pahn sapengki, “Sounkadehdehn Siohwa kan.” Pein idek rehmw, ‘Ia duwe, Koht kin ketin doadoahngki irail pwe en kak ketin karanihala ie?’ Se kangoange iuk ken kapakap ong Koht pwehn ketin seweseiuk ken mwekidki eh ketin kupwurki karanihala iuk. *