1. Ia duwen pwuhken Lipai eh kak sewese kitail?

 SIOHWA ketin kupwurki sapwellime ladu kan koaros en wia aramas sarawi kei. Irair en sarawihla kin pwarada nan Paipel pwon, ahpw pwuhken Lipai iei me kin keieu kalapw koasoia duwen irair wet. Atail wehwehki oh kalahnganki pwuhk wet pahn sewese kitail en esehla ia duwen atail kak wia aramas sarawi kei.

2. Dahme kitail pahn diarada nan pwuhken Lipai?

² Pwuhken Lipai, me Moses ntingihedi, kin wia kisehn “Pwuhk Sarawi unsek” me mwahu ong atail padahk. (2 Tim. 3:16) Ni ahnsou me Paipel tepin ntingdi ni lokaiahn Ipru, mwaren Siohwa kin pwarada mpen pak eisek nan ehuehu irelaud en pwuhk wet. Atail wehwehki pwuhken Lipai pahn kakehlaka atail en soikala wia soahng kan me pahn kasaminehla mwaren Koht. (Lip. 22:32) Lepin lokaia pwukat “Ngehi me KAUN-O,” me kin pwurepwurehng pwarada pak tohto nan pwuhk wet, anahne katamankihong kitail en peikiong Koht. Nan iren onop wet oh pil iren onop en mwuhr, kitail pahn diarada soahng kesempwal kan nan pwuhken Lipai me pahn sewese kitail en wia aramas sarawi kei nan atail kaudokiong Koht.

3, 4. Dahme kamwakel me wiawiong Aaron oh nah pwutak kan kin karasaraskihong? (Menlau kilang tepin kilel.)

³ Wadek Lipai 8:5, 6. Siohwa ketin idihada Aaron pwehn wia samworo lapalap en Israel oh nah pwutak ko ren wia samworo kei ong wehi wet. Aaron kin karasaraskihong Sises oh nein Aaron pwutak ko kin karasaraskihong Kristian keidi kan. Ia wehwehn kamwakel me wiawiong Aaron? Ia duwe, Sises pil anahne ketin kamwakelda? Soh. Sohte dihp ehu rehn Sises oh e ketin “unsek.” (Ipru 7:26; 9:14) Ahpw, mwurin Aaron kamwakelda, e rasehngala Sises, me ketin mwakelekel oh pwung. Eri, dahme kamwakel me wiawiong nein Aaron pwutak ko kin karasaraskihong?

⁴ Kamwakel me wiawiong nein Aaron pwutak ko kin karasaraskihong kamwakel me wiawiong irail kan me pilipilda ren wia samworo kei nanleng. Ia duwe, kamwakel wet kin dokedoke arail papidaisla? Soh, pwehki papidais sohte kin kamwakelehsang dihp. Ahpw papidais kin wia kilelepen emen eh inoukihong Koht eh mour. Me keidi kan kin mwakelekelkihla Mahsen en Koht, eri irail anahne uhdahn doadoahngki sapwellimen Krais padahk kan nan arail mour. (Ep. 5:25-27) Ni ahl wet, re wia aramas mwakelekel oh sarawi kei. Ahpw ia duwen “sihpw teikan”?​—Sohn 10:16, NW.

5. Dahme kahrehda kitail kak nda me sihpw teikan kin mwakelekelkihla Mahsen en Koht?

⁵ Nein Aaron pwutak ko sohte kin karasaraskihong pokon kalaimwun en sapwellimen Sises sihpw teikan. (Kaud. 7:9) Ahpw sihpw teikan pil wiahla aramas mwakelekel oh sarawi kei pwehki Mahsen en Koht. Ni irail kan me ahneki koapworopwor en mi sampah ar pwosonla dahme Paipel mahsanihki duwen manaman en sapwellimen Sises meirong, e kin kamwakid irail en kaudokiong Siohwa “ni rahn nipwong.” (Kaud. 7:13-15) Kamwakel wet me wiawiong me keidi kan oh sihpw teikan sohte kin uhdi. Pwehki met, arail wiewia kan kin mwakelekel ahnsou koaros. (1 Pit. 2:12) Siohwa kin ketin kupwurperenki ni eh mahsanihada me sapwellime kan koaros kin mwakelekel oh miniminpene ni arail kin peik oh ni loalopwoat idawehn Sounsileparail, Sises.

6. Dahme kahrehda kitail anahne kaukaule wia keseupen pein kitail?

⁶ Dahme koasoandi en kamwakel me samworo kan en Israel anahne wia kin padahkihong kitail rahnwet? Aramas tohto me onop Paipel rehtail kin kilang mwakelekel en atail wasahn kaudok kan, atail kin mwakelekel oh pil likouda mwahu. Patehng met, irail kan me men kaudokiong Siohwa anahne “mwakelekel . . . ni ar lamalam [“mohngiong,” NW].” (Wadek Melkahka 24:3, 4; Ais. 2:2, 3.) Eri kitail anahne papah Siohwa sang ni lamalam oh mohngiong mwakelekel oh pil mwakelekel ni paliwar. Kitail anahne kaukaule wia keseupen pein kitail. Ekei pak ele kitail kin diarada me kitail anahne wiahda wekidekla laud kan pwe kitail en kak wia aramas sarawi kei. (2 Kor. 13:5) Karasepe, emen me papidaislahr ahpw kin kilang kasdo oh kilel suwed kan anahne pein idek reh, ‘I kin kadehdehda me I wia aramas sarawi men?’ Eri, e anahne ale sawas pwehn uhdihsang tiahk kasaut wet.​—Seims 5:14.

7. Nin duwen me Lipai 8:22-24 kasalehda, mehn kahlemeng dahieu me Sises ketikihda?

⁷ Ni ahnsou me koasoandi en samworo kan en Israel wiawihda, ntahn sihpw wol men pahn kohwong ni palimaun en salengen Samworo Lapalap Aaron oh nah  pwutak ko, ni palimaun en sendilap en pehrail ko oh ni palimaun en sendilap en nehrail ko. (Wadek Lipai 8:22-24.) Mwomwen ntao eh kadoadoahk wasaht kin kawehwehda me samworo ko pahn peik oh kapwaiada arail pwukoa kan. Ni mwohmwohte, Sises, nin duwen Samworo Lapalap, ketikihda mehn kahlemeng unsek ong me keidi kan oh pil sihpw teikan. E ketin peikiong sapwellimen Koht kaweid, kapwaiada dahme Siohwa ketin kupwurki, oh ketin idawehn elen mour ehu me sarawi.​—Sohn 4:31-34.

8. Dahme kitail koaros anahne wia?

⁸ Nin duwen sapwellimen Siohwa tohnkaudok kan, kitail koaros anahne idawehn mehn kahlemeng en Sises, me ketin kolokolte eh lelepek ong Koht. Kitail anahne peikiong sapwellimen Koht kaweid kan me dierek nan Paipel oh ni ahl wet, kitail kak soikala kansensuwedihada sapwellimen Koht manaman. (Ep. 4:30) Koasoanehdi teng ken “weweidwei nan ahl inen.”​—Ipru 12:13.

9. Dahme brother silimen ko me iang doadoahk rehn ekei tohn Pwihn me Kin Apwalih Mwomwohdiso nan Sampah Pwon koasoia? Ia duwen dahme irail koasoia eh kak sewese kitail en wiahte aramas sarawi kei?

⁹ Kitail pahn tehkpene dahme brother silimen koasoiahki arail iang doadoahk rehn ekei tohn Pwihn me Kin Apwalih Mwomwohdiso nan Sampah Pwon erein sounpar tohto. Emen brother ko nda: “Mendahki met wia pai kaselel tohrohr ehu en iang irail papah, at doadoahkpene ekei pak kasalehda me, mendahki arail wia me keidi kei, brother pwukat sohte unsek. Ahpw ehu ei mehn akadei erein sounpar tohto iei en peikiong irail kan me kin tiengla mwowe.” Brother keriemeno koasoia: “Iren Paipel kan duwehte 2 Korint 10:5, duwen ‘en peikiong Krais,’ sewese ie en kin peik oh utungada irail kan me kin tiengla mwowe. Peik wet kohsang ei mohngiong.” Brother kesilimeno koasoia: “En poakohng dahme Siohwa ketin poakohng oh kailongki dahme e ketin kalahdeki, oh pil ahnsou koaros rapahki sapwellime kaweid oh wia dahme kin kaperenda ih, met kin wehwehki en peikiong sapwellime pwihn oh pil irail kan me e kin ketin doadoahngki pwehn utungada pweidahn kupwureo ong sampah.” Brother menet tamanda mehn kahlemeng en Nathan Knorr. Brother Knorr, me wiahla emen tohn Pwihn me Kin Apwalih Mwomwohdiso nan Sampah Pwon, pwungki dahme iren onop me oaralap “Ipwidien Wehio” sang nan Kahn Iroir en pahr 1925 (lokaiahn wai) koasoia, mendahki meteikan peidengki duwen ireo. Soangen peik wet uhdahn kamwakid brother menet. Atail doudouloale dahme brother silimen pwukat koasoia kak sewese kitail en peikiong Koht oh wiahte aramas sarawi kei.

10. Ia uwen kesempwal atail en peikiong sapwellimen Koht kosonned me pid nta?

¹⁰ Wadek Lipai 17:10. Siohwa ketin kehkehlikihong mehn Israel kan ren dehr tungoale nta. Kehkehlik pil kohwong Kristian kan ren liksang ntahn aramas oh mahn. (Wiewia 15:28, 29) En medewehla atail wia mehkot me pahn kahrehiong Koht en ketin soikala kitail oh ketikihsang kitail nan sapwellime mwomwohdiso kin kansensuwed. Kitail poakohng Siohwa oh men peikiong ih. Mehnda ma atail mour mihla nan keper, kitail sohte pahn dukula pahn irail kan me sohte ese de nsenohki Siohwa ni ar kin ndaiong kitail en sapeikiong ih. Kitail ese me ekei pahn kapailoke kitail pwehki kitail sohte kin ale nta, ahpw kitail pilada en peikiong Koht. (Sud 17, 18) Dahme pahn sewese kitail en koasoanehdi teng  en dehr tungoale nta de ale dok en nta?​—Deud. 12:23.

11. Dahme kahrehda kitail kak nda me Rahnen Tomwo kaidehn tiahk ehu me sohte kesempwal?

¹¹ Dahme samworo lapalap en Israel kin wia pak ehu nan sounpar ehu ni Rahnen Tomwo kin sewese kitail en wehwehkihla ia sapwellimen Koht madamadau duwen nta. Samworo lapalapo kin doadoahngki nta ongete kahrepe tohrohr ehu. E kin doadoahngki nta pwehn wia mahkpen dihp pwe mehn Israel kan kak ahneki nanpwungmwahu meleilei rehn Koht. E kin usupihki pweinen kohpwahn inowo ntahn kouwol oh kuht. (Lip. 16:14, 15, 19) Pwehki ntahn mahn pwukat, Koht pahn ketin mahkohng dipen mehn Israel kan. Siohwa pil ketin mahsanih me ma aramas emen kemehla mahn men pwehn wiahki kene mwenge, e anahne kakerehdi ntahn mahno nan pwehl oh kihong pwehl powe, pwehki “mour en mehkoaros me momour mihmi ni nta.” (Lip. 17:11-14) Kehkehlik pwukat kaidehn tiahk kei me sohte kesempwal. Sounpar epwiki kei mwowe, Koht ketin kaleke Noha oh kadaudoke kan sang arail en tungoale nta. (Sen. 9:3-6) Ia wehwehn met ong Kristian kan?

12. Ia duwen Pohl eh kadokepene nta ong mahkpen dihp?

¹² Wahnpoaron Pohl kawehwehda me nta ahneki manaman en kamwakel ni eh ntingihdi: “Duwen me sansal nan Kosonnedo, kereniong mehkoaros kin mwakelekelkihla nta; oh sohte lapwepen dihp kin mie ma nta sohte kin keredi.” (Ipru 9:22) Ahpw, kesempwalpen meirong en mahn akan kin ongete ahnsou mwotomwot. Pohl kasalehda me meirong pwukat katamankihong mehn Israel ko me irail aramas dipan kei oh me re anahne meirong ehu me lapalap sang pwehn kihsang douluhl diparail kan. Kosonnedo wia “kamwomwada soh dehde ehu en kamwahu kan me pahn kohdo.” (Ipru 10:1-4) Eri, ia duwen mahkpen dihp eh pahn kak wiawi?

13. Ia omw pepehm duwen Sises eh patohwanohng Siohwa pweinen eh ntao?

¹³ Wadek Episos 1:7. Sises ketin pwoula nin duwen meirong ehu ong aramas  koaros, oh met kin uhdahn kesempwal ong irail kan me poakohng ih oh Semeo. (Kal. 2:20) Ahpw, dahme Sises ketin wia mwurin eh ketin iasada iei me kasaledekihala kitail sang dihp, nin duwen me kin wiawi ni Rahnen Tomwo. Ni samworo lapalapo eh pedolong nan Wasa Sarawiheo, e kin mwomwen me e pedolong mwohn silangin Koht. Ih wasao me samworo kin patohwanohng Koht ntahn mahn ako. (Lip. 16:11-15) Mwurin eh ketin iasada, Sises ketidahla nanleng oh patohwanohng Koht pweinen eh ntao. (Ipru 9:6, 7, 11-14, 24-28) Kitail kalahnganki me kitail kak ale mahkpen dipatail oh ahneki nsenmwakelekel pwehki atail pwoson ntahn sapwellimen Sises meirongo.

14, 15. Dahme kahrehda e kesempwal kitail en wehwehki oh peikiong sapwellimen Siohwa kosonned me pid nta?

¹⁴ Ele met e sansalehr ong uhk kahrepen Siohwa ketin kehkehlikihong kitail en dehr tungoale nta. (Lip. 17:10) Ke wehwehki dahme kahrehda nta wia mehkot sarawi mwohn silangin Koht? Nta kin wehwehki mour. (Sen. 9:4) Eri, ke pahn uhdahn pwungki me kitail anahne kilangwohng nta ni ahlohte me Koht ketin wia oh me kitail anahne peikiong sapwellime kehkehlik en liksang nta. Ihte ahl me kitail kak ahneki popohl rehn Koht iei en pwoson sapwellimen Sises meirong oh wehwehki me nta uhdahn kesempwal ong Sounkapikpatail.​—Kol. 1:19, 20.

¹⁵ Ni soh kasikpe, kitail koaros ele kin anahne pilada en ale de sohte ale doken nta, soahng kan me inenen tikitik me kohsang nan nta, de wiepen ale wini kan me pidada nta. Eri e kesempwal ken kapakap ong Siohwa, wia roporop, oh koasoanehdi teng omw pilipil kan mwohn ahnsou apwal ehu eh pahn wiawi. Ni omw wia met, ke pahn ahneki eimah pwehn liksang nta. Kitail uhdahn sohte men kansensuwedihala Siohwa sang ni atail ale mehkot me e sohte kin ketin kupwurki. Rahnwet, toahkte tohto oh pil meteikan kin kangoange kitail en kihda pein atail nta pwehn sewese mour en meteikan. Ahpw nin duwen sapwellimen Koht aramas sarawi kei, kitail ese me Siohwa sapwellimanki pwuhng en mahsanihong kitail ia duwen atail pahn doadoahngki nta. Mwohn silangih, “nta” kin sarawi. Eri, kitail anahne koasoanehdi teng en peikiong sapwellime kosonned me pid nta. Kitail pil kak kasalehiong ih sang atail wiewia mwakelekel me kitail kin kesempwalki nta en sapwellimen Sises meirongo. Sapwellimen Sises ntao kelehpw me kak kahrehda mahkpen dihp oh mour soutuk en kak wiawi.​—Sohn 3:16.

16. Dahme kahrehda sapwellimen Siohwa aramas akan en sarawihla?

¹⁶ Ni Siohwa eh ketin kasaledekihala mehn Israel kan sang kalidu nan Isip, e ketin mahsanihong irail: “Ngehi KAUN-O, me kahreikumwaildo sang Isip pwe I en wiahla amwail Koht. Eri kumwail pahn sarawihla pwehki ngehi me sarawi.” (Lip. 11:45) Siohwa ketin kasik me mehn Israel ko en sarawihla pwehki e ketin sarawi. Oh rahnwet, Siohwa pil ketin kasik kitail en pil wia duwehte. Pwuhken Lipai uhdahn kasalehda met ni sansal.

17. Ia omw pepehm met duwen pwuhken Lipai?

¹⁷ Se kamehlele me ke paiekidahr atail koasoiapene ekei ire kan sang pwuhken Lipai. Mwein e kalaudehla omw kalahnganki pwuhk wet nan Paipel oh wehwehkihla mwahu ia kahrepen kitail en sarawihla. Ahpw, dahme kitail pil kak sukuhlki sang pwuhken Lipai? Ia duwen pwuhk wet en Paipel eh kak sewese kitail en kaudokiong Koht ni ahl me mwakelekel? Kitail pahn koasoiapene met nan iren onop en mwuhr.