Paipel mahsanih me Sehdan kin “pitipitih sampah pwon.” (Kaudiahl 12:9) Sehdan oh ngehn saut akan sohte men kitail en kamehlele Mahsen en Koht, iei Paipel. Re kin song wiahiong aramas en kamehlele me me melahr akan kin momour nan wasahn ngehn akan. Kitail pahn kilang ia duwen arail kin wia met.

Pelien lamalam tohto kin padahngki me mie ngehn nan aramas me kin momour mwurin mehla. Re kin nda me ahnsou me aramas men mehla, ngehno kin momour oh kohla wasa me me melahr akan kin mi ie.

Ahpw Mahsen en Koht sohte kin padahngki met. Karasepe, Paipel kin kawehwehda kepikipikdahn Adam ni ahl wet: “KAUN-O Koht eri ketikihda nesen pwehl ehu sang nanpwel oh ketin wiahkihla war ehu me mwomwen aramas. E ahpw ketikihong ni waro angin mour; ni ahnsowohte mour ahpw miehla ni paliweren aramaso.” (Senesis 2:7) Eri, Koht sohte ketikihong mehkot nan paliweren Adam me kak momour mwurin mehla.

Paipel mahsanih me ahnsou me aramas men mehla, sohte mehkot  kin momour mwurin mwo. Pwehki aramaso pwon mehla, e sohte kak wia mehkot ong aramas me momour. Paipel mahsanih:

• “Dahme komw pahn paieki sang ei pahn mehla? Kamwahu dah me komw pahn ketikihsang ei pahn mwerpeseng nan sousou? Ia duwe, me melahr akan kak kapinga komwi? Re kak lohkiseli sapwellimomwi kalahngan poatopoat?”​—Melkahka 30:9.

• “E sohte pahn kak wa kohla ni eh pahn mehla; e kepwe kan sohte pahn iang kohdihla nan sousou.”​—Melkahka 49:16, 17.

• “Ni ar kin mehla, re kin pwurehng wiepwella; oh ni ahnsowohte, ar koasoandi kan [“madamadau kan,” NW] kin imwisekla.”​—Melkahka 146:4.

Paipel pil kin kasalehda me mahn oh aramas kin ahneki imwila tehieu, iei mehla. (Eklesiasdes 3:19, 20) Irail me melahr akan sohte douluhl kin ese mehkot. (Eklesiasdes 9:5, 6, 10) Eri, ni ahnsou me aramas men mehla, sohte mehkot kin momour.

Ma ke wadekala Paipel pwon, ke sohte pahn diar me me melahr akan kin momour wasakis.  Padahk me dene mie wasa ehu me ngenen me melahr akan kin kohla ie sohte mi nan Paipel. Met padahk en Sehdan oh ienge ngehn saut akan. Siohwa kin ketin kalahdeki padahk likamw koaros.​—Lepin Padahk 6:16-19; Kaudiahl 12:9.

Pil ehu ahl me Sehdan kin pitih aramas iei sang eh doadoahngki sounkapwour eni kan. Sounkapwour eni men kak rong mehkot sang nan wasahn ngehn akan. Aramas tohto oh pil sounkapwour eni kan kin kamehlele me dahme re kin rong kin kohsang ngenen me melahr akan. Ahpw nin duwen Paipel kin kasalehda, met sohte kak wiawi.​—Eklesiasdes 9:5, 6, 10.

Eri, ihs me re kin rongorong? Ngehn saut akan! Ngehn saut akan kak tetehk aramas ni ahnsou me e momour, oh irail ese mwomwen aramaso oh mwomwen eh kin koasoi, dahme e wiahda, oh dahme e ese. Eri, e mengei ong irail en alasang aramas akan me melahr.​—1 Samuel 28:3-19.

Sehdan pil kin doadoahngki koasoi likamw kan pwehn wiahda likamw me pid me melahr akan. Soangen koasoi pwukat kin kalapw kahrehiong aramas akan en  soikala padahk mehlel en Paipel.​—2 Timoty 4:4.

Mie soangen koasoi tohto duwen aramas ar kin kilangada me melahr akan. Met kin kalapw wiawi wasakis me dohsang wasa me aramas melahro kin kousoan ie mahs. Ahpw idek rehmw: ‘Ia duwe, ma aramaso ahneki manaman en pwurodo sang mehla, e pahn kohla wasa ehu me dohsang eh peneinei de kompoakepah kan?’

Pil ehu, aramas me irail kilangadao kaidehn me melahro ahpw e sou kakete duwehte mwomwen me melahro? Karasepe, sounkalohk riemen me kalokalohk nanwehi kan tehkada me ohl laud men kin ideidawehn ira erein awa kei. Ni ara koasoiong ih, ira diarada me ohlo medewe me emen sounkalohk ko iei rie pwutak me melahr sounpar kei samwalahro. Ei, ohlo sapwung, ahpw e kahng nda me e sapwung. Medewehla soangen koasoi kan me ohl laudo pahn ndaiong kompoakepah kan oh pil mehn mpe kan mwuhr!

Ele ke kin ese duwen soahng kapwuriamwei kan me aramas kin kilangada, rong de ouramanehda.  Irail kan me kin alehdi soahng pwukat kin kalapw masakada. Marein, me kin kousoan nan Aperika, kin kalapw rong eh nohno kahlap me melahr eh liklikwerih ih ni pwong kan. Marein kin masepwehkada oh weriwer, oh tohn eh peneinei pwon kin pwourda. Met kin wiawi lao eh sahliella.

Eri, ia duwe, ma me melahr akan kin uhdahn momour, irail pahn kamasak irail kan me re kin poakohng? Uhdahn soh. Soahng suwed pwukat kin kohsang ngehn saut akan.

Ahpw ia duwen ma dahme aramas kin kilang de rong kin mwomwen kansenamwahu de wia kamwahu ong irail? Karasepe, Gbassay me mi nan ehu sahpw nan Aperika soumwahuda. Nan ouraman ehu, e kilangada eh pahpa me melahro. Eh pahpao ndaiong ih en kohla ni tuhke pwoat oh ale teho, doalohkihda pihl, oh nim. Pahpao ndaiong ih en dehr ndaiong meteikan mwohn eh wia met. E kapwaiada met oh e mwahula.

Pil emen lih nda me eh pwoudo pwarohng ih pwong ehu mwurin eh mehla. Liho nda me eh pwoudo uhdahn masamwahu oh e likouda mwahu.

 Soahng pwukat kin mwomwen mwahu oh sawas. Ahpw ia duwen, mpwukat kohsang rehn Koht? Soh. Siohwa iei “Koht me loalopwoat oh mehlel.” (Deuderonomi 32:4) E sohte mwahn pahn kupwurki pitih kitail. Ngehn saut kante me kin wia met.

Ahpw ia duwe, mie ngehn saut mwahu kan? Soh. Mendahki irail kin mwomwen wia sawas ekei pak, ahpw irail koaros suwed. Ni ahnsou me Tepilo koasoiong Ihp, e mwomwen mwahu. (Senesis 3:1) Ahpw ia imwilahn Ihp eh rong Tepilo oh wia dahme e ndaiong ih? E mehla.

Aramas suwed men kin kalapw mwahu ong irail kan me e men pitih de widinge. Mahsen en Koht mahsanih: “Sehdan pil kak kawekala pein ih, oh mwomwehda tohnleng en marain.”​—2 Korint 11:14.

Koht solahr kin ketin doadoahngki ouraman kan, kasansal kan de ngihl kan sang nanleng pwehn mahseniong aramas. E ketin kaweidki irail Paipel me kak kahrehiong emen en “koahiekla ni soangen wiewia mwahu koaros.”​—2 Timoty 3:17.

Ihme kahrehda Siohwa kin ketin padahkihong kitail en kanahieng duwen widing kan en Tepilo pwehki eh kin ketin poakohng kitail. E ketin mwahngih me ngehn saut akan kin wia imwintihti keper kei.