1, 2. (a) Dahme ekei kaunen pelien lamalam ako men ese, oh ia duwen Piter eh sapeng irail? (Menlau kilang tepin kilel.) (b) Dahme kahrehda Piter kak lokaia ni eimah?

 WIHK kei mwurin Sises ketin pwoula, wahnpoaron Piter mi mwohn kaunen pelien lamalam en Suhs ako me inenen lemei. Ohl pwukat iei me pil koasoanehdi kamakamlahn Sises. Met re lingeringer pahn Piter pwehki Piter kamwahwihala ohl emen me sohte kak alu. Re idek rehn Piter: “Soangen manaman dah me kumwa ahneki, de mwaren ihs me kumwa doadoahngki?” Ni eimah, Piter sapengki: “Ohl menet me kesikesihnen mwohmwail met mwahulahr mehlel sang ni manaman en mwaren Sises Krais mehn Nasaret, iei ih me kumwail [“kemehla ni tuhkehn kalokoloko,” NW], oh Koht ketin kaiasadahr sang mehla.”​—Wiewia 4:5-10.

² Mwoweo mwohn met eh wiawi, Piter kahmahmkihla Sises pak siluh pwehki eh masepwehk. (Mark 14:66-72) Ahpw met, Piter sohte masepwehk, e eimah uh mwohn kaunen pelien lamalam ako. Dahme kahrehda? Patehngete sawas sang sapwellimen Koht manaman, Piter uhdahn kamehlele me Sises ketin ieias. Dahme kahrehda Piter uhdahn kamehlele met? Oh dahme kahrehda kitail kak ahneki soangen koapworopworohte?

3, 4. (a) Kaiasada dah kan me wiawi mwohn sapwellimen Sises wahnpoaron ako ipwidi? (b) Ihs me Sises ketin kaiasada?

 ³ Wahnpoaron ako ese me me melahr akan kak pwurehng mourda. Mwohn wahnpoaron ako ipwidi, Koht ketikihong soukohp Elaisa oh Elisa manaman en kaiasada me melahr akan. (1 Nan. 17:17-24; 2 Nan. 4:32-37) Ohl emen me mehla pil pwurehng mourda ni paliwereo eh lekdekdihong nan sousou ehu oh sairada tihn Elisa ko. (2 Nan. 13:20, 21) Tepin Kristian ko kamehlele mepwukat, duwehte atail kamehlele me Mahsen en Koht mehlel.

⁴ Mwein ke pil mwekidkihda ni omw wadek duwen Sises eh ketin kaiasada aramas akan. Karasepe, medewehla duwen liohdio eh uhdahn pwuriamweila ahnsou me Sises ketin kaiasada nah iehroso. (Luk 7:11-15) De medewehla ahnsou me Sises ketin kaiasada serepein pwulopwulo. Ahn serepeino pahpa nohno sohla nsensuwed ahpw ira uhdahn perenda ni ara kilang neira serepeino eh mourda. (Luk 8:49-56) Oh ia uwen aramas ako ar peren ni ahnsou me re kilang Lasarus mourda oh pedoisang nan eh sousowo!​—Sohn 11:38-44.

5. Ia duwen kaiasadahn Sises eh weksang kaiasada teikan mwowe?

⁵ Wahnpoaron ako ese me kaiasadahn Sises weksang kaiasada teikan koaros me wiawi mwowe. Aramas akan me iasada mwoweo iasada ahneki paliwar uduk oh mwuhr pwurehng mehla. Ahpw Sises ketin iasada nin duwen ngehn emen me sohte kak mwerpeseng. (Wadek Wiewia 13:34.) Piter ntingihedi me Sises “ketin pwoula ni paliwar, e ahpw ketin ieias ni pali ngehn.” Pil ehu, Sises “ketidalahngehr nanleng oh ketidiongehr ni palimaun en Koht, oh ketin kakaun tohnleng koaros, me manaman akan oh me lapalap akan.” (1 Pit. 3:18-22) Kaiasada teikan wia manaman kei me uhdahn kapwuriamwei, ahpw sohte ehu me pahrekiong kaiasadahn Sises.

6. Ia duwen kaiasadahn Sises eh kamwakid sapwellime tohnpadahk ko?

⁶ Tohnpadahk ko uhdahn mwekidki kaiasadahn Sises. Sapwellimen Sises imwintihti ko kamehlele me e pwoulahr. Ahpw e ketin ieias nin duwen ngehn manaman men me aramas sohte kak kemehla. Kaiasadahn Sises kadehdehda me iei ih sapwellimen Koht Ohl. Pwehki tohnpadahk ko ese me Sises ketin ieias, re solahr nsensuwed de masepwehk. Ahpw e kahrehda ren ahneki ngoang oh koapworopwor. Ma Sises sohte ketin iasada, kupwuren Koht sohte pahn pweida oh rongamwahwo me re kalohkiseli sohte pahn kesempwal ong irail.

7. Dahme Sises ketin wiewia rahnwet, oh soangen peidek dah kan me ele kitail en idek?

⁷ Kitail ese me Sises sohte ketin wiahte aramas lapalap emen. Sises ketin ieias oh e kin ketin kaukaweid doadoahk en kalohk me wiewiawi sampah pwon. Iei ih Nanmwarki en Wehin Koht nanleng me pahn ahnsou keren ketikihsang soahng suwed koaros nin sampah oh kahrehiong en wiahla paradais ehu me aramas pahn kousoan ie kohkohlahte. (Luk 23:43) Mepwukat koaros sohte kak wiawi ma Sises sohte ketin iasada. Eri dahme kahrehda kitail kak kamehlele me Sises ketin iasada sang mehla? Oh ia wehwehn sapwellime iasada ong kitail?

8, 9. (a) Dahme kahrehda kaunen pelien lamalam en Suhs ako peki me sounsilepe ko en sinsile sapwellimen Sises sousowo? (b) Dahme wiawi ni lih riemen ako ara kohla ni sousowo?

⁸ Mwurin Sises eh ketin kamakamla, kaunen pelien lamalam en Suhs ako kohla rehn Pailet oh nda: “Maing, se tamanda duwen  mwersuwed meno eh ketihtihki, ni eh momouro, ‘I pahn pwurehng mourda mwurin rahn siluh.’ Eri, komw ketin mahsanih pwe re en sinsile sousowo lel ni kesiluhwen rahn, pwe nah tohnpadahk ko de kohla pirapahsang oh ndahng aramas akan me ‘E iasadasangehr mehla.’ Pwe piht wet pahn suwedsang mehn mahso.” Pailet eri ndaiong irail: “Ien silepe kan, kumwail kohwei oh silehdi mwahu sousowo duwen amwail kak.” Eri, ih met me re wia.​—Mad. 27:62-66.

⁹ Ni ahnsou me Sises ketin seridi, re kihong kahlepeo nan pwoar ehu me wiawihda sang paipalap ehu, oh re perehkihla wasahn pedolongo lapalahn takai ehu. Kaunen pelien lamalam ako men Sises en ketikette nan sousowo kohkohlahte. Ahpw sapwellimen Siohwa madamadau uhdahn weksang met. Rahn siluh mwuri, Mery Makdala oh Mery teio kohla ni sousowo. Ira diarada me takaio solahr mi ni ewen sousowo oh tohnleng men wie mwomwohd powe. Tohnlengo padahkihong lih riemeno ira en kilanglong nan sousowo oh kilang me solahr kanenge. Tohnlengo eri ndaiong ira: “E seuwer ket met; e kaiasadahr.” (Mad. 28:1-6) Ei, Sises ketin iasadahr!

10. Ia duwen Pohl eh kadehdehda me Sises ketin iasadahr?

¹⁰ Dahme wiawi erein rahn 40 mwurin met uhdahn kadehdehda me Sises ketin iasadahr. Wahnpoaron Pohl ntingkihlahng mehn Korint ko: “Iet padahk me keieu kesempwal me I aleier, oh I pil peusehiongkumwailehr: duwen Krais eh ketin pwoukilahr dipatail kan, nin duwen eh ntingdier nan Pwuhk Sarawi; duwen eh ketin seridi oh iasada ni kesiluhn rahn, nin duwen eh ntingdier nan Pwuhk Sarawi; duwen eh ketin pwarohng Piter, a mwuhr ong wahnpoaron ehk riemeno koaros. Mwuhr, e ahpw pil ketin pwarohng [“riatail,” NW] limepwiki samwao ahnsoutehkis, pali laud en irail momourte lel rahnwet, a ekei melahr; duwen eh pil ketin pwarohng Seims oh mwuhr, ong wahnpoaron ko koaros. E ahpw ketin pwarohng ie keieu mwuhr—eri, I duwehte seri men me ipwidi ni kaidehn uhdahn ahnsoun eh ipwidi.”​—1 Kor. 15:3-8.

11. Ia duwen kaiasadahn Sises eh wiawi “nin duwen eh ntingdier nan Pwuhk Sarawi”?

¹¹ Keieu, kaiasadahn Sises wiawi “nin duwen eh ntingdier nan Pwuhk Sarawi.” Mahsen en Koht kohpadahr duwen kaiasada wet. Karasepe, Depit ntingihedi me Koht sohte pahn ketin likidmeliehla me ‘loalopwoato’ nan sousou. (Wadek Melkahka 16:10.) Ni rahn en Pendekos pahr 33, Piter kawehwehda me ‘ladu poadidio’ iei Sises ni eh nda: “Depit eh kilangehr dahme Koht pahn ketin wia, e ahpw patohwan duwen iasadahn Mesaia, ni eh patohwan: ‘E sohte lekdekla nan wasahn me melahr akan, paliwere sohte mwerpeseng nan sousou.’”​—Wiewia 2:23-27, 31.

12. Ihs me kilang Sises me ketin iasadahro?

¹² Keriau, me tohto kilang Sises me ketin iasadahro. Erein rahn 40 ko mwurin Sises ketin iasada, e ketin pwarohng sapwellime tohnpadahk kan nan mwetuwel me karanih sapwellime sousowo, pohn ahl me kolahng Emaus oh pil wasa teikan. (Luk 24:13-15) E mahsaniong aramas kei, iangahki Piter, oh pil pwihn kei. Ehu pak, Sises pil ketin pwarohng pokon en aramas 500 samwa. Kitail sohte kak pohnsehsehla ire mehlelo me sounkadehde tohtohie kilang Sises me ketin iasadahr.

13. Ia duwen ahn tohnpadahk ko arail ngoang eh kasalehda me re uhdahn kamehlele me Sises ketin iasada?

¹³ Kesiluh, tohnpadahk ko ngoangki kalohki duwen iasadahn Sises. Re lelohng kalokolok, lokolongki kahpwal kan, oh ekei  kamakamla pwehki arail doadoahk en kalohk. Medewehla met: Ma Sises sohte ketin iasada, Piter pahn mendahkihla eh mour pwehn kalohki duwen iasadahn Sises ong aramas kohte me kailongki oh koasoanehdi kamakamlahn Sises? Piter oh tohnpadahk teiko uhdahn kamehlele me Sises ketin ieias oh ketin kaukaweid doadoahk en kalohko. Pil ehu, kaiasadahn Sises kihong sapwellime kan koapworopwor laud me re pahn pil iasada. Karasepe, ni Stipen eh mehla, e uhdahn kamehlele me e pahn iasada.​—Wiewia 7:55-60.

14. Dahme kahrehda ke kamehlele me Sises ketin ieias?

¹⁴ Kapahieu, kitail ahneki mehn kadehde me ahnsou wet Sises ketin kakaun nin duwen Nanmwarki men oh ketin wiewia Tapwin mwomwohdisohn Kristian. Padahk mehlel en Kristian kan kin pousehlahte wie kekeirda. Ia duwe, met pahn wiawi ma Sises sohte ketin iasada sang mehla? Ni mehlel, ele kitail sohte pahn rong duwen Sises ma e sohte ketin iasada. Ahpw kitail ahneki kahrepe laud en kamehlele me Sises ketin ieias oh ketin kaukaweid doadoahk en kalohk nin sampah pwon.

15. Dahme kahrehda kaiasadahn Sises kihong kitail eimah en kalohk?

¹⁵ Kaiasadahn Sises kihong kitail eimah en kalohk. Sangete ni mwehin Siseso, sapwellimen Koht imwintihti kan kin song wia soahng suwed tohto pwehn kauhdi doadoahk en kalohk, duwehte mwekid en kesehla oh uhwongada kaudok mehlel, kapailok, tiahk lemei, kalokolok laud, keinepwih oh kemehla sounkalohk kan. Ahpw, Paipel kohpadahr: “Sohte tehtehn mahwen ehu pahn kak kauweiukala.” (Ais. 54:17) Kitail sohte masak irail kan me Sehdan kin doadoahngki. Sises ketin sewesewese kitail nin duwen me e ketin inoukidahr. (Mad. 28:20) Kitail kak uhdahn ahneki koapworopwor pwehki sohte lipilipil dahme atail imwintihti kan wia, re sohte pahn kauhdi kitail.

16, 17. (a) Ia duwen kaiasadahn Sises eh kadehdehda mehlelpen soahng koaros me e ketin padahngki? (b) Nin duwen me Sohn 11:25 kasalehda, manaman dahieu me Koht ketikihong Sises?

¹⁶ Soahng koaros me Sises ketin padahngki kin mehlel pwehki sapwellime iasada. Emen ohl me samanih Paipel ntingihdi me ma Krais sohte ketin iasada, Kristian kan pahn wia aramas pweipwei kei me kamehlele lapalahn likamw ieu. Pohl ntingihdi me ma Sises sohte ketin iasada, doadoahk en kalohk oh pwoson me Kristian kan ahneki sohte pahn mie katepe. Ni mehlel, pwuhken Rongamwahu ko pahn wiahte soai kansensuwed ehu duwen ohl mwahu oh erpit men me eh imwintihti ko kemehla. Ahpw Sises ketin iasadahr, oh met kadehdehda mehlelpen soahng koaros me e ketin padahngki.​—Wadek 1 Korint 15:14, 15, 20.

¹⁷ Sises mahsanih: “Ngehi me mour sapahl oh Sounkomour. Mehmen me pwoson ie, mehnda ma e pahn mehla, ahpw e pahn [“mourda,” NW].” (Sohn 11:25) Sapwellimen Sises inou wet uhdahn pahn pweida. Siohwa ketikihong Sises manaman en kaiasada irail kan me pahn kakaun nanleng oh pil meh lik lik kei me pahn kousoan nin sampah. Sapwellimen Sises meirongo oh kaiasada inoukihda me mehla sohla pahn wiawi. Eri kitail kak ahneki kehl en dadaurete pahn kasongosong koaros oh pil sohte masepwehk ma kitail pahn mehla.

18. Dahme kaiasadahn Sises kamehlelehiong kitail?

¹⁸ Kaiasadahn Sises kihong kitail koapworopwor me sapwellimen Siohwa koasoandi limpoak kan me pahn kadeikada  aramas akan. Pohl ndaiong pwihn en ohl oh lih kei nan Adens me Koht pahn ketin “kadeingkihda sampah pwon pwuhng, sang rehn ohl emen me e ketin pilada. E ketikihda kadehdepen met ong emenemen ni eh ketin kaiasadahr ohlo sang mehla!” (Wiewia 17:31) Koht ketin idihada Sises en wia atail Sounkopwung, oh kitail kak kamehlele me sapwellime kadeik pahn wiawi ni elen limpoak oh pahrek.​—Wadek Aiseia 11:2-4.

19. Ia duwen atail kamehlele kaiasadahn Sises eh kin kamwakid kitail?

¹⁹ Kitail men wia kupwuren Koht pwehki kitail kamehlele duwen kaiasadahn Sises. Ma Sises sohte ketin tounmeteikihla eh mour oh sohte ketin iasada, kitail pahn mihte pahn dihp oh mehla. (Rom 5:12; 6:23) E sohte pahn mie atail koapworopwor oh ele kitail pahn kin nda: “Kitail en kin kamakamadipwte, pwe lakapw kitail pahn mehla.” (1 Kor. 15:32) Ahpw kitail sohte kin kilangwohngete mour nsenamwahu. Kitail kin kesempwalki koapworopwor en kaiasada oh kin men peikiong Siohwa ahnsou koaros.

20. Ia duwen kaiasadahn Sises eh kadehdehda duwen Koht eh ketin lapalap?

²⁰ Kaiasadahn Sises kadehdehda duwen Siohwa eh ketin lapalap oh me e kin ketin “katingih irail kan me kin raparapahki.” (Ipru 11:6) Siohwa ketin doadoahngki manaman oh erpit laud pwehn ketin kaiasada Sises ong mour nanleng me sohte kak mehla. Koht pil ketin kasalehda me e kak ketin kapwaiada sapwellime inou kan. Siohwa ketin inoukihda me “kadaudok” tohrohr men me pahn kapwungala ire kesempwalo me pid ihs me ahneki pwuhng en kaunda nanleng oh sampah. Pwe inou wet en pweida, ‘kadaudoko,’ Sises, anahne pwoula oh pil iasada.​—Sen. 3:15, NW.

21. Ia wehwehn koapworopwor en kaiasadao ong uhk?

²¹ Kitail kin uhdahn kalahngankihong Siohwa duwen koapworopwor en kaiasada. Paipel inoukihda: “Iet tehnpas en Koht rehn aramas akan! E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” Wahnpoaron Sohn alehdi inou wet oh pil alehdi kaweid wet: “Ntingihedi met, pwehki mahsen pwukat me mehlel oh likilik.” Ihs me kasalehiong Sohn kaudiahl wet? Iei Sises Krais me ketin iasadahro.​—Kaud. 1:1; 21:3-5.