1-3. (a) Dahme kahrehda sapwellimen Koht madamadau oh mahsen ileile sang ahn aramas akan? (b) Dahme kitail pahn sukuhlki nan iren onop wet?

 SIOHWA ketin kupwurki ehukihong meteikan mour oh peren, kahrehda e ketin kapikada tohnleng kan oh mwuhr aramas akan. (Mel. 36:9; 1 Tim. 1:11) Siohwa ketin tepin kapikada mehmeno me wahnpoaron Sohn kahdaneki “Mahseno.” (Sohn 1:1; Kaud. 3:14) Siohwa kin ketin mahmahseniong memenet, Sises, oh e ketin ehukihong ih sapwellime madamadau oh pepehm kan. (Sohn 1:14, 17; Kol. 1:15) Wahnpoaron Pohl nda me tohnleng kan pil kin koasoakoasoipene oh mie pein arail lokaia me uhdahn weksang ahn aramas.​—1 Kor. 13:1.

² Siohwa ketin mwahngih soahng koaros duwen tohnleng oh aramas lik lik kan me e ketin kapikada. E kak ketin karonge ahn aramas rar rar kei ar kapakap ni ahnsou ehute, oh e ketin wehwehki arail kapakap kan sohte lipilipil mehnia lokaia me re doadoahngki. Erein eh ketin rongorong kapakap pwukat koaros, Siohwa pil kin ketin wie mahmahseniong tohnleng kan oh kaukaweid irail. Pwehn  wia mepwukat koaros, sapwellimen Siohwa madamadau oh mahsen anahne ileile sang ahn aramas. (Wadek Aiseia 55:8, 9.) Eri ni eh kin ketin mahmahseniong aramas akan, e kin ketin kamengeila sapwellime mahsen kan pwe kitail en kak wehwehki.

³ Nan iren onop wet, kitail pahn sukuhlkihdi ia duwen Siohwa eh kin ketin mahmahseniong aramas akan ni sansal. Kitail pil pahn kilang ia duwen eh kin ketin wekidala mwomwen eh kin mahmahsen pwehn pahrekiong irair kan.

4. (a) Mehnia lokaia me Siohwa ketin doadoahngki pwehn mahseniong Moses, Samuel, oh Depit? (b) Dahme Paipel kin audaudki?

⁴ Ni ahnsou me e ketin mahseniong tepin ohlo, Adam, nan mwetuwel en Ihden, Siohwa ele ketin doadoahngki lokaiahn Ipru en mahs. Mwuhr, Siohwa ketin mahseniong ohl akan duwehte Moses, Samuel, oh Depit. Mendahki re ntingihedi pein arail lepin lokaia kan ni lokaiahng Ipru oh ni pein wiepen arail nting, re kin ntingihedi sapwellimen Koht madamadau. Irail ntingihedi mahsen kan me pein pwilisang Siohwa oh pil ntingihedi poadopoad duwen dahme wiawi nanpwungen Koht oh sapwellime kan. Karasepe, Paipel kilelehdi duwen arail pwoson oh limpoak ong Koht oh pil kin kilelehdi duwen arail sapwung kan oh ar salelepek. Ire pwukat koaros ntingdi pwehn wia kamwahupatail.​—Rom 15:4.

5. Ia duwe, lokaiahn Ipru iei ihte lokaia me Koht kin ketin doadoahngki ni eh kin mahmahseniong aramas akan? Menlau kawehwehda.

⁵ Siohwa sohte kin ketin ahnsou koaros mahmahseniong aramas akan ni lokaiahn Ipru. Ni ahnsou me mehn Israel kan ar saledekla sang Papilon, ekei irail kin lokaiahki lokaiahn Aramaik nan arail mour en ehuehu rahn. Mwein ihme kahrehda Daniel, Seremaia, oh Esra ar ntingihedi ekei pali kan nan Paipel ni lokaiahn Aramaik. *

6. Dahme kahrehda Palien Paipel ni Lokaiahn Ipru kawehwehdiong ni lokaiahn Krihk?

⁶ Alexander Lapalap mwuhr kalowehdi wasa tohto nin sampah, oh lokaiahn Krihk me adaneki Koine wiahla lokaia me sahpw tohto kin keieu doadoahngki. Mehn Suhs tohto tepida lokaiahki lokaiahn Krihk, oh kedekedeo Palien Paipel ni Lokaiahn Ipru kawehwehdiong ni lokaiahn Krihk. Kawehwe wet adaneki Septuagint. Met wia tepin kawehwehn Paipel oh wia ehu me keieu kesempwal. Me saman kan kamehlele me sounkawehwe 72 me kawehwehdi Septuagint. * Ekei irail kin kawehwe ehuehu lepin lokaia sang Palien Paipel ni Lokaiahn Ipru, ahpw meteikan sohte wia met. Mehn Suhs oh Kristian kan me kin lokaiahki lokaiahn Krihk kamehlelehte me Septuagint iei Mahsen en Koht.

7. Mehnia lokaia me Sises ketin doadoahngki pwehn padahki sapwellime tohnpadahk kan?

⁷ Ni ahnsou me Sises ketiket sampah, ele e kin ketin lokaiahki lokaiahn Ipru. (Sohn 19:20; 20:16; Wiewia 26:14) Ele e pil ketin doadoahngki ekei lokaiahn Aramaik me me tohto kin doadoahngki ahnsowo. Ahpw e pil ketin mwahngih lokaiahn Ipru en mahs me Moses oh soukohp kan doadoahngki. Dahme re ntingihedi ko kin wie wadawad nan sinakoke kan wihk koaros. (Luk 4:17-19; 24:44, 45; Wiewia 15:21) Oh mendahki aramas kin lokaiahki lokaiahn Krihk oh Latin ni mwehin Sises, Paipel sohte mahsanih ma Sises pil ketin lokaiahki lokaia pwukat.

8, 9. Dahme kahrehda Kristian tohto kin lokaiahki lokaiahng Krihk, oh dahme met padahkihong kitail duwen Siohwa?

 ⁸ Tepin sapwellimen Sises tohnpadahk kan kin lokaiahki lokaiahn Ipru, ahpw mwurin eh pwoula, sapwellime tohnpadahk ko lokaiahki lokaia teikan. (Wadek Wiewia 6:1.) Ni rongamwahwo eh kohpeseng, Kristian tohto lokaiahki lokaiahn Krihk a kaidehn Ipru. Pwehki lokaiahn Krihk iei me me tohto kin kalapw doadoahngki, pwuhk en Madiu, Mark, Luk, oh Sohn kohpeseng ni lokaiahn Krihk. * Oh pil, nein wahnpoaron Pohl kisinlikou kan oh pwuhk teikan nan Paipel ntingdi ni lokaiahn Krihk.

⁹ E mwahu en ese me ni ahnsou me sounnting kan en Palien Paipel ni Lokaiahn Krihk kin doadoahngki ire kan sang Palien Paipel ni Lokaiahn Ipru, re kin kalapw doadoahngki Septuagint. Ekei pak, ire pwukat ekis weksang uhdahn lokaiahn Ipru mahs. Eri doadoahk en sounkawehwe soh unsek pwukat wiahla kisehn Paipel me kitail naineki rahnwet. Met padahkihong kitail me Siohwa sohte kin ketin kilangwohng ehu lokaia de tiahk mwahusang ehu.​—Wadek Wiewia 10:34.

10. Dahme kitail sukuhlkihsang mwomwen Siohwa eh kin ketin mahmahseniong aramas akan?

¹⁰ Kitail sukuhlkier me Siohwa kin ketin mahmahseniong aramas akan nin duwen me konehng arail irair kan. E sohte ketin kasik kitail en lokaiahki lokaia tehieu pwehn esehla ih de kupwure kan. (Wadek Sekaraia 8:23; Kaudiahl 7:9, 10.) Kitail pil sukuhlkier me Siohwa ketin doadoahngki sounnting en Paipel kan, ahpw e ketin mweidohng irail en ntingihedi duwen sapwellime madamadau kan ni pein arail lokaia.

11. Dahme kahrehda aramas akan ar doadoahngki soangsoangen lokaia tohto sohte wia kahpwal ehu ong Siohwa?

¹¹ Aramas akan kin doadoahngki soangsoangen lokaia tohto, ahpw met sohte wia kahpwal ehu ong Siohwa. Ia duwen atail ese met? Paipel audaudki ekeite sapwellimen Sises mahsen kan ni uhdahn lokaia me e kin ketin doadoahngki. (Madiu 27:46; Mark 5:41; 7:34) Ahpw Siohwa ketin tehk mwahu me sapwellimen Sises mahsen kan ntingdi oh kawehwehdi ni lokaiahn Krihk oh mwuhr ni lokaia teikan. Pil ehu, pwehki mehn Suhs oh Kristian kan kin pak tohto pwurepwurehng ntingihedi Mahsen en Koht, sapwellime mahsen kan nekinekla. Mahsen pwukat uhd kawehwehdi ni lokaia tohto. Mpen sounpar 400 mwurin Krais, John Chrysostom nda me sapwellimen Sises padahk kan kawehwehdiong ni lokaiahn Siria, Isip, India, Persia, Idiopia, oh lokaia tohto teikan.

12. Ia duwen me tohto ar uhwongada Paipel?

 ¹² Erein poadopoad, me tohto kin uhwong Paipel oh irail kan me kawehwehda oh kihpeseng. Mpen sounpar 300 mwurin Sises ipwidi, Kaunen Rom Diocletian kehkehliki me Paipel kan koaros en sohrala. Mpen sounpar 1,200 mwuri, William Tyndale tepida kawehwehdi Paipel ni lokaiahn wai. E nda me ma Koht ketin kupwurki en mour werei, e pil pahn tehk mwahu me soumwet men pahn esehla Paipel laudsang pahdere men. Pwehki lokolok, Tyndale tangasang England kohla Iurop pwe en kak kawehwehdi oh wiahda nah Paipelo. Mendahki kaunen pelien lamalam kan song en isikala Paipel koaros me re kak diar, kawehwe me Tyndale wiahda kohpeseng rehn aramas tohtohie. Kedekedeo, Tyndale kamakamla oh isihsla pohn lepin tuhke pwoat. Ahpw eh kawehweo pitsang uhwong kan me kohsang kaunen pelien lamalam ko, oh kin kadoadoahk pwehn kaunopada kawehwehn Paipel me adaneki King James Version.​—Wadek 2 Timoty 2:9.

13. Dahme roporop en doaropwehn mahs akan en Paipel kasalehda?

¹³ E mehlel me mie kisin sapwung oh wekpeseng kei nanpwungen ekei Paipel en mahs kan me aramas pwurehng wiahda. Ahpw, sounsamanih Paipel kan kin ni keneinei onopki doaropwehn mahs kid kei, ire kan sang doaropwehn mahs kan, oh Paipel kan me kawehwehdi mahs. Mwurin arail tehkpene mepwukat, re diarada me mie kisin wekpeseng kan nan ekeite ire oh e sohte nohn laud. Ahpw dahme Paipel padahngki sohte wekila. Soangen roporop pwukat kin kamehlelehiong tohnsukuhl mehlel kan en Paipel me dahme irail naineki rahnwet iei sapwellimen Siohwa Mahsen.​—Ais. 40:8. *

14. Ia uwen eh mengeila en ale Paipel rahnwet?

¹⁴ Mendahki me tohto kin uhwong Paipel, e kawehwehdier ni lokaia daulih 2,800. Met tohtohsang pwuhk teikan me mie rahnwet. Mendahki aramas tohto sohte kin pwoson Koht, sapwellime Mahsen kin pousehlahte wia pwuhk ehu me kin keieu kohpeseng nan poadopoad. Mendahki ekei kawehwehn Paipel kan ar sohte nohn mengei en wadek de sohte nohn pwung, kereniong koaros kin kihda padahk mengei me pid koapworopwor oh mour soutuk.

15. (a) Ia duwen neitail sawaspen Paipel kan ar wekila sangete pahr 1919? (b) Dahme kahrehda neitail pwuhk kan kin ntingdi mahs ni lokaiahn wai?

¹⁵ Nan pahr 1919, ehu pwihn tikitik en tohnsukuhl en Paipel kan idihdda nin duwen “ladu lelepek oh loalokongo.” Ni ahnsowo, ladu lelepeko kin koasoakoasoiong sapwellimen Koht aramas akan keieu ni lokaiahn wai. (Mad. 24:45, NW) Ahpw rahnwet, sawaspen Paipel kan  wiawihdahr ni lokaia daulih 700. Duwehte lokaiahn Krihk mahs, me tohto met kin kalapw doadoahngki lokaiahn wai nan pesines kan oh sukuhl kan oh me tohto pil ese lokaiahki. Eri neitail pwuhk kan kin ntingdi mahs ni lokaiahn wai oh mwuhr kawehwehdiong ni lokaia teikan.

16, 17. (a) Dahme sapwellimen Koht aramas akan anahne? (b) Ia duwen anahn wet eh pweida? (c) Dahme Brother Knorr mwahuki en wiawi?

¹⁶ Koaros neitail pwuhk kan kin poahsoankihda Paipel. Keieu, sapwellimen Koht aramas akan kin doadoahngki King James Version me wiawihda nan pahr 1611. Ahpw, lokaia me mi nan pwuhk wet wia lokaiahn mahs oh e apwal en wehwehki. Mwaren Koht pwarada ekeite wasa, mendahki doaropwehn mahsie kan kin kasalehda mwareo pak kid kid kei. Pwuhk wet pil audaudki kawehwe sapwung oh re kapatahiong iretikitik kan me sohte dierek nan doaropwe kan en mahs mahsie. Kawehwe teikan en Paipel ni lokaiahn wai pil ahneki soangen kahpwal kohte.

¹⁷ E sansal me sapwellimen Koht aramas akan anahne kawehwehn Paipel ehu me pwung oh mengei en wehwehki. Eri pwihn me adaneki New World Bible Translation Committee wiawihda, oh riatail Kristian kan nan pwihn wet kihpeseng ekei pwuhk en Paipel kan sang pahr 1950 lel 1960. Tepin pwuhk nanpwungen pwuhk weneu kan me re wiahda kohpeseng ni mihting tohrohr ehu nan August 2, 1950. Ni mihting tohrohro, Brother Knorr nda me sapwellimen Koht aramas akan anahne kawehwehn Paipel ehu me pwung oh mengei en wehwehki oh me pahn sewese irail en esehla mwahu padahk mehlel. Re anahne kawehwe ehu me duwehte tepin nting ko me pein sapwellimen Krais tohnpadahk ko ntingihedi me mengei en wadek oh wehwehki. Dahme Brother Knorr mwahuki iei me kawehwehn New World Translation en sewese aramas rar rar kei en esehla Siohwa.

18. Dahme sewese kawehwehdi en Paipel?

¹⁸ Sang pahr 1963, dahme Brother Knorr mwahuki en wiawi pweida. New World Translation of the Christian Greek Scriptures kohda ni lokaiahn Dutch, French, Sehmen, Italy, Portuguese, oh Spanish. Nan pahr 1989, Pwihn me Kin Apwalih Mwomwohdiso nan Sampah Pwon wiahda wasa kapw ehu ni poasen kaun en Sounkadehdehn Siohwa kan pwehn sewese sounkawehwehn Paipel kan. Mwuhr nan pahr 2005, mweimwei kohwong sounkawehwe kan en kawehwehda Paipel ni lokaia kan me re pil kin doadoahngki ni arail kin kawehwe Kahn Iroir. Imwilahn met, New World Translation pwon de ekeite wasa miehier ni lokaia daulih 130 ahnsou wet.

19. Mwekid kesempwal dahieu me wiawi nan pahr 2013, oh dahme kitail pahn sukuhlki nan iren onop en mwuhr?

¹⁹ Ni ahnsou dower powe, lokaiahn wai kin wekiwekla oh e wiahla anahn ehu en wekidala lepin lokaia kan nan New World Translation. Ni imwin wihk en October 5 oh 6, 2013, aramas 1,413,676 sang sahpw 31 towehda de kilang nan kasdohn mihting tohrohr ehu en Watch Tower Bible oh Tract Society en Pennsylvania. Emen towe sang Pwihn me Kin Apwalih Mwomwohdiso nan Sampah Pwon pakairkihda kohpeseng en kawehwehn Paipel me kapw, New World Translation, ni lokaiahn wai. Aramas ako uhdahn perenkihda, oh me tohto sengiseng ahnsou me re alehdi pein neirail kawehwe kapw wet. Ni ahnsou me me wia padahko eh wadek ire kan sang kawehwe kapw wet, e sansal ong koaros me e mengeila en wadek oh wehwehki. Nan iren onop en mwuhr, kitail pahn kalaudehla atail sukuhlki duwen kawehwe kapw wet, oh pil ia duwen eh kawehwehdier ni lokaia teikan.