1. Ia ahn Pohl eh pepehm ong irail ko me kin doadoahk laud en kalohki rongamwahwo?

 WAHNPOARON Pohl kin kesempwalki rie Kristian kan me kin doadoahk laud pwehn kalohki rongamwahwo. E ntingihdi: “Se kin tamanda, mwohn silangin Samatail Koht, duwen amwail kin doadoahngki amwail pwoson, oh duwen amwail limpoak me kin kahrehiong kumwail doadoahk laud, oh pil duwen amwail tengediong nan amwail koapworopworki atail Kaun Sises Krais.” (1 Des. 1:3) Siohwa pil kin ketin tamataman oh kesempwalki soahng koaros me sapwellime aramas akan wia pwehn papah ih, mehnda ma laud de tikitik.​—Ipru 6:10.

2. Dahme kitail pahn koasoiapene nan iren onop wet?

² Mahso oh pil ahnsou wet, Kristian kan wiadahr tounmetei laud pwehn kalaudehla arail papah Siohwa. Nan iren onop wet, kitail pahn koasoiapene dahme ekei tepin Kristian ko wia pwehn papah Siohwa. Kitail pil pahn sukuhlki dahme irail kan me kin doadoahngki pali laud en ar ahnsou ong doadoahk ong Koht kin wia rahn pwukat, oh kitail pahn kilang ia duwen atail kak sewese irail.

3, 4. (a) Ia ekei ahl me tepin Kristian ko kin papah Siohwa? (b) Ia duwen sounkalohki Wehio kan ni mwehin tepin Kristian ko ar kak pwainla arail anahn akan?

³ Mwurinte Sises ketin papidaisla, e tapiada kalohki duwen Wehio  oh ketin padahkihong meteikan en pil wia duwehte. (Luk 3:21-23; 4:14, 15, 43) Mwurin Sises pwoula, sapwellime wahnpoaron ko kin kaweid doadoahk en kalohko oh doadoahko pousehlahte wie lalaudla. (Wiewia 5:42; 6:7) Ekei Kristian ko keseu sang arail wasa pwehn wia doadoahk en misineri. Karasepe, Pilip kin kalohk nan wasa kan nan Palestin. (Wiewia 8:5, 40; 21:8) Pil emen misineri, Pohl, pil kalohki rongamwahwo nan sahpw tohto me dohsang imweo. (Wiewia 13:2-4; 14:26; 2 Kor. 1:19) Meteikan, iangahki Mark, Luk, oh Sailas, ntingihedi ekei pwuhk en Paipel de wia sekteri kei ong irail me ntingihada Paipel. (1 Pit. 5:12) Mie sister tohto me iang brother pwukat doadoahk. (Wiewia 18:26; Rom 16:1, 2) Nan Palien Paipel ni Lokaiahn Krihk, kitail kin wadek duwen soahng kaperen kan me Kristian pwukat kin lelohng. Ire pwukat kin kataman ong kitail me Siohwa kin ketin kesempwalki doadoahk en sapwellime aramas akan oh kin ketin apwalihala arail anahn akan.

⁴ Ia duwen sounkalohki Wehio kan ni mwehin tepin Kristian kan ar kak pwainla arail anahn akan? Re sohte kin idingki riarail Kristian kan en sewese irail, eri ekei pak re kin doadoahk elep en ahnsou. (1 Kor. 9:11-15) Ahpw re pil kin ale sawas. Ekei pak mie me kin luke irail en iang irail mwenge, kihong irail wasa irail en mi ie, de sewese irail ni ahl teikan. Emenemen oh pil tohnmwomwohdiso pwon kin men sewese irail.​—Wadek Wiewia 16:14, 15; Pilipai 4:15-18.

5. Dahme pwopwoud ehu koasoiahki ara mour en doadoahngki pali laud en ara ahnsou ong papah Siohwa?

⁵ Pil rahnwet, me tohto kin doadoahk laud pwehn doadoahngki pali laud en arail ahnsou ong papah Siohwa ni soangsoangen ahl akan. (Menlau kilang koakon “ Soangen Ahl akan en Doadoahngki Pali Laud en Omw Ahnsou ong Papah Siohwa.”) Ia arail pepehm ong soangen mour me re pilada? Ke pahn ale kangoang ma ke idek rehn ekei riomw Kristian kan duwen peidek wet. Emen brother wiahier pioneer men, pioneer tohrohr men, misineri men, oh wia tohn Pedel men nan ehu sahpw tohrohr. E nda: “I pehm me ei doadoahngki pali laud en ei ahnsou ong papah Siohwa wia ehu pilipil me keieu mwahu me I wiadahr. Ni ei sounpar 18, I apwalki pilada ma I en kohla sukuhl laud, doadoahk en mwohni, de pioneer. Dahme I lelohng kasalehda me Siohwa sohte kin ketin manokehla tounmetei kan me emen wiadahr pwehn doadoahngki pali laud en arail ahnsou ong papah ih. I kin doadoahngki soangsoangen koahiek me Siohwa ketikihong ie ni ahl me I sohte leme I kak doadoahngki ma I pilada en wia doadoahk en mwohni.” Eh pwoudo koasoia: “Pwukoa koaros me I wia sewese ien kekeirda. Se pehm Siohwa eh kin ketin pwurepwurehng kaweid oh pere kiht oh pil ni ahl akan me I leme sohte kak wiawi ma se mihmihte nan soangen mour kansenamwahu me sohte pidada tounmetei. I kin kalahngankihong Siohwa rahn koaros at doadoahngki pali laud en at ahnsou ong papah ih.” Ke men ahneki soangen pepehmohte duwen omw mour?

6. Ia sapwellimen Siohwa pepehm duwen atail kin papah ih?

⁶ Mehlel, ekei sohte kak wia met ni ahnsou wet ahpw re kin wia uwen arail kak ong Siohwa. Kitail ese me Siohwa kin ketin kesempwalki arail papah ih. Karasepe, nan pwuhken Pailimwon 1-3, Pohl kadarala eh rahnmwahu ong Kristian ko koaros nan mwomwohdisohn Kolose oh kasalehda ekei ederail. (Wadek.) Pohl kesempwalki arail doadoahk laud, pil duwehte Siohwa. Ni ahlohte, Siohwa kin ketin kesempwalki dahme ke wia pwehn papah ih. Eri, dahme ke kak wia pwehn utung irail kan me kin doadoahngki pali laud en ar ahnsou ong papah Siohwa?

7, 8. Dahme doadoahk en pioneer kin pidada, oh ia duwen meteikan nan mwomwohdiso ar kak sewese pioneer kan?

⁷ Duwehte sounkalohk ngoang kan ni mwehin wahnpoaron ko, pioneer kan rahnwet kin kangoange  laud mwomwohdiso. Me tohto kin wiahda mpen awa 70 ehuehu sounpwong nan kalohk. Ia duwen omw kak sewese irail?

⁸ Emen sister me kin pioneer me adaneki Shari nda: “Pioneer kan kin mwomwen kehlail pwehki ar kin kohla kalohk rahn koaros. Ahpw, re kin anahnehte kangoang sang meteikan.” (Rom 1:11, 12) Pil emen sister me pioneerki sounpar tohto koasoiahki pioneer kan nan eh mwomwohdiso: “Re kin doadoahk laud oh sohte uhdi. Ni meteikan arail kin sawaskihda mehn peidaid nan kalohk, luke irail ong mwenge, kihong irail ekis mwohni ong kahs de soangen sawas en mwohni teikan, re kin kalahnganki mepwukat. Met kasalehiong irail me ke uhdahn nsenohki irail.”

9, 10. Dahme ekei wiadahr pwehn sewese pioneer kan nan arail mwomwohdiso?

⁹ Ehu ahl me kitail kak sewese pioneer kan iei en iang irail kalohk. Sister riemen me kin iang pioneer koasoia me re anahne brother oh sister tohto en iang irail kalohk erein wihk kan oh pil ni mwurin souwas kan. Emen sister me met wia tohn Pedel nan Brooklyn tamanda sawas me e alehdi ni ahnsou me e iang pioneer. E nda: “Emen sister me mie were sidohsa nda, ‘Ahnsou koaros ma sohte me pahn iang uhk kalohk, eker ie, oh I pahn iang uhk.’ E uhdahn sewese ie nan ei doadoahk en pioneer.” Shari nda: “Mwurin kalohk, pioneer kiripw kan kin kalapw kelekelehpw. Ele ke kak luke brother oh sister kiripw kan ong omw kaudok en peneinei ekei pak. En luke irail ren iang wiewia teikan pil kin sewese irail en kehlail.”

¹⁰ Emen sister me doadoahngki pali laud en eh ahnsou ong papah Siohwa kereniong sounpar 50 koasoiahki sawas me ih oh sister kiripw teikan alehdi: “Elder kan nan at mwomwohdiso kin mwemweitla rehn pioneer kan pak ehu nan sounpwong kei. Re idek soahng kan me pid at roson oh at doadoahk en mwohni oh kilang ma mie at iren kapwunod kan. Irail uhdahn kin nsenohki. Re kin mwemweitdo imwato pwe ren kilang ma se anahne sawas.” Elder pwukat oh meteikan me duwehte irail kin alasang mehn kahlemeng en Onesiporus. E anahne apwalih eh peneinei, oh e pil sewesehki Pohl dahme e anahne.​—2 Tim. 1:18.

11. Dahme doadoahk en pioneer tohrohr kin pidada?

¹¹ Pil ehu ahl en doadoahngki pali laud en omw ahnsou ong papah Siohwa iei en wia doadoahk en pioneer tohrohr. Pioneer tohrohr tohto kin  wiahda awa 130 sounpwong koaros nan kalohk. Re pil kin kedirepwki wiewia teikan nan mwomwohdiso. Ohpis en Sounkadehdehn Siohwa kan kin sewesekin irail kisin mwohni sounpwong koaros pwehki re ahneki ahnsou tikitik de sohte arail ahnsou ong doadoahk en mwohni. Sawas wet kin sewese irail en pwainda arail anahn akan, oh met kahrehda ren kak doadoahngki pali laud en arail ahnsou ong kalohk.

12. Ia duwen elder kan oh meteikan ar kak sewese pioneer tohrohr kan?

¹² Dahme kitail kak wia pwehn sewese pioneer tohrohr pwukat? Emen elder me kin doadoahk nan ohpis en Sounkadehdehn Siohwa kan me koasoiongehr pioneer tohrohr tohto nda: “Elder kan anahne koasoiong irail, esehda arail irair kan oh koasoanehdi ia duwen arail kak sewese irail. Ekei Sounkadehde kan kin leme me pioneer tohrohr kan sohte anahne sawas pwehki irail kin ale kisin mwohni, ahpw riatail kan nan mwomwohdiso kak sewese irail ni ahl tohto.” Duwehte pioneer kan, pioneer tohrohr kan kin kalahnganki ahnsou me riarail Kristian kan kin iang irail kalohk. Ke kak iang irail?

13, 14. (a) Dahme kitail anahne tamataman duwen sounapwalih kan me kin seiloak oh arail pwoud kan? (b) Dahme ke kak wia pwehn sewese irail me kin wia doadoahk wet?

¹³ Sounapwalih kan me kin seiloak oh arail pwoud kan wia Kristian koahiek kei me ahneki pwoson laud oh kin kangoange kitail. Ahpw kitail en dehr manokehla me irail pil anahne kangoang. Re pil anahne brother oh sister kan en iang irail kalohk. Oh re kin kalahnganki ni ahnsou me riarail Kristian kan kin luke irail en iang wia soangen mehn kamweit kan de soahng kaperen kan. Ni ahnsou me sounapwalih kan me kin seiloak de arail pwoud kan mi imwen wini de mwamwahula sang soumwahu ehu, kitail kak sewese irail ni atail kin mwemweitla oh apwalihala arail anahn akan. Luk, me wia toahkte men, kin sewesehki Pohl oh meteikan me seiloaklahng mwomwohdiso teikan arail anahn akan.—Kol. 4:14; Wiewia 20:5–21:18.

¹⁴ Sounapwalih kan me kin seiloak oh arail pwoud kan kin anahne limpoak oh kangoang sang kompoakparail kan. Emen irail nda: “Kompoakepahi kan kin ese iahd me I anahne kangoang. Re kin idek peidek mwahu kan, oh met kin sewese ien koasoia soahng kan me I kin nsenohki. Arail kin rong mwahu kin sewese ie laud.” Sounapwalih kan me kin seiloak uhdahn kalahnganki ni brother oh sister kan ar kin ni mehlel nsenohkin irail oh wiahla kompoakparail mehlel kei.

15, 16. Dahme kahrehda doadoahk me tohn Pedel kan kin wia kesempwal, oh ia duwen atail kak sewese irail?

¹⁵ Irail ko me doadoahk nan Pedel kin wia doadoahk kesempwal ehu me kin utungada doadoahk en kalohki rongamwahwo. Ma mie tohn Pedel nan omw mwomwohdiso, ia duwen omw kak tamataman irail?

¹⁶ Ni arail tepin lella nan Pedel, ele re kin loaleidkihda arail peneinei oh kompoakparail kan. Tohn Pedel kapw pwukat kin kalahnganki ni meteikan nan Pedel oh mwomwohdiso ar esehla irail oh wiahla kompoakparail. (Mark 10:29, 30) Koasoandi en doadoahk nan Pedel kin kahrehiong tohn Pedel ko en kak towehda mihting kan oh kohla kalohk wihk koaros. Ahpw ekei pak tohn Pedel kan kin wia doadoahk teikan likin dahme re kin wia. E mwahu ni mwomwohdiso kan ar kin wehwehki met oh kasalehda me re kesempwalki doadoahk me tohn Pedel kan kin wia.​—Wadek 1 Deselonika 2:9.

17, 18. Soangen pwukoa dah kan me irail kan me kin doadoahngki pali laud en ar ahnsou ong doadoahk ong Koht kin wia nan sahpw teikan?

¹⁷ Ekei me kin doadoahngki pali laud en ar ahnsou ong doadoahk ong Koht kin alehdi pwukoa ehu oh keseula nan ehu sahpw tohrohr. Ele  re anahne kang mwenge kapw, esehla ehu lokaia tohrohr, oh wekidala mwomwen arail mour pwehn ahnla tiahk oh mwomwen mour en wasao. Soangen pwukoa dah kan me irail pwukat kin wia nan sahpw teikan?

¹⁸ Ekei irail wia misineri kei oh kin doadoahngki pali laud en arail ahnsou nan kalohk. Re wia sounkalohk oh sounpadahk koahiek kei, oh re kin ehukihong meteikan nan arail mwomwohdiso dahme re sukuhlki. Ohpis en Sounkadehdehn Siohwa kan kin kihda wasahn kousoan oh pil kisin mwohni ong misineri kan pwehn sewese irail pwain dahme re anahne. Ekei kin pekederla ong sahpw teikan pwe ren iang doadoahk nan ohpis en Sounkadehdehn Siohwa kan de sewese kauwada ohpis pwukat, ohpis en kawehwe kan, Wasahn Mihting Tohrohr kan, de Wasahn Kaudok kan. Ohpis en Sounkadehdehn Siohwa kan de brother kan nan mwomwohdiso kin kihda sawas ong arail anahn kan, duwehte kanarail mwenge de wasa re pahn mi ie. Duwehte tohn Pedel kan, irail pil kin kaukaule towehda mihting kan oh iang kalohk. Mwomwohdiso kan kin paiekihda koahiek en brother oh sister pwukat.

19. Ia duwen omw kak sewese irail kan me kohdo pwehn sawas nan omw wasa?

¹⁹ Ia duwen omw kak sewese irail pwukat me kohdo pwehn sawas nan omw wasa? Tamataman me ni ar tepin kohdo, ele re sahn ekei mwenge me kitail kin kang. Eri ahnsou me ke luke irail en iang uhk mwenge, ke kak idek rehrail ma re pahn men song mwenge kapw de ma mie mehkot me re sohte men kang. Ni arail kin songosong en esehla lokaia oh tiahk kan en omw wasao, re sohte pahn esehla ahnsowohte. Eri kitail en kanengamahiong irail oh ni kadek sewese irail. Irail uhdahn men esehla.

20. Ia duwen atail kak sewese irail kan me kin doadoahngki pali laud en ar ahnsou ong doadoahk ong Koht oh pil arail pahpa nohno kan?

²⁰ Ahnsou douwehr powe, irail pwukat me mi wasa doh ele pahn anahne pilada ia duwen arail pahn sewese arail pahpa nohno kan me mahlahr. Ma pahpa nohno pwukat wia Sounkadehde kei, re pahn uhdahn mwahuki neirail seri kan en wiahte arail doadoahk. (3 Sohn 4) Irail kan me kin doadoahngki pali laud en ar ahnsou ong doadoahk ong Koht pahn wia uwen arail kak pwehn apwalih arail pahpa nohno kan ma re anahne sawas oh pahn mwemweitla rehrail ahnsou koaros me re kak. Ahpw irail me kousoan karanih pahpa nohno pwukat pil kak iang sawas. Irail kak toukihda arail ahnsou en apwalih pahpa nohno pwukat ma re anahne sawas. Kitail en dehr manokehla me irail kan me kin doadoahngki pali laud en ar ahnsou ong doadoahk ong Koht kin uhdahn kedirepwkihla arail utung doadoahk en kalohk, me wia doadoahk keieu kesempwal nan sampah rahnwet. (Mad. 28:19, 20) Ke kak tamataman irail sang ni omw sewese arail pahpa nohno kan?

21. Ia duwen irail ko me doadoahngki pali laud en arail ahnsou ong doadoahk ong Koht kin medewehki sawas oh kangoang me meteikan kihong irail?

²¹ Aramas tohto kin doadoahk laud pwehki re men kepwehpwehla. Ahpw irail ako me pilada en doadoahngki pali laud en arail ahnsou ong papah Siohwa kin doadoahk laud pwehki re men patohwanohng ih me keieu mwahu. Eri re kin kalahnganki sawas sohte lipilipil me meteikan kin kihong irail. Emen sister me kin doadoahngki pali laud en eh ahnsou ong papah Siohwa keseula nan ehu sahpw koasoia: “Pil kisinlikou en kalahngan sang meteikan kin kasalehda me meteikan kin medemedewe iuk oh me re kin perenki dahme ke wiewia.”

22. Ia omw madamadau ong doadoahngki pali laud en omw ahnsou ong papah Siohwa?

²² Irail kan me kin doadoahngki pali laud en arail ahnsou ong papah Siohwa piladahr mour ehu me uhdahn kaperen oh mie katepe. Ih mouro me keieu mwahu rahnwet. Irail pwukat kak sukuhlkihdi irair oh mehn kasukuhl kan me anahn met oh pil ahnsou kohkohdo nan sampah kapw. Ahnsou keren sapwellimen Siohwa ladu kan koaros pahn wia doadoahk me uhdahn mie katepe rahn koaros. Kitail en pousehlahte tamataman “doadoahk en pwoson” oh “doadoahk en limpoak” en irail pwukat me doadoahngki pali laud en arail ahnsou ong papah Siohwa.​—1 Des. 1:3.