1, 2. Dahme Koht ketin wia mahs nan Paipel, oh dahme ekei rahnwet ele pahn medewe ni ahnsou me re soumwahuda?

 MA MIE pak me ke uhdahn soumwahuda, ele ke kin idek: ‘I pahn kak mwahula?’ De ele omw tohnpeneinei de kompoakepahmw men pahn soumwahuda oh ke medewe ma e pahn pwurehng mwahula. Kitail kin men ahneki roson mwahu ong pein kitail oh aramas akan me kitail poakohng. Nan Paipel, kitail wadek duwen ekei me men ese ma re pahn mwahula sang arail soumwahu. Karasepe, Nanmwarki Ahasaia, nein Eihap oh Sesepel pwutak, medewe ma e pahn mwahula sang eh ohlao. Oh mwuhr, Nanmwarki Penadad en Siria soumwahuda oh men diarada ma e pahn mwahula de soh.​—2 Nan. 1:2; 8:7, 8.

² Paipel pil padahkihong kitail me mahso Siohwa kin ekei pak ketin doadoahngki manaman pwehn kamwahwihala aramas oh pil doadoahngki sapwellime soukohp kan pwehn kaiasada ekei me mehla. (1 Nan. 17:17-24; 2 Nan. 4:17-20, 32-35) Rahnwet, ekei aramas me soumwahu ele medewe ma Koht pil pahn ketin wia mehkot pwehn sewese irail mwahula.

3-5. Dahme Siohwa oh Sises kak ketin wia, oh peidek dah kan me kitail pahn koasoiapene?

 ³ Siohwa sapwellimaniki manaman en kamwakid roson en aramas. E ketin kalokehki ekei aramas soumwahu, duwehte Parao en ni mwehin Eipraam oh mwuhr rien Moses liho, Miriam. (Sen. 12:17; Nemp. 12:9, 10; 2 Sam. 24:15) Oh e ketin kalokehki mehn Israel ko “soangen soumwahu koaros” ni arail sohte kin lelepek ong ih. (Deud. 28:58-61) Ekei pak, Siohwa ketin pere sapwellime kan sang soumwahu. (Eks. 23:25; Deud. 7:15) E pil kin ketin kamwahwihala ekei irail. Karasepe, e ketin kamwahwihala Sohp ni ahnsou me e soumwahuda laud oh men mehla.​—Sohp 2:7; 3:11-13; 42:10, 16.

⁴ Kitail kamehlele me Siohwa sapwellimaniki manaman en kamwahwihala irail kan me soumwahu. Sises pil kak ketin kamwahwihala me soumwahu kan. Ni eh ketiket sampah, e ketin kamwahwihala irail ko me ahneki soumwahu me duwehte tokutok de soumwahu en lusulus. E ketin kamwahwihala me maskun kan oh me mwoator kan. (Wadek Madiu 4:23, 24; Sohn 9:1-7) Manaman pwukat sewese kitail en kasikasik soahng kaselel kan me Sises pahn ketin wia nan sampah kapwo. Ni ahnsowo, “sohte emen me kin kousoan nan sahpwo pahn kaulimkihla eh soumwahu.”​—Ais. 33:24.

⁵ Ahpw ma kitail uhdahn soumwahuda, kitail kak kasik me Siohwa de Sises en ketin doadoahngki manaman pwehn kamwahwihala atail soumwahu kan ahnsou wet? Oh dahme kitail anahne medewe ni atail pahn pilada sawas me pahn kamwahwihala atail soumwahu?

6. Dahme Paipel mahsanihki duwen manaman kan me tepin Kristian ako kin wia?

⁶ Ni mwehin tepin Kristian ko, Siohwa ketin keiekihdi Kristian kan sapwellime manaman oh ketikihong ekei irail koahiek en wia manaman. (Wiewia 3:2-7; 9:36-42) Karasepe, re kak kamwahwihala aramas oh pil lokaiahki soangsoangen lokaia kan. (1 Kor. 12:4-11) Ahpw mwuhr manaman pwukat sohla wiawi, duwehte dahme Paipel mahsanih. (1 Kor. 13:8) Ihme rahnpwukat kitail sohte kak kasik manaman ehu sang rehn Koht pwehn kamwahwihala kitail de irail kan me kitail poakohng.

7. Ia duwen Melkahka 41:3 eh kak kangoange kitail?

⁷ Ahpw ma ke soumwahu, Siohwa pahn ketin kansenamwahwihiukala oh seweseiuk, duwehte me e ketin wia ong sapwellime ladu kan mahs. Nanmwarki Depit ntingihedi: “Meid pai irail kan me kin nsenohki apwalih me semwehmwe kan; KAUN-O pahn ketin sewese irail nan arail apwal. KAUN-O pahn ketin sinsile irail oh kolokol arail mour.” (Mel. 41:1, 2) Depit sohte ndinda me irail ko me momour ahnsowo me kasalehda arail nsenohki me semwehmwe kan sohte pahn mehla. Eri ia duwen Siohwa eh pahn ketin sewese aramas mwahwo? Depit kawehwehda: “KAUN-O pahn ketin sewese irail ni ar pahn soumwahu oh e pahn ketin kakehlairailda.” (Mel. 41:3) Siohwa uhdahn mwahngih lokolok me sapwellime ladu kan kin ahneki, oh e sohte kin ketin manokehla irail. E kak ketikihong irail eimah oh erpit. Siohwa ketin kapikada paliweren aramas ni soangen ahl ehu me kak pein mwahula.

8. Nin duwen Melkahka 41, dahme Depit patohwan peki rehn Siohwa en ketin wiahiong ih erein eh soumwahuda laud?

⁸ Nan Melkahka 41, Depit pil padahkihong kitail duwen ahnsou me e soumwahuda laud oh luwetala oh ahneki pwunod. E mwomwen me ni ahnsowo, nah pwutak Apsalom kin songosong en wiahla nanmwarki oh wiliandi ih. Depit uhdahn soumwahu kahrehda e sohte kak kauhdi Apsalom. E ese me kahpwal kan nan eh  peneineio kohsang eh wiahda dihp rehn Padsipa. (2 Sam. 12:7-14) Eri, dahme e wia? E patohwan kapakap: “Maing KAUN, I patohwan dipadahr ong komwi; komw ketin kupwur kalahngan ong ie oh ketin kakehlaiehda.” (Mel. 41:4) Depit ese me Siohwa ketin mahkohng dipe kan, oh e koapworopworki Koht en ketin sewese ih erein eh soumwahwo. Ahpw ia duwe, Depit kasik manaman ehu sang rehn Siohwa?

9. (a) Dahme Siohwa ketin wiahiong Nanmwarki Esekaia? (b) Dahme Depit kasik sang Siohwa?

⁹ E mehlel me ekei pak Koht kin ketin pilada en kamwahwihala aramas. Karasepe, ni ahnsou me Nanmwarki Esekaia kereniong mehla, Siohwa ketin kamwahwihala ih. Esekaia pil momourki erein sounpar 15 mwuri. (2 Nan. 20:1-6) Depit sohte kasik manaman ehu. Ahpw, e kasik me Siohwa en ketin sewese ih ni ahlohte me E kin ketin sewese “irail kan me kin nsenohki apwalih me semwehmwe kan.” Depit ahneki nanpwungmwahu rehn Siohwa, eri e kak patohwan peki rehn Siohwa en ketin kansenamwahwih oh apwalih ih erein eh soumwahu. E pil patohwan peki me paliwere en mwahula oh kehlailda. Kitail kak patohwan peki rehn Siohwa en ketin sewese kitail ni ahlohte.​—Mel. 103:3.

10. Dahme wiawihong Tropimus oh Epaprodaitus, oh dahme met padahkihong kitail?

¹⁰ Ni mwehin wahnpoaron ko, kaidehn Kristian koaros kin mwahula pwehki manaman ehu, mendahki ma wahnpoaron Pohl oh meteikan kak kamwahwihala me soumwahu kan. (Wadek Wiewia 14:8-10.) Wahnpoaron Pohl kamwahwihala ahn Puplius eh pahpao me ahneki soumwahu karakar oh paiking laud. Pohl kapakap, “pwil peh ko powe oh kakehlahda.” (Wiewia 28:8) Ahpw Pohl sohte kamwahwihala koaros me e ese. Emen kompoakepah ko, Tropimus, iang ehu ahn Pohl seiloak en misineri. (Wiewia 20:3-5, 22; 21:29) Ni ahnsou me Tropimus soumwahuda, Pohl sohte kamwahwihala ih. Eri Tropimus anahne uhdihsang eh iang Pohl seiloak oh mihmi nan Mailihdus pwehn mwahula. (2 Tim. 4:20) Pil emen kompoakepahn Pohl, Epaprodaitus, soumwahuda oh kereniong mehla. Ahpw Paipel sohte mahsanih me Pohl kamwahwihala ih.​—Pil. 2:25-27, 30.

11, 12. Dahme kitail ese duwen Luk, oh ia duwen eh sewese Pohl?

¹¹ Luk wia emen toahkte oh e kin iang Pohl seiloakseli. (Kol. 4:14; Wiewia 16:10-12; 20:5, 6) Ele e sewese Pohl oh meteikan ni ahnsou me re kin soumwahuda nan arail seiloak en misineri. (Kal. 4:13) Duwehte me Sises mahsanih, “me soumwahu kan” kin anahne toahkte.​—Luk 5:31.

¹² Luk sohte wiahte emen me kin kihda kaweid duwen roson mwahu, ahpw e wia toahkte men. Paipel sohte mahsanih ia wasa de iahd Luk sukuhlda nin duwen toahkte men. Ahpw Paipel mahsanih me Pohl kadarala ahn Luk rahnmwahu ong mehn Kolose ko. Eri Luk kakete sukuhlda nan wasahn sukuhl en toahkte ehu nan Laodisia, kahnimw ehu karanih Kolose. Oh pil, ni Luk eh ntingihada pwuhken Rongamwahu en Luk oh pwuhken Wiewia, e kin doadoahngki lepin lokaia kan me toahkte kan kin doadoahngki. Pwehki ih toahkte men, e kin kapatahiong poadopoad tohto duwen ahnsou kan me Sises ketin kamwahwihala aramas akan.

13. Dahme kitail kak taman mwohn atail kihda de ale kaweid duwen roson?

¹³ Rahnpwukat, sohte emen riatail Kristian me kak wiahda manaman oh kamwahwihala kitail. Ahpw pwehki arail men sewese kitail, ekei ele kin kihong kitail kaweid pil ni ahnsou  kan me kitail sohte peki sawas. Mehlel me ekei sawas sohte keper. Karasepe, Pohl nda me Timoty en nim ekis wain. Timoty ahneki kahpwal en kapehd medek, mwein pwehki e nim pihl me sohte nohn mwakelekel. * (Wadek 1 Timoty 5:23.) Ahpw kitail anahne kanahieng. Brother men kakete song en kamehlelehiong kitail en ale soangen wini ehu de wini sang tuhke kan de kang de soikala soangen mwenge ieu. Ele brothero ndaiong kitail me wini wet sewese emen nan eh peneineio me ahneki soangen kahpwal ohte. Ahpw met sohte wehwehki me winio pahn pil sewese kitail. Kitail anahne taman me mendahki ma aramas tohto doadoahngki wini de wiepen sawas en wini ehu, e kakete uhdahn keper.​—Wadek Lepin Padahk 27:12.

14, 15. (a) Soangen aramas dah kitail anahne kanahieng? (b) Dahme kitail kak sukuhlkihsang Lepin Padahk 14:15?

¹⁴ Kitail koaros kin men ahneki roson mwahu pwe kitail en kak perenki mour oh doadoahk laud ong Siohwa. Ahpw kitail soh unsek, eri kitail sohte kak soikala soumwahu koaros. Ni atail soumwahuda, ele mie soangsoangen sawas kan me kak kamwahwihala atail soumwahu kan, oh kitail ahneki pwuhng en pilada mehnia me kitail en ale. Ahpw, ekei aramas oh pesines kan nda me re diarada sawas ehu me pahn kamwahwihala atail soumwahu kan. Ekei wia met pwehki re men wiahda mwohni laud. Re kakete nda me aramas tohto doadoahngki sawas wet oh mwahula. Oh ma kitail soumwahu, ele kitail pahn men song soahng sohte lipilipil me kak sewese kitail en mwahula oh mour werei. Ahpw kitail en dehr manokehla dahme Mahsen en Koht kaweidkin kitail: “Aramas pweipwei kin kamehlele mehkoaros; aramas loalokong kin kanahieng arail kahk koaros.”​—Lep. Pad. 14:15.

¹⁵ Ma kitail loalokong, de ahneki erpit, kitail pahn kanahieng duwen dahme kitail kamehlele, ahpw mehlel ma aramas me kihda kaweido sohte alehdi kaiahn mwahu. Kitail pahn pein idek rehtail: ‘E kin nda me vitamin wet, wini sang tuhke kan, de wiepen koasoandi en mwenge kin sewese aramas, ahpw ia duwe, I uhdahn ese ma met kin uhdahn sewese irail? Mehnda ma met sewese meteikan, ia duwen ei ese me met pahn sewese ie? I anahne kalaudehla ei wia roporop oh koasoiong ekei me kaiahnda mwahu en sewese kamwahwihala ei kahpwal en roson?’​—Deud. 17:6.

16. Dahme kitail anahne tehk ni atail wiahda pilipil kan duwen atail roson?

¹⁶ Ni atail pahn pilada mehnia keseu de soangen wiepen wini dah me kitail pahn ale, kitail anahne ahneki “kupwurokong, erpit,” de doadoahngki loalokong. (Ekl. 2:26) Met uhdahn kesempwal ma keseuo de soangen wiepen winio mwomwen ehusoahng douluhl. Ia duwe, aramas me kitail tuhwongo kak kawehwehda ia duwen keseuo de soangen wiepen winio ar kak doadoahk? Mwomwen eh kawehweo ehusoahng? Ia duwe, toahkte tohto pwungki me eh keseuo de soangen wiepen winio kak kamwahwihala aramas? (Lep. Pad. 22:29) Mwein mie me ndaiong kitail me mie wiepen kamwahwihala soumwahu ehu dierekda wasa doh oh me toahkte kan saikinte ese duwe. Ahpw ia duwe, mie mehn kadehde kan me kadehdehda me mie wiepen kamwahwihala soumwahu? Ele ekei pil kin kihda wiepen kamwahwihala soumwahu me kin doadoahngki doal de kehl ehu me sohte me ese. Met kak uhdahn keper. Taman me Koht ketin kehkehlikihong kitail en dehr doadoahngki akmanaman kan.​—Lip. 19:26; Deud. 18:10-12.

17. Soangen ineng dahieu me kitail ahneki?

¹⁷ Pwihn me kin apwalih mwomwohdiso pwon ni mwehin wahnpoaron ko kadarala kisinlikou ehu ong Kristian kan nan mwomwohdiso ko pwehn padahkihong irail soahng kei me re anahne soikala. Ni kaimwiseklahn kisinlikowo, pwihno ntingihedi: “Ma kumwail pahn kapwaiada soahng pwukat. Rahn kaselel ong kumwail.” (Wiewia 15:29) Nan ekei lokaia, kawehwehn kaimwiseklahn ire wet kin doadoahngki lepin lokaia kan “Roson mwahu ong kumwail,” oh pil kak wehwehki en “kehlail.” Kitail uhdahn kin men ahneki roson mwahu oh kehlail ni atail papah atail Koht lapalapo.

18, 19. Dahme kitail kak kasikasik nan sampah kapwo?

¹⁸ Pwehki kitail soh unsek, kitail sohte kak soikala soumwahu koaros. Oh ni atail soumwahuda, kitail sohte kin kasik manaman ehu sang rehn Siohwa pwehn kamwahwihala kitail. Ahpw kitail kak kasik ni ahnsou kohkohdo me Koht pahn ketin kamwahwihala kitail ni unsek. Nan Kaudiahl 22:1, 2, wahnpoaron Sohn koasoia duwen “pilen komouro” oh “tuhkehn komour” me pahn kamwahwihala koaros. Met sohte dokedoke wiepen wini sang tuhke ehu me kitail kak alehdi met de nan sampah kapw pwehn kamwahwihala kitail. Ahpw, met dokedoke soahng koaros me Siohwa oh Sises pahn ketin wia pwe kitail en kak mour kohkohlahte.​—Ais. 35:5, 6.

¹⁹ Kitail kin kasikasik ahnsou kaselel wet. Ahpw ong ahnsouwet, kitail kamehlele me Siohwa ketin poakohng emenemen kitail oh ketin wehwehki ia atail pepehm ni atail kin lokolok. Duwehte Depit, kitail uhdahn kamehlele me ma kitail soumwahuda, Siohwa sohte pahn ketin likidmeliehla kitail. E pahn ahnsou koaros ketin apwalih irail kan me kin lelepek ong ih.​—Mel. 41:12.