Medewehla omw pahn tepin lella sahpw tohrohr ehu. Ke tuhwongada aramas akan me ke uhdahn sehse duwen arail tiahk, kanarail mwenge, oh soahng teikan. Ele ke pahn pwunodki omw sohte wehwehki mepwukat.

Mwein ke ahneki soangen pepehmohte ni omw tepin wadek Paipel. Likamwete ke kohla wasa ieu mahsie me ke sahn. Ke tuhwongada mehn Pilisdia kan wasao, esehda duwen tiahk me aramas kin “tehrasang ar likou kan” ahnsou me re nsensuwed, de soangen mwenge me adaneki manna. (Eksodus 16:31; Sosua 13:2; 2 Samuel 3:31) Ke sohte kak wehwehki soahng pwukat koaros. Ke sou pahn kalahnganki ma emen kawehwehiong uhk soahng kan ni omw kohla sahpw tohrohr ehu?

Sangete Paipel eh tepin ntingdi nan pahr 1513 mwohn Krais, miehier sawas ong aramas akan pwe ren kak wehwehki Paipel. Karasepe, Moses, me tepin kahluwa mehn Israel ko, “tapihada kawehwe” dahme ntingdi loale.​—Deuderonomi 1:5.

Mpen pahr 400 samwa mwurin met, miehte irail kan me kin koahiek en kawehwehda Paipel. Nan pahr 455 mwohn Krais, pokon en mehn Suhs kei me iangahki seri tohto, pokondohng wasahn tuhpene en aramas akan nan kahnimw en Serusalem. Sounkawehwehn Paipel kan mi mwo oh re kin “kawehwe [sang pwuhkohte] sapwellimen Koht Kosonnedo.” Re pil wia laudsang met. Re “kawehwehda mwahu pwe aramas koaros en kak dehdehki.”​—Nehmaia 8:1-8.

Sounpar 500 mwuri, Sises Krais pil ketin wia soangen doadoahk en kasukuhlohte. Ni mehlel, aramas ako kin ese ih nin duwen sounpadahk men. (Sohn 13:13) E ketin padahki pokon laud kan oh pil emenemen aramas. Ehu pak, e ketin wia Kapahrek en Pohn Dohl ong pokon kalaimwun ehu oh “pokono ahpw pwuriamweikihla kowahlap duwen mwomwen eh kin ketikihwei sapwellime padahk.” (Madiu 5:1, 2; 7:28) Nan April de May en pahr 33, Sises mahseniong sapwellime tohnpadahk riemen oh ketin ‘kawehwehiong ira Pwuhk Sarawi’ ni arail alialu kohlahng kisin kahnimw me karanih Serusalem.​—Luk 24:13-15, 27, 32.

Sapwellimen Sises tohnpadahk ko pil wia sounpadahk en Paipel kei. Ehu pak, ohl lapalap kesempwal en Idiopia men wie wadewadek wasa ehu nan Pwuhk Sarawi. Tohnpadahk Pilip ahpw kohla reh oh idek: “Ia duwe, komw wehwehki dahme komw wadewadeken?” Ohl en Idiopiao eri sapengki: “Ia duwen ei pahn kak wehwehki, ma sohte me pahn kawehwehiong ie?” Pilip eri kawehwehiong ohlo iren Paipel ko.​—Wiewia 8:27-35.

Duwehte sounkasukuhl oh sounpadahk en Paipel kan mahs, Sounkadehdehn Siohwa kan rahnwet kin wiewia doadoahk en kasukuhlih Paipel nan sahpw 239. (Madiu 28:19, 20) Wihk koaros re kin sewese aramas daulih duwerar (9,000,000) en wehwehkihla Paipel. Tohtohn tohnsukuhl pwukat kin tikida wasa kan me sohte wehwehki duwen mour en Kristian. Sohte isepen koasoandi en onop pwukat oh e kak wiawi nan imwen aramas de wasa ehu me mwahu ong irail. Ekei pil kin doadoahngki delepwohn de video, doadoahngki computer de pil cellphone ape ni arail wia onop.

Pwehn esehla oh paiekihda koasoandi wet, menlau koasoiong Sounkadehdehn Siohwa kan. Ke pahn diarada me ke kak uhdahn wehwehkihla Paipel oh e pil wia pwuhk ehu me “mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek,” pwe kitail “koahiekla ni soangen wiewia mwahu koaros.”​—2 Timoty 3:16, 17.