IRELAUD 6
Stipen—“Direkihla Kupwuramwahu oh Roson en Koht”
Sukuhlsang en Stipen eh kalohk ni eimah mwohn Sanedrin
Poahsoankihda Wiewia 6:8–8:3
1-3. (a) Irair kamasepwehk dah me Stipen lelohng, ahpw ia duwen eh mwekidki met? (b) Peidek dah kan me kitail pahn tehkpene?
STIPEN uh mwohn mwoalen kopwungo. Nan pere kamasepwehk ehu, me ele karanih tehnpas sarawio nan Serusalem, ohl 71 mwohd kapil ih. Mwoalen kopwung wet, Sanedrin, pokonpene rahno pwehn kopwung Stipen. Sounkopwung ko ahneki manaman laud oh pali laud en irail sohte kin wauneki sapwellimen Sises tohnpadahk kan. Ni mehlel, ohl me ekerpene sounkopwung ko iei Samworo Lapalap Kaiapas, me pil wia kopwung ni ahnsou me Sanedrin koasoanehdi kamakamalahn Sises sounpwong kei samwalahro. Ia duwe, Stipen masepwehkada?
2 Ni ahnsowo, mie mehkot ni mesen Stipeno me kapwuriamwei. Sounkopwung ko kangkakil ih oh re kilangada me meseo “likamwete mesen tohnleng men.” (Wiewia 6:15) Tohnleng kan kin wa rohng kan sang Siohwa Koht, ihme kahrehda re kin meleilei oh sohte masepwehk. Stipen ahneki soangen pepehmohte. Sounkopwung ko me uhdahn kailongki ih pil kak kilang met. Dahme sewese ih en kolokolete eh meleilei?
3 Kristian kan rahnpwukat kak sukuhlki soahng tohto sang pasapengpen peidek wet. Kitail pil anahne ese dahme kahrehiong Stipen eh mihla nan irair uhdahn apwal wet. Ia duwen eh kin kadehdehda dahme e kamehlele ahnsou kan mwohn met? Oh ni soangen ahl dah kan me kitail kak kahlemengih ih?
“Irail Kamwoarongehda Aramas ako” (Wiewia 6:8-15)
4, 5. (a) Ia duwen Stipen eh kin wia sawas laud nan mwomwohdiso? (b) Ni ahl dah me Stipen “direkihla kupwuramwahu oh roson en Koht”?
4 Kitail sukuhlkiher me Stipen kin sawas laud nan mwomwohdisohn Kristian kapwo. Nan irelaud en mwoweo, kitail kilang me e iang wia kisehn ohl aktikitik isimeno me perenki ale pwukoa tohrohr ehu sang rehn wahnpoaron ko. Eh aktikitik kin uhdahn kapwuriamwei ni atail tehk duwen kisakis kaselel kan me Koht ketikihong ohl menet. Nan Wiewia 6:8, kitail wadek me Koht ketikihong ih manaman en wiahda “soahng kapwuriamwei kan oh kilel kan,” duwehte me ekei wahnpoaron ko wiahier. Ireo pil mahsanih me e “direkihla kupwuramwahu oh roson en Koht.” Ia wehwehn met?
5 E sansal me pwehki Stipen eh kin kadek, aramas akan kin perenki ih. E kin koasoi ni ahl ehu me kin kamehlelehiong aramas tohto me rongorong ih me e kin koasoi sang nan eh mohngiong oh me eh padahk kan me e padapadahngki pahn wia kamwahuparail. Ni aktikitik, e kin mweidohng sapwellimen Siohwa manaman en sewese ih, ihme kahrehda e direkihla kehl. E sohte mweidohng eh koahiek kan oh kisakis kan en kahrehiong ih en aklapalapala, ahpw e kin kihong Siohwa kaping koaros oh kasalehda me e kin nsenohki irail kan me e kin koasoiong. Kahrehda irail kan me kin uhwong ih kin perki ih!
6-8. (a) Soahng riau dah me sounpelian kan kin karaunehki Stipen, oh dahme kahrehda? (b) Dahme kahrehda en Stipen eh mehn kahlemeng kak sewese Kristian akan rahnpwukat?
6 Ohl ekei ahpw kodohng akamaiong Stipen, “re ahpw sohte kak pelianda erpit oh sapwellimen Koht manaman me kin kaweid eh koasoi.” a Re lingeringerkihda met, oh re “kaweidki ohl ekei ni rir” ren karaun likamwih tohnpadahk en Krais menet me sohte wiahda sapwung. Re pil “kamwoarongehda aramas ako,” ohl mah ko oh sounkawehwehn Kosonnedo ko, irail eri kohlahte parokedi Stipen oh walahng nan Sanedrino. (Wiewia 6:9-12) Sounpelian kan karaunehki Stipen soahng riau: E kin lahlahwe Koht oh Moses. Ni ahl dah kan?
7 Sounkaraun likamw ko nda me Stipen kin lahlahwe Koht ni eh koasoia soahng suwed kan duwen “wasa sarawi wet,” me iei tehnpas sarawio nan Serusalem. (Wiewia 6:13) Re pil karaunehki me e kin lahlahwe Moses ni eh ndahla soahng kan me uhwong Kosonned en Moseso oh wekidala tiahk kan me Moses kin padahkihong aramas ako. Karaun wet kin uhdahn kehlail pwe mehn Suhs ko ni ahnsowo kin uhdahn kesempwalki tehnpas sarawio, oaritik kan me mi nan Kosonned en Moseso, oh pil tiahk tohto kan me re kapatahiong nan Kosonnedo. Kahrehda karauno kin wehwehki me Stipen wia aramas keper men me warohng kamakamala!
8 E kansensuwed me pelien lamalam kan kin kalapw doadoahngki wiepe pwukat pwe ren kahpwalihala sapwellimen Koht ladu kan. Leledo rahnwet, soun uhwong kan en pelien lamalam akan kin ekei pak kamwakidada kaun en koperment kan pwe ren kaloke Sounkadehdehn Siohwa kan. Dahme kitail pahn wia ni ahnsou me aramas akan kin wiahda karaun likamw duwen kitail? Kitail kak sukuhlki soahng tohto sang Stipen.
Kadehdehda ni Eimah Duwen “Koht en Lingan” (Wiewia 7:1-53)
9, 10. Ia duwen ekei aramas ar kin kauwe en Stipen kapahreko me e wia mwohn Sanedrino, oh dahme kitail anahne tamataman?
9 Kitail koasoiapene ni tepin irelaud wet me Stipen mas meleilei, oh likamwete mesen tohnleng men ni ahnsou me e rongorong arail karakaraunlikamwih. Ahpw ahnsou wet, Kaiapas sohpeilahng ih oh nda: “Ia duwe, mepwukat mehlel?” (Wiewia 7:1) Eri en Stipen ahnsoun koasoi met, oh e koasoi ni eimah!
10 Ekei aramas kin kauwe en Stipen kapahreko oh nda me e nohn reirei oh sohte kadehdehda me e sohte wiahda sapwung. Ahpw ni mehlel, Stipen wiahda mehn kahlemeng kaselel ehu ong kitail duwen atail pahn kin wiahda ‘pasapeng’ me utung rongamwahwo. (1 Pit. 3:15) Tamataman me Stipen ale karaun me dene e kin lahlahwe Koht sang ni eh ndahla soahng suwed kan duwen tehnpas sarawio, oh me e kin lahlahwe Moses sang ni eh ndahla soahng kan me uhwong Kosonnedo. En Stipen pasapengo oaralapihada ahnsou siluh nan poadopoad en Israel, iangahki ire kei me e kasansalehda ni keneinei. Kitail pahn koasoiapene ehuehu soahng siluh pwukat.
11, 12. (a) Dahme kahrehda Stipen doadoahngki mehn kahlemeng en Eipraam? (b) Dahme kahrehda Stipen pil doadoahngki Sosep nan eh kapahreko?
11 Ni mwehin semen keinek kan. (Wiewia 7:1-16) Stipen tepki eh kapahrek ni eh koasoia duwen Eipraam, me mehn Suhs ko wauneki pwehki eh pwoson. Ni Stipen eh tepida koasoia duwen ire kesempwal wet me re kak pwungkipene, e kasansalehda me tepin ahnsou me Siohwa, “Koht en lingan,” ketin kasalehiong Eipraam pein Ih iei nan Mesopodamia. (Wiewia 7:2) Ni mehlel, ohl menet wia mehn liki men me kin kousoan nan Sapwen Inowo. Ni mwehin Eipraamo, sohte tehnpas sarawi ehu de pil Kosonned en Moses. Eri mie me kak nda me aramas emen anahne soahng pwukat pwehn lelepek ong Koht?
12 Sosep, me wia kadaudok en Eipraam, iei emen me irail kan me rongorong Stipen kin pil uhdahn wauneki. Ahpw Stipen katamankihong irail me pein rien Sosep pwutak kan, me wia semen keinek en Israel, kin kaloke ohl pwung menet oh netikihla ih nin duwen lidu men. Ahpw Koht ketin doadoahngki ih pwehn doarehla Israel sang lehk lapalapo. Stipen kak kilang soahng kan me duwehpene nanpwungen Sosep oh Sises Krais, ahpw e sohte kapahrekihirapene pwe e men irail kan me mi mwo ren rongorongete ih.
13. Ia duwen dahme Stipen koasoiahki duwen Moses eh kadehdehda me sounuhwong ko me sapwung? Oh oaralap dahieu me e kak kasalehda?
13 Ni mwehin Moseso. (Wiewia 7:17-43) Stipen koasoia soahng tohto duwen Moses, oh met kin wia elen loalokong pwehki tohn Sanedrino direki Sadusi kan me kin soikala pwuhk teikan koaros nan Paipel likin pwuhk kan me Moses ntingihedi. Pil tamataman me re karaunehki Stipen me e kin lahlahwe Moses. Stipen kadehdehda me karaun wet likamw ni eh kasalehda me e uhdahn wauneki Moses oh Kosonnedo. (Wiewia 7:38) E koasoia me irail kan me Moses nantihong kapitala kin soikala ih. Re soikala ih ni ahnsou me e sounpar 40. Oh daulih sounpar 40 mwuri, re pil kin uhwong eh kaweid pak tohto. b Eri Stipen ekisekis kasalehda oaralap kesempwalo: Sapwellimen Koht aramas akan kin pwurupwurehng soikala irail kan me Siohwa ketin idihada pwehn kaweid irail.
14. Ire kesempwal dahieu me Stipen kasalehda ni eh doadoahngki en Moses karasaraso?
14 Stipen katamankihong irail me rongorong ko me Moses kohpadahr me Koht pahn ketin idihada soukohp emen sang Israel me duwehte Moses. Ihs memenet oh ia duwen aramas akan ar pahn kilang ih? Stipen sohte sapengala peidek pwukat lao lel kaimwiseklahn eh koasoi. E kasalehda pil ehu ire kesempwal: Moses sukuhlkiher me pwehl sohte lipilipil kak sarawihla, duwehte me wiawihong pwehl ni tuhke lullulo, wasa me Siohwa ketin mahseniong. Eri, Siohwa ketin kupwurki aramas en kaudokiong Ih nan tehnpas ehute, me duwehte tehnpas sarawio nan Serusalem? Kitail pahn kilang.
15, 16. (a) Dahme kahrehda Stipen koasoia duwen impwal sarawio? (b) Dahme Stipen kasalehda ni eh koasoia duwen tehnpas me Solomon kauwadao?
15 Impwal sarawio oh tehnpas sarawio. (Wiewia 7:44-50) Stipen katamankihong mwoalen kopwungo me mwohn tehnpas sarawio nan Serusalem eh miehla, Koht ketin kehkehlikiong Moses en kauwada impwal sarawi ehu—impwal ehu ong kaudok me irail kak kamwakidseli. Eri, ma Moses kin kaudok wasao, mie me kak nda me impwal sarawio sohte kesempwal duwehte tehnpas sarawio?
16 Mwuhr ni ahnsou me Solomon kauwada tehnpas sarawio nan Serusalem, e kasalehda ire kesempwal ehu nan eh kapakapo. Stipen koasoiahki met: “Wasa Lapalahpie sohte kin ket nan tehnpas akan me wiawihkihda pehn aramas.” (Wiewia 7:48; 2 Kron. 6:18) Siohwa kak ketin doadoahngki tehnpas sarawi ehu pwehn kapwaiada kupwure, ahpw e kak ketin kapwaiada kupwure ma pil sohte tehnpas sarawio. Eri ia kahrepen sapwellime tohnkaudok kan ren medewe me kaudok mehlel anahne poahsoankihda ihmw ehu me aramas akan wiahda? Stipen kihda pasapeng kehlail ehu ong met, ni eh koasoia dahme ntingdi nan pwuhken Aiseia: “Siohwa ketin mahsanih, nanleng iei mwoalei oh sampah iei utupen aluweluwei kat. Soangen tehnpas dahieu me kumwail pahn kauwadahng ie? De ia ei wasahn kommoalen? Kaidehn nin limei kat me wiahda mepwukat koaros?”—Wiewia 7:49, 50; Ais. 66:1, 2.
17. Ia duwen en Stipen kapahreko eh (a) kasalehda madamadau sapwung en irail me rongorong ih oh (b) sapengala karaun likamw me kohwong ih ko?
17 Ni omw kousapahlih en Stipen kapahreko ong Sanedrin leledo met, ke sou pahn pwungki me e kasalehda mwahu me irail me karaunlikamwih ko ahneki madamadau sapwung? E kasalehda me Siohwa kin kak ketin kapwaiada kupwure ni soangsoangen ahl akan. E sohte kin ketin mweidohng irair kan de mehkot sohte lipilipil, iangahki tiahk kan en irehdi pweidahn kupwure. Irail me kin poakohng tehnpas sarawi kaselelo nan Serusalem oh tiahk kan me aramas kin kapatahiong nan Kosonned en Moseso sohte kin wehwehki ia kahrepen Siohwa eh ketikihda Kosonnedo oh ia kahrepen eh ketin koasoanehdi tehnpas sarawio en kokouda! Eri e mwomwen me Stipen kin idihdek peidek kesempwal wet: En peikiong Siohwa sou kin wia ahl me keieu mwahu en wauneki Kosonnedo oh tehnpas sarawio? En Stipen koasoi ko kin kadehdehda me e sohte wiahda sapwung pwehki e kin peikiong Siohwa ni uwen eh kak koaros.
18. Ni ahl dah kan me kitail en song alasang Stipen?
18 Dahme kitail kak sukuhlkihsang en Stipen eh kapahreko? E uhdahn esehla mwahu iren Paipel kan. Duwehte met, kitail pil anahne wia tohnsukuhl en Paipel mehlel kei ma kitail men “padahngki oh kawehwehda mahsen en me mehlelo ni pwung.” (2 Tim. 2:15) Kitail pil kak alasang mwomwen en Stipen eh kin koasoi ni kadek oh kamantik. Irail kan me rongorong ih uhdahn lemei! Ahpw, e nantihong uwen eh kak en koasokoasoia soahng kan me irail koaros kak pwungkipene pwehki soahng pwukat uhdahn kesempwal ong ohl pwukat. E pil kin koasoiong irail ni wahu oh ekerki ohl mah kan “semei ko.” (Wiewia 7:2) Kitail pil anahne koasoia duwen padahk mehlel kan en Mahsen en Koht ni “mpahi oh wahu laud.”—1 Pit. 3:15.
19. Ia duwen Stipen eh eimah kasalehiong Sanedrin sapwellimen Siohwa rongen kadeik?
19 Ahpw kitail en dehr mweidohng atail perki kansensuwedihala aramas akan en kauhkitaildihsang koasoia padahk mehlel en Mahsen en Koht. Kitail sohte pil kin wekidala sapwellimen Siohwa rongen kadeik pwehn kaperenda irail. Stipen wia mehn kahlemeng mwahu ong kitail. E uhdahn ese me mehn kadehde koaros me e kasalehiong Sanedrin sohte kahrehiong sounkopwung aklapalap pwukat ren wekila. Eri sang ni eh mwekidki sapwellimen Koht manaman, e kaimwisekala eh koasoio ni soh masak oh kasalehiong irail me irail duwehte samarail mehn mahs ako me kin soikala Sosep, Moses, oh pil soukohp kan koaros. (Wiewia 7:51-53) Ni mehlel sounkopwung en Sanedrin pwukat kemelahr Mesaiao me Moses oh soukohp kan koaros kohpadahr me pahn ketido. Eri re uhdahn sapeikiong Kosonned en Moseso!
“Maing Kaun Sises, Komw Ketin Ale Ei Mour” (Wiewia 7:54–8:3)
“Ni arail rongorong mepwukat, irail ahpw lingeringerda kowahlap nan kapehdirail oh ngihrail ko tepida tehtehrek ni arail kilenglahng ih.”—Wiewia 7:54
20, 21. Ia duwen Sanedrino ar mwekidki en Stipen koasoi ko, oh ia duwen Siohwa eh kin ketin kakehlakahda ih?
20 Sounkopwung ko lingeringerkihda ar sohte kak kahmahmkihla me dahme Stipen koasoia me mehlel. Irail sohte kak kolokol arail meleilei, ngihrail ko eri tepida tehtehrek ni arail kilikilenglahng Stipen. Ohl lelepek menet kak kilang me irail pahn kadeikada ih duwehte arail kadeikada eh Soumaso, Sises.
21 Stipen anahne eimah pwehn dadaurete pahn dahme pahn kereniong wiawihong ih, oh kitail kak uhdahn kamehlele me e alehdi kangoang sang kaudiahl me Siohwa ni kadek ketikihong ih. Stipen kilangada sapwellimen Koht lingan, oh e pil kilangada Sises me uh ni palimaun en Siohwa! Ni Stipen eh kawehwehda kaudiahlo, sounkopwung ko perehla salengarail kan. Dahme kahrehda? Mwoweo, Sises ketin padahkihong irail nan mwoalen kopwungohte me ih me Mesaiao oh me e pahn kereniong uh ni palimaun en Semeo. (Mark 14:62) Kaudiahl me Stipen kilangada kadehdehda me dahme Sises mahsaniho me mehlel. Ni mehlel, Sanedrino pangala oh kemehla Mesaiao! Irail koaros wiahkinteieu tangpenehng Stipen pwehn kostakaidi lao e mehla. c
22, 23. Ni ahl dah kan me en Stipen mehlao kin duwehte en eh Soumaso, oh ia duwen Kristian akan rahnpwukat ar kak likih Siohwa duwehte Stipen?
22 Duwehte eh Soumaso, ni Stipen eh pahn kamakamala, e meleilei, e likih Siohwa ni unsek oh e mahkohng irail ko me kemehla ih. E nda: “Maing Kaun Sises, komw ketin ale ei mour,” ele pwehki e kak kilikilangete kaudiahl en Nein-aramas ni eh ketiket rehn Siohwa. Kitail kak kamehlele me Stipen ese sapwellimen Sises mahsen kangoang wet: “Ngehi me kaiasada oh ngehi me mour.” (Sohn 11:25) Stipen eri kapakapohng Koht ni ngihl laud patohwan: “Maing Siohwa, komw dehr ketin kapwukoahkin irail dihp wet.” Mwurin eh nda met, e ahpw mehla.—Wiewia 7:59, 60.
23 Eri Stipen iei tepin sapwellimen Krais tohnpadahk me aramas kemehla pwehki eh pwoson. (Menlau kilang koakon “ Stipen Mehla Pwehki E Wia Sounkadehdehn Sises.”) Ahpw e kansensuwed pwe meteikan mwuri pil kamakamala. Leledo nan atail ahnsou, ekei pelien lamalam kan, pwihn en politik lemei kan oh sounpelian lemei teikan kin kemehla sapwellimen Siohwa ladu lelepek kan. Ahpw kitail kak likih Siohwa duwehte Stipen. Ahnsou wet, Sises ketin wia nanmwarki men oh Siohwa ketikihongehr manaman laud. Sohte mehkot kak kauhdi ih en kaiasada sapwellime ladu lelepek kan.—Sohn 5:28, 29.
24. Ia duwen Sohl eh utung en Stipen kamakamalao, oh soahng mwahu dah kan me wiawi pwehki kamakamalahn ohl lelepek menet?
24 Mwahnakapw men me ede Sohl kilikilang en Stipen eh kamakamala. E pwungki en Stipen kamakamala oh e pil sinsile en sounkostakai ko arail likou ko. Mwurinte mwo, e tepida kaloke sapwellimen Sises tohnpadahk kan ni lemei. Ahpw kamakamalahn Stipen pahn kahrehda soahng mwahu kan ong ahnsou reirei. Eh mehn kahlemeng kin kakehlaka Kristian teikan ren lelepekohngete Siohwa lao re mehla. Pil Sohl, me mwuhr aramas kin kalapw ekerki Pohl, uhdahn koluhkihla eh iang utung en Stipen kamakamalao. (Wiewia 22:20) E sewese Stipen en kamakamala, ahpw mwuhr e nda: “Ngehi sounlahlahwe, sounkalokolok oh aramas pohnmwahso men.” (1 Tim. 1:13) E sansal me Pohl sohte mwahn manokehla Stipen oh eh kapahrek kehlailo rahno. Ni mehlel, ekei en Pohl kapahrek oh nting kan kin poahsoankihda oaralap kan nan en Stipen kapahreko. (Wiewia 7:48; 17:24; Ipru 9:24) Kedekedeo, Pohl kin esehla mwahu en idawehn mehn kahlemeng en pwoson oh eimah me Stipen wia, ohl emen me “direkihla kupwuramwahu oh roson en Koht.” Ia duwe, kitail pil kak kahlemengih Stipen?
a Ekei sounpelian pwukat kin iang “Sinakoke en Aramas Saledekla.” Ele mie pak me mehn Rom ko salihiraildi ahpw mwuhr re saledekla. De mwein irail wia lidu kei me saledekla oh iangala lamalam en mehn Suhs. Ekei kohsang Silisia, wasa me Sohl en Tarsus pil kohsang ie. Ireo sohte kasalehda ma Sohl iang mehn Silisia pwukat me sohte kak kadehdehda me re pwung ni ar uhwong Stipen.
b Stipen koasoiahda ire kan me sohte kin dierek wasa teikan nan Paipel, duwehte sukuhl me Moses iang nan Isip, e sounpar depe ni eh tangasang Isip, oh ia uwen werei e koukousoan nan Midian.
c Pahn kosonned en mehn Rom, Sanedrin ele sohte ahneki pwung en koasoanehdi kamakamalahn aramas emen. (Sohn 18:31) Ahpw en Stipen kamakamalao mwomwen wiawi sang moromor en pwihn lingeringer ehu, a kaidehn sang ni kosonned en mwoalen kopwungo.
