EMEN ohl me adaneki Julian koasoia: “Ahnsou me I rong pakair me nei pwutako piskenla, mwomwen me soahng koaros uhdi. Ih me nei mesenih, oh se kin uhdahn kerenpene, se kin ehupene wia soahng tohto. E kin ahnsou koaros wia seri mwahu men, ahpw mwuhr ni soh kasikpe, e tepida wia soahng kan me sohte pwung. Ei pwoudo kin kalapw sengiseng, ahpw I kin sehse ia duwen ei pahn kansenamwahwihala. Se kin kalapw peikasalki ma se seu sohte pweida wia at pwukoa nin duwen pahpa oh nohno men.”

Ia duwen atail kak nda me piskenla kin wia koasoandi limpoak ehu ma e kin kahrehda nsensuwed laud? Soangen kahrepe dah kan me Paipel kin kihda pwehn wia mwekid wet me mwomwen nohn daulihala? Oh dahme uhdahn kin kahrehda emen en piskenla?

Soahng riau kin wiawi, oh met kin imwikihla emen Sounkadehdehn Siohwa en piskenla. Keieu, Sounkadehde men me papidaislahr wiahda dihp laud ehu. Keriau, e sohte koluhkihla eh dihpo.

Siohwa sohte ketin kasik kitail en wia soahng kan ni unsek, ahpw mie sapwellime koasoandi duwen mwakelekel me e kin ketin kasik sapwellime ladu kan en wia. Karasepe, Siohwa kupwurki kitail en soikala dihp laud kan duwehte tiahk samin me pid nsenen pwopwoud, pwongih dikedik en eni kan, pirap, mwersuwed, kamaramas, oh wunahni.​—1 Kor. 6:9, 10; Kaud. 21:8.

Ke seu pahn pwungki me sapwellimen Siohwa koasoandi mwakelekel kan kin toupahrek oh kin pere kitail? Kitail kin uhdahn men mi nanpwungen aramas mwahu, meleilei oh me kitail kak likih. Ih met me kitail kin diar rehn riatail Kristian kan, oh kitail kin kalahnganki inou me kitail wiahda ong Koht en mour pahrekiong kaweid kan me dierek nan sapwellime Mahsen.

Ahpw ia duwen ma Kristian men me papidaisla wiahda dihp laud ehu pwehki eh luwet kan? Sapwellimen Siohwa ladu lelepek kan mahsie pil kin wiahda soahng pwukat, ahpw Koht sohte ketin soikala irail douluhl. Karasepe ehu me me tohto ese duwe iei Nanmwarki Depit. Depit wiahda dipen kamwahl oh kamaramas, ahpw soukohp Nadan ndaiong: “KAUN-O ketin mahkohng komwi.”​—2 Sam. 12:13.

Pwehki Depit kasalehda me e uhdahn koluhla, Koht ketin mahkohng ih. (Mel. 32:1-5) Pil duwehte rahn pwukat, sapwellimen Siohwa ladu men pahn piskenla ihte ma e sohte koluhla de e kin pousehlahte wia dahme suwed. (Wiewia 3:19; 26:20) Ma elder kan me kin apwalihala kahpwal kan me pidada dihp laud kilang me e sohte kasalehda me e koluhla mehlel, re pahn anahne kihsang ih nan mwomwohdiso.

Mwein kitail pahn tepte medewe me pilipil en kihsang me wiahda sapwungo nan mwomwohdiso wia mwekid ehu me nohn daulihala de sohte kadek,  ahpw keieu ma kitail karanih aramaso. Mendahki met, sapwellimen Siohwa Mahsen kin kihong kitail kahrepe mwahu kitail en kamehlele me pilipil wet wia koasoandi limpoak ehu.

Sises ketin kasalehda me “kupwurokong en Koht kin dehdehda sang ni wahn sapwellime doadoahk kan.” (Mad. 11:19) Pilipil mwahu en kihsang emen me wiahda dihp oh sohte koluhla kin imwila mwahu. Kitail tehk soahng siluh:

Koasoandi en piskenla kin kawahuihala mwaren Siohwa. Pwehki kitail kin weuwa mwaren Siohwa, atail wiewia kan anahne kawauwih mwareo. (Ais. 43:10) Duwehte wiewiahn seri men eh kak kawauwih de kanamenekihala eh pahpa nohno, dahme aramas akan kin medewehki Siohwa pahn poahsoankihda wiewia mwahu de suwed me re kilang rehn irail akan me kin weuwa mwareo. Wahupen mwaren Koht pahn mihmihte ma aramas akan me weuwa mwareo pahn wiahkihla sapwellime koasoandi pwung kan pein arail. Irairo mwomwen duwehte dahme wiawi ni mwehin Esekiel, ahnsou me aramas en wehi kan kin kilangwohng mehn Suhs kan nin duwen aramas kei me kin weuwa mwaren Siohwa.​—Esek. 36:19-23.

Kitail kak kanamenekihala mwaren Koht me sarawi ma kitail kin wia tiahk samin. Wahnpoaron Piter kaweidki Kristian ko: “Kumwail peikiong Koht; soangen ineng kei mie rehmwail ahnsou me kumwail saikinte marainkihla Koht, eri, kumwail dehr mweidohng soangen ineng ko en kaunda amwail mour ahnsou wet. Ahpw kumwail en sarawihla ni mehkoaros me kumwail kin wia, duwen Koht me ketin malipeikumwaildo, eh ketin sarawi. Pwe Pwuhk Sarawi mahsanih, ‘Kumwail uhdahn pahn sarawihla, pwe ngehi, I me sarawi.’” (1 Pit. 1:14-16) Wiewia mwakelekel oh sarawi kin kawauwih mwaren Koht.

Ahpw, ma Sounkadehdehn Siohwa men kin wiewia me suwed, kompoakepah kan oh meteikan pahn kakete esehda. Koasoandi en piskenla kin kasalehda me Siohwa sapwellimanki aramas mwakelekel kei me kin utung kaweid kan en Paipel pwehn kolokolte irair mwakelekel wet. Ehu pak emen ohl pedolong nan Wasahn Kaudok ehu nan Switzerland oh koasoia me e men wiahla emen Sounkadehdehn Siohwa. Rie serepeino piskensang nan mwomwohdiso pwehki eh wia tiahk samin me pid wia nsenen pwopwoud. E nda me e men iang pwihn ehu me “sohte kin mweidohng wiewia suwed en mihmihte.”

Koasoandi en piskenla kin pere mwomwohdisohn Kristian me mwakelekel. Wahnpoaron Pohl katamankihong mehn Korint ko duwen keperpen mweidala irail kan me kin nsenki wia dihp en mihmiseli nanpwungarail. E kapahrekihong wiewia suwed en irail pwukat ihs kis me koumpwosehda pilawa ieu pwon. E nda: “Kisin pwidik en ihs kis kin koumpwosehda nesen pilawa ieu pwon.” Ih eri kaweidkin irail: “Kumwail kesepwekehsang nanpwungamwail aramas suwedo.”​—1 Kor. 5:6, 11-13.

E mwomwen me “aramas suwedo” me Pohl koasoia duwe kin wiewia tiahk samin ni sansal. Oh tohnmwomwohdiso teikan pil tepida utung eh wiewia ko. (1 Kor. 5:1, 2) Ma soangen dihp kasaut wet mweimweida, Kristian teikan ele pahn pehm me e pwung en iang wiewiahn tiahk samin kan en kahnimw me re kousoan ie. Ma sohte mehkot wiawihong irail pwukat me nsenki wia dihp, met kak kahrehda emen en sohla nsenohki sapwellimen Siohwa koasoandi kan. (Ekl. 8:11) Patehng met, irail kan me wiahda dihp ahpw sohte koluhla kak wia keper ehu oh kauwehla pwoson en meteikan nan mwomwohdiso.​—Sud 4, 12.

Koasoandi en piskenla ele kak sewesehda meno me wiahda dihpo en pohnesehda eh wiewia kan. Ehu pak Sises mahsanih duwen pwutak pwulopwul men me kohkohsang imwen eh pahpao oh kesehla mwahl eh sohso ong mour suwed oh tiahk samin. Pwutak me salongalao sukuhlkihdi ni ahl me apwal me mour likin imwen eh pahpao sohte katepe oh sempoak. Pwutako pohnesehda eh wiewia kan, koluhla, oh pilada en pwurehng pwurala rehn eh peneineio. (Luk 15:11-24) Mwomwen Sises eh ketin kawehwehda duwen pahpa limpoako me perenkihda nah pwutako eh wekidala eh madamadau kin sewese kitail en wehwehki sapwellimen Siohwa pepehm kan. Siohwa ketin kamehlelehiong kitail: “I sohte kin kupwurperenki mehlahn aramas dipan. Ahpw en wiliakapwasang eh suwed pwe en mour.”​—Esek. 33:11.

Pil duwehte, irail kan me piskenla me sohla wia kisehn mwomwohdisohn Kristian kin ele pohnesehda  dahme re luhssang. Imwila suwed en dihp me re wiahda, patehng arail kin tamanda ahnsou kaperen kan ni arail ahneki nanpwungmwahu rehn Siohwa oh sapwellime aramas akan, kin kak kahrehda ren pohnesehda arail wiewia kan.

Limpoak oh lokaia inen kin anahn pwehn wiahda imwila mwahu. Paipel mahsanih: “Kalokolok koaros likamwete kin kahrehiong kitail nsensuwed, kaidehk peren. Ahpw mwuhr, kalokolok kin kahrehda popohl oh mour pwung ong irail kan me kin ale.” (Ipru 12:11) Pwehn karasahda: Medewehla aramas emen wie mwengemwenge oh kisin uduk kis tengala nan kepin wereo. E sohla kak esingek mwahu oh sohla angi. E pil sohla kak lokaia. Ma sohte emen mwadang sewesehda, e pahn mehla. Eri iengeo poakih tihnseweo de kamwus. Ele iengeo eh poakih tihnseweo pahn medek ahpw met kak doarehla eh mour. Duwehte met, aramas pwung men ele anahne ale kaweid me kamedek ong pein kamwahupe.

Nan soangen irair tohto, koasoandi en piskenla kin kihda kaweid me me wiahda dihpo anahne. Mpen sounpar eisek mwuri, nein Julian pwutako, me kitail koasoia nin tapio, kesehla eh mour samin, pwuralahng mwomwohdiso, oh met kin papah nin duwen elder men. E nda: “Ei piskenlao kahrehda I en pein lokolongki imwila suwed en ei wiewia kan. I anahne soangen kaweid wet.”​—Ipru 12:7-11.

Mehlel, piskenla kin wia kahpwal kansensuwed ehu, ahpw met sohte anahne wiahla kahpwal inenen laud ehu. Kitail koaros anahne kapwaiada koasoandi en piskenla.

Elder kan me ahneki pwukoa kansensuwed wet en wiahda pilipil en piskenla emen me wiahda dihp laud kin nantihong en kasalehda sapwellimen Siohwa limpoak. Ahnsou me re padahkihong aramaso duwen arail pilipilo, irail kin kawehwehda ni kadek oh sansal duwen kahk kan me aramaso anahne wia pwehn kak pwurodo nan mwomwohdiso. Pwehn katamankihong me piskenla kan ia duwen arail kak pwurodo rehn Siohwa, ekei ahnsou elder kan ele pahn mwemweitla rehn irail kan me kin kadehdehda sang arail wiewia me re wekila. *

Peneinei kan kin kak kasalehda limpoak ong mwomwohdiso oh pil ong me wiahda dihpo sang arail wauneki koasoandi en piskenla. Julian koasoia: “E wiahte nei pwutak, ahpw mwomwen eh mouro katohrepeseng nanpwungat.”

Koaros nan mwomwohdiso kak kasalehda limpoak mehlel sang arail soikala ehuong oh koasoiong me piskenlao. (1 Kor. 5:11; 2 Sohn 10, 11) Ni arail wia met, irail kin kakehlaka kaweid me Siohwa ketikihong elder kan en kihong me piskenlao. Patehng met, tohnmwomwohdiso kak kasalehda limpoak laud oh sawas ong peneinei en me piskenlao. Peneineio kin lokolok laud oh irail sohte anahne pehm me re pil sohte kak iang patehng riarail Kristian kan.​—Rom 12:13, 15.

Julian nda: “Piskenla iei koasoandi ehu me kitail anahne. E wia koasoandi ehu me kin sewese kitail en mour pahrekiong sapwellimen Siohwa koasoandi kan. Mendahki e kamedek, e kin wahdo imwila mwahu kan. Ma I utung wiewia suwed kan me nei pwutako wia, nei pwutako sohte pahn kak mwahula.”