Riat Sounkalohki Wehio kan:

Medewehla me kowe emen wahnpoaron ko me kesikesihnen pohn Nahna Olip. Sises eri ketin pwarado mwohmw. Mwohnte eh ketidahla nanleng, e mahsanih: “Ahpw kumwail pahn alehdi manaman ni ahnsou me sapwellimen Koht manaman pahn kohdiong pohmwail, oh kumwail pahn wia ei sounkadehde kan nan Serusalem, nan Sudia pwon oh Sameria, oh pil wasa me keieu doh nin sampah.” (Wiewia 1:8) Ia pahn omw pepehm?

Ele ke pahn pehm me dahme Sises mahsanihong uhk ken wia uhdahn apwal. Ele ke pahn medewe, ‘Ia duwen tohnpadahk malaulau kei duwehte kiht at kak kalohk lella “wasa me keieu doh nin sampah”?’ Mwein ke tamanda kehkehliko me Sises ketikihda nipwongo mwohn eh pwoula: “Ladu men sohte kin lapalapasang eh soumas. Ma irail kalokeieier, re pil pahn kalokei kumwail; ma irail kapwaiada ei mahsen, re pil pahn kapwaiada amwail padahk. Ahpw re pahn wia mepwukat koaros pwe ren uhwong kumwail pwehki edei, pwe re sohte ese Ih me ketin poaroneiehdo.” (Sohn 15:20, 21) Ni omw medemedewe duwen mahsen pwukat, ele ke pahn pein idek rehmw, ‘Ia duwen ei kak kalohk ni unsek mendahki ei pahn lelohng uhwong de kalokolok?’

Rahnwet, kitail kak ahneki soangen peidek kohte. Nin duwen Sounkadehdehn Siohwa kan, kitail pil kin anahne kalohk ni unsek pil lella “wasa me keieu doh nin sampah” ong “aramas en wehi koaros.” (Mad. 28:19, 20) Ia duwen atail kak kapwaiada doadoahk wet, ahpw mehlel ni atail pahn lelohng uhwong kan me kokohpdahr?

Pwuhken Wiewia kan en Wahnpoaron ko iei koasoi kaperen kan duwen Siohwa eh kin ketin sewese wahnpoaron ko oh Kristian teikan ni ahnsowo ren kapwaiada arail pwukoahn doadoahk en kalohk. Pwuhk me ke wadewadek met pahn seweseiuk en sukuhlki duwen soahng tohto me wiawihong Kristian ko oh en pehm uwen arail peren ni arail kilang doadoahk en kalohk eh kekeirda mwadang. Ke pahn pwuriamweikihla omw pahn diarada duwen soahng tohto me duwepenehte nanpwungen Kristian ko oh kitail rahnpwukat. Ke pahn kilang me mwomwen atail koasoansoandi pil duwepenehte, kaidehn ihte doadoahko me kitail kin wia. Ni omw medemedewe mepwukat, ke pahn kalaudehla omw kamehlele me Siohwa Koht kin ketin pousehlahte kaweid sapwellime pwihn nin sampah.

Se koapworopworki oh kapakapki me ni omw pahn kasawih pwuhken Wiewia, ke pahn kakehlakahda omw likih me Siohwa pahn ketin seweseiuk oh me e pahn ketin doadoahngki sapwellime manaman pwehn ketikihong uhk kehl en dadaurete. Ni omw pahn wia met, ke pahn alehdi kangoang en pousehlahte “kadehdehda ni unsek” duwen Wehin Koht oh sewese meteikan ren kekeid nan elen komour.—Wiewia 28:23; 1 Tim. 4:16.