I tikida limwahn Puerto Limón, kahnimw ehu me mi ni oaroahr en palimesehn Costa Rica. Ei pahpa nohno naineki seri welimen, oh ngehi me keiisimen. Ei pahpao mehla ni ei sounpar waluh. Mwurin mwo, ei nohno kelehpw apwalihada kiht seri kan.

I kin ahnsou koaros perenki iakiu. Sangete ni ei tikitik I kin perenki mwadong wet. Ni ahnsou me I sounpar eisek samwa, I kin iang pwihnen mwadong ehu me sohte kin wiahda mwohni. Ni ahnsou me I sounpar 20 samwa I kin ieiang pwihn wet mwadong, oh emen ohl peki rehi ien iang mwadongki arail pwihnen mwadong nan Nicaragua. Ahpw, pwehki ei nohno kin soumwahu ahnsowo oh ngehi me kin apwahpwalih, I sohte men kohla koukousoan nan Nicaragua. Eri I nda me I sohte pahn iang irail. Mwuri, pil emen ohl luke ie en iang mwadongki pwihnen iakiu en Costa Rica, pwihn wet pilipilda sang pwihn koahiek en mwadong kan. Met, I pwungkihda oh iang irail. I kin ieiang pwihn me kin wiliandi ei wehi sang nan pahr 1949 lel 1952, oh I kin iang siai nan mwadong kan nan Cuba, Mexico, oh Nicaragua. I kin mi ni pehs oh I kin maiong wia met, mie pak me se wia mwadong 17 oh I sohte kin wiahda sapwung ehu. I perenki rong pokono ar kin ndinda edeie!

E kansensuwed pwehki I pil tepida iang wia tiahk samin kan. Mendahki mie emen ei serepein, I kin iangada ekei lih. I pil kin nim sakau laud. Ehu rahno I uhdahn sakaula, eri ni ahnsou me I pwourda mwurin rahno, I sohte kak tamataman ia mwomwen ei pwurodo ni imweio! I pil kin pilein mwohni oh kalapw pwainda nei ticket en paiamwahu.

Ni ei kin wiewia soangen mour pwukat, ei nohno wiahla emen Sounkadehdehn Siohwa. E kin song en kahrehiong ie en men iangala eh pwoson, ahpw met sohte pweida, pwehki I uhdahn kin perenki ei mwadongo. Ma I kin mihmi nan mohso praktis ni ahnsoun mwenge, I sohte kin kehn men mwenge! I kin medemedewehte duwen iakiu. I perenki iakiu laudsang soahng teikan koaros!

Ahpw, ni ahnsou me I sounpar 29, I lelohng ohla laud ehu pwehki ei songosong daperedi mpweio erein ahnsoun mwadong ehu.  Mwurin ei mwahula, I sohla iang mwadongki ei wehi. Ahpw, I kin iangete pidada pwihnen iakiu kan sang ni ei kin kasukuhlih sounmwadong kan me sohte kin wiahda mwohni me karanih imweio.

Nan pahr 1957, I alehdi luhk ehu en iang towehda mihting tohrohr en Sounkadehdehn Siohwa kan me wiawi nan wasahn mwadong ehu me I iangehr iakiu loale. Ni ei mwomwohd nan pokono, I tehkada wekpeseng en tiahk mwahu me I kilang rehn Sounkadehde ko oh wiewia suwed kan me I kin kilang rehn aramas akan me kin kilang iakiu. Dahme I kilang nan mihting tohrohro kamwakid ie en tepida onop Paipel rehn Sounkadehde kan oh iang towehda arail mihting en mwomwohdiso kan.

I pwuriamweiki padahk en Paipel tohto me I sukuhlkihdi. Karasepe, Sises ketin kohpada me ni imwin rahn akan, sapwellime tohnpadahk kan pahn kalohkiseli rohng mwahu en Wehin Koht nan sampah pwon. (Madiu 24:14) I pil sukuhlkihdi me Kristian mehlel kan sohte kin wia arail doadoahk en kalohk ni ar kin ale pweipwei. Sises mahsanih: “Nin duwen amwail aleier nin sohte pweipwei, kumwail pil kihwei nin sohte pweipwei.”—Madiu 10:8.

Ni ei onopki Paipel, I kapahrekiong dahme e mahsanih ong dahme I kin kilang rehn Sounkadehdehn Siohwa kan. I kapingahki ar kin doadoahk laud en lohkipeseng rohng mwahu en Wehin Koht nan sampah pwon. I kilang ar kin perenki toukihda pein irail duwehte dahme Sises ketin kehkehlikihong Kristian kan ren kasalehda. Eri ni ei wadek Mark 10:21 oh kilang sapwellimen Sises luhko, “Kohdo oh iangiehla,” kahrehiong ie en men wiahla Sounkadehde men.

Ahpw, I anahne ahnsou kei, pwe ien uhdahn kak wiahla emen. Karasepe, sounpar tohto I kin iang wiahda nei ticket en “paiamwahu” nan ehuehu wihk. Ahpw, I sukuhlkihdi nan Paipel me Koht kin ketin kadeik tohnkaudok en “koht kan en paiamwahu oh paisuwed” oh pil aramas noahrok kan. (Aiseia 65:11; Kolose 3:5) Eri I medewehda en uhdihsang pilein mwohni. Tepin rahn sarawi mwurin ei sohla iang wiahda nei ticket en “paiamwahu”, nei ticketo me pweida! Aramas akan kapailoke ie pwehki ei sohte men iang pilein mwohni nan wihko, oh irail uhdahn ngihtehtehkiong ie en pwurehng iang pilein mwohni, ahpw I sohte dukiong irail. I sohte pwurehng iang pilein mwohni.

I pil lelohng ehu kasongepen ei wiahla “aramas kapw”, ni rahnohte me I papidaisla ni mihting tohrohr en Sounkadehdehn Siohwa kan. (Episos 4:24) Ni soutiko, I pwurala ni ei hotelo oh diarada ei serepein en mahso eh awiawih ie likin ei wenihmwo. E ndaiong ie, “Doulongodo, Sammy. Kita pahn ahneki ahnsou mwahu!” Ahpw I mwadangete sapeng ih, “Soh!” I katamankihong ih me met I kin mourki kaweid kan en Paipel. (1 Korint 6:18) E nda, “Dah?” Ih eri nda me dahme Paipel mahsanih duwen tiahk samin me pid wia nsenen pwopwoud sohte katepe oh e ngihtehtehki sen pwurehng ehuda. Ahpw, I doulongalahte nan ei pereo oh loakehdi wenihmwo. Rahnwet, I perenki ei kak nda me sangete ni ei wiahla Sounkadehde men nan pahr 1958, I kin ni lelepek kolokolete wekidekla kan me I wiahda nan ei mour.

I pehm me I kak ntingihada pwuhk ehu duwen kapai kan me I alehdi sang ei kin idawehn kaweid en Paipel kan! Ekei kapai pwukat iei me met I ahneki kompoakepah mehlel kan, mour ehu me uhdahn mie katepe, oh nsenamwahu mehlel.

I kin perenkihte iakiu, ahpw I wekidalahr soahng kan me I kin kesempwalki. Nan iakiu I kin alehdi adamwahu oh mwohni, ahpw mepwukat sohte kin mihmi werei. Ahpw, ei nanpwungmwahu rehn Koht oh ei wia kisehn pirien en Kristian pahn mihmi kohkohlahte. Paipel mahsanih: “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:17) Met I poakohng Siohwa Koht oh sapwellime aramas akan laudsang soahng teikan koaros!