1-3. (a) Ia duwen sapwellimen Koht manaman eh kaweid Pohl oh ienge ko? (b) Soahng dah kan me kitail pahn koasoiapene?

 PWIHN en lih kei mweselsang kahnimw en Pilipai me mi nan Masedonia. Sohte pwand re lellahng ni piletik en Gangites. Nin duwen arail tiahk, re mwohndiong ni keilen pillapo oh kapakap ong Koht en Israel. Siohwa eri ketin mahmahsanih irail.—2 Kron. 16:9; Mel. 65:2.

² Erein ahnsowo, daulih mwail 500 ni palimesehn Pilipai, pwihn en ohl kei mweselsang kahnimw en Listra me mi palieir en Kalesia. Rahn kei mwuri, re lella pohn ahllap ehu me mehn Rom wiahkihda takai, me kolahng ni palikapi en wasa me diren aramas nan wehin Eisia. Ohl pwukat iei Pohl, Sailas oh Timoty, me men seiloakdihla pohn ahl pwoatet pwe ren kohla Episos oh kahnimw teikan me aramas kid kei anahne rong duwen Krais. Ahpw mwohn arail kak tapiada seiloako, sapwellimen Koht manaman kauhdi irail, ahpw Paipel sohte kawehwehda ia duwen. Irail sohte mweimwei en kalohk nan Eisia. Dahme kahrehda? Pwehki Sises ketin doadoahngki sapwellimen Koht manaman en kaweid Pohl oh ienge ko. E kupwurki irail en seiloakla lel Eisia Tikitik, (wasa me met adaneki Türkiye), kotehla Sehd en Aegean oh kohla ni keilen piletiko me adaneki Gangites.

³ Kitail kak sukuhlki soahng kesempwal kei ni atail medemedewe mwomwen Sises eh ketin kaweid Pohl oh ienge ko ni arail kohla Masedonia. Eri kitail pahn koasoiapene ekei soahng kan me wiawi erein en Pohl keriaun seiloak en misineri, me tepida mpen pahr 49.

4, 5. (a) Dahme wiawihong Pohl oh ienge ko wasa me karanih Pidinia? (b) Koasoandi dah me tohnpadahk ko wiahda, oh ia imwilahn met?

⁴ Pwehki irail sohte mweimwei en kalohk nan Eisia, Pohl oh ienge ko eri seiloakla paliepeng pwe ren kalohk nan kahnimw kan en Pidinia. Pwe ren lella wasao, ele re aluhki rahn kei pohn ahl sakanakan kan me mi nanpwungen sapwen Prikia oh Kalesia, wasa me aramas malaulau kei kin kousoan ie. Ahpw ni arail kerenlahng nan sapwen Pidinia, Sises ketin pwurehng doadoahngki sapwellimen Koht manaman pwehn  kauhdi irail. (Wiewia 16:6, 7) Met kahrehong ohl ako ren pingida. Irail ese dahme irail pahn kalohngki oh ia duwen arail pahn kalohk, ahpw irail sehse ia wasa me re pahn kalohk ie. Ni karasaras, irail wie leteletehr ni wenihmw me kolahng Eisa, ahpw re sohte pweida. Re pil leteletehr ni wenihmw me kolahng Pidinia—re pil pwurehng sohte pweida. Ahpw Pohl koasoanehdi teng en wie letelet lao e diarada wenihmw me pahn ritidahng irail. Ohl ako eri wiahda koasoandi ehu me mwomwen sohte pwung. Irail sohpeilahng palikapi oh aluhki mwail 350, oh kin dadaulih kahnimw kan lao re lel ni wap en Troas, wasa me re kak sereklahng Masedonia. (Wiewia 16:8) Ih wasao me Pohl letelet ie ni kesilipak, oh wenihmwo uhdahn ritidahng irail!

⁵ Emen sounnting en Rongamwahu ko Luk, me iangada Pohl oh ienge ko nan Troas, koasoiahda dahme wiawi: “Nipwongo, kaudiahl ehu ahpw kohieng Pohl—ohlen Masedonia men kesikesihnen oh peki reh, nda: ‘Kohdo Masedonia oh sewesei kiht.’ Ni ahnsowohte me e kilangada kaudiahlo, se song en pedolong Masedonia, pwe se esehda me Koht me ketin malipei kiht sen lohkiseli rongamwahu ong irail.” a (Wiewia 16:9, 10) Pohl eri eseier ia wasa re pahn kalohk ie. Ele Pohl uhdahn perenkihda me e doulahte songosong en kapwaiada eh mehn akadei en kalohk ong aramas akan nan wasa teikan! Ohl pahmeno eri mwadangete serekla Masedonia.

6, 7. (a) Dahme kitail kak sukuhlkihsang dahme wiawi erein en Pohl seiloak? (b) Ia duwen dahme wiawihong Pohl eh kak kangoange kitail?

⁶ Dahme kitail kak sukuhlkihsang dahme wiawio? Tehk duwen met: Ihte mwurin Pohl eh tepida kohla Eisia me sapwellimen Koht manaman kauhdi ih en kalohk wasao. Oh ihte mwurin Pohl eh karanih Pidinia me Sises ketin wia mehkot, oh pil ihte mwurin Pohl eh lella Troas me Sises ketin kaweid ih en kohla Masedonia. Nin duwen tapwin mwomwohdiso, ele Sises pahn ketin kaweid kitail ni soangen ahlohte rahnpwukat. (Kol. 1:18) Karasepe, ele kitail kin medemedewe erein ahnsou kis en papah nin duwen pioneer men de kosoula wasa ehu me anahn laud mie ong sounkalohki Wehio. Ahpw ihte mwurin atail wiadahr kahk kei pwehn kapwaiada atail mehn akadei me Sises pahn ketin kaweid kitail sang ni sapwellimen Koht manaman. Dahme kahrehda? Nna song medewehla karasaras wet: Sountangahki sidohsa men kak kaweid were sidohsao en wetla palimeing de palimaun, ahpw ihte ma sidohsao wie tangatang. Ni ahlohte, Sises kin ketin kaweid kitail en kalaudehla atail doadoahk en kalohk, ahpw ihte ma kitail tepidahr mwekid, me wehwehki, ma kitail wiadahr soahng kan me anahn pwehn kapwaiada met.

⁷ Ahpw dahme kitail pahn wia ma kitail sohte kak mwadang lel atail mehn akadei kan? Ia duwe, kitail pahn sohla nantihong en lel atail mehn akadei kan pwehki kitail kin medewe me sapwellimen Koht  manaman sohte kaukaweid kitail? Soh. Tamataman me Pohl sohte mwadangete lel eh mehn akadei kan. Ahpw e pousehlahte raparapahki lao e diarada wenihmw me ritidahng ih. Kitail kak kamehlele me ni atail kin raparapahki ‘wenihmw laud ehu ong doadoahk tohto en ritidahng kitail,’ Siohwa pahn pil ketin katingih atail nannanti.—1 Kor. 16:9.

 8. (a) Kawehwehda mwomwen kahnimw en Pilipai. (b) Soahng kaperen dah me wiawi pwehki Pohl eh kohla kalohk ni “wasahn kapakap ehu”?

⁸ Mwurin arail lella nan sapwen Masedonia, Pohl oh ienge ko eri seiloakla Pilipai—kahnimw ehu me aramas akan kin pohlki arail wia towe mehlel en Rom. Soahng tohto nan Pilipai kin duwehte Rom oh sounpei tohto me solahr doadoahk kin mi wasao. Likin ewen kelen kahnimwo, limwahn piletik ehu, misineri ko diarada wasa ehu me re leme wia “wasahn kapakap ehu.” b Ni rahnen Sapad, irail kohdihla wasao oh diarada lih kei me pokonpene wasao pwe ren kaudokiong Koht. Tohnpadahk ko eri mwohndi wasao oh koasoiong irail. Lih emen me ede Lidia “wie rongorong, oh Siohwa ketin ritingada douluhl eh mohngiong.” Lidia eri perenkihda dahme e sukuhlkihsang misineri ko me kahrehda ih oh tohnimweo papidaisla. Eri e kangoangehki Pohl oh ienge sounseiloak ko ren kohla oh mihmi ni imweo. c—Wiewia 16:13-15.

 9. Ia duwen me tohto rahnpwukat ar kin alasang en Pohl mehn kahlemeng? Oh ia duwen Siohwa eh ketin kapaiahda irail?

 ⁹ Medewehla ia uwen Pohl oh ienge ko arail peren ni ahnsou me Lidia papidaisla. Ia uwen Pohl eh perenkihda eh ale luhk en ‘kohla Masedonia’ oh me Siohwa ketin pilada en doadoahngki ih oh ienge ko pwehn sapengala kapakap en irail lih aktikitik ko! Rahnpwukat, Kristian tohto—ohl oh lih, me pwulopwul oh me mah, me pwopwoud oh me kiripw—pil kin kosoula wasa kan me mie anahn laud en sounkalohki Wehio. Mehlel me irail pil kin lelohng kahpwal akan, ahpw re pil kin peren ni arail diarada aramas akan me duwehte Lidia, me kin alehda padahk mehlel kan en Paipel. Ia duwe, ke kak wiahda wekidekla kan me pahn kahrehiong uhk en kak ‘kohla’ nan wasahn kalohk ehu me mie anahn laud? Siohwa pahn ketin kapaiaiukada ma ke wia met. Karasepe, medewehla mwahnakapw Kristian men me ede Aaron, me sounpar 20 samwa, me kosoula ehu wehi nan Central America pwehn kalaudehla eh kalohk. Duwehte me tohto me papah nan sahpw teikan, e nda: “En papah nan sahpw teikan kin sewese ie ien kekeirda oh karanihala Siohwa. Oh I kin uhdahn perenki doadoahk en kalohk wasaht! I kin onop Paipel rehn aramas welimen!”

10. Dahme ngehn suwed ko wia pwehn kahrehiong aramas ko ren uhwongada Pohl oh ienge ko?

¹⁰ Sehdan uhdahn lingeringer pwehki aramas akan kin sukusukuhlki rongamwahwo oh papidaisla nan wasa ehu me sohte me kin pelianda ih oh nah ngehn suwed akan mahso. Eri e sohte kapwuriamwei me ngehn suwed ko wia uwen arail kak pwehn kahrehiong aramas akan ren uhwong Pohl oh ienge ko! Mie lidu serepein men me ngehn suwed tiada powe, me kin wiahda mwohni ong eh kaun akan sang ni eh kin koasoia dahme pahn wiawi. Ehu rahn, e tuhwong Pohl oh ienge ko ni arail kohkohlahng ni wasahn kapakapo. E tepida idawehn irail weriwerki: “Ohl pwukat ladun Koht Wasa Lapalahpie, oh re kin lohkihong kumwail elen komour.” Mwein ngehn suwedo kahrehiong serepeino en werkihda koasoi pwukat pwe en mwomwen me dahme e koasoiao oh en Pohl padahk ko kohsang rehn Koht. Ni ahl wet, aramas akan en wasao solahr pahn tehk sapwellimen Sises tohnpadahk mehlel kan. Ahpw Pohl kameleileidi serepeino sang ni eh kausasang ngehn suwedo reh.—Wiewia 16:16-18.

11. Dahme wiawihong Pohl oh Sailas mwurin ngehn suwedo eh pedoisang rehn serepeino?

¹¹ Ni ahnsou me irail me naineki lidu serepeino esedahr me solahr elen arail ale mwohni, irail lingeringerda. Irail eri wurahdekihla Pohl  oh Sailas wasahn netineto, wasa me kaun akan—lapalap en koperment en Rom—kin wia kopwung ie. Irail me naineki ladu serepeino ese me sounkopwung ko kin kailongki mehn Suhs oh kin pohnmwahsohki arail wia mehn Rom, eri irail mwomwen nda: ‘Mehn Suhs pwukat uhdahn kapingadahr atail kahnimwet sang ni ara kin padapadahngki tiahk kan me sohte mweimweiong kitail en wia pwehki kitail mehn Rom.’ Aramas ako mwadangete mwekidkihda met. “Pokono [nan wasahn netineto] ahpw ehupene uhwongada ira [Pohl oh Sailas],” oh kaun ako eri ruwese pwe “ira en wowokihki lepin tuhke.” Mwurin mwo, Pohl oh Sailas pakahrlahng nan imwetengo. Silepen imwetengo kesehlong ohl me lipwalipwki ohla ko nan pere me keieu mi loale oh salihekihdi nehra ko lepin tuhke toutou kei. (Wiewia 16:19-24) Ni silepen imwetengo eh ritingedi wenihmwo, e uhdahn rotorot nan pereo me kahrehda Pohl oh Sailas sohte kak kilang emenemen. Ahpw, Siohwa ketin mahmahsanih ira.—Mel. 139:12.

12. (a) Dahme tohnpadahk en Krais kan kin medewehki kalokolok, oh dahme kahrehda? (b) Ia duwen Sehdan oh aramas akan me mi pahn eh manaman kin pousehlahte uhwong tohnpadahk en Krais kan rahnpwukat?

¹² Sounpar kei mwowe, Sises ketin padahkihong sapwellime tohnpadahk ko: “Irail . . . pahn kalokei kumwail.” (Sohn 15:20) Eri ni Pohl oh ienge ko ar kohla Masedonia, irail kasikasik me aramas ko pahn uhwong irail. Ni ahnsou me aramas ako uhwongada irail, irail wehwehki me Sehdan me lingeringer pahrail, ahpw kaidehn me Siohwa sohte ketin kupwurki irail. Rahnpwukat, irail akan me kin mi pahn manaman en Sehdan kin mwekid duwehte irail ko me pelianda Pohl nan Pilipai. Irail kan me kin uhwong kitail kin koasoia soahng likamw kan duwen kitail ni imwen sukuhl oh wasahn doadoahk kan, me kak kahrehiong meteikan ren uhwongada kitail. Nan ekei sahpw, kaunen pelien lamalam kan kin karaunlikamwih kitail nan mwoalen kopwung oh mwomwen re kin nda: ‘Sounkadehde pwukat uhdahn kapingadahr wasa sang ni arail kin padapadahngki tiahk kan me tohn sahpwet sohte kin pwungki.’ A nan ekei wasa, iengatail tohnkaudok kan kin kamakam oh lekdekiong nan imweteng kan. Ahpw mendahki mepwukat, Siohwa kin ketin mahmahsanih.—1 Pit. 3:12.

13. Dahme kahrehiong silepen imweteng en idek: “Dahme I anahne wia pwe I en komourla?”

¹³ Pohl oh Sailas anahne ahnsou pwe ira en kehlaildahsang kalokolok en rahno. Ahpw kolahng ni lukepen pwohngo ira kehlailda oh eri “wie kapakap oh kapikapingahki Koht koul.” Ni ahnsowohte, rerrer en sahpw ehu ahpw wiawi oh itikada imwetengo! Silepen imwetengo pirida oh kilangada me wenihmw ko ritpesengier, oh e pwunodkihda me  mwein me selidi ko tangpesengier. E ese me e pahn ale kalokolok pwehki met, kahrehda e “usada nah kedlahso oh kereniong pahn kemehla pein ih.” Ahpw Pohl likwerlahng nda: “Ke dehpa kemeiukala pwe kiht koaros mihmihte met!” Silepen imwetengo eri idek: “Maing ko, dahme I anahne wia pwe I en komourla?” Pohl oh Sailas sohte kak kamourala ih, pwe Sises kelehpw me kak. Eri ira sapeng nda: “Pwoson Kaun Sises oh ke pahn komourla.”—Wiewia 16:25-31.

14. (a) Sawas dah me Pohl oh Sailas kihong silepen imwetengo? (b) Ia duwen Siohwa eh ketin kapaiahda Pohl oh Sailas pwehki ni peren ira dadaurete?

¹⁴ Ia duwe, silepen imwetengo mehmehlelki eh peideko? Pohl kamehlele me e mehmehlel. Silepen imwetengo mehn liki men, kahrehda e sohte ese duwen Paipel. Mwohn eh kak wiahla Kristian men, e anahne sukuhlki oh kamehlele tepin padahk mehlel kan en Paipel. Kahrehda Pohl oh Sailas anahne ahnsou en padahkihong “mahsen en Siohwa.” Pwehki ara nannantihong padahkihong ohlo duwen Paipel, ira mwein manokehla ia uwen kamedek en kamakam me ira lelohngo. Ahpw silepen imwetengo tehkada ara ohla laud ko ni tihnsewera ko, ih eri kamwakelehda ara ohla ko. Ih oh tohnimwe ko ahpw “mwadangete papidaisla.” Koht uhdahn ketin kapaiahda laud Pohl oh Sailas pwehki ni peren ira dadaurete pahn kalokolok!—Wiewia 16:32-34.

15. (a) Ia duwen Sounkadehde tohto rahnpwukat ar kin alasang Pohl oh Sailas? (b) Dahme kahrehda kitail en pousehlahte pwurupwurala rehn irail kan me mi nan atail wasahn kalohk?

¹⁵ Duwehte Pohl oh Sailas, Sounkadehde tohto rahnpwukat kin kalohki rongamwahwo ni arail kin selkihdi ar pwoson, oh Siohwa kin ketin kapaiahda irail. Karasepe, nan sahpw ehu me atail doadoahk kin keinapwidi, mie pak me persent 40 en Sounkadehde kan me kin mi wasao kin esehla me mehlel duwen Siohwa ni arail kin wie sensel! (Ais. 54:17) Pil tehk me silepen imwetengo peki sawas mwurinte rerrer en sahpwo eh wiawi. Pil duwehte, ekei aramas rahnpwukat me sohte kin men rong duwen rongamwahu en Wehio, ele kin tepida rong mwurin kahpwal ehu eh wiawi nan arail mour. Ni atail kin kohla oh pwurala rehn irail kan me mi nan atail wasahn kalohk, kitail kin nantihong onopada pwehn padahkih irail ni ahnsou me irail men kitail en sewese irail.

16. Dahme wiawi mandahsang rahn me Pohl oh Sailas wowokihki lepin tuhke?

¹⁶ Mandahsang rahn me ira wowokihki lepin tuhke, kaun en kahnimwo ko ruwese pwe Pohl oh Sailas en kasaledekla. Ahpw Pohl nda: “Mendahki kiht mehn Rom, re wokih kiht mwohn pokono ni at sohte ale kopwung, oh keseikitlong nan imweteng. A met re pahn  kadarkitala ni rir? Sohte kak! Irail en pein kohdo oh kahreikitala.” Ni arail esehda me ohl riemeno wia towe mehlel en Rom kei, kaun ako “eri masepwehkada” pwehki re ese me irail kauwehla kosonned me pid en ohl ako pwuhng. d Irairo wekilahr. Irail wokih tohnpadahk ko mwohn wehipokon; a met kaun en kahnimw ko anahne pekimahk rehra mwohn wehipokon. Irail peki rehn Pohl oh Sailas ira en kohkohlahsang kahnimw en Pilipai. Tohnpadahk riemeno pwungki met, ahpw mwowe, ira wiahda ahnsou en kangoange tohnpadahk kapw ko. Oh mwurin mwo, ira ahpw mweselda oh kohkohlahsang kahnimwo.

17. Pwehki Pohl oh Sailas dadaurete pahn kalokolok, mehn kasukuhl kesempwal dah me tohnpadahk kapw ko sukuhlki?

¹⁷ Ma Pohl oh Sailas ndahte nin tapio me ira towe mehlel kei en Rom, ira kakete pitsang kamakam. (Wiewia 22:25, 26) Ahpw met pahn kakete kahrehiong tohnpadahk ko nan Pilipai ren medewe me Pohl oh Sailas isaneki ara pwuhng pwehn pitsang lokolongki rongamwahu duwen Krais. Met sohte pahn sewese tohnpadahk ko me sohte wia towe mehlel en Rom ren lelepekte, pwehki re sohte ahneki soangen pwuhngohte. Pwe kosonnedo sohte pahn pere irail sang kamakam. Kahrehda ni ara dadaur pahn kalokolok, Pohl oh Sailas wiahda mehn kahlemeng mwahu ong tohnpadahk kapw ko. Ira kasalehda me sapwellimen Krais tohnpadahk kan kak dadaurete ni arail lelohng kalokolok. Oh pil pwehki Pohl oh Sailas mwuhr nda me ira towe mehlel en Rom kei, kaun kan en kahnimwo anahne pohnese mwohn wehipokon me re kauwehla kosonned. Eri kaun kan en kahnimwo pahn kin anahne kanahieng oh peikiong kosonned, oh met pahn pere Kristian akan sang arail pahn lelohng soangen kalokoloko.

18. (a) Ia duwen sounapwalih kan en mwomwohdiso ar kin alasang en Pohl mehn kahlemeng? (b) Ia duwen atail kin “uhki oh alehdi pwuhng en kalohki rongamwahu” nan atail ahnsou?

¹⁸ Rahnpwukat, sounapwalih kan en mwomwohdisohn Kristian kin padahkih mwomwohdiso sang ni arail wiahda mehn kahlemeng. Dahme irail kin kasik iengarail tohnkaudok kan en wia, ihme re pahn pil kin wia. Duwehte Pohl, kitail kin medemedewe mwahu ia duwen oh iahd me kitail pahn kak doadoahngki atail pwuhng en pere kitail. Ma anahn, kitail kin kohla nan mwoalen kopwung en atail wasa, wehi de pil nan mwoalen kopwung en sampah pwon pwehn ale perepatail ni kosonned pwe kitail en kak pousehlahte kaudokiong Siohwa. Atail mehn akadei iei, kaidehn wekidala koperment kan, ahpw “uhki oh  alehdi pwuhng en kalohki rongamwahu sang rehn irail kan me ahneki manaman,” duwehte me Pohl ntingkilahng mwomwohdiso nan Pilipai mpen sounpar eisek mwurin eh selidi nan imweteng wasao. (Pil. 1:7) Ahpw sohte lipilipil dahme mwoalen kopwung pahn koasoanehdi, duwehte Pohl oh ienge ko, kitail kin koasoanehdi teng en pousehlahte “lohkiseli rongamwahu” wasa koaros me sapwellimen Koht manaman pahn kakete kahluwaikitaillahng ie.—Wiewia 16:10.