Mie mehn kadehde me sansalda sang irail me kin roporopki poadopoad en aramas me kin utung soahng kan me kileldi nan Paipel? Nan pahr 2014 mie ire ieu nan makasihn ehu Biblical Archaeology Review koasoia duwen peidek wet: “Aramas depe nan palien Paipel en Ipru me roporop kadehdehda me mehlel?” Pasapengo iei: “Meh 50 de tohtohsang!” Emen ohl me sohte pwarada nan ahd pwukat me kileldi nan ireo iei Tattenai. Ihs ih? Kitail pahn tehkpene pwukoa kan me e kin wia me Paipel kasalehda.

Mahso Serusalem kin wia kisehn Wehin Persia. Kahnimwo kin mihmi nan wasa ehu me mehn Persia kan kin kahdaneki Palio Pillapo, me iei, palikapi en Iupreitis. Mwurin ar kalowehdi Papilon, mehn Persia kan kasaledekala mehn Suhs kan me kolokoldi oh kihong irail manaman en pwurehng onehda sapahl tehnpas en Siohwa nan Serusalem. (Esra 1:1-4) Ahpw, imwintihti en mehn Suhs ko uhwongada arail doadoahko oh kin kose me mehn Suhs ko kin uhwong mehn Persia kan ni arail kakauwada tehnpas sarawio. (Esra 4:4-16) Erein kaundahn Darius I (522-486 Mwohn Krais), emen kaun en Persia me adaneki Tattenai tehk duwen ire wet. Paipel kin kahdaneki ih “kepinahn Palikapi-en-Iupreitis.”​—Esra 5:3-7.

Ekei soangen takai me mi nan kilel wet kin kasalehda ahd wet Tattenai, takai ko mwamwahute pwehki peneinei ehu me mwein nekidala. Takaio me kasalehda eden emen kisehn peneinei wet me pil pwarada nan Paipel iei mehn kadehde en palien pesines me wiawihda ni kariesek en pahr en Darius I, pahr 502 Mwohn Krais. E kin kasalehda sounkadehde men ong dahme wiawio me iei lidu en “Tattannu, kepinahn Palio Pillapo”, ih ohlohte met Tattenai, me pwarada nan pwuhken Paipel en Esra.

Ia en ohl menet eh pwukoa? Nan pahr 535 Mwohn Krais, Sairus Lapalap pwurehng koasoanehdi sahpw kan me e kin kaunda ong wasahn kousoan, oh ehu me adaneki Papilon oh Palio Pillapo. Mwuhr wasahn kousoano pwalpeseng wiahda wasa riau, eri ehu nanpwungara me adanekihla Palio Pillapo. E kin iangahki Coele-Syria, Penisia, Samaria, oh Suda oh ele sapwen Damaskus me kin kakaun irail. Tattenai kin kakaun wehi wet ele sang nan pahr 520 lel 502 Mwohn Krais.

Mwurin eh seiloaklahng Serusalem pwehn tehk duwen rongen uhwongo, Tattenai ripohtkihong Darius me mehn Suhs ko dene me irail alehdi mweimwei sang Sairus pwehn pwurehng onehda sapahl sapwellimen Siohwa tehnpaso. Petehkpen doaropwe kan me mi nan tehnpesen nanmwarkio kasalehda me dahme mehn Suhs ko nda me mehlel. (Esra 5:6, 7, 11-13; 6:1-3) Eri Tattenai alehdi kehkehlik en dehr kauhiraildi, oh e peikiong kehkehliko.​—Esra 6:6, 7, 13.

Ni mehlel, “Tattenai, kepinahn Palikapi-en-Iupreitis” sohte wiahda mehkot kesempwal nan poadopoad. Ahpw, tehk me Paipel koasoia duwen ih oh kihong ih daidel ehu me uhdahn pwung. Ire mehlel wet kihong kitail pil ehu mehn kadehde me roporop kin kalapw kasalehda me poadopoad en Paipel kin pwung.