Kisin serepein kis kilangada ediniei kohkohdahsang nan paip en wasahn doadoahk ehu oh wiahla mwomwen depwek pwonopwon. Ih eri medewe me wasahn doadoahko kin wiahda depwek. Soangen sawehwe tikitik ehu me seri men kin ahneki kak kemehnkouruhr. Ahpw, sawehwe laud ehu kak kamwakid atail mour. Karasepe, ma ke wadek nting me mi pohn pwoatol en wini ehu ni sapwung, kak kahrehda kahpwal laud.

Sawehwe kan me pid Paipel pil uhdahn kesempwal. Karasepe, ekei aramas sohte wehwehki sapwellimen Sises padahk kan. (Sohn 6:48-68) Pwehki re sohte kin men pousehlahte rong, re soikala soahng koaros me Sises ketin padahngki. Ia uwen arail katihasang rohng mwahu pwukat!

Ke kin wadek Paipel pwehn kaweid uhk? Met uhdahn kaselel. Mie keperpen omw sohte pahn ahneki wehwe pwung ni omw wadek Paipel? Met kin wiawihong aramas tohto. Tehk sawehwe siluh me pali tohtohn aramas sohte wehwehki.

• Ekei aramas sohte wehwehki ni Paipel eh kehkehlingki en “lemmwiki Koht.” Irail kin medewe me met wehwehki en uhdahn masak Koht. (Eklesiasdes 12:13) Ahpw Koht sohte kupwurki irail kan me kin kaudokiong ih en ahneki soangen pepehm wet ong ih. E mahsanih: “Kumwail dehr masak, pwe I kin ieiang kumwail. Kumwail dehr perki mehkot, pwe ngehi me amwail Koht. I pahn kin kakehlakei kumwail oh sewesei kumwail.” (Aiseia 41:10) En lemmwiki Koht kin uhdahn wehwehki en wauneki ih mehlel.

• Ekei aramas sohte kin wehwehki mahsen pwukat ni arail kin wadek sang nan Paipel: “Soahng koaros me kin wiawi nin sampah wet kin wiawi ni ahnsou kan me Koht ketin koasoanehdi. . . . ahnsoun ipwidi oh ahnsoun mehla.” Irail kin medewe me Koht ketin koasoanehdier iahd me emenemen aramas pahn mehla. (Eklesiasdes 3:1, 2) Ahpw, iretikitik wet kin koasoakoasoia mwomwen mwekimwekid en mour oh me mehla kin kalapw wia imwilahn atail mour. Mahsen en Koht pil kin padahngki me atail pilipil kan kak kahrehiong atail mour en werei de mwotomwot. Karasepe, kitail wadek: “Lemmwiki KAUN-O, ke ahpw pahn mour werei.” (Lepin Padahk 10:27; Melkahka 90:10; Aiseia 55:3) Ia duwen? Karasepe, wauneki Mahsen en Koht pahn kamwakid kitail en soikala wiewia kan me sohte mwahuong atail roson duwehte kamamsakau oh tiahk samin.—1 Korint 6:9, 10.

• Ekei kin medewe me ni ahnsou me Paipel mahsanih me nanleng oh sampah “pahn ohkihla kisiniei” kin wehwehki me Koht pahn ketin kauwehla sampah wet. (2 Piter 3:7) Ahpw Koht ketin inoukihda me e sohte pahn ketin kauwehla sampah wet. Koht “ketin koasoanehdi teng sampah pohn poahsoane, oh e sohte mwahn pahn mwekid kohkohlahte.” (Melkahka 104:5; Aiseia 45:18) Kaidehn sampah wet me pahn ohla, ahpw koasoandi suwed en sampah wet me pahn sohrala soutuk, duwehte eh ohkihla kisiniei. Ahpw nanleng, wehwehn lepin lokaia wet kak wehwehki nan wehwe, lahng me diren usu, de sapwellimen Koht wasahn kousoan. Mepwukat sohte pahn ohla.

Nin duwen omw kilang karasepe pwukat, aramas akan kalapw sohte wehwehki ire kan me re kin wadek sang nan Paipel. Ahpw dahme kahrehda Koht ketin mweidohng met en wiawi? Ekei ele pahn medewe: ‘Ma Koht erpit oh mwahngih soahng koaros, e kak ketikihong kitail pwuhk ehu me uhdahn sansal me koaros pahn kak mengei en wehwehki. Dahme kahrehda e sohte wiahki met?’ Tehk kahrepe siluh me kasalehda dahme kahrehda aramas kalapw sohte wehwehki Paipel ni ahl pwung.

1. Paipel wiawihda pwe irail me aktikitik kan oh me men sukuhlki en wehwehki. Sises mahsanihong Semeo: “Maing Semei, Kaun en nanleng oh sampah! I kapingahkin komwi omwi ketin ekihsang soahng pwukat me loalokong oh koahiek en sampah kan, ahpw ketin kasalehiong [“seri kan,” NW].” (Luk 10:21) Paipel ntingdi ni ahl ehu me kahrehda  irail kante me ahneki irair en madamadau pwung pahn wehwehki rohng kan loale. Irail “me loalokong oh koahiek en sampah kan” kin kalapw aklapalap, kahrehda re kin kalapw wehwehki Paipel ni ahl sapwung. Ahpw aramas me ahneki madamadau en “seri kan” kin aktikitik oh men sukuhlki mehkot. Soangen aramas pwukat kin paiekihda arail kak wehwehki mwahu rohng en Koht ni arail wadek Paipel. Ia uwen Koht eh ketin wiahda Paipel ni elen loalokong!

2. Paipel wiawihda ong aramas akan me uhdahn men ale sapwellimen Koht sawas pwehn wehwehki. Sises ketin kasalehda me aramas pahn anahne sawas pwehn wehwehki mwahu dahme e ketin padahngki. Ia duwen ar pahn alehdi? Sises ketin kawehwehda: “Sounsawaso, [“sapwellimen Koht manaman,” NW] me Semei pahn poaronehdo ni edei, iei ih me pahn kawehwehiong kumwail mehkan koaros.” (Sohn 14:26) Eri Koht kin ketikihda sapwellime manaman pwehn sewese aramas akan ren wehwehki dahme irail wadek nan Paipel. Ahpw, Koht sohte kin ketikihong sapwellime manaman ong irail kan me sohte kin likih sapwellime sawas, eri Paipel kin kalapw sohte wehwe ong irail. Sapwellime manaman pil kin kamwakid Kristian kan me ahneki wehwe laud ren sewese irail kan me kin men kalaudehla arail wehwehki.​—Wiewia 8:26-35.

3. Ekei iren Paipel kan kak wehwehiong aramas ihte ni ahnsou me konehng nan poadopoad. Karasepe, soukohp Daniel alehdi kehkehlik en ntingihedi rohng ehu ong ahnsou kohkohdo. Tohnleng men mahsanihong ih: “Daniel, pahkpene pwuhken oh kihdiong ehu mehn keteng lao lel ni ahnsou me sampah pahn imwisekla.” Erein sounpar tohto kan, aramas tohto wadekehr pwuhken Daniel ahpw re sohte kak wehwehki mwahu. Ni mehlel, pein Daniel sohte wehwehki dahme e ntingihedi ko. Ni aktikitik e wehkada: “I rong dahme e mahsanih, ahpw I sohte wehwehki.” Kedekedeo, aramas pahn wehwehkihla ni pwung sapwellimen Koht kokohp me Daniel ntingihedi, ahpw ihte nan ahnsou ieu erein poadopoad me Koht ketin koasoanehdier. Tohnlengo kawehwehda: “Ke pahn mweselier met kohkohla, Daniel, pwehki mahsen pwukat pahn wie nekinek ni rir lao lel ni imwilahn ahnsou.” Ihs me pahn wehwehki sapwellimen Koht rohng kan? “Me suwed kan sohte pahn dehdehki, . . . irail kante me kupwurokong me pahn dehdehki.” (Daniel 12:4, 8-10) Eri Koht sohte kin ketin kasalehda wehwehn ekei iren Paipel kan lao lel ahnsou me e ketin koasoanehdi.

Ia duwe, mie pak me ahnsawi saik lel me kahrehda Sounkadehdehn Siohwa kan sohte ahneki wehwe pwung duwen Paipel? Ei. Ahpw ni ahnsowo me Koht ketin koasoanehdio leledo pwehn kasalehda soahng kan ni sansal, Sounkadehde ko mwadangete kapwungala dahme re wehwehki. Ni ahl wet irail kamehlele me irail kin kahlemengih sapwellimen Krais wahnpoaron ko, me kin ni aktikitik wekidala arail madamadau ahnsou koaros me Sises kin ketin kapwungala irail.​—Wiewia 1:6, 7.

En kisin serepeino madamadau sapwung me pid duwen ia wasa depwek kan kin kohsang ie ele wiahte sawehwe tikitik ieu. Ahpw, dahme Paipel kin padahngki uhdahn kesempwal ong uhk. Rohng me mi nan Paipel uhdahn kesempwal. Sohte me kak kelehpw wehwehkihla Paipel sang ni eh kin pein wadek. Eri rapahki sawas pwehn wehwehki dahme ke wadewadek. Rapahki irail kan me kin aktikitik ni arail onopki Paipel, aramas akan me kin likih sapwellimen Koht manaman pwehn kak wehwehki Paipel, aramas akan me kamehlele me kitail wie momour ni ahnsowo me Koht kupwurki kitail en wehwehki Paipel laudsang mahso. Dehr pweiek en koasoiong Sounkadehdehn Siohwa kan de wadek roporop kan me re wiahda ni keneinei nan website jw.org. Paipel inoukihda: “Peki loalokong oh peki erpit . . . ke pahn pweida ni omw pahn padahngki duwen Koht.”​—Lepin Padahk 2:3-5.