Mie ngehn akan. Mie ngehn mwahu oh ngehn suwed. Ia duwe, irail iei ngenen me melahr akan?

Soh. Ni ahnsou me aramas emen mehla, e sohte kin kohla wasakis nin duwen me aramas tohto kin medewe. Ia duwen atail ese met? Pwehki Paipel me mahsanih. Paipel iei pwuhk ehu me audaudki me mehlel me kohsang rehn Koht mehlelo me mwarenki Siohwa. Siohwa ketin kapikada aramas oh e ketin mwahngih dahme kin wiawi ni arail kin mehla.​—2 Timoty 3:16.

Paipel mahsanih me Koht ketin kapikada tepin ohl Adam “sang nanpwel.” (Senesis 2:7) Koht ketikihdiong ih nan Paradais, mwetuwel en Ihden. Ma Adam peikiongete sapwellimen Siohwa kosonnedo, e sohte pahn mehla. E pahn wie momourte pohn sampah rahnwet. Ahpw ni Adam eh nsenkihda kauwehla sapwellimen Koht kosonnedo, Koht mahsanihong ih: “Ke [pahn] pwurehng wiepwella, me ke wiawihda sang ie. Pwe ke wiawihda sang pwehl oh ke pahn pwurehng wiepwella.”​—Senesis 3:19.

Ia wehwehn met? Ia wasa Adam mi ie mwohn Siohwa eh ketin kapikada ih sang pwehl? E sohte mie. E sohte wia ngehn emen nanleng. Eri, ni ahnsou me Siohwa ketin mahsanih me Adam pahn “pwurehng wiepwella,” met wehwehki me Adam pahn mehla. E sohte kohla wasakis. Ni eh mehla, Adam pwurehng sohla mour oh sohla mie. Mehla wehwehki solahr mour.

 Ahpw ia duwen aramas teikan me melahr? Irail pil solahr mie? Paipel sapengki:

• “Aramas oh mahn kin kolahng wasatehkis; ira koaros wiawihda sang pwehl, oh ira koaros pahn pwurehng wiepwella.”​—Eklesiasdes 3:20.

• “Me melahr akan sohte ese mehkot.”​—Eklesiasdes 9:5.

• “Arail limpoak, kailok, oh ineng en nan kapehdirail, iang irail mehla.”​—Eklesiasdes 9:6.

• “E sohte pahn mie wiewia, de lamalam, de loalokong, de erpit, nan wasahn me melahr akan [sousou]—oh iei wasa me ke pahn kohla ie.”​—Eklesiasdes 9:10.

• “Ni ar kin mehla, re kin pwurehng wiepwella; oh ni ahnsowohte, ar koasoandi kan [“madamadau kan,” NW] kin imwisekla.”​—Melkahka 146:4.

 E kin apwal ong uhk en pwungki iren Paipel pwukat? Ma iei, eri medewehla duwen met: Nan peneinei tohto, ohlo kin doadoahk en mwohni pwehn apwalih eh peneinei. Ahnsou me ohlo mehla, eh peneinei kin lelohng apwal. Ekei ahnsou e kin sohte itar mwohni en pwainda mwenge ong eh pwoud oh nah seri kan. Mwein en ohlo eh imwintihti kan pahn kin wiakauwe irail. Eri idek rehmw: ‘Ma ohlo momourte nan sapwen ngehn akan, dahme kahrehda e sohte apwahpwalihkihte eh peneinei? Dahme kahrehda e sohte pere eh peneinei sang aramas suwed kan?’ Met pwehki iren Paipel pwukat mehlel. Ohlo solahr mour oh sohte kak wia mehkot.​—Melkahka 30:9.

Ia duwe, met wehwehki me me melahr akan sohte pahn pwurehng mourda? Soh, irail pahn pwurehng mourda. Kitail pahn koasoia duwen kaiasada mwuhr. Ahpw, me melahr akan sohte ese dahme ke kin wia. Irail sohte kak kilang, rong de lokaiahiong uhk. Ke sohte anahne masak irail. Irail sohte kak sewese iuk de pil kauweiukala.​—Eklesiasdes 9:5, 6, 10.