1-3. (a) Dahme wiawi me kakete kahrehda liaktohrohr en pwarada nan tepin mwomwohdisohn Kristian? (b) Dahme kitail kak sukuhlkihsang koasoipen met nan pwuhken Wiewia?

 POHL oh Parnapas uhdahn peren ni ara pwurasang ara keieun seiloak en misineri oh pwuralahng kahnimw en Andiok nan Siria. Ira uhdahn peren pwehki Siohwa ketin “ritingadahng mehn liki kan wenihmw ong pwoson.” (Wiewia 14:26, 27) Oh re pil kilang met eh wiewiawi nan Andiok! Rongamwahwo wie lolohkseli oh mehn liki “tohtohie” wialahr kisehn mwomwohdisou.—Wiewia 11:20-26.

² Sohte pwand, rohng kapereno me pid kekeirda wet lella Sudia. Ahpw kaidehn koaros perenki rong met, oh met kahrehda akamai me pid sirkumsais eh laudla. Ia pahn mwomwen nanpwungen mehn Suhs kan me wia Kristian oh Kristian kan me kaidehn mehn Suhs? Oh Kristian kan me kaidehn mehn Suhs anahne kapwaiada Kosonned en Moses? Uwen Kristian ko ar sohte kak pwungkipene ire wet, kahrehda miniminpenehn mwomwohdisou mihla nan keper. Ia duwen ire wet eh pahn kapwungpwungla?

³ Ni atail tehkpene koasoipen met nan pwuhken Wiewia, kitail pahn sukuhlki mehn kasukuhl kesempwal tohto. Mepwukat pahn kak sewese kitail en mwekid ni loalokong ni ahnsou me irair kan me pahn kakete kahrehda liaktohrohr pahn pwarada nan atail ahnsou.

 4. Madamadau sapwung dah me ekei Kristian kan kin ahneki, oh peidek dahieu me pwarada?

⁴ Tohnpadahk Luk ntingihedi: “Ohl ekei ahpw kohdihdo [Andiok] sang Sudia oh tepida padahkih riatail kan, nda: ‘Ma kumwail sohte sirkumsaisla nin duwen kosonned en Moses, kumwail sohte kak komourla.’” (Wiewia 15:1) Kitail sehse ma “ohl . . . sang Sudia” pwukat wia Parisi kei mwohn ar wiahla Kristian kei. Ahpw e mwomwen me re kin ahneki madamadau en Parisi kan me kin kakos ni arail kapwaiada Kosonnedo. Oh mwein re pil nda me dene dahme re koasokoasoia kohsang rehn wahnpoaron oh sounapwalih kan nan Serusalem. (Wiewia 15:23, 24) Eri  dahme kahrehda mehn Suhs ko me wia Kristian kin medemedewehte me sirkumsais uhdahn anahn, pil mwurin Koht eh ketin kasalehiongehr Piter me E ketin kupwurki mehn liki kan ren iang kisehn mwomwohdisohn Kristian? a—Wiewia 10:24-29, 44-48.

5, 6. (a) Dahme kahrehda ekei mehn Suhs kan me wia Kristian kin kamehlele me sirkumsais kin anahnte? (b) Inou lap en sirkumsais wia kisehn inou lap me wiawihda rehn Eipraam? Menlau kawehwehda. (Menlau kilang nting tikitik kan me kileldi.)

⁵ Ele mie kahrepe tohto. Ehu iei Siohwa me ketin koasoanehdi me ohl akan en sirkumsaisla, oh met pahn wia kilelepen arail nanpwungmwahu tohrohr reh. E ketin mahsanihong Eipraam oh ohl akan koaros me kin kousoan reh ren sirkumsaisla, oh mwuhr E pil ketikihong mehn Israel kan kehkehlikohte. b (Lip. 12:2, 3) Pahn Kosonned en Moseso, pil lella mehn liki kan anahne sirkumsaisla mwohn ar kak iang kasarawi kan me duwehte kasarawien Pahsohpao. (Eks. 12:43, 44, 48, 49) Eri mehn Suhs kan kin wiahki ohl emen me sohte sirkumsaisla emen me samin oh sohte warohng kaudokiong Koht.—Ais. 52:1.

⁶ Eri mehn Suhs kan me wiahla Kristian kan anahne pwoson oh aktikitik pwe ren kak wekidala arail madamadau pwehn pahrekiong sapwellimen Siohwa madamadau. Inou lap kapwo wiliandiher inou lap en Kosonnedo, kahrehda emen me ipwidi nin duwen mehn Suhs men solahr kin wehwehki me e ipwidihte wiahier emen sapwellimen Koht aramas. Mehn Suhs tohto me wia Kristian kin koukousoante rehn mehn Suhs akan, kahrehda re anahne eimah laud pwehn wiahla sapwellimen Krais tohnpadahk kan oh iang kaudok rehn mehn liki kan me sohte sirkumsais.—Ser. 31:31-33; Luk 22:20.

 7. Padahk mehlel dah kan me “ohl . . . sang Sudia” ko sohte wehwehki mwahu?

⁷ Kitail ese me sapwellimen Koht koasoandi kan duwen dahme pwung oh sapwung sohte kin wekila pwehki inou lap kapwo kolokolete mouren kaweid en Kosonned en Moseso. (Mad. 22:36-40) Karasepe, me pid sirkumsais, Pohl mwuhr ntingihedi: “Ih mehn Suhs mehlelen me kin wia mehn Suhs loale, oh eh sirkumsais mi ni mohngiong sang ni sapwellimen Koht manaman, a kaidehn kosonned me ntingdier.” (Rom 2:29; Deud. 10:16) “Ohl . . . sang Sudia” ko sohte wehwehki mwahu padahk mehlel pwukat, ahpw re ngihtehtehki me Koht ketin kupwurkihte aramas akan ren sirkumsais. Re pahn men kapwungala arail madamadau?

 8. Dahme kahrehda ire me pid sirkumsais wisikla Serusalem rehn pwihn me kin apwalih mwomwohdiso pwon?

⁸ Luk doula koasoia: “Liaktohrohr ahpw pwarada, Pohl oh Parnapas eri akamai kehlail ong irail [ohl ako me “kohdihdo sang Sudia”]. Riatail ko eri koasoanehdi me Pohl oh Parnapas oh meteikan en kohdahla oh tuhkihong wahnpoaron ko oh sounapwalih kan nan Serusalem ire wet.” c (Wiewia 15:2) Ohl Kristian kan nan mwomwohdisohn Andiok akamaiki ma sirkumsais anahnte de soh. Irail koaros kamehlele me pein irail me pwung oh re sohte kak pwungkipene ire wet. Pwehn kolokolete popohl oh minimin, mwomwohdisou koasoanehdi ren idek ire wet rehn “wahnpoaron ko oh sounapwalih kan nan Serusalem,” pwihn me kin apwalih mwomwohdiso pwon. Dahme kitail kak sukuhlkihsang elder kan nan Andiok?

9, 10. Ia duwen brother kan nan Andiok iangahki Pohl oh Parnapas ar wia mehn kahlemeng mwahu ong kitail rahnpwukat?

⁹ Ehu mehn kasukuhl kesempwal me kitail sukuhlki iei me kitail anahne likih sapwellimen Koht pwihn. Medewehla met: Brother kan nan Andiok ese me pwihn me kin apwalih mwomwohdiso pwon wiawihkihda Kristian en mehn Suhs tohr. Ahpw re likih me pwihn wet pahn doadoahngki Nting Sarawi kan pwehn apwalihala ire me pid sirkumsais. Dahme kahrehda? Pwehki mwomwohdisou kamehlele me Siohwa pahn ketin doadoahngki sapwellime manaman oh Tapwin mwomwohdisohn Kristian, Sises Krais, pwehn apwalihala ireo. (Mad. 28:18, 20; Ep. 1:22, 23) Ni ahnsou me kahpwal laud kan kin pwarada rahnpwukat, kitail en alasang mehn kahlemeng mwahu en Kristian kan nan Andiok ni atail likih sapwellimen Siohwa pwihn oh Pwihn me Kin Apwalih Mwomwohdiso nan Sampah Pwon, oh pwihn wet wiawihkihda Kristian keidi kan.

¹⁰ Kitail pil sukuhlkiher ia uwen kesempwal en kin aktikitik oh kanengamah. Sapwellimen Koht manaman me idihada Pohl oh Parnapas ren kohla kalohk ong mehn liki kan, ahpw ira sohte medewe me met kihong ira pwuhng en kapwungala ireo me pid sirkumsais me pwarada nan Andiok. (Wiewia 13:2, 3) Pohl pil mwuhr ntingihedi: “I kohdahla [Serusalem] pwehki kaudiahl ehu”—me kasalehda me sapwellimen Koht manaman me kin kaukaweid ih. (Kal. 2:2) Elder kan rahnpwukat kin nantihong ahneki soangen madamadau en kanengamah oh aktikitikohte ni ahnsou me peidek kan me kak kauwehla popohl oh minimin nan mwomwohdiso kin pwarada. Re sohte kin akamaiki ire pwukat de ngihtehtehki me re pwung, ahpw re kin men ese sapwellimen Siohwa  madamadau, kahrehda re kin onopki Paipel oh ropada dahme ladu lelepek kaweidki.—Pil. 2:2, 3.

11, 12. Dahme kahrehda e kesempwal en kin awih Siohwa?

¹¹ Nan ekei irair, ele kitail kin anahne awih Siohwa en ketin sewese kitail en wehwehkihla mwahu duwen ire ehu. Karasepe, sounpar 13 mwurin Kornilius eh keidi, Siohwa ketin kasansalehiong koaros me irail kan me kaidehn mehn Suhs sohte anahne sirkumsaisla. Dahme kahrehda Siohwa ketin awihki erein ahnsou reirei pwehn kasansalehda met? Ele Koht kupwurki ketikihong mehn Suhs kan me wia Kristian ahnsou me itar pwe ren kak wekidala arail madamadau ong ni sapwellime madamadau. Pwe inou lap en sirkumsaiso me Siohwa ketin wiahiong Eipraam, ohl me irail kin poakepoake oh waunekio, kin kadoadoahk erein sounpar 1,900. Eri met uhdahn wia wekidekla laud ehu!—Sohn 16:12.

¹² E wia pwais kaselel ehu me Siohwa kin ketin ni kanengamah oh kadek padahkih oh sewese kitail en ahneki madamadau oh pepehm duwehte sapwellime! Soahng kan me e kin ketin padahkihong kitail kin ahnsou koaros wia kamwahupatail. (Ais. 48:17, 18; 64:8) Eri kitail en dehr kin pohnmwahso oh ngihtehtehki me dahme kitail medewe me pwung, oh kitail en dehr kin men rapahki sapwung kan ni ahnsou me sapwellime pwihn kin wiahda wekidekla kan oh kapwungala mwomwen atail wehwehki ekei iren Paipel kan. (Ekl. 7:8) Ma ke tepida ahneki soangen madamadau pwukat, ke sou kapakap oh doudouloale mouren kaweid konehng kan me dierek nan Wiewia irelaud 15? d

13. Ia duwen atail kak alasang sapwellimen Siohwa kanengamah nan atail kalohk?

¹³ Kitail kin anahne kanengamah ni atail kin onopki Paipel rehn aramas akan  me kin apwalki kesehla dahme re kin kamehlele de sohla wia tiahk en arail pelien lamalam kan. Nan soangen irair pwukat, kitail ele anahne kihong uwen ahnsou ieu pwe sapwellimen Koht manaman en kamwakid en tohnsukuhlo eh mohngiong. (1 Kor. 3:6, 7) Kitail pil anahne kapakapkin irail. Eri Siohwa pahn ketin kasansalehiong kitail ahl me keieu mwahu en sewese irail.—1 Sohn 5:14.

14, 15. Ia duwen mwomwohdisou nan Andiok ar kawauwih Pohl, Parnapas, oh irail kan me iang ira seiloak? Ia duwen Pohl oh ienge kan ar kangoange irail kan me re tuhwong ni arail seiseiloak?

¹⁴ Luk doula koasoia: “Mwurin tohnmwomwohdiso arail iangada ohl pwukat ekis aluhla, irail eri kohkohla Penisia oh Sameria oh koasoiahda ni oaritik duwen mehn liki kan ar wekiongehr Koht oh kahrehiong riatail ko koaros ren perenda laud.” (Wiewia 15:3) Mwomwohdisou kasalehda arail poakohng oh wauneki Pohl, Parnapas, oh irail kan me ieiang ira sang ni arail kin patpatehng irail erein ahnsou kis. Tohnmwomwohdiso ko men utung irail oh re men ren alehdi sapwellimen Koht kapai. Met wia pil ehu mehn kahlemeng mwahu me Kristian kan nan Andiok wiahda ong kitail! Ia duwe, ke kin kasalehda omw wauneki riomw Kristian kan, “ahpw mehlel irail [elder] kan me kin doadoahk laud ni arail kin koasoia oh padahngki mahsen en Koht”?—1 Tim. 5:17.  

¹⁵ Ni arail kohkohlahng Serusalem, Pohl oh ienge ko kangoange Kristian ko nan Penisia oh Sameria ni arail koasoiahda “ni oaritik” duwen tohto irail kan me kaidehn mehn Suhs ar wialahr Kristian kei. Ekei Kristian kan me rong duwen met ele iei mehn Suhs kan me wia Kristian, me tangala wasao mwurin Stipen eh kamakamala. Pil rahnpwukat, ni atail kin rong duwen Siohwa eh kin ketin kapaia doadoahk en kalohk, met kin kangoange kitail, ahpw mehlel ni atail kin mi pahn kahpwal kan. Ia duwe, ke kin paiekihda laud soangen rohng pwukat ni omw kin iang towehda mihting en Kristian kan oh mihting tohrohr kan, pil ni omw kin wadek duwen koasoipen mouren riatail kan nan neitail sawasepen Paipel kan me print de nan jw.org?

16. Dahme kasalehda me sirkumsais wiahlahr iren kahpwal laud ehu?

¹⁶ Mwurin ar seiloangkiher mpen mwail 350 kohla palieir, Kristian kan sang Andiok lella wasa me re seiseiloaklahngo. Luk ntingihedi: “Ni arail lella Serusalem, tohnmwomwohdiso oh wahnpoaron ko oh sounapwalih ko ahpw kasamwo irail ni kadek, irail eri koasoiahda soahng tohto me Koht ketin wiadahr ni eh ketin doadoahngki irail.” (Wiewia 15:4) Ahpw “ekei kisehn pwihnen Parisi ko me pwosonlahr ahpw uhda sang nan dewerail oh nda: ‘Irail anahne sirkumsaisla oh kitail anahne  kehkehlingkihong irail en kapwaiada Kosonned en Moses.’” (Wiewia 15:5) E sansal me ire me pid sirkumsais wialahr kahpwal laud ehu oh e anahne kapwungpwungla.  

17. Ihs me wia kisehn pwihno nan Serusalem me kin apwalih mwomwohdiso pwon, oh dahme kahrehda “sounapwalih ko” kin wia towe?

¹⁷ Lepin Padahk 13:10 mahsanih: “Me kin peki kaweid, ih me loalokong.” Ih met me wahnpoaron ko oh sounapwalih ko wia. Irail “pokonpene pwe irail en koasoiapene [ire me pid sirkumsais].” (Wiewia 15:6) “Wahnpoaron ko oh sounapwalih ko” kin wia wiliepen mwomwohdisohn Kristian pwon, pil duwehte dahme Pwihn me Kin Apwalih Mwomwohdiso nan Sampah Pwon kin wia rahnpwukat. Dahme kahrehda “sounapwalih ko” kin iang wahnpoaron ko doadoahk? Tamataman me wahnpoaron Seims kamakamalahr oh wahnpoaron Piter pil selidi erein ahnsou ieu. Ia duwe, met pil kak wiawihong wahnpoaron teiko? Ma iei, e pahn kesempwal en mie ohl Kristian keidi teikan me pahn kak sewese apwalih doadoahko.   

18, 19. Koasoi kehlail dah kan me Piter koasoia, oh dahme irail me rongorong ko anahne medemedewe?

¹⁸ Luk doula koasoia: “Mwurin arail kapwkapwungpene ahnsou reirei, Piter ahpw uhda oh ndaiong irail: ‘Ohl ako, riei ko, kumwail eseier me Koht ketin piliehda mahs sang nanpwungamwail pwe mehn liki kan en rong mahsen en rongamwahwo oh kamehlelehla. Oh Koht, me kin ketin mwahngih mohngiong, ketin kadehdehda me e ketin kupwurkin irail sang ni eh ketikihong irail sapwellime manaman, duwehte eh pil ketikihong kitail. Oh e sohte ketin wiahki me mie wekpeseng nanpwungen kitail oh irail, ahpw e ketin kamwakelehda arail mohngiong pwehki arail pwoson.’” (Wiewia 15:7-9) Nin duwen me ehu pwuhk kawehwehda, lepin lokaiahn Krihso me kawehwehdiong “kapwkapwungpene” nan iretikitik 7 kak wehwehki me elder kan kin idek peidek kan oh pil kin roporop ni keneinei duwen ireo. Eri  mendahki arail madamadau ko wekpeseng, ahpw re men koasoiapene duwen ireo oh ni saledek kasalehda arail madamadau oh pepehm kan duwen ireo.

¹⁹ En Piter eh koasoi ko katamankihong koaros me pein ih mihmi wasao ni ahnsou me tepin mehn liki kan me sohte sirkumsais—Kornilius oh tohnimweo—keikihdi sapwellimen Koht manaman nan pahr 36. Eri, ma Siohwa solahr ketin wiahki me mehn Suhs weksang irail me kaidehn mehn Suhs, mie aramas emen me ahneki manaman en nda me irail wekpeseng? En Piter koasoi kan pil kasalehda me aramas emen kin pwungla rehn Koht kaidehn pwehki e peikiong Kosonned en Moseso, ahpw pwehki e kasalehda eh pwoson Krais.—Kal. 2:16.

20. Ia duwen irail me kin uhki sirkumsais ar kin ‘kasongosonge Koht’?

²⁰ Poahsoankihda dahme Koht ketin mahsanih ni sansal oh ia duwen eh ketin doadoahngki sapwellime manaman, Piter nda: “Eri, dahme kahrehda kumwail kasongosongehki Koht ahnsou wet, ni amwail pwilikihdiong pohn tepinweren tohnpadahk kan, mehn wisik ehu me samatail mehn mahs ako oh pein kitail sohte kak wahda? Eri soh, kitail kin pwoson me kitail pahn komourkihla kadek sapan en Kaun Sises duwehte irail.” (Wiewia 15:10, 11) Irail me kin uhki sirkumsais kin uhdahn ‘kasongosonge Koht’ de re kin kasonge sapwellime kanengamah. Irail kin songosong en idingkihong mehn liki ko ren kapwaiada Kosonnedo. Ahpw pein irail sohte kak uhdahn kapwaiada, oh pwehki met, irail warohng mehla. (Kal. 3:10) Eri mehn Suhs ako anahne kalahnganki sapwellimen Koht kadek sapan me e ketin kasalehda pwehki Sises.

21. Dahme Parnapas oh Pohl koasoia me sewese brother ko ren wiahda pilipil mwahu?

²¹ E sansal me en Piter koasoi ko kahrehiong me rongorong ko ren madamadau laud, pwe “pokono pwon ahpw nennenla.” Mwuri Parnapas oh Pohl koasoiahda duwen “kilel tohto oh soahng kapwuriamwei tohto me Koht ketin wiadahr nanpwungen mehn liki kan sang ni eh ketin doadoahngki ira.” (Wiewia 15:12) Kahrehda met wahnpoaron ko oh sounapwalih ko kakehr wiahda pilipil mwahu me poahsoankihda sapwellimen Koht madamadau duwen ireo me pid sirkumsais.

22-24. (a) Ia duwen Pwihn me Kin Apwalih Mwomwohdiso nan Sampah Pwon rahnpwukat ar kin alasang pwihn me kin apwalih mwomwohdiso ni mwehin tepin Kristian ko? (b) Ia duwen elder kan koaros ar kak kasalehda ar men wia soahng kan ni ahl me Siohwa ketin kupwurki?

²² Pil rahnpwukat ni tohn Pwihn me Kin Apwalih Mwomwohdiso nan Sampah Pwon ar kin tuhpene, re kin doadoahngki sapwellimen Koht Mahsen pwehn kaweid irail oh kin kapakapki sapwellime manaman. (Mel. 119:105; Mad. 7:7-11) Pwe irail en wiahda koasoandi kan me kasalehda sapwellimen Koht madamadau, emenemen tohn pwihn wet kin  alehdi ire me pid mihtingo mwohn arail pahn tuhpene pwe en kak pein medemedewe oh kapakapki. (Lep. Pad. 15:28) Erein mihtingo, ohl keidi pwukat kin kasalehda arail madamadau ni saledek oh ni wahu. Re kin kalapw doadoahngki Paipel ni arail kin koasoipene.

²³ Elder kan nan mwomwohdiso anahne alasang mehn kahlemeng wet. Oh ma mwurin elder kan ar koasoiapenehr duwen kahpwal laud ehu, ahpw re saikinte ese ia duwen arail pahn apwalihala, ele irail kak ale kaweid sang ohpis en Sounkadehdehn Siohwa kan nan ehuehu sahpw, de sang wiliepe idihdida kan me duwehte sounapwalih me kin seiloak kan. Mwurin mwo, ohpiso pahn uhd ntinglahng Pwihn me Kin Apwalih Mwomwohdiso nan Sampah Pwon ma anahn.

²⁴ Ei, Siohwa kin ketin kapaia irail akan me kin perenki peikiong kaweid kan sang sapwellime pwihn oh mwomwohdiso. Oh e kin ketin kapaiahda irail akan me kin kasalehda aktikitik, lelepek oh kanengamah. Oh duwehte me kitail pahn tehkpene nan irelaud en mwurin met, ma kitail pahn kapwaiada mepwukat, Siohwa pahn ketin kapaiahkin kitail popohl, miniminpene oh kekeirda nan mwomwohdiso.