Wehin Koht iei koperment ehu nanleng. Sises ketin mahsanihong sapwellime tohnpadahk kan ren kapakapki Wehi wet en pweida pwehki Wehi wet me pahn wahdo pwung oh popohl nin sampah. Sohte koperment ehu en aramas me kak uhdahn kasohrehla tiahk lemei, wiewia sapahrek, de soumwahu, ahpw Wehin Koht kak oh pahn wia met. Koht ketin pilada sapwellime Ohl, Sises, en wia Nanmwarki en Wehi wet. Siohwa pil ketin pilada pwihn ehu me wiawihkihda tohnpadahk kan en Sises pwehn iang Sises wia kaun kei nan Wehi wet.​—Wadek Luk 11:2; 22:28-30.

Ahnsou keren, Wehin Koht pahn kihsang irail koaros me kin uhwong sapwellimen Koht kaunda. Eri atail kapakapki pwe Wehin Koht en pweida kin wia pekipek ehu me sapwellimen Koht koperment en uhd wiliandi koperment kan koaros en aramas.​—Wadek Daniel 7:13, 14; Kaudiahl 11:15, 18.

Sises me keieu warohng en ketin wia Nanmwarki en Wehi wet pwehki e ketin limpoak. Pwehki ih me sapwellimen Koht Ohl, e pil sapwellimanki manaman en ketikihda sawas ong koaros me kin peki sawas sang rehn Koht.​—Wadek Melkahka 72:8, 12-14.

Wehin Koht pahn wia kamwahu ong koaros me kin uhdahn kapakapki me Wehi wet en pweida oh kin wiahda wekidekla kan nan arail mour pwehn pahrekiong kupwuren Koht. Ke sohte pahn koluhkihla omw sukuhlki dahme Paipel mahsanihki duwen Wehin Koht.​—Wadek Luk 18:16, 17; Sohn 4:23.