1. Dahme kahrehda kitail anahne kolokol atail nanpwungmwahu rehn Siohwa en kehlail?

 MA KOWE emen Sounkadehdehn Siohwa me papidaislahr, ke ahneki mehkot me uhdahn kesempwal. Ke ahneki nanpwungmwahu rehn Siohwa. Ahpw omw nanpwungmwahu wet kak lelohng kasongosong sang ahn Sehdan sampah oh pil kak luwetala pwehki pein omw soh unsek kan. Ihme kahrehda kitail koaros anahne wia uwen atail kak pwehn kolokol atail nanpwungmwahu rehn Siohwa en kehlail.

2. (a) Ia wehwehn en ahneki nanpwungmwahu rehn emen? (Menlau kilang nting tikitik kan me kileldi.) (b) Ia duwen atail kak kakehlakahla atail nanpwungmwahu rehn Siohwa?

² Ia duwe, ke wiahkin Siohwa emen me uhdahn ketin mie? Ke pehm me e ketin wia Kompoakpahmw men? Ke men omw nanpwungmwahu reh en pil kehlailla? Seims 4:8 padahkihong uhk dahme ke anahne wia: “Kumwail keido mpen Koht, oh e pahn ketin keiong mpamwail.” Omw nanpwungmwahu rehn Siohwa kin pid  nanpwungamwa koaros. * Ma ke wia kahk kan pwehn karanihala Siohwa, e pahn ketin wia duwehte. Ni omw kalaudehla omw wia met, e pahn laudla omw wiahkin ih emen me uhdahn ketin mie, oh omw nanpwungmwahu reh pahn uhdahn keren me ke pahn ahneki soangen pepehmo me Sises sapwellimaniki ni eh mahsanih: “Ih me ketin kadariehdo, iei ih me mehlel” oh “I ese” ih. (Sohn 7:28, 29) Ahpw, ia ekei soahng kan me ke kak wia pwe ken karanihala Siohwa?

3. Ia duwen atail kak patohwan koasoakoasoiong Siohwa?

³ Ma ke men karanihala Siohwa, e uhdahn kesempwal kumwa en kaukaule koasoakoasoipene. Ahpw ia duwen met eh kak wiawi? Nna medewehla ia duwen kowe oh kompoakepahmw men me kousoan wasa doh ele pahn koasoakoasoipene. Kumwa kak kalapw ntingpene oh koasoipene nan delepwohn . Ke kin patohwan koasoiong Siohwa ni omw kin kaukaule kapakap ong ih. (Wadek Melkahka 142:2.) Ahpw, ia duwen omw kak mweidohng Siohwa en mahsen ong uhk? Ke kin wia met sang ni omw kin kaukaule wadek sapwellime Mahsen, Paipel, oh doudouloale. (Wadek Aiseia 30:20, 21.) Kitail kilang ia duwen koasoakoasoipene wet nanpwungen kowe oh Siohwa eh kak kakehlakahda omw nanpwungmwahu reh oh wiahkihla ih uhdahn Kompoakepahmw men.

4, 5. Ia duwen Siohwa eh kin ketin mahmahsen ong uhk ni omw onopki Paipel? Menlau kihda ehu karasepe.

⁴ Kitail ese me Paipel iei sapwellimen Koht mahsen ong koaros. Ahpw ia duwe, Paipel kak sewese iuk en karanihala Siohwa? Ei! Ni omw kin kaukaule wadek oh onopki Paipel, tehk kanahieng ia omw pepehm ong dahme ke wadwadeko. Oh medewe ia duwen omw kak doadoahngki dahme ke sukuhlkihdi. Ni omw wia met, ke kin mweidohng Siohwa en ketin mahmahsen ong uhk. E pahn ketin wiahla Kompoakepahmw keren men me kin seweseiuk, oh ke pahn karanihala ih.​—Ipru 4:12; Seims 1:23-25.

⁵ Karasepe, ia omw pepehm ni omw wadek sapwellimen Sises mahsen: “Kumwail dehr kin ngoangki kepwehpwehkihla kepwehn sampah”? Ma ke kin wia uwen omw kak en mwohneki Siohwa nan omw mour, ke pahn pehm me e ketin kupwurperenkin uhk. Ahpw ele ke pahn wadek sapwellimen Sises mahsen ko oh esehda me ke anahne kihsang soahng kan me sohte nohn kesempwal nan omw mour oh kalaudehla  omw kilangwohngete en papah Koht. Ma iei, eri Siohwa kin ketin sewesewese iuk en wehwehki dahme ke kak wia pwe ken karanihala ih.​—Mad. 6:19, 20.

6, 7. (a) Ni atail kin onopki Paipel, dahme kin wiawihong atail limpoak ong Siohwa oh sapwellime limpoak ong kitail? (b) Ia atail mehn akadei me keieu laud ni atail onopki Paipel?

⁶ E mehlel me ni atail kin onopki Paipel, kitail sukuhlki duwen wekidekla kan me kitail kak wiahda pwehn kamwahwihala atail papah Siohwa. Ahpw kitail pil sukuhlkihdi duwen soahng kan me e ketin wiahda ni limpoak oh sapwellime irair kaselel, me kahrehda atail limpoak ong ih en laudla. Oh ni atail limpoak ong ih kin laudla, sapwellime limpoak ong kitail pil kin laudla, oh atail nanpwungmwahu reh kin pil kehlailla.​—Wadek 1 Korint 8:3.

⁷ Ma kitail men karanihala Siohwa, e kesempwal me kahrepen atail onopki Paipel kin pwung. Sises mahsanih: “Iet mour: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.” (Sohn 17:3) Kitail kak sukuhlki soahng kapw tohto oh soahng teikan ni atail wadek Paipel, ahpw atail mehn akadei me keieu laud iei en esehla mwahu Siohwa nin duwen Emen me uhdahn ketin mie.​—Wadek Eksodus 33:13; Mel. 25:4.

8. (a) Dahme ekei ele medewehki duwen dahme Siohwa ketin wiahiong Nanmwarki Asaraia? (b) Ma ke esehla Siohwa, ia pahn omw pepehm ong dahme e ketin wia?

⁸ Ni atail esehla Siohwa nin duwen Kompoakepatail keren men, kitail sohte pahn pwunodki ma Paipel sohte kawehwehda kahrepen sapwellime wiewia kan. Karasepe, ni ahnsou me Asaraia wia nanmwarkien Suda, aramas ako kin kaudokiong koht likamw akan. Asaraia sohte kin iang irail. E “wia dahme KAUN-O kin ketin kupwurperenki.” (2 Nan. 15:1-5) Ahpw Siohwa ketin kalokehki Asaraia soumwahu en tokutok. Dahme kahrehda? Paipel sohte kasalehda. Eri ia omw pepehm ong dahme Siohwa ketin wia? Ia duwe, e kapwunode iuk oh kahrehiong uhk en pehm me sapwellimen Siohwa wiewia sohte pahrek, me e ketin kaloke Asaraia ni soh kahrepe? Soh. Ma ke uhdahn esehla Siohwa, ke ese me sapwellime kaiahn kin ahnsou koaros pwung. E kin ahnsou koaros ketin kaiahn “ni pwung.” (Ser. 30:11) Eri, mehnda ma ke ele sohte ese kahrepen Siohwa eh ketin kaloke Asaraia, ke kak kamehlele me Siohwa ketin wia dahme pwung.

9. Ire dah kan me sewese kitail en wehwehki dahme kahrehda Siohwa ketin kalokehki Asaraia soumwahu en tokutok?

⁹ Paipel kalaudehla oaritik kan me pid duwen mour en Nanmwarki Asaraia, me pil adaneki Nanmwarki Usaia. (2 Nan. 15:7, 32) Poadopoado nan 2 Kronikel 26:3-5, 16-21 mahsanih me Usaia kin wia “dahme kaparanda kupwur en KAUN-O.” Ahpw Paipel pil mahsanih me mwuhr “e ahpw aklapalapala, oh met kahrehiong eh pwupwudi.” Nanmwarkio song en wia mehkot me samworo kante mweimweiong en wia. Samworo meh weliakan emen ndaiong ih me e sapwung oh song en kauhdi ih. Ia duwen Usaia eh mwekidki met? E uhdahn aklapalapala me kahrehda en lingeringerda pahrail! Ire pwukat sewese kitail en wehwehki dahme kahrehda Siohwa ketin kalokehki Nanmwarkio soumwahu en tokutok.

10. Dahme kahrehda kitail sohte anahne ahnsou koaros ese kahrepen sapwellimen Siohwa wiewia kan? Ia duwen atail kak kalaudehla atail likih me Siohwa kin ahnsou koaros ketin wia dahme pwung?

¹⁰ Mehn kasukuhl kesempwal dahieu me kitail sukuhlkihdi? Nan poadopoad en Nanmwarki Asaraia, mie ire kan me itar en sewese kitail en wehwehki dahme kahrehda Siohwa ketin kaloke ih. Ahpw ni Paipel eh sohte kihda ire kan koaros, dahme ke pahn wia? Ke pahn medewe ma Siohwa uhdahn ketin wia dahme pwung? De ke pahn medewe me Paipel kin kihda ire kan me itarohng uhk en likih me Koht kin  ahnsou koaros ketin wia dahme pwung? (Deud. 32:4) Ni omw kalaudehla omw esehla Siohwa nin duwen emen me ketin mie, omw poakohng oh likih ih pahn pil laudla. Eri ke sohte pahn anahne ese kahrepen soahng koaros me e kin ketin wia. Ni omw onopki Paipel, ke pahn kamehlele me Siohwa uhdahn ketin mie oh ke pahn karanihala ih.​—Mel. 77:12, 13.

11-13. Ia duwen omw ese me Siohwa kin ketin karonge kapakap kan? (Menlau kilang tepin kilel.)

¹¹ Ahnsou me kitail kin kapakap, kitail kin karanihala Siohwa. Kitail kin kapinga ih, kapingkalahngan ong ih, oh peki sawas sang reh. (Mel. 32:8) Ahpw ma ke men ahneki nanpwungmwahu keren rehn Siohwa, ke anahne uhdahn kamehlele me e kin ketin karonge kapakap kan.

¹² Ekei aramas kin nda me Koht sohte kin ketin karonge kapakap kan oh me kapakap kin wiahte mehkot me kin kansenamwahwihiukala. Re kamehlele me kapakap kan kin ihte seweseiuk en medewe kanahieng omw kahpwal kan oh en diarada pein omw pasapeng. E mehlel me kapakap ele kin seweseiuk ni soangen ahl pwukat. Ahpw ni ahnsou me ke patohwan koasoiong Siohwa nan kapakap, e uhdahn kin ketin karonge iuk. Ia duwen omw kak kamehlele met?

¹³ Medewehla met: Mwohn Sises eh patohdo sampah, e patohwan ese me Siohwa kin ketin sapengala kapakap en sapwellime aramas akan. Ni eh mihmi sampah, Sises kin patohwan kapakap ong Semeo me ketiket nanleng duwen eh madamadau oh pepehm kan. Ehu pak, e pil ketin kapakap erein pwohng ehu pwon. (Luk 6:12; 22:40-46) Ia duwe, Sises pahn wia met ma e patohwan ese me Siohwa sohte kin uhdahn ketin rongorong? Sises pil ketin padahkihong sapwellime tohnpadahk ko ia duwen arail pahn kin kapakap ong Siohwa. Ia duwe, e pahn wia met ma e ese me Siohwa sohte kin ketin karonge kapakap kan? E sansal me Sises ese me Siohwa uhdahn kin ketin karonge kapakap kan. Ehu pak, Sises mahsanih: “Semei, kalahngan en komwi pwehki omwi ketin karongeier. I ese me komwi kin ketin karonge ie ahnsou koaros.” Kitail pil kak uhdahn kamehlele me Siohwa kin ketin karonge atail kapakap kan.​—Sohn 11:41, 42; Mel. 65:2.

14, 15. (a) Ia duwen atail kin paiekihda ni atail kapakapki soahng kan ni oaritik? (b) Ia duwen ahn Kathy kapakap ko ar sewese ih en karanihala Siohwa?

 ¹⁴ Pasapengpen omw kapakap kan ele kaidehn ahnsou koaros kin sansal. Ahpw ma ke kapakapki soahng kan ni oaritik, ke pahn kak kilang ni sansal sapwellimen Siohwa pasapengo, oh ke pahn kamehlele me e uhdahn ketin mie. Ma ke kin kasalehiong Siohwa soahng koaros me kin kapwunode iuk, e pahn ketin karanihala iuk.

¹⁵ Karasepe, Kathy kin kalapw kohla kalohk, ahpw e sohte perenki. * E nda: “I sohte mwahuki kalohk, I uhdahn sohte mwahuki.” Ni ahnsou me e kommoal sang eh doadoahko, emen elder kangoange ih en wiahla pioneer men. Kathy nda: “E pil kihong ie nei doaropwe I en audehda. I eri pilada en iang pioneer, ahpw I pil tepida kapakap ong Siohwa rahn koaros en ketin kahrehiong ie en perenki kalohk.” Ia duwe, Siohwa ketin sapengala eh kapakap ko? Mwurin eh pioneerki sounpar siluh, met e nda: “Sang ni ei kin kihong ahnsou laud nan kalohk oh sukuhl sang sister teikan, I kin ekisekis kamwahwihala ei koahiek en kalohk. Rahnwet, I sohte ihte mwahuki kalohk, I uhdahn perenki. Laudsang met, ei nanpwungmwahu rehn Siohwa uhdahn kerenla sang mahs.” Ahn Kathy kapakap ko uhdahn sewese ih en karanihala Siohwa.

16, 17. (a) Dahme kitail anahne wia pwehn doulahte kakehlakahda atail nanpwungmwahu rehn Siohwa? (b) Dahme kitail pahn koasoiapene nan iren onop en mwuhr?

¹⁶ Kitail kak doulahte karanihala Siohwa kohkohlahte. Eri kitail en kin rongorong ih sang ni atail kaukaule onop Paipel oh doulahte patohwan koasoiong ih sang atail kapakap. Ma kitail wia met, atail nanpwungmwahu rehn Siohwa pahn wie kekehlailla, oh pwehki sapwellime sawas, kitail pahn kak dadaur pahn kahpwal kan.

¹⁷ Ahpw ekei pak kitail kin apwalki pein atail kahpwal kan, mehnda ma kitail kin pousehlahte kapakap ong Siohwa. Ni soangen ahnsou pwuko, kitail kak tepida sohla likih Siohwa. Kitail ele pehm me Siohwa sohte kin ketin karonge atail kapakap kan oh ele medewe ma kitail uhdahn wia kompoakepah. Ma ke tepida ahneki soangen pepehm wet, dahme ke kak wia? Iren onop en mwuhr pahn seweseiuk.