1, 2. (a) Dahme Sises ketin kasalehda duwen imwin rahn akan? (b) Peidek dah kan me kitail pahn koasoiapene?

 SONG medewehla Sises eh ketiket pohn Nahna Olip me kilengdihlahng tehnpas sarawio nan Serusalem. Sapwellime wahnpoaron pahmen ko, Piter, Andru, Seims, oh Sohn me iang ih. Re wie rongorong kanahieng Sises ni eh ketin padahkihong irail kokohp kaselel ehu duwen ahnsou kohkohdo. Kokohpo kasalehda dahme pahn wiawi erein imwin rahn akan en koasoandi suwed wet, ahnsou me Sises pahn ketin kaunda Wehin Koht. Sises ketin padahkihong irail me erein ahnsowo, sapwellime “ladu lelepek oh loalokongo” pahn wilian ih nin sampah oh pahn kihong sapwellime tohnpadahk kan padahk mehlel me rasehng mehn ketihnain ni ahnsou me konehng.​—Mad. 24:45-47, NW.

² Mwuhr, nan kokohpohte, Sises ketin padahkihong irail duwen karasaras en serepein meipwon ehk ko. (Wadek Madiu 25:1-13.) Nan iren onop wet, kitail pahn koasoiapene peidek pwukat: (1) Ia ire kesempwalo nan karasaraso? (2) Ia duwen me keidi  lelepek kan ar doadoahngki kaweid en karasaraso, oh ia imwilahn met? (3) Ia duwen emenemen kitail kak paiekihda sapwellimen Sises karasaraso rahnwet?

3. Mahso, ia duwen neitail sawaspen Paipel kan ar kawehwehda karasaras en meipwon ehk ko, oh dahme kakete wiawi?

³ Nan iren onop en mwoweo, kitail sukuhlkihdi me nan sounpar kan me kerendo, ladu lelepeko wekidala mwomwen kawehwehn ekei koasoipen Paipel kan. Met ladu lelepeko kin medemedewehte en kasalehda ia mehn kasukuhlo nan koasoipen Paipelo laudsang dahme e kakete karasaraskihong. Karasepe, medewehla sapwellimen Sises karasaras en meipwon ehk ko. Mahso, neitail sawaspen Paipel kan kin nda me lamp ako, leho, oh pwoatol ko kin karasaraskihong aramas emen de mehkot. Ia duwe, ire kesempwalo nan karasaraso seu pahn kakete salongala ma kitail nohn nsenohkihte ire pisetik kan? Pasapengpen peidek wet kesempwal.

4. Nan karasaraso, ia duwen atail ese (a) ihs ohl kamwohdo? (b) ihs serepein meipwon ko?

⁴ Kitail pahn tehkpene ire kesempwalo nan sapwellimen Sises karasaraso. Keieu, medewe duwen ihs me mi nan karasaras en meipwon ehk ko. Ihs ohl kamwohdo? Sises. Kitail ese met pwehki mie ahnsou me Sises ketin kahdaneki pein ih ohl kamwohdo. (Luk 5:34, 35) Ihs serepein meipwon ko? Irail pwukat iei “kisin pwihn sihpw” en Kristian keidi kan. Ia duwen atail ese met? Nan karasaraso, meipwon ko anahne onopada iangahki neirail lamp ko ni ahnsou me ohl kamwohdo ketido. Tehk dahme Sises mahsanihong sapwellime tohnpadahk keidi kan: “Kumwail onohnop ong dahme pahn kohdo, katengehdiong amwail likou kan nin lukopamwail kan oh amwail mehn ser en kin lullul, duwehte ladu kan me kin awiawih ar mwohnsapw me pahn sapahldo sang ni kamadipw en kapwopwoud.” (Luk 12:32, 35, 36) Patehng met, wahnpoaron Pohl oh wahnpoaron Sohn kapahrekihong sapwellimen Krais me keidi kan meipwon mwakelekel kei. (2 Kor. 11:2; Kaud. 14:4) Eri kitail kak kilang me kaweid oh mehn kataman me dierek nan Madiu 25:1-13 kin dokedoke sapwellimen Sises me keidi kan.

5. Ia duwen Sises eh ketin kasalehda iahd ahnsowo me sapwellime karasaraso kin dokedoke?

⁵ Keriau, ahnsou dah me sapwellimen Sises kaweido kin dokedoke? Dahme Sises mahsanih ni kerenlahng imwin karasaraso kin sewese kitail en ese iahd. E mahsanih: “Ohl kamwohdo pa leledo.” (Mad. 25:10) Nan Kahn Iroir en July 1, 2013, kitail sukuhlki me sapwellimen Sises kokohp me kileldi nan Madiu irelaud 24 oh 25 kin koasoia duwen mwomwen Sises eh “ketido” pak waluh. Ni Sises eh mahsanih duwen eh “ketido,” e kin mahmahsanih duwen ahnsowo erein kahn kamakam kowahlapo ni eh pahn ketido pwehn ketin kadeikada oh kasohrehla sampah suwed wet. Eri kitail kak nda me sapwellimen Sises karasaraso kin dokedoke imwin rahn akan oh me e pahn “ketido” erein kahn kamakam kowahlapo.

6. Ia ire kesempwalo nan karasaraso?

⁶ Ire kesempwal dahieu me kitail sukuhlkihsang karasaraso? Tamanda dahme wiawi mwoweo oh mwurin koasoipen Paipel wet. Nan Madiu irelaud 24, Sises kin mahsanih duwen “ladu lelepek oh loalokongo.” Laduwo pahn wia pwihn tikitik ehu me wiawihkihda ohl keidi kan me pahn tiengla mwowe nanpwungen sapwellimen Krais tohnpadahk kan erein imwin rahn akan. Sises ketin katamankihong ohl pwukat me re anahne kolokolte arail lelepek. Nan irelaudo mwuri, Sises ketin doadoahngki karasaras en meipwon ehk ko pwehn ketin kaweid sapwellime tohnpadahk me keidi kan  koaros ni imwin rahn akan. Ire kesempwalo iei en “mwasamwasahn” pwe ren dehr katihasang ketingparail en mi nanleng. (Mad. 25:13) Met kitail pahn koasoiapene karasaraso oh ia duwen me keidi kan ar kin doadoahngki kaweido nan karasaraso.

7, 8. (a) Dahme kahrehda meipwon loalokong ko onopadahr? (b) Ia duwen me keidi kan ar kasalehda me re onopadahr?

⁷ Nan karasaraso, Sises ketin kasalehda me weksang meipwon loalopwon ko, meipwon loalokong ko onopadahr ni ohl kamwohdo eh ketido. Dahme kahrehda? Pwehki re kin wie onohnop oh mwasamwasahn. Serepein meipwon ehk ko koaros anahne mwasamwasahn oh neirail lamp ko en kin wie lullul erein nipwongo. Weksang meipwon loalopwon ko, meipwon loalokong limmen ko onopadahr pwehki re wahda kisin pwoatol kei me diren leh iangahki neirail lamp ko. Ia duwen Kristian keidi lelepek kan ar onopadahng ketidohn Krais?

⁸ Me keidi kan onopadahngehr en kapwaiada arail pwukoa kan lao lel ni imwi. Pwe irail en papah Koht, re pohnese me re anahne uhdihsang mourki soangen mour me ahneki kepwe tohto me dierek nan ahn Sehdan sampah. Ahpw re men wia met. Re koasoanehdi teng ren papah Siohwa ni loalopwoat, kaidehn pwehki imwio kerendohr ahpw pwehki re poakohng ih oh sapwellime Ohlo. Re kolokolte arail lelepek oh sohte men mweidohng madamadau en sampah me pid noahrok, tiahk samin, oh roporop en kamwakid irail. Duwehte meipwon loalokong ko me onopada iangahki neirail lamp ko, me keidi kan kin pousehlahte wie lingalingki marain oh ni kanengamah, awiawih ketidohn ohl kamwohdo, mehnda ma e mwomwen ketin pwapwand.​—Pil. 2:15.

9. (a) Mehn kataman dahieu me Sises ketikihda duwen lusulusoi? (b) Ia duwen me keidi kan arail mwekidki likwero: “Iet ohl kamwohdo, e samwodohr”? (Pil kilang nting tikitik kan.)

⁹ Meipwon loalokong ko pil kin onopada ong ketidohn ohl kamwohdo pwehki re kin mwasamwasahn. Ahpw nan karasaraso, serepein meipwon ko koaros “lusulusoite, meirla” ni arail awiawih ohl kamwohdo me mwomwen ketin pwapwand. Eri ia duwe, Kristian keidi kan rahnwet kakete “meirla,” de mweidohng mehkot en kerempwairailla ni arail awiawih ketidohn Krais? Ei. Sises mwahngih me aramas ngoang men pil kakete luwetala oh mweidohng mehkot en kerempwahla ih ni eh awiawih ketidohn Krais. Eri Kristian keidi lelepek kan kin doadoahk uhdahn laud pwe ren mwasamwasahn. Ia duwen? Nan karasaraso, meipwon ehk ko koaros mwekidki likwero: “Iet ohl kamwohdo, e samwodohr!” Ahpw, meipwon loalokong kohte me wie mwasamwasahn. (Mad. 25:5, 6; 26:41) Pil duwehte, erein imwin rahn akan, Kristian keidi lelepek kan mwekidkiher likwero: “Iet ohl kamwohdo, e samwodohr!” Irail kamehlele duwen mehn kadehde laud me Sises kereniongehr pahn ketido, oh re onopadahr. * Met kitail pahn kilang duwen imwilahn sapwellimen Sises karasaraso me dokedoke erein ahnsou ehu.

10. Dahme kitail kak ndahki koasoakoasoipene me wiawi nanpwungen meipwon loalokong ko oh loalopwon ko?

¹⁰ Kerenlahng ni imwin karasaraso,  meipwon loalopwon ko peki rehn meipwon loalokong ko ren kihong ekis pilen neirail lamp ko. Ahpw meipwon loalokong ko sohte sewese irail. (Wadek Madiu 25:8, 9.) Ahpw ia duwe, mie pak me Kristian keidi lelepek kan sohte kin sewese emen me anahne sawas? Tamataman ahnsowo me karasaraso kin dokedoke. Sises, Ohl kamwohdo, ketido kerenlahng ni imwin kahn kamakam kowahlapo pwehn wia sapwellime kadeik. Eri koasoakoasoipene wet nanpwungen meipwon loalokong ko oh loalopwon ko ele dokedoke dahme wiawi mwohnte imwilahn kahn kamakam kowahlapo. Dahme kahrehda kitail kak nda met? Pwehki ni ahnsowo, kaimwiseklahn kileldi en me keidi kan pahn wiawiher.

11. (a) Dahme pahn wiawi mwohnte kahn kamakam kowahlapo pahn tepida? (b) Ia wehwehn meipwon loalokong ko arail ndaiong meipwon loalopwon ko en kohla oh pwainda pilen neirail lamp ko?

¹¹ Eri, mwohn kahn kamakam kowahlapo tepida, kaimwiseklahn kileldi en me keidi lelepek kan koaros nin sampah pahn wiawiher. (Kaud. 7:1-4) Sang ahnsowo kohla, re uhdahn pahn kohla nanleng. Ahpw medewehla duwen sounpar kan mwohn kahn kamakam kowahlapo. Dahme pahn wiawiong me keidi kan me sohte kin mwasamwasahn oh sohla lelepek? Re sohte pahn iang kaimwiseklahn kileldio. Ni ahnsowo, Kristian lelepek teikan pahn keikihdi sapwellimen Koht manaman. Ahnsou me kahn kamakam kowahlapo pahn tepida, me loalopwon ko ele pahn pwuriamweikihla arail kilang kasohrlahn Papilon Lapalap. Mwein ih ahnsowo me re pahn esehda me re sohte onopada ong ketidohn Sises. Ni ahnsowo, dahme pahn wiawi ma irail peki sawas? Pasapengo sansalda nan karasaraso. Meipwon loalokong ko sohte kihong meipwon loalopwon ko pilen neirail lamp ko ahpw re ndaiong ren kohla oh pwainda. Ahpw pwehki ahnsowo ‘nin lukepen pwohng,’ sohte mehmen me netikiong irail pilen neirail lamp ko. E pwandalahr!

12. (a) Erein kahn kamakam kowahlapo, dahme pahn wiawihong mehmen me mahs wia emen me keidi ahpw sohla lelepek mwohn kaimwiseklahn kileldi en me keidi kan? (b) Dahme pahn wiawihong irail kan me duwehte meipwon loalopwon ko?

¹² Erein kahn kamakam kowahlapo, me keidi lelepek kan sohte kak sewese mehmen me sohla lelepek. E pwandalahr. Eri, dahme pahn wiawihong irail kan me sohla lelepek? Tehk dahme wiawihong meipwon loalopwon ko me kohieila pwehn pwainda pilen neirail lamp ko: “Ohl kamwohdo pa leledo. Serepein limmeno me onopadahr, ahpw iang ketilong nan kamadipw en kapwopwoudo, wenihmwen ihmwo ahpw ritidi.” Ni Sises eh pahn ketido nan sapwellime lingan ni kerenlahng imwin kahn kamakam kowahlapo, e pahn ketikihpene sapwellime me keidi lelepek kan ong nanleng. (Mad. 24:31; 25:10; Sohn 14:1-3; 1 Des. 4:17) Ahpw, Sises pahn ketin soikala me sohla lelepek kan. Duwehte meipwon loalopwon ko, ele me sohla lelepek pwukat pahn nda: “Maing, maing! Komw ketin ritingadahng kiht wenihmwen!” Ahpw ia duwen Sises eh pahn ketin sapeng? E pahn ketin sapengkin irail pasapengohte me e ketin sapengki me tohto me rasehng kuht: “Soh! I sehse ihs kumwail.”​—Mad. 7:21-23; 25:11, 12.

13. (a) Dahme kahrehda kitail sohte anahne nda me sapwellimen Krais me keidi tohto pahn sohla lelepek? (b) Dahme kahrehda kitail kak nda me sapwellimen Sises karasaraso kin kasalehda me Sises kin ketin likih Kristian keidi kan? (Menlau kilang tepin kilel.)

¹³ Ia duwe, Sises kin mahmahsanih me me keidi tohto sohla pahn lelepek oh me lelepek teikan pahn wiliandi? Soh. Nan Madiu irelaud 24, Sises ketin katamankihong  ladu lelepek oh loalokongo en dehr wiahla papah suwed men. Met sohte wehwehki me e ketin kasik me met pahn wiawi. Pil duwehte, karasaras en serepein meipwon ehk ko kin wia mehn kataman ehu. Duwehte meipwon meh limmen ko ar loalopwon oh pil meh limmen teiko ar loalokong, emenemen Kristian keidi anahne pilada en kin onohnop oh mwasamwasahn. Ma soh, e kakete loalopwonla oh sohla lelepek. Pohl kihda mehn kataman ehu me duwehte met ong rie me keidi kan. (Wadek Ipru 6:4-9; pil kilang Deuderonomi 30:19.) Eh mehn katamano uhdahn inen, ahpw e pil likih me rie Kristian ko pahn alehdi ketingparail. Mehn katamano nan karasaras en serepein meipwon ehk ko kin kasalehda me Sises pil ketin sapwellimanki soangen likilikohte ong me keidi kan. E mwahngih me emenemen sapwellime ladu keidi kan kak kolokol arail lelepek oh ale ketingparailo me kaselel.

14. Dahme kahrehda “sihpw teikan” pil kak paiekihda karasaras en serepein meipwon ehk ko?

¹⁴ Sapwellimen Sises karasaraso kin dokedoke Kristian keidi kan. Ahpw ia duwe, “sihpw teikan” pil kak paiekihda sapwellimen Sises karasaraso? (Sohn 10:16, NW) Ei uhdahn! Ire kesempwalo nan karasaraso uhdahn sansal: “Kumwail eri mwasamwasahn.” Ehu pak Sises pil mahsanih: “Dahme I ndaiong kumwail, I pil ndaiong aramas koaros: Kumwail pepehd oh mwasamwasahn!” (Mark 13:37) Sises kupwurki me sapwellime tohnpadahk kan koaros en kin onohnop oh mwasamwasahn. Oh Kristian koaros kak alasang mehn kahlemeng mwahu en me keidi kan me kin mwohneki doadoahk en kalohk nan arail mour. Tamataman me meipwon loalopwon ko peki rehn meipwon loalokong ko ren kihong irail ekis pilen neirail lamp ko. Arail pekipeko sohte pweida. Met kin katamankihong kitail me emenemen kitail me pahn pilada en kolokol atail lelepek ong Koht, en kin onohnop oh pil mwasamwasahn. Sohte mehmen me kak wia met ong kitail. Emenemen kitail pwukoahki pein kitail mwohn silangin Sounkopwungo, Sises Krais, me pahn kereniong ketido. Eri kitail anahne onopada!

15. Dahme kahrehda kapwopwoud en Krais oh sapwellime lih kamwohdo inenen kaperen ong Kristian mehlel koaros?

¹⁵ Kristian koaros inenen perenkihda duwen kapwopwoudo nan sapwellimen Sises karasaraso. Ahnsou kohkohdo, mwurin mahwen en Armakedon, Kristian keidi kan pahn wiahla sapwellimen Krais lih kamwohd. (Kaud. 19:7-9) Koaros nin sampah eri pahn paiekihda kapwopwoud wet me pahn wiawi nanleng. Dahme kahrehda? Pwehki e kamehlelehiong kitail duwen koperment unsek ehu ong aramas koaros. Sohte lipilipil ma kitail ahneki koapworopwor en mour nanleng de nin sampah, kitail en koasoanehdi teng en kin onohnop oh mwasamwasahn. Ma kitail wia met, kitail kak paiekihda ahnsou kaselel me Siohwa ketin kaunopadahng kitail ong ahnsou kohkohdo!