1. Dahme wahnpoaron Sohn kangoangehkin Kristian kan en medewe, oh dahme kahrehda?

 WAHNPOARON Sohn kangoange kitail en medewe mwahu duwen sapwellimen Siohwa limpoak laud ong kitail. 1 Sohn 3:1 mahsanih: “Kumwail kilang uwen limpoak en Sahmo ong kitail!” Ni atail doudouloale uwen laud en Siohwa eh ketin poakohng kitail oh ia duwen eh kin ketin kasalehda met, kitail kin karanihala ih oh atail poakohng ih kin laudla.

2. Dahme kahrehda e apwal ong ekei en wehwehki me Koht ketin poakohng irail?

² Ahpw ekei sohte wehwehki ia duwen Koht eh kak ketin poakohng irail. Re medewe me Koht sohte ketin nsenohkin aramas. Ele re kamehlele me Koht kin ihte ketin wiahda kosonned kan oh kaloke irail kan me sohte kin peikiong ih. Pwehki padahk likamw kan, ekei pil kin medewe me Koht ketin lemei oh me kitail sohte kak poakohng ih. Meteikan medewe me Koht kin ketin poakohng aramas koaros sohte lipilipil dahme re wia. Ahpw omw onopki Paipel sewesehier uhk ken esehla dahme mehlel duwen Siohwa. Ke ese me limpoak iei sapwellime irair kaselel me keieu laud oh me e ketikihda sapwellime Ohl nin duwen meirong ehu ong uhk. (Sohn 3:16; 1 Sohn 4:8) Ahpw, pwehki dahme wiawihong uhk nan mour, ele e pahn apwal ken wehwehki ia uwen Siohwa eh ketin poakohng uhk.

3. Dahme pahn sewese kitail en wehwehki sapwellimen Siohwa limpoak ong kitail?

 ³ Pwehn sewese kitail en wehwehki sapwellimen Siohwa limpoak ong kitail, keieu kitail anahne wehwehki me Siohwa me ketin kapikada kitail. E ketikihong kitail mour. (Wadek Melkahka 100:3-5.) Ihme kahrehda Paipel kahdaneki tepin aramaso “sapwellimen Koht.” (Luk 3:38) Oh Sises ketin padahkihong kitail en kamwarenki Siohwa “Samat me ketiket nanleng.” (Mad. 6:9) Eri Siohwa iei Samatail, oh e ketin poakohng kitail duwehte pahpa mwahu men eh kin poakohng nah seri kan.

4. (a) Ia duwen Siohwa eh ketin weksang pahpa teikan? (b) Dahme kitail pahn koasoiapene nan iren onop wet oh iren onop en mwuhr?

⁴ E kin apwal ong ekei en medewe me pahpa men kak wia aramas limpoak men. Ele re kin tamanda soahng kansensuwed kan ni arail tikitik pwehki arail pahpao kin lemeiong irail. Siohwa sohte pahn ketin wia met ong sapwellime kan. Ih me Samatail me keieu mwahu. (Mel. 27:10) E uhdahn ketin poakohng kitail oh e kin ketin apwalih kitail ni soangen ahl tohtohie. Ni atail kin pehm sapwellimen Siohwa limpoak ong kitail eh laudla, atail poakohng ih pil pahn laudla. (Seims 4:8) Nan iren onop wet, kitail pahn koasoiapene ahl pahieu me Siohwa kin ketin kasalehda sapwellime limpoak ong kitail. Oh nan iren onop en mwuhr, kitail pahn kilang ahl pahieu me kitail kak kasalehda atail limpoak ong ih.

5. Dahme Koht ketikihong aramas koaros?

⁵ Ni wahnpoaron Pohl eh mi Adens nan Krihs, e tehkada me mie dikedik tohto wasao oh me aramas akan kamehlele me arail koht kan kin kihong irail mour. Ih eri padahkihong irail duwen “Koht me ketin kapikada sampah oh audepe kan koaros.” E nda me Koht “ketikihong mour oh esingek oh soahng teikan ong aramas akan koaros” oh “kitail kin momourki ih, oh mwekimwekidki ih, oh pil mihmi pwehki ih.” (Wiewia 17:24, 25, 28) Siohwa kin ketikihong kitail mehkoaros me kitail anahne pwehn wie momour oh perenki atail mour. Medewehla ekei soahng kan me e ketikihongehr kitail pwehki e ketin poakohng kitail.

6. Soangen wasahn kousoan dahieu me Siohwa ketikihong kitail? (Menlau kilang tepin kilel.)

⁶ Karasepe, Siohwa ketin wiahda wasahn kousoan kaselel ehu ong kitail. (Mel. 115:15, 16) Nanpwungen usu (planet) kan koaros me e ketin kapikada, sampah mwomwen weksang koaros. Saintis kan wiahier roporop duwen nan wehwe oh diarada planet tohto, ahpw re saikinte kak diarada ehu planet me ahneki soahng koaros me aramas anahne pwehn mour. Siohwa sohte ihte ketikihong kitail soahng koaros me kitail anahne pwehn mour, ahpw e pil ketin wiahda sampah wet en kaselel, kansenamwahu oh sohte keper pwe kitail en kak perenki mour. (Ais. 45:18) Ni atail kin medewehla duwen atail wasahn kousoan me Samatail, Siohwa, ketikihong kitail, kitail kin uhdahn pehm uwen laud en sapwellimen Koht limpoak ong kitail.​—Wadek Sohp 38:4, 7; Melkahka 8:3-5.

7. Ia duwen mwomwen atail kapikipikda kin kasalehda me Siohwa ketin poakohng kitail?

⁷ Ehu ahl me Siohwa ketin kasalehda sapwellime limpoak ong kitail iei sang ni eh ketin kapikada kitail pwehn ahneki koahiek en alasang ih. (Sen. 1:27) Met wehwehki me kitail kak pehm sapwellime limpoak ong kitail oh eri kasalehda atail limpoak ong ih. E ketin mwahngih me met kin kahrehiong kitail en uhdahn peren. Seri kan kin keieu peren ni arail pehm me arail pahpa nohno kin poakohng irail. Oh tamataman me Sises ketin padahkihong kitail me kitail pahn peren ma kitail karanihala Samatailo, Siohwa. (Mad. 5:3) Siohwa kin ketikihong kitail “soahng koaros pwe kitail en peren.” E sansal me e uhdahn  ketin kadek sapan oh kin uhdahn poakohng kitail.—1 Tim. 6:17; Mel. 145:16.

8. Dahme kahrehda kitail men Siohwa en ketin padahki kitail?

⁸ Pahpa kan kin poakohng neirail seri kan oh sohte men emen en kin pitih de widinge neirail seri kan. Ahpw pahpa nohno tohto rahnwet sohte kin pwungki kaweid en Paipel kan me pid dahme pwung oh sapwung. Ihme kahrehda re sohte kak kaweid neirail seri kan ni ahl me pwung, met kin kalapw imwikihla nsensuwed oh pingiping. (Lep. Pad. 14:12) Ahpw, Siohwa ketikihong sapwellime kan kaweid me keieu mwahu pwehki ih me “Koht en mehlel.” (Mel. 31:5, NW) E ketin kupwurperenki padahkihong kitail dahme mehlel duwen ih. E pil kin ketin padahkihong kitail ia duwen atail en kaudokiong ih oh e ketin kasalehiong kitail ahl me keieu mwahu en mour. (Wadek Melkahka 43:3.) Eri, dahme Siohwa ketin padahkihong kitail me kasalehda ia uwen laud en eh ketin poakohng kitail?

9, 10. (a) Dahme kahrehda Siohwa kin ketin padahkihong kitail duwen pein ih? (b) Dahme e ketin padahkihong kitail duwen kupwure ong kitail?

⁹ Keieu, Siohwa ketin padahkihong kitail duwen ih. E ketin kupwurki kitail en esehla ih. (Seims 4:8) Eri e ketin padahkihong kitail mwareo. Ni mehlel, Paipel kasalehda mwareo tohto sang ahd teikan. Siohwa pil ketin kasalehiong kitail soangen Koht dah men ih. Ni atail kilang soahng kan me e ketin kapikada, kitail kin sukuhlki me e ketin manaman oh erpit. (Rom 1:20) Oh ni atail kin wadek Paipel, kitail kin sukuhlki ia uwen eh ketin toupahrek oh uwen eh ketin poakohng kitail. Ni atail esehla sapwellimen Siohwa irair kaselel kan, kitail kin karanihala ih.

¹⁰ Siohwa pil ketin padahkihong kitail duwen ia kupwure. E ketin padahkihong kitail me kitail wia kisehn sapwellime peneinei. E pil ketin kawehwehda dahme e ketin kasik sang kitail pwe kitail en kak doadoahkpene ni minimin oh popohl rehn koaros nan sapwellime peneinei. Paipel kasalehda ni sansal me Koht sohte ketin kapikada kitail en ahneki pwuhng en pein pilada dahme mwahu oh dahme suwed. (Ser. 10:23) Siohwa ketin mwahngih dahme keieu mwahu ong kitail. Oh ihte sang ni atail kin idawehn sapwellime kaunda oh peikiong ih me kitail kak ahneki popohl oh mour nsenamwahu. Siohwa ketin padahkihong kitail ire mehlel kesempwal wet pwehki e ketin poakohng kitail.

11. Dahme Samatail limpoak ketin padahkihong kitail duwen ahnsou kohkohdo?

¹¹ Pahpa limpoak men kin medewe laud duwen dahme pahn wiawihong nah seri kan ahnsou kohkohdo. E kin men irail en ahneki mour nsenamwahu. E kansensuwed me pali laud en aramas rahnwet kin pwunodki ahnsou kohkohdo, oh me tohto kin kauwehla mwahl arail mour ong mehkan me sohte pahn mihmi werei. (Mel. 90:10) Ia uwen atail kalahnganki me Samatail, Siohwa, kaidehn ihte ketin padahkihong kitail ia mwomwen atail pahn ahneki mour nsenamwahu ahnsou wet ahpw e pil ketin inoukihda mour kaselel ehu ong kitail ahnsou kohkohdo!

12. Ia duwen Siohwa eh ketin song en sewese Kain oh Paruk?

¹² Ni Siohwa eh ketin mahsanihada me Kain mi nan keper en wiahda mehkot me uhdahn suwed, e ketin song en sewese Kain sang ni eh kalelapak reh: “Dahme ke lingeringerki oh pohtoutouki? Ma ke wia mehkot pwung, ke pahn pereperen.” (Sen. 4:6, 7) Kain soikala sapwellimen Siohwa sawas, oh pwehki met e lokolok. (Sen. 4:11-13) Pil ehu ahnsou, Siohwa mahsanihada me ahn Paruk eh madamadauo  sapwung kahrehda Paruk en pwangada oh mworusala. Siohwa eri mahsanihong Paruk me eh madamadauo sapwung oh me e anahne wekidala. Paruk rong sapwellimen Siohwa kaweido oh met doarehla eh mour.​—Ser. 45:2-5.

13. Dahme sapwellimen Siohwa ladu lelepek kan kin sukuhlkihsang arail kasongosong kan?

¹³ Siohwa kin ketin kaweid oh panawih kitail pwehki e ketin poakohng kitail. E sohte kin ihte ketin kapwungala kitail ni ahnsou me anahn, ahpw e pil kin ketin kaiahne kitail. (Ipru 12:6) Kitail kin wadek nan Paipel duwen ladu lelepek kan me Siohwa ketin kaiahnehda pwe ren wiahla aramas mwahu kei. Karasepe, Sosep, Moses oh Depit kin lelohng ahnsou kei me inenen apwal. Erein arail kasongosong kan, Siohwa kin ketin ieiang irail. Oh soahng kan me re sukuhlki erein arail kasongosong ko kin sewese irail ni ahnsou me Siohwa kin ketin kalaudehla pwukoa kan me e ketikihong irail. Ni atail wadek nan Paipel duwen mwomwen Siohwa eh kin ketin sewese oh kaiahne sapwellime aramas akan, kitail pehm me Siohwa uhdahn ketin poakohng kitail.​—Wadek Lepin Padahk 3:11, 12.

14. Ma kitail wiahda mehkot sapwung, ia duwen Siohwa eh kin ketin kasalehiong kitail me e poakohng kitail?

¹⁴ Pil ni ahnsou me kitail wiahda mehkot sapwung, Siohwa kin ketin pousehlahte kasalehiong kitail limpoak. Ma kitail peikiong sapwellime kaweid oh koluhla, e pahn ketin “kupwurkalahngan oh kin mwadang mahkikihong kitail dipatail kan.” (Ais. 55:7) Ia wehwehn met? Dahme Depit ndahki duwen Siohwa eh kin ketin mahkohng aramas kin kasalehiong kitail uwen mahk kalahngan en Samatailo: “E kin ketin mahkikihong ie dipei kan koaros, oh kin ketin kamwahwihala ei soumwahu kan koaros. E kin ketin doareiesang nan sousou oh kin ketin  kupwuramwahwihkin ie limpoak oh kalahngan. Duwen mesenleng oh kepinleng ara dohpeseng, ih duwen eh kin ketin kadohwaneweisang kitail dipatail kan.” (Mel. 103:3, 4, 12) Siohwa kin ketin panawih oh kaweid kitail ni soangsoangen ahl kan. Ia duwe, ke kin mwadang en wiahda wekidekla kan? Ahnsou koaros tamataman me Siohwa kin ketin panawih kitail pwehki e ketin poakohng kitail.​—Mel. 30:5.

15. Ia pil ehu ahl me Siohwa ketin kasalehda me e ketin poakohng kitail?

¹⁵ Pahpa limpoak men kin pere eh peneinei sang keper. Ihme Samatail, Siohwa, kin ketin wiahiong kitail. Sounnting en Melkahkao ndahki duwen Siohwa: “E kin ketin sinsile mour en sapwellime aramas akan; e kin ketin kapitirailla sang pahn manaman en aramas suwed kan.” (Mel. 97:10) Medewehla duwen met: Duwehte omw kin mwadangete perehla mesomw kan pwehki ke kesempwalki, Siohwa kin ketin mwadang pere sapwellime aramas akan pwehki re kesempwal ong ih.​—Wadek Sekaraia 2:8. *

16, 17. Ia duwen Siohwa eh kin ketin pere sapwellime kan mahs oh pil ahnsou wet?

¹⁶ Ehu ahl me Siohwa kin ketin pere sapwellime aramas akan mahs oh ahnsou wet iei sang ni eh kin ketin doadoahngki sapwellime tohnleng kan. (Mel. 91:11) Emen tohnleng kemehla sounpei en Asiria meh 185,000 pwohng ehute oh kapitala sapwellimen Koht aramas akan. (2 Nan. 19:35) Ni mwehin tepin Kristian ko, tohnleng kan kapitala Piter, Pohl oh meteikan sang imweteng. (Wiewia 5:18-20; 12:6-11) Me keren, mie mahwen laud ehu me wiawi nan ehu sapwen Aperika. Nan sahpwo mie pingiping laud pwehki pei, pirap, angkehlail oh kamakamalahn aramas. Mendahki sohte riatail Kristian me mehla, me tohto rehrail luhssang mehkoaros me re ahneki. Ahpw irail koaros pehm sapwellimen Siohwa limpoak oh ese me e kin ketin apwahpwalih irail. Mendahki kahpwal kan me re lelohng, re kin pereperente. Ni ahnsou me emen sang poasen kaun en Sounkadehde kan mwemweitla rehrail oh idek ia irarail, re sapengki, “Soahng koaros mwahu, kalahngan ong Siohwa!”

¹⁷ Ei mehlel, ekei sapwellimen Siohwa ladu kan, duwehte tohnpadahk Stipen oh meteikan me duwehte ih, mehla pwehki arail lelepek. Siohwa sohte kin ahnsou koaros ketin kauhdi met sang eh pahn wiawi. Ahpw e kin ketin pere sapwellime kan nin duwen pwihn ehu sang ni eh ketin katamankihong irail soangsoangen ahl kan me Sehdan kin song en pitih irail. (Ep. 6:10-12) Kitail kin diar mehn kataman pwukat nan Paipel oh nan pwuhk kan me sapwellimen Siohwa pwihn kin wiahda. Karasepe, kitail kin sukuhlki keperpen Internet, limpoak ong mwohni oh pil kasdo, pwuhk de game kan me pid tiahk samin oh tiahk lemei. E sansal me Siohwa kin ketin poakohng oh kupwurki pere kitail.

18. Ia omw pepehm ong sapwellimen Siohwa limpoak ong uhk?

¹⁸ Ni Moses eh medewehla duwen sounpar ko koaros me e kin papah Siohwa, e uhdahn kamehlele me Siohwa kin ketin poakohng ih. Moses nda: “Komw ketin kadirehkinkitala sapwellimomwi limpoak poatopoat nimenseng koaros, pwe se en kin kokouliong komwi oh pereperen erein at mour.” (Mel. 90:14) Kitail paiekihda atail kak wehwehki oh pehm sapwellimen Siohwa limpoak ong kitail. Ia uwen eh wia pai kaselel ehu me Siohwa kin ketin poakohng kitail! Atail pepehm kin duwehte ahn wahnpoaron Sohn, me nda: “Kumwail kilang uwen limpoak en Sahmo ong kitail!”​—1 Sohn 3:1.