Siohwa pahn ketin kamwahwihala douluhl suwed koaros me Sehdan wiahda. Siohwa ketin idihadahr Sises pwehn wia Nanmwarki pohn sampah pwon. Sises ketin mahsanihong loallap men: “I ndaiong uhk ni mehlel rahnwet, Ke pahn iang ie mi nan Paradais.” Pahn sapwellime kaunda, sampah pahn wiahla paradais ehu.​—Daniel 7:13, 14; Luk 23:43, NW.

Siohwa ketin inoukihda mepwukat:

• REKEN MWENGE: “Sapwatail kapwaredahr audepe; Koht, atail Koht, ketin kupwuramwahwihkitailehr.” “Reken wahn pilawa en kin wiewiawihte nan wehiet; wahnsahpw en kin kipehdi dohl akan.”​—Melkahka 67:6; 72:16.

• SOLAHR MAHWEN: “Kumwail kohdo, oh kilang dahme KAUN-O ketin wiahda. Kumwail kilang soahng kapwuriamwei kan me e ketin wiahda nan sampah. E kin ketin katokehdi mahwen wasa koaros nin sampah.”​—Melkahka 46:8, 9.

• SOLAHR ARAMAS SUWED: “Aramas suwed kan pahn koakoahksang. Ahnsou keren aramas suwed kan pahn sohrala; ke  pahn rapahkin irail, ke ahpw sohte pahn diar irail.”​—Melkahka 37:9, 10.

• SOLAHR SOUMWAHU, PAHTOU, OH MEHLA: “Iei ahnsowo me maskun kan pahn pehdpeseng, oh me salengepon kan pahn rongada wasa. Me nehtuk kan pahn mwusikekda oh kahkahlek, oh me lohteng kan pahn ngisingiski ar peren.”​—Aiseia 35:5, 6.

  “Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”​—Kaudiahl 21:3, 4.

Siohwa sohte kin ketin likamw duwehte Sehdan oh nah ngehn saut akan. Soahng koaros me e ketin inoukihda pahn pweida. (Luk 1:36, 37) Siohwa ketin poakohng uhk oh kupwurki ken mi nan Paradais me e pahn ketin wiahda. Eri, tuhwong Sounkadehdehn Siohwa kan pwe ken sukuhlki padahk mehlel oh kaselel kan me dierek nan Mahsen en Koht. Ma ke pahn doadoahngki padahk mehlel nan omw mour, ke pahn saledeksang padahk likamw kan oh kihlenwo, oh ke pahn esehla dahme mehlel. Ehu rahn, ke pil pahn saledeksang dihp oh mehla. Sises ketin mahsanih: “Kumwail pahn dehdehki dahme mehlel, oh me mehlelo pahn kasaledengkumwailla.”​—Sohn 8:32.