1, 2. (a) Dahme ekei pahpa oh nohno en me pwulopwul kan kin pwunodki? (b) Dahme seri kan kak paiekihda erein arail wie me pwulopwul men?

 EHU ahnsou me keieu kaperen ong pahpa nohno kan iei ahnsou me neira seri kan papidaisla. Nein Berenice nah seri pahmen ko koaros papidaisla mwohn arail sounpar 14. Berenice nda: “Met inenen kamwakid kiht. Mehlel me se uhdahn kalahnganki me nait seri kan men papah Siohwa. Ahpw se pil ese me pwehki re wia me pwulopwul kei re pahn lelohng kahpwal tohto.” Ele ke pahn pil pwunodki met ma noumw pwutako de serepeino wia de pahn wiahla emen me pwulopwul (teenager).

² Emen me kin samanih madamadau oh pepehm en seri kan koasoia me erein seri kan ar sounpar 13 lel 19 kin wia ahnsou apwal ehu ong pahpa nohno kan oh me pwulopwul kan, ahpw pahpa nohno kan en dehr medewe me neirail seri kan sahliel de mwomwen seri. Ahpw e nda me me pwulopwul kan kin perenki wiahda soahng kan, re kin ahneki pepehm loal, oh ahneki anahn en iang kompoakparail kan. Eri ni arail wia me pwulopwul kei, noumw seri kan kak kakairada nanpwungmwahu keren ehu rehn Siohwa, duwehte dahme Sises ketin wia ni eh pwulopwul. (Wadek Luk 2:52.) Re kak pil kamwahwihala arail  koahiek nan kalohk oh kakairada ineng kehlail ehu en kalaudehla arail papah Koht. Oh re kak pein wiahda arail pilipil kan, duwehte pein inoukihda arail mour ong Siohwa oh peikiong ih. Ahpw dahme ke kak wia nin duwen pahpa de nohno men pwehn kaiahnehda noumw me pwulopwulo en papah Siohwa? Ke kak sukuhlkihsang ni mwomwen Sises eh ketin kaiahnehda sapwellime tohnpadahk ko ni limpoak, aktikitik, oh erpit en wehwehki mwahu ire kan.

3. Ia duwen wahnpoaron ko ar ese me Sises ketin wia kompoakparail?

³ Sises ketin wia laudsang ihte Kaun en sapwellime wahnpoaron ko. E pil kin ketin wia kompoakparail. (Wadek Sohn 15:15.) Nan Paipel, kaun emen sohte pahn kalapw koasoiong nah ladu kan duwen eh madamadau oh pepehm kan. Ahpw Sises sohte ketin wiahiong sapwellime wahnpoaron ko nin duwen lidu kei. E ketin poakohng irail oh ketikihong sapwellime ahnsou ong irail. E kupwurki padahkihong irail dahme e kin ketin medemedewe oh pehm, oh e kin ketin rong kanahieng ni arail kasalehda arail madamadau oh pepehm. (Mark 6:30-32) Koasoakoasoipene wet nanpwungen Sises oh sapwellime wahnpoaron ko kahrehiong irail en wia kompoakepah kei me uhdahn keren oh pil kaunopada wahnpoaron ko ong doadoahko me re pahn wia ni ahnsou kohkohdo.

4. Pahpa oh nohno kan, ia duwen amwail kak wia kompoakepahn noumwail seri kan? (Menlau kilang tepin kilel.)

⁴ Mehnda ma mie omw manaman pohn noumw seri kan, ke pil kak wia kompoakparail. Kompoakepah kan kin kihong ahnsou ong emenemen. Mwein ke kak katikala omw ahnsou ong doadoahk de wia soahng teikan pwe ken kak kalaudehla omw ahnsou ong noumw seri kan. Iei met me ke anahne kapakapki oh medewe laud duwe. Kompoakepah kan kin pil perenki soahng kan me duwepenehte. Eri diarada dahme noumw me pwulopwulo kin perenki, duwehte soangen koul, kasdo, de mwadong. Eri song en perenki dahme e perenki. Ilaria, me kin kousoan nan Italy, nda: “Ei pahpa nohno kin men ese soangen koul dah me I kin rong. Met kahrehiong ei pahpao en wiahla kompoakepahi me keieu keren, oh I kin ahneki saledek en koasoiong ih pil duwen mehkan me I perki koasoia.” Ni omw wia kompoakepahn noumw seri ko oh kin sewese irail en wia kompoakepahn Siohwa, met sohte wehwehki me ke luhssang omw manaman nin duwen pahpa de nohno men. (Mel. 25:14) Noumw seri kan pahn kilang me ke poakohng oh waunekin irail, oh met pahn kamengeila arail en koasoiaiong uhk duwen soahng sohte lipilipil kan.

5. Ia duwen sapwellimen Sises tohnpadahk ko ar kak peren ni arail wiewia sapwellimen Siohwa doadoahk?

⁵ Sises mwahngih me ma sapwellime tohnpadahk ko kin ngoangki arail papah Siohwa oh kin pwerisekiong kalohki rongamwahwo, re pahn uhdahn peren. Eri e ketin kangoange irail en doadoahk laud nan kalohk, oh e ketin inoukihda me e pahn ketin sewese irail.​—Mad. 28:19, 20.

6, 7. Ia duwen omw kin kasalehda limpoak ong noumw seri kan ni omw kin padahkihong irail en ahneki koasoandi ehu en kaukaule papah Siohwa?

⁶ Ke mwahuki noumw seri kan en karanih Siohwa. Oh Siohwa kupwurki ken kaiahne oh kaweid irail. E ketikihong uhk manaman en wia met. (Ep. 6:4) Eri ke anahne tehk mwahu me noumw seri kan en kaukaule ale kaiahn. Medewehla met: Ke kin tehk mwahu me noumw seri kan kin iang sukuhl pwehki ke ese me arail kasukuhl kesempwal oh me ke men ren perenki sukuhlki soahng kapw kan. Pil duwehte met, ke kin tehk mwahu me re kin iang towehda mihting kan, mihting tohrohr kan, oh kaudok en peneinei. Mehlel, kasukuhl me re alehdihsang Siohwa kak doarehla arail mour. Eri sewese irail en perenki sukuhlki duwen Siohwa oh pohnese me e kak ketin padahkihong irail en uhdahn ahneki erpit mehlel. (Lep. Pad. 24:14) Pil kaiahnehda noumw seri kan en iang kohla kalohk kaukaule. Alasang sapwellimen Sises mehn kahlemeng sang ni omw kin sewese irail en  perenki padahkihong meteikan duwen Mahsen en Koht.

⁷ Ia duwen koasoandi en kaukaule papah Siohwa, duwehte onop, mihting, oh kalohk, ar kin sewese me pwulopwul kan? Erin, me kin kousoan nan Palieir en Aperika, nda: “Ngehi oh riei ko kin kalapw kaulim ni ahnsoun onop en Paipel, mihting kan, oh kalohk. Ekei pak se kin wia pwehn kauhdi at kaudok en peneinei pwe en nek. Ahpw at pahpa nohno sohte kin dukila pahn met.” Erin kin kalahnganki eh pahpa nohno pwehki ira sewese ih en pohnese uwen kesempwal en soahng pwukat. Met ni ahnsou me e sohte iang towehda mihting de sohte kak kohla kalohk, e kin men mwadangete pwuralahng eh koasoandio.

8. (a) Ia duwen Sises eh kasalehda me e ketin aktikitik? (b) Ia duwen sapwellimen Sises aktikitik eh sewese sapwellime tohnpadahk ko?

⁸ Mendahki Sises unsek, e kin ketin aktikitik oh padahkihong sapwellime tohnpadahk ko me e kin anahne sapwellimen Siohwa sawas. (Wadek Sohn 5:19.) Ia duwe, met kin kahrehiong tohnpadahk ko en sohla nohn wauneki Sises? Soh. Ni arail kin kalapw kilang eh kin ketin likih Siohwa, arail likih ih kin laudla. Mwuhr, irail alasang sapwellime mehn kahlemeng en aktikitik.​—Wiewia 3:12, 13, 16.

9. Ni omw wehkada omw sapwung kan oh pek mahk, ia duwen met eh kak sewese noumw me pwulopwulo?

⁹ Weksang Sises, kitail sohte unsek oh kin wiahda sapwung kan. Eri kasalehda aktikitik. Pohnese me mie soahng tohto me ke sohte kak wia oh wehkada omw sapwung kan. (1 Sohn 1:8) Eri noumw me pwulopwulo pahn sukuhlki en wehkada pein eh sapwung kan oh pahn laudla eh wauneki uhk. Pwe ihs me ke kin keieu wauneki? Kaun emen me kin wehkada eh sapwung kan de emen me sohte kin pek mahk? Rosemary, me naineki seri silimen, nda me ih oh eh pwoudo sohte kin pweiek en wehkada ara sapwung kan. E kawehwehda: “Met kamwakid nait seri kan ren kak koasoiong kiht ni ahnsou me mie arail kahpwal.” E pil nda: “Se padahkihong nait seri kan ia wasa ren rapahki kaweid me keieu mwahu ong arail kahpwal kan. Ni arail kin anahne sawas, se kin ahnsou koaros doadoahngki neitail sawaspen Paipel kan pwehn sewese irail, oh se kin kapakapene.”

10. Ia duwen Sises eh kin ketin kasalehda aktikitik pil ni ahnsou kan me e ketin padahkihong sapwellime tohnpadahk kan dahme ren wia?

¹⁰ Sises sapwellimaniki manaman en padahkihong sapwellime tohnpadahk ko dahme ren wia. Ahpw pwehki e ketin aktikitik, e kin kalapw ketin kawehwehda dahme kahrehda re anahne wia met. Karasepe, e sohte kin ihte ketin padahkihong irail en rapahki mahs Wehio oh sapwellimen Koht pwung. Ahpw e mahsanih: “A soahng teikan koaros e ahpw pahn ketikihong kumwail.” Ni eh ketin padahkihong irail ren uhdihsang kadeikada meteikan, e kawehwehda: “Pwe Koht en dehr ketin kadeingkumwailda. Pwe Koht pahn ketin kadeik kumwail nin duwen amwail kin kadeik meteikan.”​—Mad. 6:31–7:2.

11. Ia duwen omw kak sewese noumw me pwulopwulo ni omw kawehwehiong kahrepen omw wiahda koasoandi ehu de pilipil ehu?

¹¹ Rapahki ahnsou me konehng pwehn kawehwehiong noumw me pwulopwulo dahme kahrehda ke wiahda kosonndi ehu de pilipil ehu. Ni eh kin wehwehki dahme kahrehda, ele e pahn men peikiong uhk. Barry, emen me apwalihada seri pahmen, nda: “Omw kin kihda kahrepe kan kin sewese noumw me pwulopwulo en likih iuk.” Me pwulopwul kan pahn kilang me ke sohte wiahda koasoandi ehu de pilipil ehu ihte pwehki ke ahneki manaman en wia met ahpw pwehki mie omw kahrepe mwahu. Oh pil tamataman me me pwulopwul kan solahr wia seri tikitik kei. Re sukusukuhlki ia duwen arail kak pein medewehda soahng kan, oh re men pein wiahda arail pilipil kan. (Ipru 5:14) Barry kawehwehda: “Me pwulopwul kan anahne sukuhlki en wiahda pilipil mwahu kan me kin kohsang kahrepe  kan a kaidehn sang arail mwekidki arail pepehm kan.” (Mel. 119:34) Eri kasalehda aktikitik oh kawehwehiong noumw me pwulopwulo dahme kahrehda ke wiahda pilipil ehu. Ni ahl wet, noumw me pwulopwulo sukuhlkihdi en wiahda pein eh pilipil kan, oh e pahn ese me ke wauneki ih oh me ke pohnese me e wie koahkoahiekla.

12. Pwehki Sises sapwellimaniki erpit en wehwehki mwahu ire kan, ia duwen eh ketin sewese Piter?

¹² Sises ketin sapwellimaniki erpit en wehwehki mwahu ire kan oh wehwehki sawas dah me sapwellime tohnpadahk ko anahne. Karasepe, ni ahnsou me Sises ketin padahkihong sapwellime tohnpadahk ko me e pahn ketin kamakamla, Piter patohwanohng Sises en ketin kadek ong pein ih. Sises mwahngih me Piter poakohng ih, ahpw e pil mwahngih me mwomwen ahn Piter eh madamadauo sapwung. Ia duwen Sises eh ketin sewese Piter oh tohnpadahk teiko? Keieu, e ketin kapwungala Piter. Sises eri ketin kawehwehda dahme pahn wiawihong irail kan me kin soikala wia kupwuren Siohwa ni ahnsou me e apwal en wia met. Sises pil mahsanih me Siohwa pahn ketin katingih irail kan me sohte roporop. (Mad. 16:21-27) Piter alehdi kasukuhl mwahu sang met.​—1 Pit. 2:20, 21.

13, 14. (a) Dahme pahn kasalehda me noumw me pwulopwulo anahne kakehlakahda eh pwoson? (b) Ia duwen omw kak diarada soangen sawas dah me noumw pwutak de serepeino uhdahn anahne?

¹³ Kapakapohng Siohwa pwehn ketikihong uhk erpit pwe ken kak wehwehki mwahu ire kan pwehn sewese iuk en wehwehki dahme noumw me pwulopwulo kin anahne. (Mel. 32:8) Ele ke kilang me e solahr kin nohn peren duwehte mahso de e kin nda mehkot sohte mwahu duwen riatail Kristian kan. Mwein ke medewe me mie mehkot me e sohte padahkihong uhk. Dehr mwadangete medewe me noumw me pwulopwulo kin wiewia mehkot ni rir me uhdahn sapwung. Ahpw dehr pohnsehsehla kahpwalo de koapworopworkihte me kahpwalo sohla pahn mie. Met kak wehwehki me ke anahne sewese ih en kakehlahda eh pwoson.

¹⁴ Pwehn diarada ia duwen omw kak sewese noumw me pwulopwulo, idek reh peidek kan ni kadek oh ni wahu. E kin duwehte ni omw kin idipil ni pwarer ehu. Ma nohn mwadang omw idipasang, ke sohte pahn alehdi uwen pihl me ke men ale. Pil duwehte, ma ke sohte kanengamah ni omw idek peidek de song en idingkihong noumw  me pwulopwulo en lokaia, ke sohte pahn diarada ia eh madamadau oh pepehm. (Wadek Lepin Padahk 20:5.) Ilaria tamanda me ni eh pwulopwul, e kin men kihong ahnsou laud rehn ienge tohnsukuhl kan ahpw e ese me met sapwung. Eh pahpa nohno tehkada me e pwunodki mehkot. Ilaria nda: “Ehu ni soutiko, ira nda me ira kilang me I ekis mworus, oh ira idek rehi ia ei kahpwalo. I sengiseng, kawehwehda ei irairo, oh peki sawas. Ira pwoaleiehdi, padahkihong ie me ira wehwehki, oh inoukihong ie me ira pahn sewese ie.” Ahn Ilaria eh pahpa nohno mwadangete tepida sewese ih en wiahda kompoakepah mwahu kan nan mwomwohdiso.

15. Ia pil ehu ahl me Sises ketin kasalehda me e sapwellimanki erpit?

¹⁵ Sises pil ketin sapwellimanki erpit en wehwehki mwahu ire kan ni eh ketin tehk irair mwahu en sapwellime tohnpadahk ko. Karasepe, ni ahnsou me Nadaniel rong me Sises sang Nasaret, e nda: “Ia duwe, kakete mehkot mwahu en pwarada sang Nasaret?” (Sohn 1:46) Ma ke mi mwo ke pahn medewe me Nadaniel koasoia mehkot sohte mwahu de mwomwen lipilipilki aramas de sohte eh pwoson? Sises sohte ketin medewe met. Ahpw, e ketin sapwellimanki erpit en wehwehki mwahu ire kan oh ketin mwahngih me Nadaniel koasoi ni mehlel, eri e mahsanih: “Iet uhdahn ohl mehlel en Israel men, me sohte kin widing!” (Sohn 1:47) Sises kak ketin mwahngih mohngiong en aramas, oh e ketin doadoahngki koahiek wet pwehn mahsanihada irair mwahu kan en aramas.

16. Ia duwen omw kak kangoange noumw me pwulopwulo en kekeirda?

¹⁶ Mehnda ma ke sohte kak wehwehki mohngiong en aramas duwehte Sises, ke kak ahneki erpit en wehwehki mwahu ire kan. Siohwa kak ketin sewese iuk en rapahki irair mwahu kan en noumw me pwulopwulo. Mehnda ma noumw me pwulopwulo kansensuwediukala, en dehr nda me ih aramas suwed emen de ketihwo. Dehr pil medewehda met duwen ih. Ahpw, padahkihong ih me ke kak kilang eh irair mwahu kan oh me ke uhdahn kamehlele me e kin men wia dahme pwung. Tehk dahme e kin wia pwehn mwahula oh kapinga ih. Sewese ih en koadoahke eh irair mwahu kan sang ni omw kin kalaudehla eh pwukoa kan ni ahnsou me kak. Sises ketin wia met ong sapwellime tohnpadahk ko. Sounpar ehu elep mwurin eh tuhwong Nadaniel (me pil kin adaneki Pardolomiu), Sises ketikihong ih pwukoa kesempwal ehu. E ketin idihada Nadaniel en wia wahnpoaron men, oh Nadaniel kin loalopwoatohng doadoahk me Sises ketikihong ih. (Luk 6:13, 14; Wiewia 1:13, 14) Dehr kahrehiong noumw me pwulopwulo en pehm me sohte mehkot e wia kin itar ahpw kapinga oh kangoange ih. Kahrehiong en pehm me e kak kaperenda iuk oh Siohwa oh me e pil kak doadoahngki eh koahiek en papah Siohwa.

17, 18. Ma ke doulahte kaiahne noumw me pwulopwul kan en papah Siohwa, ia pahn kak imwilahn met?

¹⁷ Ele ke ahneki soangen pepehmohte me wahnpoaron Pohl ahneki. E kin pwunodki laud irail kan me duwehte seri ong ih. Irail pwukat iei irail kan me e kin sewese pwehn sukuhlki duwen Siohwa, oh e uhdahn poakohng irail. Eri e kansensuwed ong ih en medewe me ekei irail pwukat ele sohte pahn pousehlahte papah Siohwa. (2 Kor. 2:4; 1 Kor. 4:15) Victor, me apwalihada seri silimen, nda: “Erein ahnsoun emen eh wie pwulopwul kin wia sounpar apwal kei. Ahpw, ahnsou mwahu kan kin kipehdi ahnsou apwal ko. Pwehki sapwellimen Siohwa sawas, se perenki at nanpwungmwahu keren rehn nait seri kan.”

¹⁸ Pahpa nohno kan, kumwail doadoahk laud pwehn kaiahnehda noumwail seri kan pwehki kumwail uhdahn poakohng irail. Dehr uhdihsang met. Medewehla ia uwen peren me ke pahn ahneki ni ahnsou me noumw seri kan pilada en papah Koht oh pousehlahte papah ih ni loalopwoat.​—3 Sohn 4.