IRELAUD 20
“Lolohkseli oh Inenen Kehlailla” Mendahki Uhwong
Mwomwen en Apolos oh Pohl ara sewese aramas tohto ren rong rongamwahwo
Poahsoankihda Wiewia 18:23–19:41
1, 2. (a) Soangen keper dah me Pohl oh ienge ko lelohng nan Episos? (b) Dahme kitail pahn koasoiapene nan irelaud wet?
ARAMAS akan nan Episos kin wie weriwer oh tangatangseli nanial akan. Pwihn en moromor ehu wiawidahr oh re uhwongada Pohl oh ienge ko. Aramas ako parokedi oh tepida wurahdeki iengen Pohl meh riemeno. Aramas tohto mi nan ahl tehlapo, wasa kisin sidohwa kan mi ie. Irail iangala pwihn en moromoro oh irail koaros tangalahng nan wasahn poudiahl laud ehu nan kahnimwo, me aramas 25,000 kin kak kilang mwadong loale. Pali moron en irail sohte ese dahme kahrehda moromoro, ahpw mwein re medewe me arail wasahn kaudoko oh arail koht lih Artemis me re kesempwalkio pahn sohla katepe. Irail eri tepida pwurupwurehng weriwerki: “Artemis en mehn Episos me lapalap!”—Wiewia 19:34.
2 Eri kitail kin pwurupwurehng kilang en Sehdan eh kin songosong doadoahngki pwihn en moromor lemei kan pwehn kauhdi kohpeseng en rongamwahu en Wehin Koht. Ni mehlel, Sehdan pil kin doadoahngki tiahk lemei oh soahng teikan pwehn song kauhdi doadoahk en kalohk. Nan irelaud wet, kitail pahn koasoiapene soangen wiepe kan me Sehdan kin doadoahngki pwehn kauhdi doadoahk en kalohk oh kauwehla miniminpene nanpwungen tepin Kristian ko. Kesempwal sang met, kitail pahn kilang me soahng koaros me Sehdan kin wia sohte kin pweida pwe, “mahsen en Siohwa kin lolohkseli oh inenen kehlailla.” (Wiewia 19:20) Dahme kahrehda Kristian ko kin kak pousehlahte arail doadoahk en kalohk? Pwehki soangen kahrepehkohte me kitail kin ahneki rahnpwukat. Kitail kin kak pousehlahte kalohk oh kolokol atail miniminpene pwehki sapwellimen Siohwa sawas. Ahpw duwehte tepin Kristian ko, kitail anahne doadoahk laud. Sang ni sawas en sapwellimen Siohwa manaman, kitail kak kakairada irair kan me pahn sewese kitail en kak pweida nan atail doadoahk en kalohk. Kitail pahn tehkpene mahs mehn kahlemeng en Apolos.
E “Samanihla Nting Sarawi kan” (Wiewia 18:24-28)
3, 4. Dahme Akwila oh Persila tehkada duwen Apolos, oh ia duwen ara sewese ih?
3 Ni Pohl eh kohkolahng Episos erein eh kesiluhwen seiloak en misineri, mehn Suhs men me ede Apolos leledo nan kahnimwo. Ih pwilidak en kahnimw ndand en Aleksandria, Isip. Mie soahng mwahu tohto me pid duwen Apolos. E kin uhdahn kadek kapahrek. Patehng eh kin kadek kapahrek, e “samanihla Nting Sarawi kan.” E kin “direkihla ngoang sang ni sapwellimen Koht manaman.” E pil kin ngoang oh eimah ni eh kin koasoiong mehn Suhs kan nan sinakokeo.—Wiewia 18:24, 25.
4 Akwila oh Persila rong en Apolos kapahreko. Kitail kak medewehla ia uwen ara peren ni ara rong eh kin “padahkihwei ni pwung soahng kan me pid duwen Sises.” Dahme e kin padahngki duwen Sises kin pwung. Ahpw mendahki eh padahk kan kin pwung, pwopwoud Kristian wet mwadangete tehkada me mie mehkot me uhdahn kesempwal me Apolos saikinte ese, pwe “e kin wehwehkihte papidais en Sohn.” Pwopwoud karakarahk wet me kin wiahda oh netiki ihmw likou kan sohte masak en Apolos eh kin kadek kapahrek oh iang sukuhl laud. Ahpw ira “kahrehda ih oh kawehwehiong ni pwung elen Koht.” (Wiewia 18:25, 26) Eri ia duwen Apolos eh mwekidki met? Apolos kasalehda me e ahneki irair me keieu kesempwal me Kristian emen kak ahneki, me iei aktikitik.
5, 6. Dahme sewese Apolos en kak koahiekla nin duwen sapwellimen Siohwa ladu, oh dahme kitail kak sukuhlkihsang en Apolos mehn kahlemeng?
5 Pwehki Apolos alehdi sawas sang rehn Akwila oh Persila, e koahiekla nin duwen sapwellimen Siohwa ladu men. Mwuhr e seiloakla Akaia, wasa me e “sewesehda laud” Kristian ko. E pil kin wia kadehde mwahu ong mehn Suhs akan nan sahpwo, me kin ngihtehtehki me Sises kaidehn Mesaiao me kokohpda. Luk koasoia: ‘E ngoangki kadehdehda douluhl . . . me mehn Suhs akan sapwung, oh kasalehiong irail sang nan Nting Sarawi kan me Sises iei Krais.’ (Wiewia 18:27, 28) Apolos kin wia sawas laud ong mwomwohdisou. Pwehki Apolos, aramas tohto sukuhlki duwen “mahsen en Siohwa.” Eri, dahme kitail kak sukuhlkihsang mehn kahlemeng en Apolos?
6 Aktikitik iei irair kaselel ehu me Kristian koaros anahne kakairada. Kitail koaros ahneki irair kaselel kan—sohte lipilipil ma soahng pwukat kin pidada soangen koahiek kei de loalokong. Ahpw kitail anahne aktikitik pwe Siohwa en kak ketin doadoahngki kitail. Pwe ma soh, atail koahiek kan kakete kahrehda kahpwal kan. Ma kitail sohte kanahieng, kitail kak aklapalapala pwehki atail koahiek kan. (1 Kor. 4:7; Seims 4:6) Ma kitail kin uhdahn aktikitik, kitail pahn wiahki meteikan lapalapasang kitail. (Pil. 2:3) Kitail sohte pahn lingeringer ni meteikan ar kapwung kitail oh kitail pahn mweidohng meteikan ren padahkih kitail. Kitail sohte mwahn pahn ngihtehtehki me pein atail madamadau kan me pwung ni atail esehda me atail madamadau sohte pahrekiong kaweid en sapwellimen Koht manaman. Ma kitail kolokolete atail aktikitik, Siohwa oh sapwellime Ohlo pahn ketin pousehlahte doadoahngki kitail.—Luk 1:51, 52.
7. Ia duwen Pohl oh Apolos ara wiahda mehn kahlemeng en aktikitik?
7 Aktikitik pil kin sewese kitail en soikala siai ong meteikan. Medewehla ia uwen Sehdan eh kin men kahrehda saminimin nanpwungen tepin Kristian ko. E pahn uhdahn perenda ma Apolos oh Pohl, me wia sounpadahk koahiek oh kehlail kei, ira en tepida peirinpene oh akamaiki ihs me keieu lapalap nan mwomwohdiso! E pahn mengeiong met en wiawi, pwe nan Korint, ekei Kristian tepida koasoia, “I kin idawehn Pohl,” ni ekei ar kin nda, “A ngehi Apolos.” Ia duwe, Pohl de Apolos men Kristian ko en uhpalih ira? Soh! Pohl kin aktikitik oh kapingahki Apolos eh doadoahk en kalohk. Pohl pil kin kawauwih sang ni eh kin kihong ih pil ekei doadoahk kan en wia. Oh Apolos kin idawehn en Pohl kaweid ko. (1 Kor. 1:10-12; 3:6, 9; Taitus 3:12, 13) Pohl oh Apolos kin aktikitik oh kin miniminpene doadoahk. Ira wia mehn kahlemeng me uhdahn mwahu ong kitail rahnpwukat!
“Songosong Pwe Ren Kamehlele Duwen Wehin Koht” (Wiewia 18:23; 19:1-10)
8. Ia duwen Pohl eh pwurala Episos, oh dahme kahrehda?
8 Pohl inoukihda me e pahn pwurala Episos, oh ih met me e wia. a (Wiewia 18:20, 21) Ahpw tehk ia duwen eh pwurala. Pohl tapiada eh seiloako nan Andiok, Siria. Eri eh seiloako pahn keren ma e kohla Seluhsia oh douda pohn sohp ehu pwehn sereklahng Episos. Ahpw, e seiloak “nan wasa kan me dohsang sehd.” Pwehn kak wia soangen seiloak wet me Wiewia 18:23 oh 19:1 kawehwehda, Pohl seiloangkihla mpen mwail kid! Dahme kahrehda Pohl pilada en wia soangen seiloak apwal wet? Pwehki eh mehn akadei iei en “kin kakehlaka tohnpadahk ko koaros.” (Wiewia 18:23) Eh kesiluhwen seiloak en misineri me duwehte eh seiloak riau teiko pahn uhdahn apwal, ahpw e medewe me met uhdahn pahn katapan. Sounapwalih me kin seiloak kan oh arail pwoud kan rahnpwukat pil kin kasalehda soangen madamadauohte. Kitail sou kin kalahnganki arail kin kasalehda soangen limpoak me kin tounmeteikihla pein irail?
9. Dahme kahrehda pwihn en tohnpadahko anahne pwurehng papidaisla? Oh mehn kasukuhl dah me kitail kak sukuhlkihsang irail?
9 Ni Pohl eh lella Episos, e diarada pwihn en tohnpadahk en Sohn Sounpapidais me tohtohki mpen meh ehk riemen. Irail pwukat papidaiskilahr soangen papidais ehu me solahr kin kadoadoahk. Patehng met, e mwomwen me re ekiste wehwehki de sohte wehwehki duwen sapwellimen Koht manaman. Pohl eri kawehwehda kesempwalpen papidais ni mwaren Sises, oh duwehte Apolos, irail kasalehda me irail aramas aktikitik kei oh kin men kalaudehla dahme re ese. Mwurin arail papidaisla ni mwaren Sises, irail alehdi sapwellimen Koht manaman oh kisakis en wia manaman akan. Eri e sansal me Siohwa kin ketin kapaiahda irail kan me kin perenki peikiong kaweid kapw kan me kohsang sapwellime pwihn.—Wiewia 19:1-7.
10. Dahme kahrehda Pohl kohkohlahsang nan sinakokeo oh kohla nan imwen sukuhlo, oh ia duwen atail kak alasang eh mehn kahlemeng nan atail kalohk?
10 Pil mie mehkot me mwadangete wiawi. Pohl kin ngoangki padahk nan sinakokeo erein sounpwong siluh. Mendahki e kin “songosong pwe ren kamehlele duwen Wehin Koht,” ekei kin keptakaila oh tepida uhwong ih. Ahpw e sohte kauwehla mwahl ahnsou rehn irail kan me “kin kauwe duwen Ahlo.” Pohl tepida padahk rahn koaros nan imwen sukuhl ehu. (Wiewia 19:8, 9) Irail akan me men pousehlahte kalaudehla arail sukuhlki duwen Wehin Koht anahne kohkohlahsang nan sinakokeo oh kohla nan imwen sukuhlo. Eri duwehte Pohl, ele kitail men kauhdi koasoio ni atail tehkada me tohnihmwo sohte men rong de e men akamaite. Ahpw miehte aramas tohto me ahneki mohngiong mehlel me anahne rong duwen rongamwahwo!
11, 12. (a) Ia duwen Pohl eh kasalehda me e kin doadoahk laud oh wiahda wekidekla kan? (b) Ia duwen Sounkadehdehn Siohwa kan ar kin doadoahk laud oh wiahda wekidekla kan ni arail kalohk?
11 Mwein Pohl kin padahk nan imwen sukuhlo rahn koaros sang mpen kuloak 11:00 nimenseng lel ni mpen kuloak 4:00 mwurin souwas. Ih soangen ahnsowo me kin keieu karakar oh aramas akan kin uhdihsang doadoahk pwe ren mwenge oh kommoal. Medewehla ma Pohl kin pousehlahte kalohk rahn koaros ni soangen kuloak pwukat erein sounpar riau, ele e pahn doadoahngkihla awa daulih 3,000. b Eri met pil wia ehu kahrepe me aramas akan me rong duwen mahsen en Siohwa ar wie tohtohla. Pohl kin doadoahk laud oh kin men wiahda wekidekla kan me anahn. Karasepe, e kin perenki wekidala ahnsou oh wasa me e pahn kalohk ie pwehn sewese aramas tohto. Ia imwilahn met? “Irail koaros me kin kousoan nan wehin Eisia, mehn Suhs oh mehn Krihs, rong mahsen en Kauno.” (Wiewia 19:10) Eri Pohl uhdahn kadehdehda ni unsek duwen Wehin Koht!
Kitail kin song en kalohk ong aramas akan ni ahnsou oh wasa sohte lipilipil
12 Sounkadehdehn Siohwa kan rahnpwukat pil kin doadoahk laud oh men wiahda wekidekla kan pwe ren tuhwong meteikan. Kitail kin song en kalohk ni ahnsou oh nan wasa sohte lipilipil me kitail kak diar aramas tohto. Kitail kin kalohk nanial akan, wasahn netinet kan, oh wasahn peidi en sidohsa kan. Mwein kitail pil kin kalohk ong aramas nan delepwohn oh pil sang ni atail ntingihada kisinlikou kan. Oh nan doadoahk en kalohk ihmw lel ihmw, kitail kin nantihong diar aramas akan ni ahnsou me irail kin mi ni imwarail ko.
“Kin Lolohkseli oh Inenen Kehlailla” Mendahki Ngehn Suwed kan (Wiewia 19:11-22)
13, 14. (a) Dahme Siohwa ketin sewese Pohl en wia? (b) Sapwung dah me nein Skepa pwutak ko wiahda, oh ia duwen irail kan me dene irail Kristian kei rahnpwukat pil kin wiahda soangen sapwungohte?
13 Kitail pil wadek nan pwuhk en Wiewia me Siohwa ketin sewese Pohl en wiahda “manaman kapwuriamwei kan.” Pil likou kan me e kin doadoahngki kin wisikla rehn aramas soumwahu kan oh irail kin mwahula. Ngehn suwed kan pil kin pekeussang rehn aramas akan me kin doadoahngki likou pwukat. c (Wiewia 19:11, 12) Pali laud en aramas akan kin pwuriamweikihla ni ngehn suwed kan ar kin pekeussang rehn aramas ako, ahpw kaidehn koaros kin perenki met.
14 Ekei “mehn Suhs akan me kin seiseiloakseli oh kin kausasang ngehn saut akan” kin song en alasang en Pohl manaman ako. Ekei mehn Suhs pwukat kin song en kausala ngehn suwed kan sang ni arail kin doadoahngki mwaren Sises oh Pohl. Luk karasaraski duwen nein Skepa pwutak isimeno—kisehn peneinei en samworo ehu—me kin song en wia met. Ngehn suwedo eri ndaiong irail: “I ese Sises oh I ese Pohl; ahpw ihs kumwail?” Ohl me ngehn suwed tiada poweo ahpw poarehng irail me likamw pwukat, oh lus pohrail likamw mahn lawalo men, me kahrehda irail en ohla oh kilisou tang. (Wiewia 19:13-16) Met kasalehiong koaros me Siohwa ketikihong manaman laud rehn Pohl, ahpw kaidehn rehn irail pwukat me iang pelien lamalam likamw. Aramas rar kei rahnpwukat kin ahneki madamadau sapwung me dene irail kak kaperenda Koht ma irail ndahlahte mwaren Sises de nda me irail Kristian kei. Ahpw Sises ketin kasalehda me irail akante me kin wia kupwuren Semeo me ahneki koapworopwor mehlel ong ahnsou kohkohdo.—Mad. 7:21-23.
15. Ia duwen atail kak alasang mehn Episos ko me pid duwen wunahni de soahng kan me pidada tiahk en wunahni?
15 Ni ahnsou me sansalehr me nein Skepa pwutak ko sohte arail manaman, met kamwakid aramas tohto ren wiahla Kristian kei, oh kesehla tiahk en wunahni. Mehn Episos tohto kin kamehlele akmanaman. Re kin kalapw doadoahngki mwir kan, oh mehn silasil kan, iangahki lokaiahn wunahni kan me kin kalapw ntingdi. Mehn Episos tohto eri wapene neirail pwuhk kan me pid akmanaman oh isikala mwohn wehipokon, mendahki soahng pwukat inenen pweilaud me lella tala nen kei nan atail ahnsou. d Luk koasoia: “Eri, mahsen en Siohwa kin lolohkseli oh inenen kehlailla.” (Wiewia 19:17-20) Met uhdahn kasalehda me Siohwa oh sapwellime tohnkaudok kan uhdahn powehdi pelien lamalam likamw oh tiahk en wunahni! Irail me lelepek pwukat wiahda mehn kahlemeng mwahu ong kitail rahnpwukat. Rahnpwukat, aramas akan me kin wia tiahk en wunahni kin kapilkitailpene. Ma kitail diarada me kitail naineki de ahneki mehkot me pidada wunahni, a kitail anahne alasang dahme mehn Episos ko wia—mwadangete kesehla! Kitail en kadohwaneweisang kitail soangen tiahk kasaut pwukat mendahki ma e apwal.
“Moromor Laud Ehu Ahpw Wiawi” (Wiewia 19:23-41)
“Kompoakepahi ko, kumwail ese me atail pai kin kohsang ni pesineset.”—Wiewia 19:25
16, 17. (a) Kawehwehda ia duwen Demihtrius eh kahrehiong aramas ako ren tepida moromor nan Episos. (b) Ia duwen mehn Episos kan ar kasalehda arail kin sipelehla poadidiong arail pelien lamalam?
16 Met kitail pahn wadek ia duwen Sehdan eh doadoahngki moromor lemei ehu. Luk koasoia: “Moromor laud ehu ahpw wiawi me pid Ahlo.” Met uhdahn keper. e (Wiewia 19:23) Sounsukmeteo me adaneki Demihtrius me tapiada kahpwal wet. Keieu, e katamankihong sounparada kepwe teikan me irail kin anahne netikihla dikedik kan pwe ren wiahda mwohni. E pousehla nda me rohng me Pohl kin kalohki pahn suwed ong pesines, pwehki Kristian akan sohte kin kaudokiong dikedik kan. Ih eri song kamwakid sounrongorong ko me kin pohlki arail kahnimwo oh wehi, me ma aramas rong Pohl, arail koht liho Artemis oh arail wasahn kaudok ndando “pahn sohla katepe.”—Wiewia 19:24-27.
17 Demihtrius uhdahn kamwakid aramas ako ren soikala en Pohl padahk kan. Sounsukmete ko eri lingeringerda oh tepida weriwerki: “Artemis en mehn Episos me lapalap!” Tohn kahnimwo eri pingida oh uhwongada Pohl duwehte me tepin irelaud wet kawehwehda. f Pohl uhdahn eimah oh men kohla nan wasahn poudiahlo pwehn koasoiong pokono, ahpw tohnpadahk ko ngihtehtehki en dehr kohla pwe e de lelohng nan keper. Ohl emen me ede Aleksander eri uhda mwohn pokono oh song en koasoi. Pwehki ih mehn Suhs men, mwein e men kawehwehda wekpeseng en mehn Suhs oh Kristian pwukat. Ahpw pokono sohte men rong. Ni arail esehda me ih mehn Suhs, irail sohte mweidohng ih en koasoi, ahpw re pwurupwurehng weriwerki erein awa riau nda: “Artemis en mehn Episos me lapalap!” Rahnpwukat, e pil kin mie soangen aramas akan me kin sipelehla arail poadidiong pelien lamalam. Oh irail uhdahn kak pil keptakai oh sohte men rong meteikan.—Wiewia 19:28-34.
18, 19. (a) Ia duwen sounnting en kahnimwo eh kameleileidi pwihn en moromoro nan Episos? (b) Ia duwen lapalap akan ar kin ekei pak pere sapwellimen Siohwa aramas akan, oh dahme kitail kak wia pwe met en kak wiawihong kitail?
18 Sounnting en kahnimwo eri kameleileidi pokono. Lapalap menet kin uhdahn toupahrek. Keieu, e padahkihong pwihn en moromoro me Kristian pwukat sohte keper ong arail wasahn kaudoko oh arail koht liho. Ih eri nda me Pohl oh ienge ko sohte kauwehla kosonned me pid wasahn kaudok en Artemis. E pil nda me ma aramas ako sohte mwahuki dahme Pohl oh ienge ko kin wiewia, irail anahne padahkihong kaun akan. Ahpw mwein dahme keieu kesempwal me e koasoia iei me e katamankihong pokono me nin duwen kosonned en Rom, arail pokonpeneo kin kauwehla kosonned. Ih eri kadarpeseng pokono. Pwehki en lapalapo eh koasoi konehng ko, pokono mwadangete meleileidi duwehte arail mwadangete lingeringerdao.—Wiewia 19:35-41.
19 Met kaidehn tepin de kaimwiseklahn ahnsou me lapalap toupahrek men kak pere sapwellimen Sises tohnpadahk kan. Ni mehlel, wahnpoaron Sohn kilangada nan kaudiahl ehu me erein imwin rahn akan, pwihn en aramas akan me ahneki madamadau toupahrek, de “sampah,” pahn kadallehla “pillap” me kin karasaraskihong en Sehdan uhwong kan ong sapwellimen Sises tohnpadahk kan. (Kaud. 12:15, 16) Kokohp wet pweidahier. Pak tohto, sounkopwung toupahrek kan kin pere en Sounkadehdehn Siohwa kan arail pwuhng en tuhpene kaudok oh kalohk ong meteikan. Ahpw mehlel, atail wiewia mwahu kan iei kahrepe keieu kesempwal me kahrehda sounkopwung kan ele pahn pere atail pwuhng kan. E mwomwen me en Pohl wiewia mwahu me kahrehda ekei lapalap en koperment kan nan Episos kin wauneki ih oh men pere ih. (Wiewia 19:31) Atail kin mehlel oh kasalehda wahu en kin kahrehiong irail kan me kitail pil kin tuhwong ren wauneki kitail. Soahng mwahu tohto kin wiawi pwehki atail wiewia mwahu kan.
20. (a) Ia omw pepehm ni omw medewehla duwen “mahsen en Siohwa kin lolohkseli oh inenen kehlailla” ni mwehin tepin Kristian ko oh rahnpwukat? (b) Dahme ke koasoanehdi teng en wia?
20 E sou kaperen en medewe ia duwen “mahsen en Siohwa kin lolohkseli oh inenen kehlailla” ni mwehin tepin Kristian ko? E pil kin kaperen en kilang ia duwen Siohwa eh kin ketin sewesehda soangen pweida pwukat nan atail ahnsou. Ke pahn men iang ahneki pwais kaselel wet, mehnda ma e pil tikitik, nan soangen pweida pwukat? Eri sukuhlkihsang mehn kahlemeng mwahu kan me kitail tehkpeneier. Pousehlahte kasalehda aktikitik, mwadang peikiong kaweid sang sapwellimen Siohwa pwihn, nantihong doadoahk laud, soikala tiahk en wunahni, oh wia uwen omw kak en kadehdehda me mehlelo sang ni omw kin mehlel oh kasalehda wahu.
a Menlau kilang koakon “ Episos Iei Kahnimw Keieu Kesempwal en Eisia.”
b Pohl pil ntingihedi 1 Korint ni eh mihmi Episos.
c Mwein Pohl kin pirehiong angkasi kei ni temweo pwehn kauhdi pwudowe en dehr kerediong nan pwoaren mese ko. En Pohl eh kin likawih eipron nan soangen ahnsou ko kakete wehwehki me e kin doadoahk laud en wiahda ihmw likou kan ni ahnsou kan me e sohte kin kalohk, ele ni sohrahn kan.—Wiewia 20:34, 35.
d Luk koasoia me uwen pweinen pwuhk pwukat lella silper mwohni 50,000. Ma dahme e koasoia wehwehki denari, eri tohndoadoahk men pahn kin anahne doadoahk rahn 50,000—sounpar 137—pwehn koadoahkihada uwen mwohni wet ma e kin doadoahk rahn isuh nan wihk koaros.
e Ekei kin nda me ni Pohl eh ndaiong mehn Korint ko, “se sohte medewe me se kak mour,” e koasoakoasoia irair wet me wiawi nan Episos. (2 Kor. 1:8) Ahpw mwein e koasoakoasoia ehu irair me keper sang met. Ni Pohl eh ntingihedi me e “peiong mahn lawalo kan nan Episos,” e kakete koasoakoasoia duwen peiong mahn lawalo kan nan wasahn mwadong kan de uhwong sang rehn aramas akan. (1 Kor. 15:32) Eri dahme Pohl koasoakoasoiao kakete uhdahn wiawi de e pil kakete wia lokaia karasaras.
f Pwihn en sounparada kepwe pwukat kak uhdahn kehlail. Karasepe, mpen sounpar epwiki mwuri, pwihn en sounwia pilawa kan pil wiahda moromor ehu nan Episos.
