1, 2. Ia duwen Siohwa eh ketin padahkihong kitail en poakohng ih?

 AHL me keieu mwahu pahpa men kak padahki nah seri kan iei sang ni pein eh mehn kahlemeng. Ni eh kin kasalehda limpoak ong nah seri kan, e kin padahkihong irail ia duwen arail en kasalehda limpoak. Sohte emen me poakohng kitail duwehte Samatail, Siohwa. Eri kitail kin sukuhlki ia duwen atail pahn kasalehda limpoak “pwehki Koht eh tepin limpoak ong kitail.”​—1 Sohn 4:19.

² Ni ahl dah me Siohwa ketin kasalehda me e “tepin limpoak ong kitail”? Paipel mahsanih: “Ni ahnsou me kitail mihmi nan dihp, Krais ketin pwoukinkitailla!” (Rom 5:8) Samatail limpoak, Siohwa, ketikihda sapwellime Ohl nin duwen meirong ehu pwehn kapitkitailsang dihp oh mehla. Kisakis kesempwal wet kahrehiong kitail en kak karanihala Siohwa oh kasalehda atail limpoak ong ih. Sang ni eh ketin wiahda tounmetei laud wet, Siohwa ketikihda mehn kahlemeng ehu. E ketin padahkihong kitail me kitail en kasalehda limpoak sang ni atail kadek oh sohte roporop.​—1 Sohn 4:10.

3, 4. Ia duwen atail kak kasalehda me kitail poakohng Koht?

³ Limpoak iei sapwellimen Siohwa irair kaselel me keieu kesempwal. Eri kitail kak wehwehki dahme kahrehda Sises mahsanih me  kosonned me keieu kesempwal iei: “Ke uhdahn pahn poakohng Kaun-o, amwail Koht, nan kapehdomw unsek, [“omw mour,” NW] unsek, omw lamalam koaros unsek, oh omw kehl unsek.” (Mark 12:30) Siohwa ketin kupwurki kitail en poakohng ih sang nan ‘kapehditail unsek.’ Siohwa pahn ketin kupwursuwedkihla ma kitail poakohng emen de mehkot tohrohr laudsang atail poakohng ih. Atail limpoak ong ih en laudsang ihte pepehm ehu. Siohwa pil ketin kasik kitail en poakohng ih sang atail “lamalam koaros unsek” oh pil atail “kehl unsek.” Met wehwehki me atail limpoak ong Siohwa kin pidada mwomwen atail lamalam oh dahme kitail kin wia.​—Wadek Maika 6:8.

⁴ Ia duwen atail kak kasalehda me kitail uhdahn poakohng Samatail nanleng? Sang ni atail kin keieu mwohneki ih nan atail mour. Nan iren onop en mwoweo, kitail koasoiapene ahl pahieu me Siohwa kin ketin kasalehda sapwellime limpoak laud ong sapwellime kan. Met kitail pahn kilang ia duwen atail kak kalaudehla oh pil kasalehda atail limpoak ong Siohwa.

5. Ni atail medewehla soahng koaros me Siohwa ketin wiadahr ong kitail, dahme kitail men wia?

⁵ Ni emen eh kihong uhk kisakis ehu, uhdahn ke pahn kasalehda me ke kalahnganki. Oh pwehki ke kalahnganki kisakiso, ke kin pil doadoahngki. Seims ntingihedi: “Soangen wiawi sapan koaros oh kisakis mwahu koaros kin kohdihdo sang nanleng; re kin kohdihdo sang rehn Koht, Sounwiepen marain koaros en nanleng kan. Koht sohte kin ketin wekila, oh sohte kisin mwomwen wekila kis kak mie reh.” (Seims 1:17) Kitail uhdahn kalahnganki me Siohwa kin ketikihong kitail soahng koaros me kitail anahne pwehn mour oh peren. Kitail kin esehda uwen laud en eh ketin poakohng kitail, oh kitail men kasalehiong ih me kitail pil kin poakohng ih. Ke ahneki soangen pepehm wet?

6. Dahme mehn Israel kan anahne wia ma re men Siohwa en ketin pousehlahte kapaiahda irail?

⁶ Mehn Israel kan alehdi kisakis tohto sang rehn Siohwa. Sounpar epwiki kei, e kin ketin kaweidkin irail sapwellime kosonned kan oh ketikihong irail soahng koaros me re anahne pwehn mour. (Deud. 4:7, 8) Mehn Israel ko kak kasalehda arail kalahngan ong Siohwa sang ni arail peikiong kosonned pwukat. Karasepe, ni arail wiahda meirong ong Siohwa, re anahne patohwandohng ih ‘wahnsahpw me irail pahn tepin dolung’ me keieu mwahu sang sapwarailo. (Eks. 23:19) Mehn Israel ko ese me Siohwa pahn ketin pousehlahte kapaiahda irail ma re peikiong ih oh patohwanohng ih me keieu mwahu.​—Wadek Deuderonomi 8:7-11.

7. Ia duwen atail kak doadoahngki “me keieu mwahu” rehtail pwehn kasalehiong Siohwa me kitail poakohng ih?

⁷ Kitail pil kak kasalehiong Siohwa me kitail poakohng ih sang atail patohwanohng “me keieu mwahu” rehtail. (Lep. Pad. 3:9) Kitail wia met sang ni atail kin doadoahngki dahme kitail ahneki pwehn kawauwih Siohwa. Karasepe, kitail kak toukihda sawas en mwohni pwehn utung doadoahk en Wehio nan atail mwomwohdiso oh nan sampah pwon. Mehnda ma kitail ahneki soahng tohto de malaulau, kitail koaros kak doadoahngki dahme kitail ahneki pwehn kasalehda atail limpoak ong Siohwa. (2 Kor. 8:12) Ahpw pil mie ahl teikan me kitail kak kasalehiong Siohwa me kitail poakohng ih.

8, 9. Ia pil ehu ahl me kitail kin kasalehiong Siohwa me kitail poakohng ih? Dahme Mike oh eh peneineio wia?

⁸ Sises ketin padahkihong kitail en pousehlahte rapahki mahs Wehio oh en dehr pwunodki dahme kitail en tungoale oh likawih.  Samatail nanleng ketin inoukihda en ketikihong kitail dahme kitail anahne. (Mad. 6:31-33) Kitail kin likih Siohwa oh ese me e pahn ketin kapwaiada inou wet. Ni omw kin uhdahn poakohng emen, ke kin likih ih. Ni mehlel, ni atail likih Siohwa eh kin laudla, atail kasalehiong ih me kitail poakohng ih pil kin laudla. (Mel. 143:8) Ele kitail kak idek rehtail: ‘Ia duwe, ei pilahn kan oh mwomwen ei kin doadoahngki ei ahnsou oh kehl kasalehda me I uhdahn poakohng Siohwa? I kin koapworopworki Siohwa en ketin apwalihala ei anahn kan rahn koaros?’

⁹ Mike oh eh peneineio kin likih Siohwa. Ni ahnsou me Mike pwulopwul, e kin men kohla kalohk nan ehu sahpw tohrohr. Pil mwurin eh pwopwoudida oh naineki seri riemen, e pil men wiahte met. Ni Mike oh eh peneineio ar wadek duwen riatail Kristian kan me kohla iang papah nan wasa me anahn laud mie, re pilada en kihsang soahng kan me sohte nohn kesempwal nan arail mour. Re netikihla imwarailo oh kosoula nan ehu ihmw me tikitiksang. Mike pil katikala eh pesines en kamwakelo oh diarada ia duwen eh pahn katanga pesineso ma e mi nan ehu sahpw tohrohr ni eh doadoahngki Internet. Pwehki met, Mike oh eh peneineio kak kosoula ehu sahpw tohrohr, oh re uhdahn perenki arail doadoahk en kalohk wasao. Mike nda: “Se pehm mehlelpen sapwellimen Sises mahsen ko me kileldi nan Madiu 6:33.”

10. Duwehte Nanmwarki Depit, dahme kahrehda e mwahu ong kitail en doudouloale dahme kitail sukuhlki duwen Siohwa?

¹⁰ Nanmwarki Depit ntingihedi: “Ia uwen sansal en pahnlahng eh kasalehda sapwellimen Koht lingan! Ia uwen eh kasalehda mwahu mehkan me eh ketin wiahda!” E pil nda: “Kosonned en KAUN-O me unsek mehlel; e kin pwurehng kakehlahda aramas. Mahsen en KAUN-O me likilik, e kin kaloalokongihala me soaloalokong kan.” Ni Depit eh doudouloale sapwellimen Siohwa kosonned erpit kan oh kapikipik kaselel kan, e kin karanihala Siohwa oh men kasalehiong eh limpoak. Depit patohwan: “Maing KAUN, komwi me silepei oh sounkomourpei, komw ketin kupwurehla ei pato oh ei lamalam!”​—Mel. 19:1, 7, 14.

11. Ia duwen atail kak doadoahngki loalokong me Siohwa ketikihong kitail pwehn kasalehda atail limpoak ong ih? (Menlau kilang tepin kilel.)

¹¹ Rahnwet, Siohwa kin ketin padahkihong kitail soahng tohto duwen ih, dahme e ketin kupwurki, sapwellime kapikipik oh sapwellime Mahsen. Sampah wet kin kangoange aramas en ale kasukuhl, ahpw sukuhl laud kin kalapw kahrehiong irail en sohla poakohng Koht. Weksang met, Siohwa sohte ihte ketin kupwurki kitail en esehla soahng kan, ahpw e kin ketin sewese kitail en ahneki erpit. E ketin kupwurki kitail en doadoahngki dahme kitail sukuhlki ong pein kamwahupatail oh pwehn sewese meteikan. (Lep. Pad. 4:5-7) Karasepe, e ketin kupwurki kitail en ehukihong meteikan ‘me mehlelo’ oh sewese irail en mourla. (1 Tim. 2:4) Kitail kin kasalehda atail limpoak ong Siohwa oh aramas akan sang atail padahkihong koaros duwen Wehin Koht oh dahme wehi wet pahn wiahiong tohnsampah.​—Wadek Melkahka 66:16, 17.

12. Dahme emen sister pwulopwul ndahki duwen kisakis ehu me Siohwa ketikihda?

¹² Me pwulopwul kan pil kak doudouloale soahng koaros me Siohwa ketikihong oh padahkihong irail. Shannon tamatamante ia eh pepehm ni ahnsou me e sounpar 11 oh rie serepeino sounpar 10 ni ara iang mihting tohrohr ehu me oaralape koasoia “Poadidi ong Koht.”  Erein ehu prokram en mihting tohrohro, brother ko padahkihong me pwulopwul kan koaros, iangahki Shannon oh rie serepeino, ren kohla mwohndi ehu wasa tohrohr. Ni tapio, Shannon saloh. Ahpw mwuhr e pwuriamweikihla ni ahnsou me emenemen me pwulopwul kan alehdi neirail pwuhk en Questions Young People Ask—Answers That Work (lokaiahn wai). Ia duwen kisakis kaselel wet eh kamwakid eh pepehm ong Siohwa? E nda: “Ih ahnsowo me I esehda me Siohwa uhdahn ketin mie oh uhdahn ketin poakohng ie. Ia uwen atail perenki me atail Koht lapalap, Siohwa, kin ketikihda ni sapan soangen kisakis kaselel unsek pwukat ong kitail!”

13, 14. Ia pahn mwomwen atail mwekidki ni Siohwa eh ketin kaweid kitail oh dahme kahrehda?

¹³ Paipel katamankihong kitail: “KAUN-O kin ketin kapwungala irail kan me e kin ketin loalloale, duwehte sahm emen eh kin kapwungala nah pwutak me e kin suweiki.” (Lep. Pad. 3:12) Ni atail kin peikiong sapwellimen Siohwa peneu oh mweidohng en ketin kaiahne kitail, kitail kin sukuhlki en wia dahme mwahu oh ahneki meleilei. Mehlel me “kalokolok koaros likamwete kin kahrehiong kitail nsensuwed, kaidehk peren.” (Ipru 12:11) Ahpw, ia duwen atail pahn mwekidki ni Siohwa eh kin ketin panawih kitail? Kitail en dehr pohnsehsehla sapwellimen Siohwa kaweid de kadakadaur atail nsensuwed ma kitail sohte perenki dahme kitail rong. Kitail poakohng Siohwa, kahrehda kitail en rong ih oh wiahda wekidekla kan me anahn.

¹⁴ Ni mwehin Malakai, mehn Suhs tohto sohte rong Siohwa. Re sohte nsenohki me meirong ko me re wiahda sohte kin kaperenda kupwure. Siohwa eri ketikihong irail kaweid kehlail me pid duwen met. (Wadek Malakai 1:12, 13.) Ni mehlel, pak tohto Siohwa kin ketikihong irail kaweid, ahpw re sohte kin rong. Ih eri mahsanihong irail: “I pahn kerieikumwailla. I pahn ketikihong riah ieu pohn soahng kan me kumwail kin ale.” (Mal. 2:1, 2) E sansal me ma kitail pousehlahte pohnsehse sapwellimen Siohwa kaweid de pehm me kaweido sohte kesempwal, kitail sohla pahn kompoakepahnki ih.

15. Soangen madamadau dah kitail en soikala?

¹⁵ Ahn Sehdan sampah kin kangoange aramas akan ren pohnmwahso oh roporop. Me tohto sohte kin men aramas en kapwungala irail de ndaiong dahme ren wia. Ekei kin rong kaweid ihte pwehki re anahne. Kitail en dehr duwe irail. Paipel mahsanihong kitail en “dehr kahlemengih wiewia kan en sampah wet.” Ahpw, kitail anahne wehwehki dahme Siohwa ketin kasik sang kitail oh wia dahme kin kaperenda ih. (Rom 12:2) E kin ketin doadoahngki sapwellime pwihn en ketikihong kitail kaweid ni ahnsou me konehng. Karasepe, kitail kin ale mehn kataman duwen mwomwen  atail wiewia ong ohl de lih, duwen atail en pilada kompoakepatail kan, oh duwen atail pahn pilada mehn kamweit kan. Ni atail kin men peikiong sapwellimen Siohwa kaweid oh wiahda wekidekla kan pwehn kaperenda ih, kitail kin kasalehda me kitail kalahnganki sapwellime kaweid oh uhdahn poakohng ih.​—Sohn 14:31; Rom 6:17.

16, 17. (a) Dahme kahrehda kitail en esehda mahs ia sapwellimen Siohwa madamadau mwohn atail pahn wiahda pilipil kan? (b) Ia duwen mehn Israel ko ar kasalehda me re sohte poakohng oh likih Siohwa?

¹⁶ Seri tikitik kan kin koapworopworki me arail pahpa nohno en sewese irail oh pere irail. Irail me laud kan pil kin peki sawas sang rehn arail pahpa nohno kan. Re ese me mendahki re kak wiahda pein arail pilipil, arail pahpa nohno kak kihong irail kaweid mwahu. Samatail, Siohwa, ketin mweidohng kitail en wiahda pein atail pilipil kan. Ahpw pwehki kitail uhdahn likih oh poakohng ih, kitail kin ahnsou koaros peki sapwellime sawas oh wia uwen atail kak en esehda ia sapwellime madamadau mwohn atail pahn wiahda pilipil ehu. Ma kitail koapworopworki Siohwa, e pahn ketikihong kitail sapwellime manaman pwehn sewese kitail en wia dahme pwung.​—Pil. 2:13.

¹⁷ Ni mwehin Samuel, mehn Israel ko lohdi pahn mehn Pilisdia kan nan mahwen ehu. Re sohte idek rehn Siohwa dahme re pahn anahne wia mwuhr, ahpw re nda: “Nna, kitail wadohng met Kohpwahn Inowo sang Sailo, pwe KAUN-O en ketin ieiang kitail oh ketin kapitkitailsang atail imwintihti kan.” Ia imwilahn pilipil wet? “Mwomwlahn mehn Israel ko me inenen laud, pwe sounpeien Israel 30,000 me kamakamala. Eri, Kohpwahn Inoun KAUN-O pil lohdiong mehn Pilisdia ko.” (1 Sam. 4:2-4, 10, 11) Mehn Israel ko medewe me sang ni arail wahdahte Kohpwahn Inowo, Siohwa pahn ketin sewese oh pere irail. Re sohte peki rehn Siohwa sawas de song en esehda ia sapwellime madamadau. Ahpw, re wia dahme re leme me pwung oh re lelohng lokolok laud.​—Wadek Lepin Padahk 14:12.

18. Dahme Paipel padahkihong uhk duwen en koapworopworki Siohwa?

¹⁸ Emen sounmelkahka me uhdahn poakohng Siohwa oh likih ih ntingihedi: “I pahn koapworopworki Koht, oh I pahn pwurehng kapinga, ei sounkomour oh ei Koht. Mohngiongiet tihwolahr wasa me I kalipilipdohnget, I ahpw sohpeiong Koht.” (Mel. 42:5, 6) Ia duwe, ih met omw pepehm ong Siohwa? Ke pehm me ke kin karanih oh likih ih? Ele ke kak sukuhlki en kalaudehla omw koapworopworki ih. Paipel mahsanih: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese. Tamanda KAUN-O ni omw wiewia kan koaros, oh e pahn ketin kasalehiong uhk ahl me pwung.”​—Lep. Pad. 3:5, 6.

19. Ia duwen omw pahn kasalehiong Siohwa me ke poakohng ih?

¹⁹ Sang ni eh tepin poakohng kitail, Siohwa ketin padahkihong kitail duwen atail en poakohng ih. Kitail en ahnsou koaros medewehla uwen laud en dahme e ketin wiadahr ong kitail oh uwen laud en eh ketin poakohng kitail. Oh kitail en kasalehiong ih me kitail poakohng ih sang ni mohngiongitail, atail mour, atail lamalam, oh atail kehl unsek.​—Mark 12:30.