Soangen kisakis keieu kaselel dah me ke kak kihong noumw seri? Mie soahng tohto re kin anahne, iangahki omw limpoak, kaweid, oh pere irail. Ahpw nanpwungen mepwukat koaros, kisakis me keieu kesempwal me ke kak kihong irail iei ren sukuhlki duwen Siohwa oh me mehlel kan me dierek nan sapwellime Mahsen, iei Paipel. (Sohn 17:3) Soangen loalokong wet kak sewese noumw seri en kekeirda poakohng Siohwa oh papah ih sang nan arail mohngiong unsek, pil sangete ni arail tikitik.​—Madiu 21:16.

Tohto pahpa nohno kan kin diarada me kisin seri kin keieu perenki mehn kasukuhl mwotomwot kan oh kisin soahng kaperen kan me re kak wia. Eri, se perenki kihda kisin pwuhk wet, me adaneki Nei Mehn Kasukuhl kan Sang nan Paipel. Ehuehu mehn kasukuhl kan wiawihda pwe ken kasukuhlih noumw seri ni ahl mengei. Kilel kan oh nting kan me mi loale wiawihda keieu ong seri me sounpar siluh oh tikitiksang. Mie kisin soahng kaperen kan me re pil kak wia. Nei Mehn Kasukuhl kan Sang nan Paipel kaidehn mehn mwadong ong seri. Ahpw, e wiawihda pwe kowe oh noumw seri en wadekpene. Met pahn sewese amwail kin koasoakoasoipene.

Se kamehlele me pwuhk wet pahn wia mehn sawas mwahu ni omw pahn padahkihong noumw seri padahk mehlel en Paipel sangete ni arail “kisin seri.”​—2 Timoty 3:14, 15.

Riamwail kan,

Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan