1-3. Dahme kahrehda Pohl uhdahn kamehlele me e kak likih Siohwa? (Menlau kilang tepin kilel.)

 MA KOWE Kristian men nan Rom ni mwehin wahnpoaron ko, ke wie momour ni ahnsou keper ehu. Kristian kan kin ale kalokolok laud sang mehn Rom kan. Mehn Rom kan kin kapwukoahkin Kristian ko me irail me kahrehda kisiniei laud ehu nan Rom oh karaunkin irail me re kin kailongki aramas akan. Riomw Kristian tohto selidier. Mahn akan kemehla ekei irail. Ekei poasdahng tuhke kan oh eri isihsla ni arail momourte pwehn wia kamarainpen ni pwong kan. Ehuehu rahn ke ese me soahng pwukat kakete wiawihong uhk.

² Erein ahnsou uhdahn apwal wet, wahnpoaron Pohl selidi. Mwein e medewe ma rie Kristian kan pahn kak sewese ih pwehki sohte me sewesehda ih nan kahpwal ehu me wiawi mwoweo. Ahpw Pohl ale sawas sang Sises. E ntingihdi: “Kaun-o ketiket rehi, oh ketin kakehlaka ie.” Sises ketikihong Pohl kehl me e anahne. Pohl pil ntingihdi me e “pitsangehr mehla [“ewen laion,” NW].”​—2 Tim. 4:16, 17. *

 ³ Pohl tamanda duwen Siohwa eh ketin sewesehda ih mahso. Eri e uhdahn kamehlele me Siohwa pahn ketikihong ih kehl me e anahne pwehn dadaur pahn kahpwalo me e mi loale oh pil kahpwal koaros me pahn pwarada. E uhdahn kamehlele met kahrehda e ntingihedi: “Kaun-o pahn kapitiehsang nan soangen suwed koaros.” (2 Tim. 4:18) Pohl sukuhlkihdi me pil nan kahpwal kan me rie Kristian kan sohte kak sewese ih, e kak ahnsou koaros likih me Siohwa oh Sises pahn ketin sewese ih. E sohte peikasalki met.

4, 5. (a) Ihs me kak ahnsou koaros kihong uhk sawas me ke anahne? (b) Ia duwen omw kak kakehlakahda omw nanpwungmwahu rehn Siohwa?

⁴ Mie pak ke lelohng kahpwal laud ehu oh pehm me ke kelehpw oh sohte me kak sewese iuk? Mwein sohla omw doadoahk de ke ale kasongosong sang sukuhl. Mwein ke uhdahn soumwahu de pil ahneki kahpwal laud tohrohr ehu. Ke ele peki sawas sang meteikan ahpw nsensuwedla pwehki re sohte kihong uhk sawas me ke anahne. Mehlel, aramas sohte kak kamwahwihala ekei kahpwal kan. Eri dahme ke pahn wia? Paipel mahsanih me kitail en “likih KAUN-O.” (Lep. Pad. 3:5, 6) Ahpw ke kak kamehlele me e pahn ketin sewese iuk? Ei uhdahn! Kitail kak wadek karasepe tohto nan Paipel me uhdahn kamehlelehiong kitail me Siohwa uhdahn kin ketin sewese sapwellime aramas akan.

⁵ Dehr mwakarada ma meteikan sohte kihong uhk sawas me ke anahne. Ahpw, duwehte Pohl, kilangwohng kahpwalo nin duwen ahnsou mwahu ehu en likih Siohwa ni unsek. E pil wia ahnsou mwahu ehu en kilang sang pein omw mour ia duwen eh kin ketin apwalih iuk. Omw likih Siohwa oh omw nanpwungmwahu reh eri pahn uhdahn kehlailla.

6. Dahme kahrehda e kakete apwal en likih Siohwa ahnsou me kitail ahneki kahpwal laud ehu?

⁶ Ele mie omw kahpwal laud ehu me kin kansensuwedih iuk. Ke wiahier soahng koaros me ke kak ong omw irairo, oh ke kapakapkier sapwellimen Siohwa sawas. Ia duwe, ke kak pehm omw meleileidi pwehki ke likih me e pahn ketin sewese iuk? Ei, ke kak! (Wadek Melkahka 62:8; 1 Piter 5:7.) Ma ke men ahneki nanpwungmwahu rehn Siohwa, e kesempwal ken esehla likih ih. Ahpw e sohte kin ahnsou koaros mengei en wia met. Dahme kahrehda? Ehu kahrepe iei Siohwa ele sohte mwadangete sapengala omw kapakapo.​—Mel. 13:1, 2; 74:10; 89:46; 90:13; Apak. 1:2.

7. Dahme kahrehda Siohwa sohte kin ahnsou koaros ketin mwadangete sapengala atail kapakap kan?

⁷ Dahme kahrehda Siohwa sohte kin ahnsou koaros ketin mwadangete sapengala atail kapakap kan? Paipel mahsanih me Siohwa ketin duwehte pahpa men. (Mel. 103:13) Pahpa men sohte kin kihong nah serio soahng koaros me e kin peki de pil kihong ih ahnsowohte. Pahpa men ese me seri men kakete ahnsowohte men nainekihda mehkot a mwuhr sohla men naineki. Pahpa men pil ese dahme keieu mwahu ong nah serio, oh e ese ia duwen met eh kak kamwakid meteikan. E ese dahme serio anahne oh iahd me e kak alehdi. Ma pahpao mwadangete kihong serio soahng koaros e peki, pahpao pahn wiahla nein serio lidu. Siohwa, Samatail nanleng, kin ketin poakohng kitail. Nin duwen Sounkapikpatail me erpit, e ketin mwahngih dahme kitail anahne oh e kin ketin pilada iahd me keieu mwahu en ketikihong kitail dahme kitail peki. E mwahu kitail en awih oh kilang ia duwen  Siohwa eh kin ketin sapengala atail kapakap kan.​—Pil kilang Aiseia 29:16; 45:9.

8. Dahme Siohwa ketin inoukihda me pid duwen atail kak dadaur?

⁸ Pil tamataman me Siohwa kin ketin mwahngih dahme emenemen kitail kak de sohte kak powehdi. (Mel. 103:14) Eri e kin ketikihong kitail kehl me kitail anahne. E mehlel me ekei pak kitail ele pehm me kitail solahr kakohng atail kahpwalo. Ahpw Siohwa ketin inoukihda me ma kahpwalo nohn laudla ong kitail en dadaur, e pahn ketikihong kitail kehl. (Wadek 1 Korint 10:13.) E kin kansenamwahu en ese me kitail kak likih me Siohwa kin ketin mwahngih uwen me kitail kak dadaur.

9. Dahme kitail anahne wia ma kitail kapakapki sawas sang rehn Siohwa ahpw e sohte ketin mwadangete sapengala?

⁹ Ma kitail kapakapki sawas sang rehn Siohwa ahpw e sohte ketin mwadangete sapengala, kitail en kanengamah. Tamataman me Siohwa kupwurki sewese kitail, ahpw e kin ketin kanengamah oh awih lao ahnsou me keieu mwahu en ketikihong kitail dahme kitail anahne. Paipel mahsanih: “KAUN-O ketin kaunopada en kupwurmahk oh kalahngan ong kumwail, pwehki eh kin ketin wia me pwung ahnsou koaros. Meid pai irail kan me kin likih KAUN-O.”​—Ais. 30:18.

10-12. (a) Dahme kakete kahpwalihala atail apwalih emen me soumwahu nan atail peneinei? (b) Ni omw likih Siohwa nan ahnsou apwal kan, ia duwen met eh kak kamwakid omw nanpwungmwahu reh? Menlau kihda ehu karasaras.

¹⁰ Mwein omw irairo uhdahn apwal kahrehda ken ahneki pepehm duwehte Pohl oh anahne pitsang “ewen laion.” Erein soangen ahnsou pwukat, e uhdahn kesempwal ken likih Siohwa. Karasepe, mwein ke apwalih emen nan omw peneinei me soumwahu. Ke kapakapohng Siohwa en ketin sewese iuk en wiahda pilipil mwahu kan oh en kehlail. * Met ke kak pehm meleilei ni omw tamanda me Siohwa kin ketin mwahngih oh wehwehkin uhk oh omw irairo. E pahn ketin sewese iuk en dadaur oh lelepek ong ih.​—Mel. 32:8.

¹¹ Ele e sohte mwomwen me Siohwa kin ketin sewese iuk. Mwein toahkte kan sohte pwungkipene dahme anahne wiawi. De ke koapworopworki me kisehmw kan pahn kansenamwahwihiuk, ahpw irail mwomwen kahpwalihala omw kahpwalo. Likih Siohwa ahnsou koaros pwehn ketikihong uhk kehl. Doulahte karanihala ih. (Wadek 1 Samuel 30:3, 6.) Mwuhr, ni omw esehda ia duwen Siohwa eh ketin sewesehda iuk, omw nanpwungmwahu reh pahn kehlailla.

¹² Linda ahneki soangen pepehmohte. * Ahnsou reirei e kin apwahpwalih eh pahpa nohno mwohn ara mehla. E nda: “Erein kahpwalo, ngehi, ei pwoudo oh pil riei pwutako kalapw sehse dahme se pahn wia. Ekei pak se sehse ia duwen at kak apwalihala irairo. Ahpw ni at kin tamanda ahnsou pwuko, se kak kilang ni sansal duwen Siohwa eh ketin ieiang kiht. E ketin kakehlahda kiht oh ketikihong kiht dahme se anahne, mehnda ma e mwomwen solahr mehkot me se kak wia.”

13. Ia duwen ahn Rhonda likih Siohwa eh sewese en dadaurete pahn ehuehu kahpwal?

¹³ Atail kin likih Siohwa ni unsek pahn pil sewese kitail en dadaurete pahn kahpwal kan. Iei met me wiawihong Rhonda. Eh pwoudo, me kaidehn Sounkadehdehn Siohwa men, pahn mweisang ih. Erein ahnsowo, rie pwutako diarada me e ahneki soumwahu laud ehu  me adaneki lupus. Oh sounpwong kei mwuri, ahn rie pwutako eh pwoudo mehla. Ahnsou me Rhonda tepida mwahuda sang soahng kansensuwed pwukat, e tepida wia doadoahk en pioneer. Ahpw mwuhr, eh nohno mehla. Ia duwen Rhonda eh kak dadaurete pahn kahpwal pwukat? E nda: “I kin kapakapohng Siohwa rahn koaros, mehnda ma pil pid pilipil tikitik kan. Ei wia met kin kamehlelehiong ie me Siohwa uhdahn ketin mie. Met kin sewese ie en koapworopworki ih ahpw kaidehn pein ngehi de pil meteikan. Oh sawas me e kin ketikihong ie uhdahn mehlel, e ketin apwalihala ei anahn kan koaros. Imwilahn met, I kin pehm me ngehi oh Siohwa kin ehupene doadoahk.”

14. Ia duwen Siohwa eh kak ketin sewese iuk ma emen nan omw peneinei piskenla?

¹⁴ Medewehla pil ehu kahpwal tohrohr. Medewehla me emen nan omw peneinei piskenla. Ke ese dahme Paipel mahsanihki duwen irail kan me piskenla. (1 Kor. 5:11; 2 Sohn 10) Ahpw pwehki ke poakepoake aramaso, ke ele pehm me e uhdahn apwal de ke pil sohte kak peikiong dahme Paipel kaweidki. * Ke pahn likih me Samatail nanleng pahn ketikihong uhk kehl en peikiong ih ni lelepek? Ke pahn medewehiong irair wet nin duwen ahnsou mwahu ehu en karanihala Siohwa?

15. Dahme kahrehda Adam sohte peikiong Siohwa?

¹⁵ Ia duwen met eh pahrekiong irair en tepin ohlo, Adam? Ia duwe, Adam kamehlele me e kak sapeikiong Siohwa oh wie momourte? Soh, Adam sohte “lohdiong widing.” (1 Tim. 2:14) Eri dahme kahrehda e sohte peikiong Siohwa? Adam tungoale wahntuhkeo me  eh pwoudo kihong ih pwehki e poakepoake eh pwoudo laudsang eh poakohng Siohwa. E rongala eh pwoudo ahpw kaidehn sapwellimen Siohwa kehkehlik.​—Sen. 3:6, 17.

16. Ihs me kitail pahn keieu poakohng, oh dahme kahrehda?

¹⁶ Dahme Adam piladao kin padahkihong kitail me kitail anahne poakohng Siohwa laudsang atail poakohng meteikan. (Wadek Madiu 22:37, 38.) Oh ni atail poakohng Siohwa kin uhdahn kehlail duwehte met, kitail kak sewese kisehtail kan ni ahl me keieu mwahu, mehnda ma re kin papah Siohwa de soh. Eri doulahte kakehlaka omw limpoak ong Siohwa oh omw likih ih. Ma ke pwunodki emen nan omw peneinei me piskenla, kapakapohng Siohwa oh patohwanohng ih omw pepehm koaros. * (Rom 12:12; Pil. 4:6, 7) Mehnda ma ke uhdahn nsensuwed, medewehiong irair wet nin duwen ahnsou mwahu ehu en kakehlailihala omw nanpwungmwahu rehn Siohwa en laudsang mahs. Eri ke pahn kak likih ih oh ese me omw peikiong ih pahn kahrehda imwila me keieu mwahu.

17. Ma kitail doulahte soupisengki doadoahk en kalohk, dahme kitail kak likih me Siohwa pahn ketin wia?

¹⁷ Dahme kahrehda Siohwa ketin kapitala Pohl sang ‘ewen laiono’? Pohl nda me pwehki en “kak kalohkiseli mahseno unsek.” (2 Tim. 4:17) Siohwa pil ketikihong kitail doadoahk en kalohki “Rongamwahwo,” oh kin ketin kahdanekin kitail ‘tohndoadoahk kei me kin iang ih ketin wiewia sapwellime doadoahk.’ (1 Des. 2:4; 1 Kor. 3:9) Ma kitail doulahte soupisengki doadoahk wet ni uwen atail kak, kitail kak likih me Siohwa pahn ketikihong kitail soahng koaros me kitail anahne. (Mad. 6:33) Oh e pahn mengeila ong kitail en awih Siohwa en ketin sapengala atail kapakap kan.

18. Ia duwen omw kak kakairada omw likih Siohwa oh kakehlailihala omw nanpwungmwahu reh?

¹⁸ Eri doadoahngki rahn koaros en kakehlailihala omw nanpwungmwahu rehn Siohwa. Ni kahpwal ehu eh pwarada oh ke pwunodikihda, doadoahngki met en wia ahnsou mwahu ehu en karanihala Siohwa. Wadek, onopki, oh doudouloale Mahsen en Koht, Paipel. Doulahte kapakapohng Siohwa oh doulahte soupisengki omw kin papah ih. Ma ke wia mepwukat, ke kak likih me Siohwa pahn ketin sewese iuk ken dadaurete pahn omw kahpwal koaros ahnsou wet oh pil ahnsou kohkohdo.