1, 2. Dahme kasalehda me aramas weksang mahn akan?

 MWAHLIEL en aramas wia mehkot kapwuriamwei. Karasepe, aramas ahneki koahiek en sukuhlkihdi lokaia ehu. Oh met kin kahrehiong kitail en kak wadawad, nting, koasoi oh wehwehki dahme kitail rong. Met pil kin kahrehiong kitail en ahneki koahiek en kapakap oh koulki koul en kaping ong Siohwa. Soahng pwukat koaros kahrehda kitail en weksang mahn akan. Saintis kan sohte kak uhdahn wehwehki ia duwen atail mwahliel eh kak wia soahng kapwuriamwei pwukat.

² Atail koahiek en doadoahngki lokaia iei kisakis ehu sang rehn Siohwa. (Mel. 139:14; Kaud. 4:11) E pil ketikihong kitail ehu kisakis tohrohr me kasalehda me kitail weksang mahn akan. Aramas kapikipikda “rasehng [Koht].” Kitail ahneki saledek en pein wiahda atail pilipil kan. Oh kitail kak pilada en doadoahngki lokaia pwehn papah oh kapinga Siohwa.​—Sen. 1:27.

3. Dahme Siohwa ketikihong kitail pwe kitail en loalokongla?

³ Siohwa ketin kasalehiong kitail ia duwen atail en papah oh kapinga ih sang ni eh ketikihong kitail Paipel. Paipel pwon de ekei wasa kan nan Paipel wiawihda ni lokaia daulih 2,800. Ni atail  doudouloale dahme Paipel mahsanih, atail madamadau kak tepida pahrekiong sapwellimen Koht madamadau. (Mel. 40:5; 92:5; 139:17) Oh sapwellimen Siohwa madamadau kin kahrehiong kitail en loalokongla oh kahluweikitaillahng mour soutuk.​—Wadek 2 Timoty 3:14-17.

4. Ia wehwehn en doudouloale, oh peidek dah kan me kitail pahn koasoiapene?

⁴ En doudouloale wehwehki en medemedewehte mehkot oh medewe laud oh kanahieng duwen dahme ke medeweo. (Mel. 77:12; Lep. Pad. 24:1, 2) Kitail kin keieu paiekihda ni atail kin doudouloale dahme kitail sukuhlki duwen Siohwa oh Sises. (Sohn 17:3) Nan iren onop wet kitail pahn sapengala peidek pwukat: Ia duwen atail kak wadawad ni ahl ehu me pahn mengei en doudouloale? Dahme kitail kak doudouloale? Dahme kak sewese kitail en kaukaule doudouloale oh perenki met?

5, 6. Dahme kak sewese iuk en tamataman oh wehwehki mwahu dahme ke wadek?

⁵ Mie pak me ke tehk me mie soahng kei me ke kak wia ni omw sohte medemedewe, duwehte esingek, alialu, de dake pwaisikel? Ekei pak ele ke sohte kin madamadau ni omw wadawad. Ele ke pil kin tepida medemedewe soahng teikan ni omw wie wadawad. Dahme ke kak wia pwe ken dehr wia met? E kesempwal en medemedewehte dahme ke wadewadek oh ia wehwehn dahme ke wadeko. Eri, ni ahnsou me ke lella ni imwin parakrap de sawaspen oaralap nan pwuhk ehu, uhdi oh doudouloale dahme ke ahpwtehn wadek. Medemedewe dahme ke sukuhlki, oh tehk mwahu me ke uhdahn wehwehki.

⁶ Saintis kan diarada me e mengei en tamataman mehkot ma kitail wadawad mie ngilatail. Sounkapikpatailo ketin mwahngih met, oh ihme kahrehda e ketin padahkihong Sosua en wadek pwuhken Kosonnedo “ni ngihl tikitik.” (Wadek Sosua 1:8. *) Omw wadek Paipel mie ngilomw pahn pil sewese iuk en medemedewe mwahu oh tamataman soahng tohto.

7. Iahd me keieu mwahu en doudouloale Paipel? (Menlau kilang tepin kilel.)

⁷ Kitail anahne nantihong laud en doudouloale oh medemedewe dahme kitail kin onopki. Ihme kahrehda e keieu mwahu ken doudouloale ni ahnsou me ke sohte pwang oh ni wasa ehu me sohte katairong, me soahng tohto sohte pahn kerempwa iuk. Sounmelkahka Depit kin doudouloale ni ahnsou me e wie pepehd nan eh pehto ni pwong kan. (Mel. 63:6) Sises, me unsek, kin ketin pilada wasa kan me meleilei pwehn doudouloale oh kapakap.​—Luk 6:12.

8. (a) Dahme kitail kak doudouloale? (b) Ia sapwellimen Siohwa pepehm ni atail kin koasoiaiong meteikan duwen ih?

⁸ Patehng dahme ke kin wadek nan Paipel, mie pil soahng teikan me ke kak doudouloale. Karasepe, ni omw kilang ehu rehn soahng kaselel kan me Siohwa ketin kapikada, uhdi oh pein idek rehmw, ‘Dahme met padahkihong ie duwen Siohwa?’ Soangen madamadau wet pahn uhdahn kamwakid uhk en kalahnganohng Siohwa nan omw kapakap. Oh ma ke mi rehn meteikan, ke pahn men ehukihong irail omw pepehm kan. (Mel. 104:24; Wiewia 14:17) Siohwa kin ketin tehk oh kupwurperenkihda  ni ahnsou me kitail kin doudouloale, kapakap, oh koasoia duwen ih nanpwungatail. Paipel kamehlelehiong kitail: “Pwuhk en kataman ehu me mi mwohn silangi tepida ntingdi irail kan me kin lemmwiki Siohwa oh irail kan me kin medemedewe mware.”​—Mal. 3:16, NW.

9. (a) Dahme Pohl padahkihong Timoty en doudouloale? (b) Dahme kitail kak doudouloale ni atail kaunopada ong kalohk?

⁹ Wahnpoaron Pohl padahkihong Timoty en doudouloale ia duwen eh koasoi, eh wiewia, oh padahk ar kamwakid meteikan. (Wadek 1 Timoty 4:12-16.) Ke pil kak doudouloale soahng pwukat. Karasepe, ke anahne ahnsou en doudouloale ni omw kaunopada en wia onop Paipel rehn emen. Medewe duwen noumw tohnsukuhlo oh song rapahkihda ehu peidek de karasaras me pahn sewese ih kekeirda. Ni omw kaunopada omw wia onop en Paipel ni ahl wet, pein omw pwoson pahn kehlailla oh ke pahn kalaudehla omw koahiek oh ngoang nin duwen sounkasukuhl en Paipel men. Ke pahn pil paiekihda ni omw kin doudouloale mwohn omw kohla kalohk. (Wadek Esra 7:10.) Ele ke kak wadek ehu oaralap sang pwuhken Wiewia pwehn sewese iuk en kalaudehla omw ngoang nan kalohk. Ke pil kak doudouloale iren Paipel kan me ke koasoanehdi en doadoahngki oh pil pwuhk kan me ke pahn kihla rahno. (2 Tim. 1:6) Medewe duwen aramas akan nan omw wasahn kalohk oh dahme ke kak nda me pahn kahrehiong ren men rong. Ma ke kaunopada ni ahl wet, ke pahn kak doadoahngki mwahu Paipel nan omw kalohk ong meteikan.​—1 Kor. 2:4.

10. Soahng mwahu dah teikan me kitail kak doudouloale?

¹⁰ Dahme ke pil kak doudouloale? Ma ke  ntingihdi ire kan erein padahk ong wehi pokon oh mihting tohrohr kan, kihong ahnsou pwehn kousapahlih ire pwukat. Ni omw wia met, pein idek rehmw: ‘Dahme I sukuhlkihsang Mahsen en Koht oh sapwellime pwihn?’ Ke pil kak doudouloale ire kan en ehuehu sounpwong en Kahn Iroir oh Awake! (lokaiahn wai) oh pil soahng kapw kan me kohda nan mihting tohrohr kan. Ni omw wadek Yearbook (lokaiahn wai), uhdi mwurin omw wadek duwen dahme kin lelohng riatail Kristian kan, medewe duwen met, oh mweidohng met en sair omw mohngiong. Ni omw wadek neitail sawaspen Paipel kan, ele ke pahn men lainihala de kilelehdi ire kesempwal kan. Met pahn sewese iuk ni ahnsou me ke kaunopada pwehn pwurala rehn emen nan kalohk, ni ahnsoun mwemweit en elder kan, de nan padahk ehu. Ahpw keieu kesempwal, ni omw uhdi oh doudouloale dahme ke wadek, ke kin mweidohng ahnsou pwe ireo en sair omw mohngiong oh pil ahnsou en kapakap kapingkalahngankihong Siohwa soahng mwahu kan me ke kin sukuhlki.

11. Mehnia pwuhk me keieu kesempwal kitail en doudouloale, oh ia duwen met eh pahn sewese kitail?

¹¹ Ei mehlel, Paipel iei pwuhk me keieu kesempwal kitail en doudouloale. Ahpw ia duwen ma ehu rahn sohla mweimwei ong uhk en naineki Paipel? Sohte me kak kahrehiong uhk en uhdihsang doudouloale mehkan me ke wadlikiala, duwehte iren Paipel kan de koul kan ong Wehio me ke kin keieu perenki. (Wiewia 16:25) Oh sapwellimen Koht manaman pahn sewese iuk en taman dahme ke sukuhlkiher, me pahn sewese iuk kolokol omw lelepek.​—Sohn 14:26.

12. Ia ehu ahl me ke kak wiahda omw koasoandi ong wadawad Paipel ehuehu rahn?

¹² Ia ehu ahl me ke kak wiahda omw koasoandi ong wadawad Paipel ehuehu rahn? Ekei rahn ni wihko, ele ke kak wadek oh doudouloale wadawad en Paipel en Sukuhl ong Sapwellimen Koht Doadoahk. Rahn teikan ke kak wadek sang Rongamwahu en Madiu, Mark, Luk, oh Sohn oh doudouloale dahme Sises ketin mahsanih oh wia. (Rom 10:17; Ipru 12:2; 1 Pit. 2:21) Pil mie neitail pwuhk ehu me kawehwehda duwen kairekdi en dahme wiawi nan sapwellimen Sises mour. Pwuhk wet kak sewese iuk ken paiekihda laud omw wadek pwuhken Rongamwahu ko.​—Sohn 14:6.

13, 14. Dahme kahrehda e uhdahn kesempwal kitail en pousehlahte doudouloale duwen Siohwa oh Sises, oh ia duwen met eh pahn kamwakid kitail?

¹³ Doudouloale duwen Siohwa oh Sises kak sewese emen en wiahla Kristian koahiek men oh kolokol pwoson kehlail. (Ipru 5:14; 6:1) Aramas emen me kin doadoahngki ahnsou tikitik en medemedewe duwen Koht pahn kedekedeo sohla eh nanpwungmwahu rehn Siohwa de soikala ih. (Ipru 2:1; 3:12) Sises ketin kehkehlikihong kitail me ma kitail sohte rong, de kamehlele Mahsen en Koht, kitail sohte pahn ‘katengehdi ong nan kapehditail ni peik oh mwakelekel.’ Ahpw, “anahn akan oh kepwe kan oh peren kan en sampah wet” kak mwadangete ‘koaitenla oh kasokehla mahseno nan kapehditail kan.’​—Luk 8:14, 15.

¹⁴ Eri kitail en pousehlahte doudouloale Paipel oh kalaudehla atail esehla Siohwa. Met pahn kamwakid kitail en kalaudehla atail alasang ih oh sapwellime irair kaselel kan. (2 Kor. 3:18) Kitail kak pousehlahte kalaudehla atail sukuhlki duwen Samatail nanleng oh  alasang ih kohkohlahte. Met uhdahn pai kaselel ehu!​—Ekl. 3:11.

15, 16. (a) Ia duwen omw paiekihda omw doudouloale duwen Siohwa oh Sises? (b) Dahme kahrehda ekei pak e apwal en doudouloale, ahpw dahme kahrehda kitail en pousehlahte wia met?

¹⁵ Omw doudouloale duwen Siohwa oh Sises kin sewese iuk en kolokol omw ngoang ong padahk mehlel. Omw ngoang pahn kangoange riomw Kristian kan oh aramas akan me ke tuhwong nan kalohk. Oh ni omw kin doudouloale duwen dahme Siohwa ketin wiahiong uhk sang ni eh ketikihda meirong en Sises, ke pahn pousehlahte kesempwalki omw nanpwungmwahu rehn Koht. (Rom 3:24; Seims 4:8) Mark, emen brother sang Palieir en Aperika me selidi nan imweteng erein sounpar siluh pwehki eh pwoson, nda: “En doudouloale kin kak duwehte seiloak kaperen ehu. Ni atail kin kalaudehla atail doudouloale soahng kan me pid atail kaudok, met kin kalaudehla atail esehla soahng kapw kan duwen atail Koht, Siohwa. Ni ahnsou kan me I pehm me I ekis nsensuwed de pwunodki dahme pahn wiawi ahnsou kohkohdo, I kin ale nei Paipelo oh doudouloale ehu ire sang loale. I pehm me met kin uhdahn kameleileiehdi.”

¹⁶ Mour nan sampah inenen direkihla mehn kerempwa kan me kahrehda e apwal en rapahki ahnsou en doudouloale Paipel. Patrick, emen brother sang Aperika , nda: “Ei madamadau duwehte koakon en kisinlikou ehu me direki soangsoangen ire kan me ekei anahn a ekei soh, me kin anahne koasoansoandi rahn koaros. Ni ei kin rapahki audepen ei madamadau, I kin kalapw ‘pwunodada,’ oh I kin anahne kapakap ong Siohwa duwen mepwukat pwe ien kak madamadau mwahu mwohn ei kak doudouloale. Mehnda ma ei wia met kakete kihsang ekis ei ahnsou mwohn ei kak tepida doudouloale soahng kan me pid ei kaudok, I kin pehm me I karanihala Siohwa. Met kin ritingada ei madamadau en wehwehkihla mwahu padahk mehlel.” (Mel. 94:19) Ei, kitail kin paiekihda ni soangen ahl tohto ni atail kin wadek oh doudouloale Paipel rahn koaros.​—Wiewia 17:11.

17. Ia duwen atail kak diarada ahnsou en doudouloale?

¹⁷ Ekei kin pirida nimensehngie pwehn wadawad, doudouloale, oh kapakap. Meteikan kin wia met erein kommoal en mwengehn souwas. Mwein ong uhk, ahnsou me keieu mwahu en wadek Paipel iei ni soutuk kan de mwohn omw meir. Ekei kin men wadek Paipel ni menseng oh pwurehng wadek mwohn arail kohla meir. (Sos. 1:8) Dahme kesempwal iei en “isaneki ahnsou mwahu koaros,” me iei en kihsang ahnsou ong mehkan me sohte nohn kesempwal pwe ken kak doudouloale Mahsen en Koht ehuehu rahn.​—Ep. 5:15, 16.

18. Dahme Paipel inoukihda ong irail kan me kin doudouloale Mahsen en Koht rahn koaros oh kin kapwaiada dahme re sukuhlki?

¹⁸ Paipel inoukihda me Siohwa pahn ketin kapaiahda koaros me kin doudouloale sapwellime Mahsen oh song uwen arail kak pwehn kapwaiada dahme re sukuhlki. (Wadek Melkahka 1:1-3.) Sises mahsanih: “Irail kan me kin rong mahsen en Koht oh kapwaiada, iei irail me paisang mehlel!” (Luk 11:28) Ahpw me keieu kesempwal, atail doudouloale sapwellimen Siohwa Mahsen rahn koaros pahn sewese kitail en mwekid ni ahl ehu me pahn kawahuihala ih. Ni atail wia met, Siohwa pahn ketin katingih kitail pwe kitail en nsenamwahu met oh ahneki mour soutuk nan sapwellime sampah kapwo.​—Seims 1:25; Kaud. 1:3.