1-3. Kaudiahl dahieu me Piter kilangada oh dahme kahrehda e kesempwal en wehwehki met?

 NAN pahr 36, Piter mihmi nan kahnimw en Sopa. Wasao, e mwemweitla rehn Saimon oh mihmihki rahn kei. Saimon kin mihmi limwahn sehdo oh e kin wiahda oh netiki kilin mahn. Mehn Suhs kan kin sapwungki irail kan me kin wia soangen doadoahk wet oh pali laud en irail pahn kahng mihmi rehn ohl menet. a Piter weksang irail. Ahpw Siohwa ketin kupwurki sewese Piter en wehwehkihla ia uwen Eh sohte kin ketin lipilipilki aramas. Eri ni Piter eh kohdahla pohn ihmwo pwehn kapakap, Siohwa ketin padahkihong Piter mehn kasukuhl kesempwal ehu.

² Ni Piter eh wie kapakap, e kilangada kaudiahl ehu me pahn kapwunod ong mehn Suhs kan. Dahme e kilangada iei lepin likou me duwehte tehi ehu me kohkohdihdo sang nanleng oh mahn akan mihmi powe. Kosonnedo kin keinapwih mehn Suhs en tungoale mahn pwukat. Ngihl ehu sang nanleng pa mahsanihong Piter en kemehla oh tungoale mahn ko, ahpw e sapengki: “I saikinte kang mehkot me keinepwi oh samin nin duwen kosonned.” Kaidehn pak ehute ahpw pak siluh me ngihlo mahsanihong Piter: “Dehr nda me soahng kan me Koht ketin kamwakeledahr me samin.” (Wiewia 10:14-16) Piter ahpw pingida oh medemedewe ia wehwehn met, Siohwa eri ketin sewese en wehwehkihla.

³ Ia wehwehn kaudiahl me Piter kilangadao? E kesempwal kitail  en wehwehki met pwehki e pahn padahkihong kitail mehkot kesempwal duwen sapwellimen Siohwa madamadau ong aramas akan. Pwe kitail en kak kadehdehda ni unsek duwen Wehin Koht, kitail anahne sukuhlki en kin kilangwohng aramas akan ni ahl me Koht kin ketin wia. Pwehn diarada wehwehn dahme Piter kilangada rahno, kitail pahn tehkpene soahng kan me wiawi mwohn oh mwurin mwo.

4, 5. Ihs Kornilius oh dahme wiawi ni eh wie kapakap?

⁴ Piter sehse me mie ohl emen me kin mi mpen mwail 30 paliepeng nan Sesaria, me adaneki Kornilius me pil alehdi kaudiahl ehu sang rehn Koht rahnen mwoweo. Kornilius, me wia kaunen sounpei en Rom 100, kin wia “ohl poadidi men.” b E pil wia moangen peneinei mwahu men me kin “lemmwiki Koht iangahki tohn imwe koaros.” Kornilius sohte iangala lamalam en mehn Suhs; ih mehn liki men me sohte sirkumsaisla. Ahpw e kin poakehla mehn Suhs semwehmwe kan oh kin sewesehkin irail mwohni oh arail anahn teikan. Ohl menet “kin poaden kapakap ong Koht ni ngidingid.”—Wiewia 10:2.

⁵ Mpen kuloak 3 mwurin souwas ni eh wie kapakap, Kornilius rongada ngilen tohnleng men me ndaiong ih nan kaudiahl ehu: “Omw kapakap kan oh kisakis en kadek kalahngan kan leldalahr rehn Koht nin duwen mehn kataman ehu.” (Wiewia 10:4) Tohnlengo ndaiong Kornilius en kadarala meninkeder kei pwe ren rapahkihda wahnpoaron  Piter. Kornilius pahn wia tepin mehn liki me pahn wiahla Kristian men.

6, 7. (a) Kihda ehu karasaras me kasalehda me Koht kin ketin sapengala kapakap en irail kan me uhdahn men esehla ih. (b) Dahme kitail kin sukuhlkihsang soangen karasaras pwukat?

⁶ Ia duwe, Koht kin ketin sapengala kapakap kan en irail kan me mohngiong mehlel me kin raparapahki padahk mehlel duwen ih? Medewehla duwen met. Lih emen nan Albania ale ehu nah Kahn Iroir me mie oaralap ehu me pid duwen en apwalihada seri. c E ndaiong Sounkadehde me kohla reho: “Ke kamehlele me I wie kapakapki sawas sang rehn Koht ong ia duwen ei kak apwalihada nei serepein ko? Ah iet, E ketin kadaruhkedo! Ke uhdahn sair ei mohngiong! Ih met me I kin raparapahki!” Liho oh nah serepein ko eri tepida onopki Paipel oh mwuhr eh pwoudo pil iang irail onopki Paipel.

⁷ Dahme wiawihong irail, ihme kin kalapw wiawi nan wasa tohto, oh sohte kin depweilahte wiawi. Dahme met kin kasalehiong kitail? Keieu, Siohwa kin ketin sapengala kapakap kan en irail kan me mohngiong mehlel me kin raparapahki ih. (1 Nan. 8:41-43; Mel. 65:2) Keriau, tohnleng kan kin sawas nan atail doadoahk en kalohk.—Kaud. 14:6, 7.

8, 9. Dahme Koht ketin mahsanihong Piter en wia, oh ia duwen eh mwekidki met?

⁸ Ni Piter eh mihmihte pohn ihmwo, oh ‘wie pwonopwonki’ ia wehwehn kaudiahlo, ohl kei me Kornilius kadarodo reh ahpw leledo ni ihmwo. (Wiewia 10:17) Ma Piter soansuwedki kang mwenge kan me mehn Suhs kan sohte mweimwei en kang, ia duwe, e pahn men iangada ohl pwukat oh kohla nan imwen mehn liki men? Koht ketin doadoahngki sapwellime manaman pwehn kahrehiong Piter en ese dahme E ketin kupwurki en wia, ni eh rong mahsen wet: “Kilang! Ohl silimen men tuhwong uhk. Eri uhda oh doudihla oh iangirailda, oh ke dehpa peikasal pwe ngehi me kadariraildo.” (Wiewia 10:19, 20) Dahme Piter kilangada uhdahn sewese ih en onopadahng peikiong kaweid me kohsang sapwellimen Koht manaman.

⁹ Ni Piter eh esehda me tohnleng men me padahkihong Kornilius  en kadarodo ohl ko, e kasamwolong irail nan ihmwo oh “irail mihmi reh.” (Wiewia 10:23a) Wahnpoaron peik menet tepidahr wekidala eh madamadau ni eh wehwehkier dahme Koht ketin kupwurki. 

10. Ia duwen Siohwa eh kin ketin kaweid sapwellime aramas akan, oh peidek dah kan me kitail anahne pein idek rehtail?

¹⁰ Leledo rahnwet, Siohwa kin ketin pousehlahte sewese sapwellime aramas akan ren ekisekis wehwehkihla kupwure. (Lep. Pad. 4:18) Siohwa kin ketin doadoahngki sapwellime manaman pwehn kaweid “ladu lelepek oh loalokong.” (Mad. 24:45) Ekei pak, ele mie wekidekla kan me pid mwomwen atail wehwehki Mahsen en Koht, de me pid koasoandi kan nan atail pwihn. E pahn mwahu en kin pein idek rehtail: ‘I pahn men wekidala ei madamadau? I kin perenki idawehn kaweid sang sapwellimen Koht manaman?’

11, 12. Dahme Piter wia ni eh lella Sesaria, oh dahme e sukuhlkihdi?

¹¹ Mandahsang rahno me e kilangada kaudiahlo, Piter oh ohl duwemen—silimen me Kornilius kadarodo oh ‘riarail [mehn Suhs] meh wenemen’ sang Sopa—kohla Sesaria. (Wiewia 11:12) Pwehki Kornilius kasikasik en tuhwong Piter, e kapokonepene “kiseh ko oh kompoakepah likilik ko”—me koaros wia mehn liki kei. (Wiewia 10:24) Ni eh lella wasao, Piter wia mehkot me e sohte medewe e pahn kak wia: E pedolong nan imwen mehn liki men me sohte sirkumsaisla! Piter kawehwehda: “Kumwail ese mwahu ia uwen eh uhwong kosonned mehn Suhs men en werekiong de kohla rehn emen sang ehu keinek tohrohr, ahpw Koht ketin kasalehiong ie me I en dehr wiahki aramas emen me samin.” (Wiewia 10:28) Met Piter wehwehkihda me dahme Koht ketin kasalehiong ih pohn ihmwo sohte wiahte mehn kasukuhl ehu me pid soangen mwenge dah me e kak kang. Ahpw en “dehr wiahki aramas emen [pil mehn liki men] me samin.”

¹² Aramas ako koaros nan imwen Kornilius men rong dahme Piter pahn koasoia. Kornilius kawehwehda: “Kiht koaros patohier mwohn Koht pwe sen rong soahng koaros me Siohwa ketin mahsanihong uhk en padahkihong kiht.” (Wiewia 10:33) Nna song medewehla ia pahn omw pepehm ma ke rong soangen koasoi wet sang rehn emen me men sukuhlki duwen Siohwa! Piter eri tepikihda mahsen kangoang wet: “Met I uhdahn wehwehkidahr me  Koht sohte kin ketin lipilipilki aramas, ahpw nan wehi koaros, e kin ketin kupwurperenki aramas emen me kin lemmwiki ih oh wia dahme pwung.” (Wiewia 10:34, 35) Piter sukuhlkier me mwomwen Koht eh kin ketin kilengwohng aramas sohte kin poahsoankihda arail keinek, arail wehi de pil pohn kilirail. Piter eri kalohkihong irail duwen sapwellimen Sises doadoahk en kalohk, pwoula oh iasada.

13, 14. (a) Ni mehn liki kan ar wiahla Kristian kei nan pahr 36, dahme met kasalehda? (b) Dahme kahrehda kitail en dehr kadeik aramas akan sang dahme kitail kilang masliki?

¹³ Eri mie mehkot me wiawi me sohte kin wiawi sang mahs kohdo: ‘Ni Piter eh wie koasoakoasoite,’ sapwellimen Koht manaman ahpw kohdi pohn “mehn liki kan.” (Wiewia 10:44, 45) Ihte wasaht me Mahsen en Koht mahsanih me sapwellimen Koht manaman kohdi pohn aramas mwohn arail papidaisla. Piter pohnese me met wehwehki me Koht ketin wiahkilahr irail sapwellime aramas akan. Ih eri “ndaiong irail [pwihn en mehn liki ko] en papidaisla.” (Wiewia 10:48) Ni mehn liki pwukat ar wiahla Kristian kei nan pahr 36, met kasalehda me ahnsou me Koht kin ketin kasalehiong mehn Suhs kan kupwuramwahu imwiseklahr. (Dan. 9:24-27) Ahnsowo, Piter doadoahngki kesiluhwen oh kaimwiseklahn “kih kan en Wehin nanleng.” (Mad. 16:19) Kih wet kihong mehn liki kan me sohte sirkumsaisla ahnsou mwahu en wia Kristian kan me keikihdi sapwellimen Koht manaman.

¹⁴ Ni atail kin kalohki rongamwahwo rahnpwukat, kitail kin wehwehki me “Koht sohte kin ketin lipilipilki aramas.” (Rom 2:11) Kupwure iei me “soangen aramas koaros en komourla.” (1 Tim. 2:4)  Eri kitail en dehr kadeik aramas sang dahme kitail kilang masliki. Atail pwukoa iei en kadehdehda ni unsek duwen Wehin Koht, oh met kin pidada en kalohk ong aramas koaros sohte lipilipil irail mehn ia, sahpw me re kohsang ie, ia mwomwarail, de dahme re kin kamehlele.

15, 16. Dahme kahrehda ekei mehn Suhs kan me wiahla Kristian sapwungki dahme Piter wia? Ia duwen Piter eh kawehwehda kahrepen eh papidaisihala mehn liki ko?

¹⁵ Piter men kohla Serusalem pwehn ndaiong Kristian kan wasao duwen dahme wiawio. Ahpw mwohn eh kak wia met, Kristian kan nan Serusalem rongehr duwen en mehn liki kan ar “kamehlelehla mahsen en Koht.” Mwurinte Piter eh lella mwo, “irail kan me kin utung sirkumsais ahpw tepida kauwe ih.” Re sapwungki eh pedolong nan “imwen aramas akan me sohte sirkumsais oh iang irail mwenge.” (Wiewia 11:1-3) Re sohte sapwungki me mehn liki kan wiahla Kristian kei, ahpw tohnpadahk en mehn Suhs pwukat uhdahn kin ngihtehtehki me mehn liki ko anahne kapwaiada Kosonnedo—iangahki en sirkumsaisla—pwe ren kak kaudokiong Siohwa ni ahl me pwung. E sansal me e apwal ong ekei tohnpadahk en mehn Suhs pwukat ren mweisang Kosonned en Moseso.  

¹⁶ Ia duwen Piter eh kawehwehda kahrepen eh papidaisihala mehn liki ko? Nin duwen me Wiewia 11:4-16 mahsanih, e kasalehda mehn kadehde pahieu me met iei kupwuren Koht: (1) kaudiahlo me e alehdi sang rehn Koht (Iretikitik 4-10); (2) dahme sapwellimen Koht manaman padahkihong en wia (Iretikitik 11, 12); (3) tohnlengo tuhwong Kornilius (Iretikitik 13, 14); oh (4) sapwellimen Koht manaman eh kohdi pohn mehn liki ko. (Iretikitik 15, 16) Piter eri kaimwisengkihla eh kapahreko peidek manaman wet: “Eri ma Koht ketikihong irail [mehn liki kan me pwosonla] kisakisohte [sapwellimen Koht manaman] me e ketikihong kitail [mehn Suhs] me kin kamehlele Kauno, Sises Krais, a ihs ngehi pwe I en kak irehdi Koht?”—Wiewia 11:17.

17, 18. (a) Pilipil dahieu me mehn Suhs akan me wiahla Kristian anahne wiahda? (b) Dahme kahrehda e kakete apwal en kolokolete miniminpene nan mwomwohdiso, oh peidek dah kan me kitail en pein idek rehtail?

¹⁷ Mwurin mehn Suhs ko me wiahla Kristian ar rongehr dahme Piter ndao, re anahne wiahda pilipil ehu. Ia duwe, re pahn uhdihsang  kadeik mehn liki kan oh kasamwo irail nin duwen riarail Kristian kei? Ireo mahsanih: “Ni arail [wahnpoaron ko oh mehn Suhs teikan me wiahla Kristian] rong mepwukat, irail sohla pelian, irail eri kalinganahda Koht, nda: ‘Eri, Koht pil ketin kupwurki mehn liki kan ren koluhla pwe ren kak ale mour.’” (Wiewia 11:18) Arail men wekidala arail madamadau kahrehda mwomwohdisou kolokolete ar miniminpene.

¹⁸ Rahnpwukat e kakete apwal en kolokol minimin pwehki tohnkaudok mehlel kan kin “kohsang wehi koaros, keinek koaros, aramas koaros oh lokaia koaros.” (Kaud. 7:9) Kahrehda nan mwomwohdiso tohto, kitail kak kilang aramas akan me kohsang soangsoangen wasa kan oh tikida nan soangsoangen irair kan. Kitail kak pein idek rehtail: ‘I kihsangehr madamadau en lipilipilki aramas sang nan ei mohngiong? I koasoanedier teng en dehr mweidohng madamadau liaktohrohr en sampah wet—me duwehte uhki wehi de keinek, pohnmwahsohki tiahk en sahpw oh lipilipilki aramas—en kamwakid mwomwen ei kin kilangwohng riei Kristian kan?’ Tamanda dahme wiawihong Piter (Kepas) sounpar kei mwurin mehn liki kan ar tepin wiahla Kristian kei. Pwehki e dukula pahn en meteikan ar kin lipilipilki aramas, e “tohrohrasang” Kristian kan me kaidehn mehn Suhs, oh Pohl anahne kapwungala ih. (Kal. 2:11-14) Kitail en pousehlahte kalekeikitailsang lipilipilki aramas.

19. Mehn Suhs kan me wiahla Kristian nan Andiok tepida kalohk ong ihs, oh ia imwilahn met?

¹⁹ Eri ia duwe, sapwellimen Sises tohnpadahk kan tepida kalohk ong mehn liki kan me sohte sirkumsaisla? Tehk dahme wiawi mwuhr nan Andiok en Siria. d Mehn Suhs tohto kin mi nan kahnimw wet oh re kin ehuong mehn liki kan. Eri Andiok wia wasa mwahu ehu en kalohk ong mehn liki kan. Wasao me ekei tohnpadahk en mehn Suhs kan tepida kalohki rongamwahwo ong “aramas akan me kin lokaiahn Krihs.” (Wiewia 11:20) Re kin kalohk kaidehn ongete mehn Suhs kan me kin lokaiahn Krihs, ahpw pil ong mehn liki kan me sohte sirkumsaisla. Siohwa ketin kapaia arail doadoahk oh “aramas tohtohie pwosonlahr.”—Wiewia 11:21.

20, 21. Ia duwen Parnapas eh kasalehda aktikitik, oh ia duwen atail kak kahlemengih nan kalohk?

 ²⁰ Pwehn apwalih wasa ehu me aramas pahn men rong, mwomwohdisohn Serusalem kadarala Parnapas Andiok. Aramas tohto men rong, kahrehda e sohte pahn kak kelehpw apwalihala met. Sohl, me pahn wia doadoahk en wahnpoaron ong wehi kan koaros, sou pahn keieu mwahu en sewese ih? (Wiewia 9:15; Rom 1:5) Ia duwe, Parnapas pahn kahng luke Sohl en sewese ih pwe e perki Sohl de wia sounpadahk men me mwahusang ih? Soh. Parnapas aktikitik oh pohnese me e anahne sawas. E tiengla mwowe oh kohla Tarsus pwehn rapahki Sohl en iang ih kohla Andiok oh sewese ih. Ira mihmihki mwo erein sounpar ehu oh kin kangoange tohnpadahk kan nan mwomwohdisou wasao.—Wiewia 11:22-26a.

²¹ Ia duwen atail kak kasalehda aktikitik nan kalohk? Irair wet kin pidada en pohnese me mie soahng kan me kitail sohte kak wia. Atail kehl oh koahiek kan kin wekpeseng. Karasepe, ele ekei kin koahiek en kalohk ahnsou sohte lipilipil de kalohk ihmw lel ihmw, ahpw kin apwalki pwurala de tapiada onop en Paipel kan. Ma mie wasa kan nan wiepen kalohk pwukat me ke men kamwahwihala rehmw, ke sou peki sawas? Ni omw wia met, ke pahn kak kamwahwihala omw kin wia sounpadahk en Paipel men oh kalaudehla omw peren nan doadoahk en kalohk.—1 Kor. 9:26.

22, 23. Ia duwen Kristian kan nan Andiok ar kasalehda limpoak mehlel ong riarail Kristian kan? Ia duwen sapwellimen Koht aramas akan rahnpwukat ar kin alasang irail?

²² Andiok iei wasa me “tohnpadahk ko tepin adanekihla Kristian sang ni sapwellimen Koht kaweid.” (Wiewia 11:26b) Ahd wet me Koht ketikihong irail uhdahn konehng irail kan me men idawehn Krais. Ni mehn liki kan ar wiahla Kristian kei, irail oh mehn Suhs kan poakohngala emenemen? Medewehla dahme wiawi ni lehk lapalap ehu eh wiawi ni mpen pahr 46. e Mahso, lehk lapalap kan kin kahrehda lokolok laud ong me semwehmwe kan pwehki sohte neirail sent de kanarail mwenge me re kak nekidala. Erein lehk lapalap wet, pali laud en mehn Suhs kan me wiahla Kristian me kin mihmi Sudia kin semwehmwe oh anahne mwenge oh soahng teikan. Ni Kristian akan nan Andiok—iangahki Kristian akan me  kaidehn mehn Suhs—ar rong duwen met, re kadarala “sawas . . . ong riarail kan me koukousoan nan Sudia.” (Wiewia 11:29) Re uhdahn kasalehda limpoak mehlel ong riarail Kristian akan!

²³ Met pil kin wiawi rehn sapwellimen Koht aramas akan rahnpwukat. Ni atail kin esehda me riatail kan—me mi nan sahpw teikan de pil nan pein atail wasa—kin anahne sawas, kitail kin perenki sewese irail. Pwihn me Kin Apwalih Ohpis en Sounkadehdehn Siohwa kan kin mwadang idihada Pwihn en Sawas ong Ahnsoun Kahpwal (Disaster Relief Committee) ren sewese riatail kan me kin lelohng kahpwal kan me duwehte melimel, rerrer en sahpw de ilok laud ape. Ni atail kin sewese riatail kan me anahne sawas, kitail kin kasalehda me kitail uhdahn poakohng irail.—Sohn 13:34, 35; 1 Sohn 3:17.

24. Ia duwen atail kak kasalehda me kitail pil wehwehki dahme Siohwa ketin padahkihongehr Piter?

²⁴ Nin duwen Kristian mehlel kan, kitail ese me e kesempwal kitail en sukuhlki ire kan sang kaudiahlo me Piter kilangada pohn ihmwo nan Sopa. Kitail kin kaudokiong Koht emen me sohte kin ketin lipilipilki aramas. Kupwure iei me kitail en kadehdehda ni unsek duwen sapwellime Wehi. Met kin pidada en kalohk ong aramas koaros, sohte lipilipil ia wasa re kohsang ie de ia mwomwen aramas teikan ar kin kilangwohng irail. Eri kitail en koasoanehdi teng en kalohk ong aramas koaros me pahn men rong pwe ren kak ahneki ahnsou mwahu en sukuhlki duwen Siohwa.—Rom 10:11-13.