Dahme kahrehda Sehdan oh nah ngehn saut akan kin doadoahk laud pwehn pitih aramas? Pwehki irail men kitail en iang irail uhwong Koht. Irail men kitail en kaudokiong irail. Irail men kitail en kamehlele arail likamw kan oh wia soahng kan me Siohwa kin ketin kalahdeki. Wiewia pwukat kin kalapw pid tiahk en mehla.

Mehlahn emen me kitail poakohng kin uhdahn kansensuwed oh e pwung oh konehng kitail en kasalehda atail nsensuwed. Sises “ketin tentenihr” mwurin kompoakepah Lasarus mehla.​—Sohn 11:35.

Mie tiahk en mehla tohto oh tiahk pwukat kin wekpeseng nan ehuehu wasa. Ekei sohte kin uhwong padahk en Paipel kan. Ahpw ekei tiahk pwukat kin poahsoankihda madamadau me dene me melahr akan kin momour oh kak kilang kitail. Pehdinpwong, mwahiei daulihala, oh wia lapalahn doadoahk ong mehla, kin poahsoankihda arail masak re de kansensuwedihala ngenen me melahr akan. Ahpw pwehki me melahr akan “sohte ese mehkot,” wiewia pwukat kin utung en Sehdan eh likamw kan.​—Eklesiasdes 9:5.

 Ekei tiahk kin kohsang madamadau me dene me melahr akan anahne sawas sang irail me momour oh re pahn kamedekihala me momour kan ma re sohte kaperenda irail. Nan ekei sahpw kan, kamadipw oh wiahda meirong kan kin wiawi erein rahn 40 de sounpar ehu mwurin mehlahn aramaso. Irail kin nda me met pahn sewese me melahro en kohla nan wasahn ngehn akan de kaperenda ih. Pil ehu me irail kin kalapw wia iei en kihong me melahro mwenge oh pihl.

Wiewia pwukat sapwung pwehki re kin utung en Sehdan eh likamw kan me pid me melahr akan. Ia duwe, Siohwa pahn ketin kupwurperenki atail iang pidada tiahk kan me kohsang padahk en ngehn saut akan? Uhdahn Soh!​—2 Korint 6:14-18.

Sapwellimen Siohwa ladu mehlel kan sohte kin iang tiahk kan me kin utung en Sehdan eh likamw kan. Ahpw irail kin nantihong sewese me momour kan oh kamweit irail. Irail ese me ma emen kin mehla, Siohwa kelehpw  me kak ketin sewese ih.​—Sohp 14:14, 15.

Ekei aramas kin koasoiong de karanih ngehn saut akan, oh ekei kin doadoahngki sounkapwour eni kan pwehn wia met. Met iei tiahk en wunahni. Katieni, akmanaman, kosetipw, oh song koasoiong me melahr akan, mepwukat koaros kin wia kisehn tiahk en wunahni.

Paipel kin keinapwih kitail sang mepwukat oh mahsanih: “Kumwail . . . dehr mweidohng amwail aramas akan en wia soangen tiahk me duwehte kosetipw, pweh, wunahni de mesehl, oh dehr mweidohng re en kin katieni. KAUN-O, amwail Koht, kin ketin kalahdeki aramas me kin wia soangen tiahk suwed pwukat.”​—Deuderonomi 18:10-12.

Dahme kahrehda Siohwa kin ketin kaleke kitail sang wiewia pwukat?

 Siohwa kin ketin kaleke kitail sang soangen tiahk en wunahni koaros pwehn wia kamwahupatail. E ketin poakohng oh nsenohki aramas, oh e ketin mwahngih me irail kan me kin koasoiong de karanih ngehn saut akan pahn lelohng kahpwal kan.

Karasepe, Nilda kin wia emen sounkapwour eni nan Brazil. Ngehn saut akan kahrehda eh mour en inenen apwal. E koasoia: “Ngehn pwukat . . . tiahda pohi oh kauniehda. Ekei pak I kin ese dahme I wiewia oh ekei pak I kin lipwongmas, oh I anahne kohla ni imwen wini pwehki I tepida sahliella. Ngehn saut akan kin kaloke ie laud kahrehda I ahneki kahpwal wet. I kin kang wini oh tepida kang sakau en wai oh kin kalapw simoak. Met kin wiawi erein sounpar kei.”

Mwuhr, Nilda ale sawas sang Siohwa oh sapwellime Sounkadehde kan, oh saledekla sang ngehn saut akan. Ahnsouwet e kin mour nsenamwahu. E koasoia: “I men kangoange koaros ren dehpa iang pidada [ngehn] suwed kan, mehnda ma kisin ahnsoukis.”