I ipwidi nan Paddington, kisin wasa ehu me aramas tohto kin kousoan ie nan London, England. I kin mi rehn ei nohno oh riei serepein laud silimen. Ei pahpao kin kohdo oh pwurehng kohkohsang kiht pwehki eh kahpwal en kamamsakau.

Ni ahnsou me I tikitik, ei nohno padahkihong ie en kin kapakap nipwong koaros. Mie nei Paipel ehu me audaudkihte pwuhken Melkahka kan, oh I kin wiahkihda ngilen keseng pwe ien kak koulki. I tamanda ei wadek lepin lokaia kei nan ehu nei pwuhk me tengediong nan moangeiet: “Ehu rahn e pahn sohte lakapw.” Koasoi pwukat kahrehiong ei kin wonohn nipwong kan oh medemedewe duwen ni ahnsou kohkohdo. I kin medewe, ‘Uhdahn e pahn mie kahrepen mour me mwahusang met. Dahme kahrehda I mihmi wasaht?’ I sohte men mehla!

I tepida kin medewe duwen wunahni. I kin song en koasoiong me melahr kan, iang iengei tohnsukuhl kan kohla ni sousou kan, oh iang irail kilang kasdo kamasepwehk kan. Se kin medewe me e kaperen oh pil ni ahnsowohte kamasepwehk.

I tepida wiahla seri ketihwo men ni ahnsou me I sounpar eisek. I kin tepida iang simoak sika, oh I mwadangete sohla kak uhdihsang. Mwuhr, I tepida simoak maru. Ni ahnsou me I sounpar 11, I tepida song sakau en wai. I perenki ei kin sakaula, mendahki ei sohte iouki nemenemen sakau. I pil kin perenki rong koul oh kahlek. I kin kohla ni kisin kamadipw kan oh kohla wasahn sakau kan ni ahnsou me I kak. I kin waiiei nipwong kan oh pwurehng wailong nan imwato mwohn eh rahnpeseng. Mwurin rahno I kin pwangada oh kalapw tangasang sukuhl. Ahnsou me I kin iang sukuhl, I kin kalapw nim sakau ahnsou me I kin mi likin perehn sukuhl kan.

I alehdi deng sakanakan ni kaimwiseklahn pahr en sukuhlo. Ei nohno lingeringerkihda oh nsensuwedkihla met, ahpw e sehse pali laud en ei ketihwo kan. Se akamaikihda met, ngehi eri kohkohlahsang imwato. Erein ahnsou kis, I kin mihmi rehn Tony, pwutak men me I kin ieiang. Tony kin iang pelien lamalam ehu me adaneki Rasta. E kin iang wia tiahk mwersuwed tikitik kan oh netiki wini en kasahliel oh e ndandki emen me uhdahn lemei. Ngehi eri liseianda, oh ni ahnsou me I sounpar 16 I naitikidi nait pwutako.

I tuhwong Sounkadehdehn Siohwa kan ni ahnsou me I kin mi nan ihmw ehu ong lih me sohte pwopwoud oh naineki seri kan. Irail kan me kin apwalih wasao kihong ie pere ieu me I kak mi loale. Lih riemen me iang Sounkadehdehn Siohwa kin kalapw mwemweitla rehn nohno pwulopwul teiko. Ehu rahno I iang irail koasoia duwen Paipel. I uhdahn men kasalehiong irail me Sounkadehde ko sapwung. Ei peidek tohto ahpw ira sapengala koaros ni kamantik oh sansal sang nan Paipel. Ira uhdahn kadek, kahrehda I men koasoiong ira. Eri I pwungkihda en onop Paipel rehra.

Mwuhr I sukuhlki mehkot sang nan Paipel me wekidala ei mour. Sangete ahnsou me I pwulopwul I kin masak me I pahn mehla. Ahpw met I wehwehkidahr sapwellimen Sises padahk duwen kaiasada! (Sohn 5:28, 29) I pil sukuhlki me Koht kin ketin nsenohkin ie. (1 Piter 5:7) I uhdahn mwekidki mahsen kan nan pwuhken Seremaia 29:11, me mahsanih: “‘Ngehite me mwahngih koasoandi kan ong kumwail, koasoandien kapaiakumwailda, ahpw kaidehn en kahpwalihkumwaila, koasoandi kan en ahnsou kohkohdo kan me kumwail kasikasik.’” I tepida kamehlele me I kak ahneki koapworopwor en kousoan nan paradais nin sampah kohkohlahte.​—Melkahka 37:29.

Sounkadehdehn Siohwa ko kasalehiong ie limpoak mehlel. Ni ahnsou me I tepida iang towehda ehu arail mihting ko, aramas ako kin limpoak oh kadek, koaros kin ese kasamwo meteikan! (Sohn 13:34, 35) Met uhdahn weksang dahme I kin kilang nan imwen sarawi me I kin iang towehda. Sounkadehde ko kasamwo ie mendahki ei irair kan. Irail kin kihong ie ahnsou, apwalih oh tehk ie, oh pil kihong ie sawas kan me I anahne. I pehm me I wia kisehn peneinei limpoak laud ehu.

Sang ei onop Paipel, I tehkada me I anahne wiahda wekidekla kan nan ei mour pwehn pahrekiong sapwellimen Koht kosonned kan me pid wiewia. E apwal ong ie en uhdihsang simoak sika. Pil ni ahnsowohte, I tehkada me ekei koul kan kin kalaudehla ei ineng en men simoak maru, eri I wekidala koul kan me I kin rong. Pwehki I sohte men sakaula, I sohla kin kohla ni kisin kamadipw kan oh wasahn sakau kan, wasa me I kin alehdi kasongosong en sakaula. Oh I kompoakepahnkihla aramas ekei me kin kangoange ie nan ei elen mour kapw.​—Lepin Padahk 13:20.

Erein ahnsowo, Tony pil iang onop Paipel rehn Sounkadehdehn Siohwa kan. Ni Sounkadehde ko ar kin sapengala eh peidek kan sang nan Paipel, e pil kamehlelehda padahk mehlel me e sukusukuhlki. E wiahda wekidekla laud kan nan eh mour: e uhdihsang patehng aramas lemei kan, uhdihsang eh tiahk en mwersuwed tikitik kan, oh sohla simoak maru. Pwehn kalaudehla at kaperenda Siohwa, kiht koaros kilang anahn en wekidala at elen mour suwed oh kakairada nait pwutak nan mour mwahu. Se pwopwoudla nan pahr 1982.

I tamataman ei rapahki ire kan sang Kahn Iroir oh Awake! a me pid duwen koasoipen aramas akan me pweida ni ar wiahda wekidekla kan me I men wiahda. Arail mehn kahlemeng mwahu kan uhdahn kangoange ie! Met kakehlaka ie en nanti laud oh sohte uhdi. I kin kaukaule kapakapohng Siohwa en dehr uhdihsang sewese ie. Ngehi oh Tony papidaisla nin duwen Sounkadehdehn Siohwa kei nan July 1982.

Kakairada nanpwungmwahu rehn Siohwa Koht doarehla ei mour. Ngehi oh Tony pil kehner sapwellimen Siohwa sawas nan ahnsou apwal akan. Se esehla likih Koht nan ahnsou apwal akan, oh se pehm me e kin ketin ahnsou koaros sawas oh apwalih at peneinei.​—Melkahka 55:22.

I uhdahn perenki ei sewese nait pwutak oh serepeino en esehla Siohwa duwehte dahme I wia. Met I pil kin perenkihda ni ei kilang neira seri kan ar kin kakairada arail esehla Koht.

I sohla kin wonohn nipwong kan oh pwunpwunodiki duwen ahnsou kohkohdo de mehla. Ngehi oh Tony kin kedirepwki at kin seiseiloakseli ni soangsoangen mwomwohdiso kan en Sounkadehdehn Siohwa kan ehuehu wihk pwehn kangoange irail. Se kin iang irail padahkihong meteikan me ma re pahn pwoson Sises, irail pil kak iang paieki mour soutuk.